Chapter 48

[English text for this chapter is available]

śrīrudra uvāca |
aṣṭādhikaṃ vijānīhi catvāriṃśattamaṃ priye |
yasya darśanamātreṇa na bhavasya bhayaṃ bhavet || 1 ||
[Analyze grammar]

kalpāvasāne prathame pādme padmanibhekṣaṇe |
naṣṭacaṃdrārkanakṣatre naṣṭabhūmitriviṣṭape |
brahmā vai ciṃtayāmāsa kathaṃ sṛṣṭirbhavediti || 2 ||
[Analyze grammar]

ityākulitarūpasya tasya netradvayāttadā |
papātāśrukaṇaḥ sthūlo netrādvāmānmahātmanaḥ || 3 ||
[Analyze grammar]

tasmādaśrukaṇājjāto hāravonāma dānavaḥ |
tīkṣṇadaṃṣṭro mahākāyo bhinnāṃjanacayaprabhaḥ || 4 ||
[Analyze grammar]

dakṣiṇānnayanājjātaḥ kālakelītiviśrutaḥ |
kṛṣṇadeho'tidīrghaśca mahādaṃṣṭrordhvaromakaḥ || 5 ||
[Analyze grammar]

karālavadano duṣṭo yamarūpo durāsadaḥ |
kṛṣṇāṃjanacayākāraḥ pāśapāṇirvibhīṣaṇaḥ || 6 ||
[Analyze grammar]

tau tu daityau samāgatya kṛtasaṃketakau tadā |
brahmāṇaṃ haṃtumicchaṃtau pramattāvabhidhāvitau || 7 ||
[Analyze grammar]

tato brahmā bhayāviṣṭaḥ kāṃdiśīkaścacāra ha |
tato jale'tigaṃbhīre so'paśyadamitadyutim || 8 ||
[Analyze grammar]

puruṣaṃ pītavasanaṃ śaṃkhacakragadādharam |
tamālokya tato brahmā saṃtrāsaṃ paramaṃ gataḥ |
uvāca ko bhavāñchete niḥśeṣesmiṃścarācare || 9 ||
[Analyze grammar]

tamuvāca tato viṣṇurahamevaṃ jagatpitā |
lokakṛllokasaṃharttā lokasthitividhāyakaḥ || 10 ||
[Analyze grammar]

ityuktaḥ padmajastena kṛṣṇenākliṣṭakarmaṇā |
pratyuvāca tadā brahmā sraṣṭāhaṃ bhuvanatraye || 11 ||
[Analyze grammar]

mayā sṛṣṭaṃ jagatsarvaṃ sadevāsuramānuṣam |
atrāṃtare ca tau daityāvāyātau baladarpitau || 12 ||
[Analyze grammar]

bhoktukāmau kṣudhāviṣṭau dṛṣṭvā brahmābravīdidam |
kṛṣṇaṃ kamalapatrākṣaṃ kaṃpitādharapallavaḥ || 13 ||
[Analyze grammar]

yadi tvaṃ kāraṇaṃ kiṃcidasya lokasya kathyase |
tadā tāvasurau bhīmau haṃtumarhasi sāṃpratam || 14 ||
[Analyze grammar]

tacchrutvā tu tadā viṣṇurjñātvā duḥkhaṃ parasparam |
kṣaṇaṃ viśramyatāṃ tāvatpaścāddvaṃdvaṃ bhaviṣyati || 15 ||
[Analyze grammar]

ityuktvā kṛtasaṃketau tau daityau balagarvitau |
brahmanārāyaṇau haṃtuṃ dhāvitau tu tvarānvitau || 16 ||
[Analyze grammar]

brahmaviṣṇū tadā dṛṣṭvā dānavau durjayau raṇe |
saṃtrāsaṃ jagmatustatra svedakaṃpapariplutau || 17 ||
[Analyze grammar]

anyonyamūcatustau hi deśakālocitaṃ vacaḥ |
kartavyaṃ kiṃ nu vā kāryaṃ mama vā tava vā bhavet || 18 ||
[Analyze grammar]

upasthitaṃ bhayaṃ ghoraṃ tatra kiṃ kāryamasti nau |
āsannaṃ maraṇaṃ dṛṣṭvā brahmā provāca keśavam || 19 ||
[Analyze grammar]

gamyatāṃ kṛṣṇa śīghraṃ vai mahākālavanottamam |
pralaye'pyakṣayaṃ proktaṃ tatra rakṣā bhaviṣyati |
ahaṃ tatra gamiṣyāmi vraja tvaṃ tatra keśava || 20 ||
[Analyze grammar]

ityukto brahmaṇā kṛṣṇo jagāma saha tena vai |
mahākālavanaṃ prāptau na ca dṛṣṭo maheśvaraḥ |
tatrāpi daśasāhasrakālaḥ paryaṭatostayoḥ || 21 ||
[Analyze grammar]

tato jvālāmayaṃ divyaṃ nūpureśvaradakṣiṇe |
dṛṣṭvā talliṃgamāhātmyaṃ brahmaviṣṇū tataḥ svayam |
prārthayāṃcakraturdevamabhayaṃ dehi nau prabho || 22 ||
[Analyze grammar]

