Chapter 82

[English text for this chapter is available]

mahādeva uvāca |
kāyāvarohaṇasyāpi utpattiṃ śṛṇu pārvati |
yasyāḥ śravaṇamātreṇa na naraḥ kāyavānbhavet || 1 ||
[Analyze grammar]

brahmaṇaḥ sṛṣṭikāmasya manovarvaisvateṃ'tare |
dakṣastva jāyatāṃguṣṭhāddakṣiṇātsa prajāpatiḥ || 2 ||
[Analyze grammar]

vāmādajāyatāṃguṣṭhādbhāryā tasya mahātmanaḥ |
tasyāṃ pañcāśataṃ kanyāḥ sa evājanayatprabhuḥ || 3 ||
[Analyze grammar]

tāḥ sarvāścānavadyāṃgīḥ kanyāḥ kamalalocanāḥ |
putrikāḥ sthāpayāmāsa naṣṭaputraḥ prajāpatiḥ || 4 ||
[Analyze grammar]

dadau sa daśa dharmāya kaśyapāya trayodaśa |
divyena vidhinā devi saptaviṃśatimiṃdave || 5 ||
[Analyze grammar]

rohiṇī vallabhā jātā tasya candrasya sarvadā |
ṣaḍviṃśatikṛte candraḥ śapto dakṣeṇa pārvati || 6 ||
[Analyze grammar]

caṃdreṇāpi tathā śapto dakṣaḥ prācetasaḥ kṛtaḥ |
ayajatso'śvamedhena bhūtvā prācetasātmajaḥ || 7 ||
[Analyze grammar]

nāmaṃtrito'haṃ mohena dakṣeṇa parvatātmaje |
tatra devanikāyānāṃ yajñabhāgānaśeṣataḥ || 8 ||
[Analyze grammar]

havyavāhastadā yukto vahanmaṃtraiḥ samīritaḥ |
tvayā dṛṣṭo viśālākṣi nirālaṃbeṃ'bare sthitaḥ || 9 ||
[Analyze grammar]

smaraṃtyā pūrvavairaṃ tu vijñapto'haṃ tvayā priye |
tvaṃ devaḥ sarvadevānāṃ gatiśca śaraṇaṃ tathā || 10 ||
[Analyze grammar]

tvaṃ yajñastvaṃ vaṣaṭkāro hotā'dhvaryustvameva ca |
tvayā vinā kathaṃ yajño varttate sarvadevapa || 11 ||
[Analyze grammar]

devānāṃ bhāgadheyāni vahatyagnirayaṃ bhayāt |
sagarvaścāvaliptaśca dakṣaḥ prācetasaḥ kila || 12 ||
[Analyze grammar]

anusmaranpūrvavairaṃ naiva dāsyatyaśāsitaḥ |
kāyahīnaśca karttavyo dakṣo vahnistathaiva ca || 13 ||
[Analyze grammar]

ye ca yajñe samānītā devā dakṣasya śaṃkara |
te sarve kāyarahitāḥ kāryā stripurasūdana || 14 ||
[Analyze grammar]

evamukte tvayā devi mayāpyuktaṃ varānane |
pūrvajanmani dakṣo'yaṃ pitā tava śucismite || 15 ||
[Analyze grammar]

vahniścādeśakārī ca devāḥ krīḍanakāḥ priye |
madīyaṃ vacanaṃ śrutvā kṛtaḥ krodhastvayā priye || 16 ||
[Analyze grammar]

lalāṭe bhrukuṭīṃ kṛtvā procchvasaṃtyā punaḥpunaḥ |
krodhātkareṇa nāsāgraṃ marditaṃ bahuśastadā || 17 ||
[Analyze grammar]

tasminsaṃmardyamāne tu nāsāgre parvatātmaje |
jātā strī bhrukuṭīvakrā caturdaṃṣṭrā trilocanā || 18 ||
[Analyze grammar]

baddhagodhāṃgulitrā ca kavacābaddhamekhalā |
sakhaḍgā sadhanuṣkā ca satūṇā sapatākinī || 19 ||
[Analyze grammar]

sahasrāsyā śatabhujā sahasracaraṇodarī |
pratikūlaiḥ padairdevi kaṃpayaṃtī tathā bhuvam || 20 ||
[Analyze grammar]

kṛtaṃ nāma tvayā devi tāṃ dṛṣṭvā ca tamomayīm |
bhadrakālī ca māyā ca sarvalokanamaskṛte || 21 ||
[Analyze grammar]

mayā sṛṣṭastu puruṣastādṛśo lomaharṣaṇaḥ |
sa cāpi prāṃjalirbhūtvā māmuvāca punaḥpunaḥ |
ājñāpaya sureśāna kiṃ karomi jagatprabho || 22 ||
[Analyze grammar]

