Chapter 40

[English text for this chapter is available]

agastya uvāca |
pārvatīhṛdayānaṃda pārvatīśa samudbhavam |
kathayeha yaduddiṣṭaṃ bhavatā prāgaghāpaham || 1 ||
[Analyze grammar]

skaṃda uvāca |
śṛṇvagaste yadā menā himācalapativratā |
girīṃdrajāṃ sutāmāha putri tesya maheśituḥ || 2 ||
[Analyze grammar]

kiṃ sthānaṃ vasatirvā kā ko baṃdhurvetsi kiṃcana |
prāyo gṛhaṃ na jāmāturasya kopi ca kutracit || 3 ||
[Analyze grammar]

niśamyeti vaco māturatihrīṇā girīṃdrajā |
āsādyāvasaraṃ śaṃbhuṃ natvā gaurī vyajijñapat || 4 ||
[Analyze grammar]

mayā śvaśrūgṛhaṃ kāṃta gamyamadya viniścitam |
nāthātra naiva vastavyaṃ naya māṃ svaṃ niketanam || 5 ||
[Analyze grammar]

girīṃdrajāgiraṃ śrutvā girīśa iti tattvavit |
hitvā himagiriṃ prāpto nijamānaṃdakānanam || 6 ||
[Analyze grammar]

prāpyānaṃdavanaṃ devī paramānaṃdakāraṇam |
vismṛtya pitṛsaṃvāsaṃ jātā cānaṃdarūpiṇī || 7 ||
[Analyze grammar]

atha vijñāpayāṃcakre gaurī giriśamekadā |
acchinnānaṃdasaṃdohaḥ kutaḥ kṣetre'tra tadvada || 8 ||
[Analyze grammar]

iti gaurīritaṃ śrutvā pratyuvāca pinākadhṛk |
paṃcakrośaparīmāṇe kṣetresminmuktisadmani || 9 ||
[Analyze grammar]

tilāṃtaraṃ na devyasti vinā liṃgaṃ hi kutracit |
ekaikaṃ parito liṃgaṃ krośaṃ krośaṃ ca yāvaniḥ || 10 ||
[Analyze grammar]

anyatrāpi hi sā devi bhavedānaṃdakāraṇam |
atrānaṃdavane devi paramānaṃdajanmani || 11 ||
[Analyze grammar]

paramānaṃdarūpāṇi saṃti liṃgānyanekaśaḥ |
caturdaśasu lokeṣu kṛtino ye vasaṃti hi || 12 ||
[Analyze grammar]

taiḥ svanāmneha liṃgāni kṛtvā'pi kṛtakṛtyatā |
atra yena mahādevi liṃgaṃ saṃsthāpitaṃ mama || 13 ||
[Analyze grammar]

vetti tacchreyasaḥ saṃkhyāṃ śeṣopi na viśeṣavit || 14 ||
[Analyze grammar]

paricchedavyatītasyānaṃdasya parakāraṇam |
atastvidaṃ paraṃ kṣetraṃ lirgairbhūyobhiradrije || 15 ||
[Analyze grammar]

niśamyeti mahādevī punaḥ pādau praṇamya ca |
dehyanujñāṃ mahādeva liṃgasaṃsthāpanāya me || 16 ||
[Analyze grammar]

patyurājñāṃ samāsādya yacchecchreyaḥ pativratā |
na tasyāḥ śreyaso hāniḥ saṃvartepi kadācana || 17 ||
[Analyze grammar]

iti prasādya deveśamājñāṃ prāpya maheśituḥ |
liṃgaṃ saṃsthāpitaṃ gauryā mahādeva samīpataḥ || 18 ||
[Analyze grammar]

talliṃgadarśanātpuṃsāṃ brahmahatyādipātakam |
vilīyeta na saṃdeho dehabaṃdhopi no punaḥ || 19 ||
[Analyze grammar]

tatra liṃge varo datto devadevena yaḥ punaḥ |
niśāmaya mune taṃ tu bhaktānāṃ hitakāmyayā || 20 ||
[Analyze grammar]

liṃgaṃ yaḥ pārvatīśākhyaṃ kāśyāṃ saṃpūjayiṣyati |
taddehāvasitiṃ prāpya kāśīliṃgaṃ bhaviṣyati || 21 ||
[Analyze grammar]

kāśīliṃgatvamāsādya māmevānupravekṣyati |
caitraśuklatṛtīyāyāṃ pārvatīśasamarcanāt || 22 ||
[Analyze grammar]

iha saubhāgyamāpnoti paratra ca śubhāṃ gatim |
pārvatīśvaramārādhya yoṣidvā puruṣopi vā || 23 ||
[Analyze grammar]

na garbhamāviśedbhūyo bhavetsaubhāgyabhājanam |
pārvatīśasya liṃgasya nāmāpi parigṛhṇataḥ || 24 ||
[Analyze grammar]

api janmasahasrasya pāpaṃ kṣayati tatkṣaṇāt |
pārvatīśasya māhātmyaṃ yaḥ śroṣyati narottamaḥ |
aihikāmuṣmikānkāmānsa prāpsyati mahāmatiḥ || 25 ||
[Analyze grammar]

iti śrīskāṃde mahāpurāṇa ekāśīti sāhasryāṃ saṃhitāyāṃ caturthe kāśīkhaṃḍa uttarārdhe pārvatīśavarṇanaṃ nāma navatitamo'dhyāyaḥ || 90 ||
[Analyze grammar]