śaraṇaṃ bhava deveśa dānavābhyāṃ prapīḍitau |
abhayaṃ ca tato dattaṃ tena liṃgena pārvati || 23 ||
[Analyze grammar]

śuśrāva garjitaṃ tābhyāṃ dānavābhyāṃ pitāmahaḥ |
pratyuvāca bhayatrasto liṃgaṃ kaṃpitakaṃ dharaḥ || 24 ||
[Analyze grammar]

sa eṣa mṛtyurasmākameti śīghraṃ bhayāvahaḥ |
dīyatāmabhayaṃ deva kṛṣṇenoktaṃ tadā priye || 25 ||
[Analyze grammar]

bhayārttavacanaṃ śrutvā brahmaṇaḥ keśavasya ca |
tau daivau tena liṃgena jaṭhare saṃniveśitau || 26 ||
[Analyze grammar]

dṛṣṭaṃ tābhyāṃ jagatsarvaṃ sārkacaṃdramahīdharam |
sasiddhagaṃdharvakulaṃ śailatālalatākulam || 27 ||
[Analyze grammar]

samudrapīṭhasaṃyuktaṃ nānāvarṇāśramojjvalam |
sapātālatalaṃ devi sabhujaṃgamahīruham || 28 ||
[Analyze grammar]

sasaptalokavinyāsaṃ sadevāsurarākṣasam |
punastau niḥsṛtau tasmājjaṭharādvismayānvitau || 29 ||
[Analyze grammar]

dṛṣṭvau bhasmīkṛtau daityau tena liṃgena pārvati |
tuṣṭuvāte paraṃ liṃgaṃ bhaktyā paramayā yutau || 30 ||
[Analyze grammar]

liṃgenoktaṃ prasannena bhavadbhyāṃ kiṃ dadāmyaham |
mamāmoghamidaṃ devau darśanaṃ cātidurlabham || 31 ||
[Analyze grammar]

tato brahmā ca viṣṇuśca varayāmāsaturvaram |
yadi deyo varo' smākaṃ nṛṇāmabhayado bhava || 32 ||
[Analyze grammar]

ye ca tvāṃ pūjayiṣyaṃti yakṣyaṃti ca samāhitāḥ |
saṃsmariṣyaṃti satataṃ teṣāmabhayado bhave || 33 ||
[Analyze grammar]

abhayeśvarasaṃjñastu khyāto bhuvi bhaviṣyasi |
te kṛtārthā bhaviṣyaṃti ye tvāṃ paśyaṃti bhaktitaḥ || 34 ||
[Analyze grammar]

bhaviṣyati bhayaṃ naiva saṃsārapatanaṃ tathā |
dhanaputrakalatrāṇāṃ viyogo na bhaviṣyati || 35 ||
[Analyze grammar]

duḥkhitā durbhagā nārī darśanaṃ yā kariṣyati |
saubhāgyasukhasaṃyuktā bhaviṣyati na saṃśayaḥ |
vīraṃ tu gurviṇī kanyā patimāpsyati śobhanam || 36 ||
[Analyze grammar]

yaṃyaṃ kāmamabhidhyāya ye tvāṃ paśyaṃti mānavāḥ |
taṃtaṃ manorathaṃ sarvaṃ gamiṣyaṃti na saṃśayaḥ || 37 ||
[Analyze grammar]

evaṃ bhaviṣyatītyuktvā liṃgena parameśvari |
visarjitau gatau daivau brahmaviṣṇū svamālayam || 38 ||
[Analyze grammar]

eṣa te kathito devi prabhāvaḥ pāpanāśanaḥ |
abhayeśvara devasya śrūyatāṃ pṛthukeśvaram || 39 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṃgamāhātmye'bhayeśvaramāhātmyavarṇanaṃnāmāṣṭācatvāriṃśo'dhyāyaḥ || 48 ||
[Analyze grammar]