tato devi mayājñapto bhāvaṃ jñātvā tvadīyakam |
kṛtvā nāma manojñaṃ tu vīrabhadra iti smṛtaḥ || 23 ||
[Analyze grammar]

vīrabhadra mamādeśādbhadrakālyā sahānayā |
prācetasātmajaṃ dakṣaṃ sagarvaṃ sahadaivatam || 24 ||
[Analyze grammar]

vidhvaṃsaya gaṇādhyakṣa sayajñaṃ saparigraham |
dattaṃ mayā mahatsainyamasaṃkhyeyaguṇasya ca || 25 ||
[Analyze grammar]

tvayāpi bhadrakālyāstu dattaṃ sainyaṃ bhayāvaham |
kapālakartrikāhastaṃ mātṝṇāṃ gaṇamakṣayam || 26 ||
[Analyze grammar]

tatastau tena sainyena mahatātisamāvṛtau |
jagmatustatra yatrāste dakṣaḥ prācetaso yajan || 27 ||
[Analyze grammar]

devaiḥ parivṛto devi sadasyairbrāhmaṇaiḥ saha |
tato devāḥ suruddhāste tena sainyena pārvati |
viśrabdhā maṃtrapūtaṃ tu pibaṃtaḥ somamadhvare || 28 ||
[Analyze grammar]

trinetreṇa triśūlena tridaśādhipa īśvaraḥ || trā |
sitaḥ sahasā śakro gaṇenādhvaramadhyagaḥ || 29 ||
[Analyze grammar]

yamākhyena gaṇenaiva yamakalpaprabheṇa ca |
somapāne prasaktaśca yamaścākarṣito'dhvare || 30 ||
[Analyze grammar]

pāśena varuṇo baddhaḥ pāśena gaṇapena tu |
paścimāśādhipo vīraḥ prāṇena parameśvari || 31 ||
[Analyze grammar]

tāḍito'nila evātha uttare naravāhanaḥ |
uttarāśādhipo devi nidhānaiḥ sahito'dhvare |
vīrabhadraniyuktāste cakruryuddhaṃ sudāruṇam || 32 ||
[Analyze grammar]

atha yuddhaṃ cakāro ccairbhadrakālī bhayāvahā |
vikarālī mahākālī kālikā kalaśodarī || 33 ||
[Analyze grammar]

prajvālajvalanākārā śuṣkamāṃsātibhairavā |
etāścānyāśca śataśo naramālāvibhūṣaṇāḥ || 34 ||
[Analyze grammar]

kapālakartrikāhastā jaghnurdevagaṇāstadā |
iti mātṛgaṇaṃ kruddhaṃ mardayaṃtaṃ surāstadā |
dṛṣṭvābhyupagatā devāstuṣitā yuddhalālasā || 35 ||
[Analyze grammar]

kecicca cikṣipuḥ śaktīḥ kecitprāsāṃstathāpare |
kecicca tomaraistīkṣṇaiḥ kecitkhaṅgaiśca paṭṭiśaiḥ || 36 ||
[Analyze grammar]

arddito mātṛsaṃghastu pīḍitāḥ pramathā yadā |
bhadrakālī tadā kruddhā gadayā śaravṛṣṭibhiḥ || 37 ||
[Analyze grammar]

khaḍgādibhiḥ ṣaḍarkāṃśuḥ pīḍayāmāsa saṃyuge |
bhagasya netre pūṣṇastu daśanāḥ sūditā mukhāt || 38 ||
[Analyze grammar]

karāndinakarasyaiva caraṇau bhāskarasya ca |
muśalena hatā ye'ṣṭau vasavo raṇakovidāḥ || 39 ||
[Analyze grammar]

vamanto rudhiraṃ te'pi naṣṭā jarjara mastakāḥ |
videhāśca kṛtā yuddhe tuṣitā raṇagarvitāḥ || 40 ||
[Analyze grammar]

baddhaḥ prācetaso dakṣaḥ pāśena sudṛḍhena ca |
śeṣāśca tridaśā bhītā brahmāṇaṃ śaraṇaṃ gatāḥ || 41 ||
[Analyze grammar]

vṛttāṃtaḥ kathitaḥ sarvo vistareṇa yathā tathā |
ādyā ye tuṣitā devā videhāścaiva te kṛtāḥ || 42 ||
[Analyze grammar]

naṣṭāśca vasavo devāḥ pīḍitā bhāskarā raṇe |
na jñāyate sahasrākṣo na yamo na dhaneśvaraḥ |
varuṇo yādasāṃ nāthaḥ kva gataḥ parameśvaraḥ || 43 ||
[Analyze grammar]

