Chapter 14

[English text for this chapter is available]

| adhyāya || 14 ||
[Analyze grammar]

yudhiṣṭhira uvāca |
tatasta ṛṣayaḥ sarve mahābhāgāstapodhanāḥ |
gatāstu paramaṃ lokaṃ tataḥ kiṃ jātamadbhutam || 1 ||
[Analyze grammar]

śrīmārkaṇḍeya uvāca |
tatasteṣu prayāteṣu narmadātīravāsiṣu |
babhūva raudrasaṃhāraḥ sarvabhūtakṣayaṃkaraḥ || 2 ||
[Analyze grammar]

kailāsaśikharasthaṃ tu mahādevaṃ sanātanam |
brahmādyāḥ prāstuvan devamṛgyajuḥsāmabhiḥ śivam || 3 ||
[Analyze grammar]

saṃhara tvaṃ jagaddeva sadevāsuramānuṣam |
prāpto yugasahasrāntaḥ kālaḥ saṃharaṇakṣamaḥ || 4 ||
[Analyze grammar]

madrūpaṃ tu samāsthāya tvayā caitadvinirmitam |
vaiṣṇavīṃ mūrtimāsthāya tvayaitatparipālitam || 5 ||
[Analyze grammar]

ekā mūrtistridhā jātā brāhmī śaivī ca vaiṣṇavī |
sṛṣṭisaṃhārarakṣārthaṃ bhavedevaṃ maheśvara || 6 ||
[Analyze grammar]

etacchrutvā vacastathyaṃ viṣṇośca parameṣṭhinaḥ |
sagaṇaḥ saparīvāraḥ saha tābhyāṃ sahomayā || 7 ||
[Analyze grammar]

samalokānvibhidyemānbhagavānnīlalohitaḥ |
bhūrādyabrahmalokāntaṃ bhittvāṇḍaṃ parataḥ param || 8 ||
[Analyze grammar]

śaivaṃ padamajaṃ divyamāviśatsaha tairvibhuḥ |
na tatra vāyurnākāśaṃ nāgnistatra na bhūtalam || 9 ||
[Analyze grammar]

yatra saṃtiṣṭhe deva umayā saha śaṅkaraḥ |
na sūryo na grahāstatra na ṛkṣāṇi diśastathā || 10 ||
[Analyze grammar]

na lokapālā na sukhaṃ na ca duḥkhaṃ nṛpottama || 11 ||
[Analyze grammar]

brāhmaṃ padaṃ yatkavayo vadanti śaivaṃ padaṃ yatkavayo vadanti |
kṣetrajñamīśaṃ pravadanti cānye sāṃkhyāśca gāyanti kilādimokṣam || 12 ||
[Analyze grammar]

yadbrahma ādyaṃ pravadanti kecidyaṃ sarvamīśānamajaṃ purāṇam |
tamekarūpaṃ tamanekarūpamarūpamādyaṃ paramavyayākhyam || 13 ||
[Analyze grammar]

avarṇamapyarthamanāmagotraṃ turyaṃ padaṃ yatkavayo vadanti |
dhyānārthavijñānamayaṃ susūkṣmamātmasthamīśānavaraṃ vareṇyam || 14 ||
[Analyze grammar]

tatastrayaste bhagavantamīśaṃ samprāpya saṃkṣipya bhavantyarthakam |
pṛthaksvarūpaistu punasta eva jagatsamastaṃ paripālayanti || 15 ||
[Analyze grammar]

saṃhāraṃ sarvabhūtānāṃ rudratve kurute prabhuḥ |
viṣṇutve pālayellokānbrahmatve sṛṣṭikārakaḥ || 16 ||
[Analyze grammar]

prakṛtyā saha saṃyuktaḥ kālo bhūtvā maheśvaraḥ |
viśvarūpā mahābhāgā tasya pārśve vyavasthitā || 17 ||
[Analyze grammar]

yāmāhuḥ prakṛtiṃ tajjñāḥ padārthānāṃ vicakṣaṇāḥ |
puruṣatve prakṛtitve ca kāraṇaṃ parameśvaraḥ || 18 ||
[Analyze grammar]

tasmādetajjagatsarvaṃ carācaram |
tasminneva layaṃ yāti yugānte samupasthite || 19 ||
[Analyze grammar]

bhagaliṅgāṅkitaṃ sarvaṃ vyāptaṃ vai parameṣṭhinā |
bhagarūpo bhavedviṣṇurliṅgarūpo maheśvaraḥ || 20 ||
[Analyze grammar]

