Chapter 19

[English text for this chapter is available]

śivaśarmovāca |
tiṣṭhannekena pādena koyaṃ bhramati sattamau |
anekaraśanāvyagra hastāgro vyagralocanaḥ || 1 ||
[Analyze grammar]

trilokīmaṃḍapastaṃbha sannibhobhābhirāvṛtaḥ |
atulaṃ jyotiṣāṃ rāśiṃ tulayā tulayanniva || 2 ||
[Analyze grammar]

sūtradhāra iva vyoma vyāyāmaparimāpakaḥ |
traivikramoṃghridaṃḍo vā proddaṃḍo gaganāṃgaṇe || 3 ||
[Analyze grammar]

athavāṃbarakāsārasārayūpasvarūpadhṛk |
koyaṃ kathaya taṃ devau kṛpayā parayā mama || 4 ||
[Analyze grammar]

niśamyeti vacastasya vayasyasya vimānagau |
praṇayādāhatustasmai dhruvāṃ dhruvakathāṃ gaṇau || 5 ||
[Analyze grammar]

gaṇāvūcatuḥ |
manoḥ svāyaṃbhuvasyāsīduttānacaraṇaḥ sutaḥ |
tasya kṣitipatervipra dvau sutau saṃbabhūvatuḥ || 6 ||
[Analyze grammar]

surucyāmuttamo jyeṣṭhaḥ sunītyāṃ tu dhruvo paraḥ |
madhye sabhaṃ narapaterupaviṣṭasya caikadā || 7 ||
[Analyze grammar]

sunītyā rājasevāyai niyukto'laṃkṛtorbhakaḥ |
dhruvo dhātreyikāputraiḥ samaṃ vinayatatparaḥ || 8 ||
[Analyze grammar]

sa gatvottānacaraṇaṃ kṣoṇīśaṃ praṇanāma ha |
dṛṣṭvottamaṃ tadutsaṃge niviṣṭaṃ janakasya vai || 9 ||
[Analyze grammar]

proccasiṃhāsanasthasya nṛpaterbālyacāpalāt |
āroḍhukāmastvabhavatsaunīteyastadā dhruvaḥ || 10 ||
[Analyze grammar]

ārurukṣumavekṣyāmuṃ surucirdhuvamabravīt |
daurbhageya kimāroḍhumiccheraṃkaṃ mahīpateḥ || 11 ||
[Analyze grammar]

bālabāliśabuddhitvādabhāgyā jaṭharodbhava |
asminsiṃhāsane sthātuṃ na tvayā sukṛtaṃ kṛtam || 12 ||
[Analyze grammar]

yadi syātsukṛtaṃ tatkiṃ durbhagodarago'bhavaḥ |
anenaivānumānena budhyasva svālpapuṇyatām || 13 ||
[Analyze grammar]

bhūtvā rājakumāropi nālaṃkuryā mamodaram |
sukukṣijamamuṃ paśya tvamuttamamanuttamam || 14 ||
[Analyze grammar]

adhijānudharājānermānena paribṛṃhitam |
prāṃśoḥ siṃhāsanasyāsya ruciścedadhirohaṇe || 15 ||
[Analyze grammar]

kukṣiṃ hitvā kimavasaḥ suruceśca surociṣam |
madhye bhūpasabhaṃ bālastayeti paribhartsitaḥ || 16 ||
[Analyze grammar]

patannipītabāṣpāṃburdhairyātkiṃcinna coktavān |
ucitā'nucitaṃ kiṃcinnocivānsopi pārthivaḥ || 17 ||
[Analyze grammar]

niyaṃtrito mahiṣyāśca tasyāḥ saubhāgyagauravāt |
vimṛjya ca sabhālokaṃ śokaṃ saṃmṛjya ceṣṭitaiḥ || 18 ||
[Analyze grammar]

śaiśavaiḥ sa śiśurnatvā nṛpaṃ svasadanaṃ yayau |
sunītirnītinilayamavalokyātha bālakam || 19 ||
[Analyze grammar]

sukhalakṣmyaivacājñāsīddhruvaṃ samavamānitam |
abhisṛtya ca taṃ bālaṃ mūrdhnyupāghrāya sā sakṛt || 20 ||
[Analyze grammar]

kiṃcitparimlānamiva sasāṃtvaṃ pariṣasvaje |
atha dṛṣṭvā sunītiṃ sa rahoṃtaḥ puravāsinīm || 21 ||
[Analyze grammar]

dīrghaṃ niḥśvasya bahuśo māturagre ruroda ha |
sāṃtvayitvāśrunayanā vadanaṃ parimārjya ca || 22 ||
[Analyze grammar]

dukūlāṃcala saṃparkairmṛdulairmṛdupāṇinā |
papraccha tanayaṃ mātā vada rodanakāraṇam |
vidyamāne narapatau śiśo kenāpamānitaḥ || 23 ||
[Analyze grammar]

apothasamupaspṛśya tāṃbūlaṃ parigṛhya ca |
mātrā pṛṣṭaḥ soparodhaṃ dhruvastāṃ paryabhāṣata || 24 ||
[Analyze grammar]

