Chapter 33

[English text for this chapter is available]

śrīhara uvāca |
trayastriṃśattamaṃ devamānaṃdeśvaramīśvaram |
viddhi pāpaharaṃ puṇyaṃ sarvasaṃpatkaraṃ sadā || 1 ||
[Analyze grammar]

purā rāthaṃtare kalpe babhūva pṛthivīpatiḥ |
anamitra iti khyātaḥ sārvabhaumo mahītale || 2 ||
[Analyze grammar]

dharmātmā mahātmā ca parākramadhano nṛpaḥ |
atītya sarvabhūtāni babhau bhānurivāvyayaḥ || 3 ||
[Analyze grammar]

samaḥ śatrau ca putre ca mitre ca paradharmmavit |
giribhadrā gireḥ putrī tenoḍhā varavarṇinī || 4 ||
[Analyze grammar]

atīva vallabhā sā ca prāṇebhyo'pi garīyasī |
ānaṃda iti putro'bhūttasya jñānarataḥ sudhīḥ || 5 ||
[Analyze grammar]

jātamātro nijotsaṃge sthiramullāpya vai punaḥ |
pariṣvajati hārdena ullāpayati punaḥpunaḥ || 6 ||
[Analyze grammar]

sa jātismaraṇo jāto māturutsaṃgamāsthitaḥ |
jahāsa ca tadā mātā saṃkṣubdhā vākyamavravīt || 7 ||
[Analyze grammar]

bhītāsmi kimidaṃ vatsa hāso yadvadane tava |
akālabodhaḥ saṃjātaḥ kiṃsvitpaśyasi śobhanam || 8 ||
[Analyze grammar]

ityukto mātaraṃ prāha sarvo'pi svārthamīhate |
māṃ netumicchati puro mārjārī kiṃ na paśyasi |
aṃtardhānagatā ceyaṃ dvitīyā jātahāriṇī || 9 ||
[Analyze grammar]

putraprītyā ca mātastvamataḥ svārthaṃ samīhase |
ullāpyollāpya bahuśaḥ pariṣvajasi māṃ bata || 10 ||
[Analyze grammar]

udbhūte bālake snehātsaṃbhramātstrījano'pyayam |
tatoyamāgato hāsaḥ śṛṇu cāpyatra kāraṇam || 11 ||
[Analyze grammar]

svārthe prasaktā mārjārī lolupā māmavekṣate |
tathāṃtarddhānagā ceyaṃ dvitīyā jātahāriṇī || 12 ||
[Analyze grammar]

tvaṃ tu krameṇopabhogyaṃ mattaḥ phalamabhīpsasi |
na māṃ jānāsi ko'pyevaṃ na vai copakṛtaṃ mayā || 13 ||
[Analyze grammar]

saṃgatirnāti bālānāṃ paṃcasaptadinātmakam |
tathāpi snihyasi prītyā pariṣva jasi saṃtatam || 14 ||
[Analyze grammar]

tateti vatsa bho bhadra ityalīkaṃ bravīṣi mām |
putrasya vacanaṃ śrutvā kruddhā mātā'bravīdidam || 15 ||
[Analyze grammar]

nāhaṃ tvāmupakārārthaṃ vatsa prītyā pariṣvaje |
svārtho mayā parityakto yastvatto me bhaviṣyati || 16 ||
[Analyze grammar]

ityuktvā sā tamutsṛjya niṣkrāṃtā sūtikāgṛhāt |
jahāra tatparityaktaṃ sā tadā jātahāriṇī || 17 ||
[Analyze grammar]

sā hṛtvā taṃ tadā bālaṃ pūrvajātismaraṃ priye |
haiminyāḥ śayane nyasyadvikrāṃtasya mahībhṛtaḥ || 18 ||
[Analyze grammar]

matvā svakīyaṃ putraṃ tu vikrāṃtena mahībhṛtā |
kṛtaṃ vai nāmakaraṇamānaṃda iti viśrutam || 19 ||
[Analyze grammar]

vikrāṃtasya suto nīto bodhasya ca dvijanmanaḥ |
caitranāmā kṛtastena saṃskṛto vedamaṃtrakaiḥ || 20 ||
[Analyze grammar]

tṛtīyaṃ bhakṣayāmāsa bodhaputraṃ niśācarī |
jātismaro'pyathānaṃdaḥ kṛtopanayanastadā || 21 ||
[Analyze grammar]

guruṇā samanujñātaṃ kriyatāmabhivādanam |
jananyāḥ prāgupasthānamityukto vākyamabravīt || 22 ||
[Analyze grammar]

vaṃdyā me katamā mātā janitrī pālinī ca vā |
ānaṃdasya vacaḥ śrutvā gururvacanamabravīt || 23 ||
[Analyze grammar]

nanviyaṃ te mahābhāga janitrī janakātmajā |
vikrāṃtasyāgramahiṣī haiminīnāma nāmataḥ || 24 ||
[Analyze grammar]