bhadrakālyā hataṃ sarvaṃ vīrabhadragaṇena ca |
bhagnaśca yajñayūpo vai vidhvastaṃ kalaśaṃ tadā || 44 ||
[Analyze grammar]

pradīpitā mahāśālā bhagnaṃ vai yajñatoraṇam |
teṣāṃ tu vacanaṃ śrutvā brahmā lokapitāmahaḥ |
ājagāma kṛpāviṣṭo yatrāhaṃ mandare sthitaḥ || 45 ||
[Analyze grammar]

stutiṃ kṛtvā madīyāṃ tu vākyamuktamidaṃ tadā |
ādyā ye tuṣitā devā videhāścaiva te kṛtāḥ || 46 ||
[Analyze grammar]

bhadrakālyā mahādeva vasavo jarjarīkṛtāḥ |
pīḍitā bhāskarā yuddhe śeṣā naṣṭā diśo gatāḥ || 47 ||
[Analyze grammar]

kāyāvarohaṇaṃ deva tuṣitānāṃ kathaṃ bhavet |
brahmaṇo vacanaṃ śrutvā mayā proktaṃ varānane || 48 ||
[Analyze grammar]

mahākālavane kṣetre gacchantu tuṣitāstvamī |
lakuṭīśo gato yatra kāyāvarohaṇādgra ham || 49 ||
[Analyze grammar]

brāhmaṇāśca mamādeśāccatuḥśiṣyaiḥ samanvitāḥ |
dvāpare samatikrāṃte prāpte kaliyuge tathā || 50 ||
[Analyze grammar]

tatra kāyamanuprāptā mama śiṣyā mamo pamāḥ |
avasaṃta kṣitau dhanyā rakṣaṇārthaṃ dvijanmanām || 51 ||
[Analyze grammar]

kṣetrasya dakṣiṇe tasya vidyate liṃgamuttamam |
sarvasaṃpatkaraṃ divyaṃ siddhānāṃ kāya dāyakam || 52 ||
[Analyze grammar]

prasādāttasya liṃgasya kāyānprāpsyaṃtyamī surāḥ |
madīyaṃ vacanaṃ śrutvā gatāste tuṣitāḥ priye || 53 ||
[Analyze grammar]

muditā brahmaṇā sārddhaṃ yatra talliṃgamuttamam |
prasādāttasya liṃgasya prāptaṃ kāyamanuttamam || 54 ||
[Analyze grammar]

punaste tādṛśā jātāstuṣitā yādṛśā'bhavan |
ato devaiḥ kṛtaṃ nāma kāyāvarohaṇeśvaraḥ |
samīhitaprado nityaṃ khyāto devo bhaviṣyati || 55 ||
[Analyze grammar]

ye gatvā dakṣiṇāmāśāṃ devaṃ kāyāvarohaṇam |
paśyanti parayā bhaktyā yamasteṣāṃ pitā bhavet || 56 ||
[Analyze grammar]

janmakoṭisahasraistu yatpāpaṃ samupārjitam |
tatsarvaṃ nāśamāyāti darśanādeva nānyathā || 57 ||
[Analyze grammar]

svakarmaṇā gatā ye ca narake pitaro gaṇāḥ |
darśanāttasya liṃgasya teṣāṃ muktirbhaviṣyati || 58 ||
[Analyze grammar]

ye paśyaṃti prasaṃgena devaṃ kāyārohaṇam |
na teṣāṃ punarāvṛttiḥ kalpakoṭiśatairapi || 59 ||
[Analyze grammar]

sparśanāttasya liṃgasya pāpinopi hi ye narāḥ |
te yāsyaṃti paraṃ sthānaṃ sarvapāpavivarjitam || 60 ||
[Analyze grammar]

śāṭhyena pūjito devaḥ kāyāvarohaṇeśvaraḥ |
dadāti rājyaṃ bhogāṃśca svargalokaṃ sanātanam || 61 ||
[Analyze grammar]

dvādaśyāṃ ye prapaśyaṃti snātvā kāyāvarohaṇam |
te bhittvā brahmasadanaṃ yāsyanti paramāṃ gatim || 62 ||
[Analyze grammar]

eṣa te kathito devi prabhāvaḥ pāpanāśanaḥ |
kāyāvarohaṇeśasya bilveśvaramatho śṛṇu || 63 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvaṃtyakhaṃḍe caturaśītiliṅgamāhātmya umāmaheśvarasaṃvāde kāyāvarohaṇeśvaramāhātmyavarṇa naṃnāma dvayaśītitamo'dhyāyaḥ || 82 ||
[Analyze grammar]