saṃpṛcche janani tvāhaṃ samyakśaṃsa mamāgrataḥ |
bhāryātvepi ca sāmānye kathaṃ sā suruciḥ priyā || 25 ||
[Analyze grammar]

kathaṃ na bhavatī mātaḥ priyā kṣitipaterasi |
kathamuttamatāṃ prāpta uttamaḥ suruceḥ sutaḥ || 26 ||
[Analyze grammar]

kumāratvepi sāmānye kathaṃ tvahamanuttamaḥ |
kathaṃ tvaṃ maṃdabhāgyāsi sukukṣiḥ suruciḥ katham || 27 ||
[Analyze grammar]

kathaṃ nṛpāsanaṃ yogyamuttamasya kathaṃ na me |
kathaṃ me sukṛtaṃ tucchamuttamasyottamaṃ katham || 28 ||
[Analyze grammar]

iti śrutvā vacastasya sunītirnītimacchiśoḥ |
kiṃciducchvasya śanakaiḥ śiśukopopaśāṃtaye || 29 ||
[Analyze grammar]

svabhāvamadhurāṃ vāṇīṃ vaktuṃ samupacakrame |
sāpatnaṃ pratighaṃ tyaktvā rājanītividāṃvarā || 30 ||
[Analyze grammar]

sunītiruvāca |
ayi tāta mahābuddhe viśuddhenāṃtarātmanā |
nivedayāmi te sarvaṃ mā'pamāne matiṃ kṛthāḥ || 31 ||
[Analyze grammar]

tayā yaduktaṃ tatsarvaṃ tathyameva na cānyathā |
sāpatyurmahiṣīrājño rājñīnāmati vallabhā || 32 ||
[Analyze grammar]

tayā janmāṃtare tāta yatpuṇyaṃ samupārjitam |
tatpuṇyopacayādrājā surucyāṃ surucirbhṛśam || 33 ||
[Analyze grammar]

mādṛśyo maṃdabhāgyāyāḥ pramadāsu pratiṣṭhitāḥ |
kevalaṃ rājapatnītvavādastāsu na tadruciḥ || 34 ||
[Analyze grammar]

mahā sukṛtasaṃbhārairuttamaścottamodare |
uvāsa tasyāḥ puṇyā yā nṛpasiṃhāsanocitaḥ || 35 ||
[Analyze grammar]

ātapatraṃ ca caṃdrābhaṃ śubhe cāpi ca cāmare |
bhadrāsanaṃ tathoccaṃ ca siṃdhurāśca madoddhurāḥ || 36 ||
[Analyze grammar]

turaṃgamāśca turagāstvanādhivyādhijīvitam |
niḥsapatnaṃ śubhaṃ rājyaṃ prājyaṃ hariharārcanam || 37 ||
[Analyze grammar]

vipulaṃ ca kalājñānamadhītamaparājitam |
tathā jayoriṣaḍvarge svabhāvātsāttvikī matiḥ || 38 ||
[Analyze grammar]

dṛṣṭiḥ kāruṇyasaṃpūrṇā vāṇī madhurabhāṣiṇī |
anālasyaṃ ca kāryeṣu tathā gurujane natiḥ || 39 ||
[Analyze grammar]

sarvatra śucitā tāta sā paropakṛtiḥ sadā |
aurjasvalā manovṛttiḥ sadaivādīnavāditā || 40 ||
[Analyze grammar]

sadojire ca pāṃḍityaṃ prāgalbhyaṃ caraṇāṃgaṇe |
ārjavaṃ baṃdhuvargeṣu kāṭhinyaṃ krayavikraye || 41 ||
[Analyze grammar]

mārdavaṃ strīprayogeṣu vatsalatvaṃ prajāsu ca |
brāhmaṇebhyo bhayaṃ nityaṃ vṛddhavṛttyupajīvanam || 42 ||
[Analyze grammar]

vāso bhāgīrathītīre tīrthe vā maraṇaṃ raṇe |
aparāṅmukhatā'rthibhyaḥ pratyarthibhyo viśeṣataḥ || 43 ||
[Analyze grammar]

bhogaḥ parijanaiḥ sārdhaṃ dānāvaṃdhyadināgamaḥ |
vidyāvyasanitā nityaṃ nityaṃ pitrorupasthitiḥ || 44 ||
[Analyze grammar]

yaśasaḥ saṃcayo nityaṃ nityaṃ dharmasya saṃcayaḥ |
svargāpavargayoḥ siddhiḥ sadā śīlasya maṃḍanam || 45 ||
[Analyze grammar]

sadbhiśca saṃgatirnityaṃ maitrī ca pitṛmitrakaiḥ |
itihāsapurāṇānāmutkaṃṭhā śravaṇe sadā || 46 ||
[Analyze grammar]

vipadyapi paraṃ dhairyaṃ sthairyaṃ saṃpatsamāgame |
gāṃbhīryaṃ vāgvilāseṣu audāryaṃ pātrapāṇiṣu || 47 ||
[Analyze grammar]