ānaṃda uvāca |
caitrasya prasavitrīyaṃ caitro'yaṃ dvijaveśmani |
saṃskṛto brāhmaṇairmaṃtrairgiribhadrāsutastvaham || 25 ||
[Analyze grammar]

gururāha tataḥ kastvaṃ caitraḥ ko vā tvayocyate |
tataḥ sa kathayāmāsa pūrvavṛttāṃtamāditaḥ || 26 ||
[Analyze grammar]

gururuvāca |
atīva gahanaṃ vatsa saṃkaṭaṃ mahadāgatam |
na vedmi kiṃcinmohena bhramaṃti mama buddhayaḥ || 27 ||
[Analyze grammar]

ānaṃda uvāca |
mohasyāvasaraḥ ko'tra jagatyevaṃ vyavasthitaḥ |
kaḥ kasya putro viprarṣe ko vā kasya na bāṃdhavaḥ || 28 ||
[Analyze grammar]

ataḥ saṃsāratā haṃti saṃsāraṃ prāṇināmiha |
mahāmohahataṃ cetaścitramatra kathaṃ guro || 29 ||
[Analyze grammar]

brahmaputrasya duṣṭasya duḥsahasya sutā bhuvi |
jātahāriṇikānāma parivarttayate sutān || 30 ||
[Analyze grammar]

mātṛdvayaṃ mayā prāptamasminneva hi janmani |
mātṛdvayamatho prāptaṃ jātiṃ saṃsmaratā satā || 31 ||
[Analyze grammar]

so'haṃ tapaḥ kariṣyāmi caitra ānīyatāmiti |
tataḥ suvismito rājā sabhāryaḥ saha baṃdhubhiḥ || 32 ||
[Analyze grammar]

tasmānnivarttya mamatā manumene ca taṃ prati |
caitramānīya tanayaṃ rājyayogyaṃ cakāra saḥ || 33 ||
[Analyze grammar]

sanmānya brāhmaṇaṃ yena putrabuddhyā sa pālitaḥ |
so'pyānaṃdastapastepe mahākālavane śubhe || 34 ||
[Analyze grammar]

iṃdreśvarasya devasya paścime liṃgamuttamam |
bhaktyā hyārādhayāmāsa tapasā duṣkareṇa tu || 35 ||
[Analyze grammar]

tapasyaṃtaṃ tatastaṃ tu devaḥ prāha śucismite |
kimarthaṃ tapyase vatsa tapastīvraṃ bravīmi te || 36 ||
[Analyze grammar]

manunā bhavatā bhāvyaṃ ṣaṣṭhena vraja tatkuru |
alaṃ te tapasā tasmiṃstato muktimavāpsyasi || 37 ||
[Analyze grammar]

ityukto devadevena tathetyāha mahāmatiḥ |
babhūva sa manurdevi brahmatulyo mahāyaśāḥ || 38 ||
[Analyze grammar]

putrānutpādayāmāsa liṃgasyāsya samarcanāt |
kṛtaṃ nāma tadā devairānaṃdeśvaramuttamam || 39 ||
[Analyze grammar]

ānaṃdena yataḥ prāptā siddhirdevi sudurllabhā |
ato nāma suvikhyātamānaṃdeśvaramīkṣyatām || 40 ||
[Analyze grammar]

ye paśyaṃti viśālākṣi ānaṃdeśvaramīśvaram |
te putrapautrasaṃpannā bhaviṣyaṃti mahītale || 41 ||
[Analyze grammar]

yeṣāṃ kṣīṇaṃ nṛṇāṃ pāpaṃ koṭijanmaśatodbhavam |
teṣāṃ bhavati sā bhaktirānaṃdeśvaradarśanāt || 42 ||
[Analyze grammar]

tadaiva puruṣo mukto janmamṛtyujarādibhiḥ |
yadā paśyati deveśamānaṃdeśvarasaṃjñakam || 43 ||
[Analyze grammar]

mayoktaṃ muktidaṃ nṛṇāmānandeśvaradarśanam |
svargāpavargadaṃ devamānaṃdaṃ liṃgamuttamam |
atra devairviśālākṣi pūjitaṃ liṃgamuttamam || 44 ||
[Analyze grammar]

eṣa te kathito devi prabhāvaḥ pāpanāśanaḥ |
ānaṃdeśvaradevasya śṛṇu tvaṃ kaṃthaḍeśvaram || 45 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ pañcama āvantyakhaṇḍe caturaśītiliṅgamāhātmya ānaṃdeśvaramāhātmyavarṇanaṃnāma trayastriṃśo'dhyāyaḥ || 33 ||
[Analyze grammar]