Chapter 18

[English text for this chapter is available]

agastiruvāca |
iti śṛṇvankathāṃ ramyāṃ śivaśarmā'tha māthuraḥ |
muktipuryāṃ susaṃsnāto māyāpuryāṃ gatāsukaḥ || 1 ||
[Analyze grammar]

netrayoḥ prāghuṇī cakre tataḥ saptarṣimaṃḍalam |
vrajansa vaiṣṇavaṃ lokamaṃte viṣṇupurīkṣaṇāt || 2 ||
[Analyze grammar]

uvāca ca prasannātmā stutaścāraṇamāgadhaiḥ |
prārthito devakanyābhistiṣṭha tiṣṭheti cakṣaṇam || 3 ||
[Analyze grammar]

sthitā sutāsu niḥśvasasya maṃdabhāgyā vayaṃ tviti |
gataḥ puṇyatamāṃllokānasau yatpuṇyavattamaḥ || 4 ||
[Analyze grammar]

iti śṛṇavanmukhāttāsāṃ vacanāni vimānagaḥ |
devau kasyāyamatulo lokastejomayaḥ śubhaḥ || 5 ||
[Analyze grammar]

iti dvijavacaḥ śrutvā procaturgaṇasattamau |
śivaśarmañchivamate sadā saptarṣayomalāḥ || 6 ||
[Analyze grammar]

vasaṃtīha prajāḥ sraṣṭuṃ viniyuktāḥ prajāsṛjā |
marīciratriḥ pulahaḥ pulastyaḥ kraturaṅgirāḥ || 7 ||
[Analyze grammar]

vasiṣṭhaśca mahābhāgo brahmaṇo mānasāḥ sutāḥ |
sapta brahmāṇa ityete purāṇe niścayaṃ gatāḥ || 8 ||
[Analyze grammar]

saṃbhūtiranasūyā ca kṣamā prītiśca sannatiḥ |
smṛtirūrjā kramādeṣāṃ patnyo lokasya mātaraḥ || 9 ||
[Analyze grammar]

eteṣāṃ tapasā caitaddhāryate bhuvanatrayam |
utpādya brahmaṇā pūrvamete proktā maharṣayaḥ || 10 ||
[Analyze grammar]

prajāḥ sṛjata re putrā nānārūpāḥ prayatnataḥ |
tataḥ praṇamya brahmāṇaṃ tapase kṛtaniścayāḥ || 11 ||
[Analyze grammar]

avimuktaṃ samāsādya kṣetraṃkṣetrajñadhiṣṭhitam |
muktaye sarvajaṃtūnāmavimuktaṃ śivena yat || 12 ||
[Analyze grammar]

pratiṣṭhāpya ca liṃgāni te svanāmnāṃkitāni ca |
śiveti parayā bhaktyā tepurugraṃ tapo bhṛśama || 13 ||
[Analyze grammar]

tuṣṭastattapasā śaṃbhuḥ prājāpatyapadaṃ dadau |
liṃgānyatrīśvarādīni dṛṣṭvā kāśyāṃ prayatnataḥ || 4 ||
[Analyze grammar]

prājāpatye'tra te loke vasaṃtyujjvalatejasaḥ |
gokarṇeśasya sarasaḥ pratyaktīre pratiṣṭhitam || 15 ||
[Analyze grammar]

liṃgamatrīśvaraṃ dṛṣṭvā brahmatejobhivardhate |
karkoṭa vāpyā īśāne marīceḥ kuṃḍamuttamam || 16 ||
[Analyze grammar]

tatra snātvā naro bhakttyā bhrājate bhāskaro yathā |
marīcīśvara saṃjñaṃ tu tatra liṃgaṃ pratiṣṭhitam || 17 ||
[Analyze grammar]

talliṃgadarśanādvipra mārīcaṃ lokamāpnuyāt |
kāṃtyā marīcimālīva śobhate puruṣarṣabhaḥ || 18 ||
[Analyze grammar]

pulaheśa pulastyeśau svargadvārasya paścime |
tau dṛṣṭvā manujo loke prājāpatye mahīyate || 19 ||
[Analyze grammar]

harikeśavane ramye dṛṣṭvaivāṃgiraseśvaram |
iha loke vasedvipra tejasāparibṛṃhitaḥ || 20 ||
[Analyze grammar]

varaṇāyāstaṭe ramye dṛṣṭvā vāsiṣṭhamīśvam |
kratvīśvaraṃ ca tatraiva labhate vasatiṃ tviha || 21 ||
[Analyze grammar]

kāśyāmetāni liṃgāni sevitāni śubhaiṣibhiḥ |
manobhivāṃchitaṃ dadyuriha loke paratra ca || 22 ||
[Analyze grammar]

gaṇāvūcatuḥ |
śivaśarmanmahābhāga tiṣṭhate sātra suṃdarī |
aruṃdhatī mahāpuṇyā pativrataparāyaṇā || 23 ||
[Analyze grammar]

yasyāḥ smaraṇamātreṇa gaṃgāsnāna phalaṃ labhet |
aṃtaḥpuracarairdvitraiḥ pavitraiḥ sahito vibhuḥ || 24 ||
[Analyze grammar]

sadā nārāyaṇo devo yasyāścakre kathāṃ mudā |
kamalāyāḥ purobhāge pātivratya sutoṣitaḥ || 25 ||
[Analyze grammar]

pativratāsvaruṃdhatyāḥ kamale vimalāśayaḥ |
yathāsti na tathā'nyasyāḥ kasyāścitkāpi bhāmini || 26 ||
[Analyze grammar]

na tadrūpaṃ na tacchīlaṃ na tatkaulīnyameva ca |
na tatkalāsukauśalyaṃ patyuḥ śuśrūṣaṇaṃ na tat || 27 ||
[Analyze grammar]

na mādhuryaṃ na gāṃbhīryaṃ na cāryaparitoṣaṇam |
aruṃdhatyā yathā devi tathā'nyāsāṃ kvacitpriye || 28 ||
[Analyze grammar]

dhanyāstā yoṣito loke sabhāgyāḥ śuddhabuddhayaḥ |
aruṃdhatyāḥ prasaṃge yā nāmāpi parigṛhṇate || 29 ||
[Analyze grammar]

yadā pativratānāṃ tu kathāsmadbhavane bhavet |
tadā prāthamikīṃ rekhāmeṣā'laṃkurute satī || 30 ||
[Analyze grammar]

bruvatoriti saṃkathāṃ tathā gaṇayorvaiṣṇavayormudāvahām |
dhruvalokaupāgatastato nayanātithyamatathyavarjitaḥ || 31 ||
[Analyze grammar]

iti śrīskāṃde mahāpurāṇa ekāśītisāhasyāṃ saṃhitāyāṃ caturthe kāśīkhaṃḍe pūrvārddhe saptarṣilokavarṇanaṃnāmāṣṭādaśo'dhyāyaḥ || 18 ||
[Analyze grammar]