bhāti sarveṣu lokeṣu gīyate bhūrbhuvādiṣu |
praviṣṭaḥ sarvabhūteṣu tena viṣṇurbhagaḥ smṛtaḥ || 21 ||
[Analyze grammar]

viśanādviṣṇurityuktaḥ sarvadevamayo mahān |
bhāsanādgamanāccaiva bhagasaṃjñā prakīrtitā || 22 ||
[Analyze grammar]

brahmādistambaparyantaṃ yasminneti layaṃ jagat |
ekabhāvaṃ samāpannaṃ liṅgaṃ tasmādvidurbudhāḥ || 23 ||
[Analyze grammar]

mahādevastato devīmāha pārśve sthitāṃ tadā |
saṃharasva jagatsarvaṃ mā vilambasva śobhane || 24 ||
[Analyze grammar]

tyaja saumyamidaṃ rūpaṃ sitacandrāṃśunirmalam |
rudraṃ rūpaṃ samāsthāya saṃharasva carācaram || 25 ||
[Analyze grammar]

raudrairbhūtagaṇairghorairdevi tvaṃ parivāritā |
jīvalokamimaṃ sarvaṃ bhakṣayasvāmbujekṣaṇe || 26 ||
[Analyze grammar]

tato'haṃ mardayiṣyāmi plāvayiṣye tathā jagat |
kṛtvā caikārṇavaṃ bhūyaḥ sukhaṃ svapsye tvayā saha || 27 ||
[Analyze grammar]

śrīdevyuvāca |
nāhaṃ deva jagaccaitatsaṃharāmi mahādyute |
ambā bhūtvā viceṣṭaṃ na bhakṣayāmi bhṛśāturam || 28 ||
[Analyze grammar]

strīsvabhāvena kāruṇyaṃ karoti hṛdayaṃ mama |
kathaṃ vai nirdahiṣyāmi jagadetajjagatpate || 29 ||
[Analyze grammar]

tasmāttvaṃ svayamevedaṃ jagatsaṃhara śaṅkara |
athaivamuktastāṃ devīṃ dhūrjaṭirnīlalohitaḥ || 30 ||
[Analyze grammar]

kruddho nirbhartsayāmāsa huṅkāreṇa maheśvarīm |
oṃ huṃphaṭtvaṃ sa ityāha kopāviṣṭairathekṣaṇaiḥ || 31 ||
[Analyze grammar]

huṃkāritā viśālākṣī pīnorujaghanasthalā |
tatkṣaṇāccābhavadraudrā kālarātrīva bhārata || 32 ||
[Analyze grammar]

huṃkurvatī mahānādairnādayantī diśo daśa |
vyavardhata mahāraudrā vidyutsaudāminī yathā || 33 ||
[Analyze grammar]

vidyutsampātaduṣprekṣyā vidyutsaṃghātacañcalā |
vidyujjvālākulā raudrā vidyudagninibhekṣaṇā || 34 ||
[Analyze grammar]

muktakeśī viśālākṣī kṛśagrīvā kṛśodarī |
vyāghracarmāmbaradharā vyālayajñopavītinī || 35 ||
[Analyze grammar]

vṛścikairagnipuñjābhairgonasaiśca vibhūṣitā |
trailokyaṃ pūrayāmāsa vistāreṇocchrayeṇa ca || 36 ||
[Analyze grammar]

bhāsurāṅgā tu saṃvṛttā kṛṣṇasarpaikakuṇḍalā |
citradaṇḍodyatakarā vyāghracarmopasevitā || 37 ||
[Analyze grammar]

vyavardhata mahāraudrā jagatsaṃhārakāriṇī |
sṛkkiṇī lelihānā ca krūraphūtkārakāriṇī || 38 ||
[Analyze grammar]

vyāttāsyā ghurghurārāvā jagatsaṃkṣobhakāriṇī |
kheladbhūtānugā krūrā niḥśvāsocchvāsakāriṇī || 39 ||
[Analyze grammar]

jātāṭṭaahāsā durnāsā vahnikuṇḍasamekṣaṇā |
prodyatkilakilārāvā dadāha sakalaṃ jagat || 40 ||
[Analyze grammar]

dahyamānāḥ surāstatra patanti dharaṇītale |
patanti yakṣagandharvāḥ sakinnaramahoragāḥ || 41 ||
[Analyze grammar]

patanti bhūtasaṅghāśca hāhāhaihaivirāviṇaḥ |
bumbāpātaiḥ sanirghātairuditārtasvarairapi || 42 ||
[Analyze grammar]

vyāptamāsīttadā viśvaṃ trailokyaṃ sacarācaram |
saṃpatadbhiḥ patadbhiśca jvaladbhūtagaṇairmahī || 43 ||
[Analyze grammar]

jātaiścaṭacaṭāśabdaiḥ patadbhirgirisānubhiḥ |
tatra raudrotsave jātā rudrānandavivardhinī || 44 ||
[Analyze grammar]

vihiṃsamānā bhūtāni carvamāṇācarānapi |
tattadgandhamupādāya śivārāvavirāviṇī || 45 ||
[Analyze grammar]

galacchoṇitadhārābhimukhā digdhakalevarā |
caṇḍaśīlābhavaccaṇḍī jagatsaṃhārakarmaṇi || 46 ||
[Analyze grammar]

ye'pi prāptā maharlokaṃ bhṛgvādyāśca maharṣayaḥ |
te'pi naśyanti śataśo brahmakṣattraviśādayaḥ || 47 ||
[Analyze grammar]

devāsurā bhayatrastāḥ sayakṣoragarākṣasāḥ |
viśanti ke'pi pātālaṃ līyante ca guhādiṣu || 48 ||
[Analyze grammar]

sā ca devī diśaḥ sarvā vyāpya mṛtyuriva sthitā |
yugakṣayakare kāle devena viniyojitā || 49 ||
[Analyze grammar]

ekāpi navadhā jātā daśadhā daśadhā tathā |
catuḥṣaṣṭisvarūpā ca śatarūpāṭṭahāsinī || 50 ||
[Analyze grammar]

jajñe sahasrarūpā ca lakṣakoṭitanuḥ śivā |
nānārūpāyudhākārā nānāvādanacāriṇī || 51 ||
[Analyze grammar]

evaṃrūpā'bhavaddevī śivasyānujñayā nṛpa |
dikṣu sarvāsu gagane vikaṭāyudhaśīlinaḥ || 52 ||
[Analyze grammar]

rundhanto naśyamānāṃstāngaṇā māheśvarāḥ sthitāḥ |
vicaranti tayā sārddhaṃ śūlapaṭṭiśapāṇayaḥ || 53 ||
[Analyze grammar]

tato mātṛgaṇāḥ kecidvināyakagaṇaiḥ saha |
vyavardhanta mahāraudrā jagatsaṃhārakāriṇaḥ || 54 ||
[Analyze grammar]

tatastasyā vyavardhanta daṃṣṭrāḥ kundendusannibhāḥ |
yojanānāṃ sahasrāṇi ayutānyarbudāni ca || 55 ||
[Analyze grammar]

daṃṣṭrāvaliḥ kararuhāḥ krūrāstīkṣṇāśca karkaśāḥ |
viyaddiśo likhantyeva saptadvīpāṃ vasuṃdharām || 56 ||
[Analyze grammar]

tasyā daṃṣṭrābhisampātaiścūrṇitā vanaparvatāḥ |
śilāsaṃcayasaṃghātā viśīryate sahasraśaḥ || 57 ||
[Analyze grammar]

himavānhemakūṭaśca niṣadho gandhamādanaḥ |
mālyavāṃścaiva nīlaśca śvetaścaiva mahāgiriḥ || 58 ||
[Analyze grammar]

merumadhyamilāpīṭhaṃ saptadvīpaṃ ca sārṇavam |
lokālokena sahitaṃ prākampata nṛpottama || 59 ||
[Analyze grammar]

daṃṣṭrāśanivispṛṣṭāśca viśīryante mahādrumāḥ |
utpātaiśca diśo vyāptā ghorarūpaiḥ samantataḥ || 60 ||
[Analyze grammar]

tārā grahagaṇāḥ sarve ye ca vaimānikā gaṇāḥ |
śivāsahasrairākīrṇā mahāmātṛgaṇaistathā || 61 ||
[Analyze grammar]

sā cacāra jagatkṛtsnaṃ yugānte samupasthite |
bhramadbhiśca bruvadbhiśca krośadbhiśca samantataḥ || 62 ||
[Analyze grammar]

pramathadbhirjvaladbhiśca raudrairvyāptā diśo daśa |
vistīrṇaṃ śailasaṅghātaṃ vighūrṇitagiridrumam || 63 ||
[Analyze grammar]

prabhinnagopuradvāraṃ keśaśuṣkāsthisaṃkulam |
pradagdhagrāmanagaraṃ bhasmapuṃjābhisaṃvṛtam || 64 ||
[Analyze grammar]

citādhūmākulaṃ sarvaṃ trailokyaṃ sacarācaram |
hāhākārākulaṃ sarvamahahasvananisvanam || 65 ||
[Analyze grammar]

jagadetadabhūtsarvamaśaraṇyaṃ nirāśrayam || 66 ||
[Analyze grammar]