dehe paraikā kṛśatā tapobhirniyamairyamaiḥ |
etairmanorathaphalaiḥ phalatyeva tapodrumāḥ || 48 ||
[Analyze grammar]

tasmādalpatapastvādvai tvaṃ cāhaṃ ca mahāmate |
prāpyāpi rājasāṃnidhyaṃ rājalakṣmyā na bhājanam || 49 ||
[Analyze grammar]

mānāpamānayostasmātsvakṛtaṃ kāraṇaṃ param |
sraṣṭāpi nāpamārṣṭuṃ tatparīṣṭe svakṛtāṃ kṛtim |
mā śocastvamataḥ putra diṣṭamiṣṭaṃ samarpayet || 50 ||
[Analyze grammar]

ityākarṇya sunītyāstanmahāvākyaṃ sunītimat |
saunīte yo dhruvovācamādade vaktumuttaram || 51 ||
[Analyze grammar]

dhruva uvāca |
janayitri sunīte me śṛṇu vākyamanākulam |
mā bāla iti matvā māmavamaṃsthāstapasvini || 52 ||
[Analyze grammar]

yadyahaṃ mānave vaṃśe jātosmyatyaṃta pāvane |
uttānapādatanayastvadīyodara saṃbhavaḥ || 53 ||
[Analyze grammar]

tapa eva hi cenmātaḥ kāraṇaṃ sarvasaṃpadām |
tattadāsāditaṃ vidvipadamanyairdurāsadam || 54 ||
[Analyze grammar]

ekameva hi sāhāyyaṃ kuru mātarataṃdritā |
anujñā dānamātraṃ ca āśīrbhirabhinaṃdaya || 55 ||
[Analyze grammar]

sāpi jñātvā mahāvīryaṃ kumāraṃ kukṣisaṃbhavam |
mahatyotsāhasaṃ pattyā rājamānamuvāca tam || 56 ||
[Analyze grammar]

anujñātuṃ na śaktā'haṃ tvāmuttānaśayāṃgaja |
sāṣṭaikavarṣadeśīyantathāpi kathayāmyaham || 57 ||
[Analyze grammar]

sapatnīvākyabhallībhirbhinne mahati me hṛdi |
tava bāṣpaughavārīṇi na tiṣṭhaṃti karomi kim || 58 ||
[Analyze grammar]

tāni manye'tra mārgeṇa sravaṃtyavirataṃ śiśo |
sravaṃtīśca cikīrṣaṃti pratikūla jalāḥ kila || 59 ||
[Analyze grammar]

tvadekatanayā tāta tvadādhāraikajīvitā |
tvamaṃgayaṣṭirasi me tvanmukhāsaktalocanā || 60 ||
[Analyze grammar]

labdhosi katibhiḥ kaṣṭairiṣṭāḥ saṃprārthya devatāḥ |
tvanmukheṃdūdaye tāta manmanaḥ kṣīranīradhiḥ || 61 ||
[Analyze grammar]

ānandapayasāpūrya kucāvudvelito bhavet |
tvadaṃgasaṃgasaṃbhūta sukhasandoha śītalā || 62 ||
[Analyze grammar]

sukhaṃśaye suśayane prāvṛtya pulakāṃbaram |
apo'tha samupaspṛśya tāṃbūlaṃ parigṛhya ca || 63 ||
[Analyze grammar]

tvadāsyasyauṣṭhapuṭaka dugdhavārdhi vivardhitām |
sudhāsudhāṃśuvadanadhayatyapi dhinomi na || 64 ||
[Analyze grammar]

tvadīyaḥ śītalālāpaḥ prāpa śrutipathaṃ yadā |
sapatnīvākyadavathustadaivatyātsa vepathuḥ || 65 ||
[Analyze grammar]

yadaṃga nidrāsiciraṃ dhyāyaṃtyasmi tadetyaham |
kadā nidrā daridrosau bhavitārkodaye'bjavat || 66 ||
[Analyze grammar]

yadopeyā gṛhānvatsa khelitvā bālakhelanaiḥ |
tadānarghyārghyamutsraṣṭuṃ stanausyātāmivonmukhau || 67 ||
[Analyze grammar]

yadā saudhādviniryāyāḥ padmarekhāṃkitaṃ padam |
prāṇānāṃ te yiyāsūnāṃ tadā tadavalaṃbanam || 68 ||
[Analyze grammar]

yadāyadā bahiryāsi putra tricaturaṃ padam |
tadātadā mama prāṇaḥ kaṃṭhaprāghuṇikī bhavet || 69 ||
[Analyze grammar]

citraṃ putra tvarayati yātuṃ me mānasāṃḍajaḥ |
sudhādhārādhara iva bahiścirayati tvayi || 70 ||
[Analyze grammar]

atha tiṣṭhaṃtu kaṭhināḥ prāṇāḥ kaṃṭhāṭavītaṭe |
tapasyaṃtotisaṃtaptāstapase tvayi yāsyati || 71 ||
[Analyze grammar]

ityanujñāmanuprāpya jananī caraṇāṃbujau |
kṣaṇaṃ maulijajaṃbāla jaḍau kṛtvā dhruvo yayau || 72 ||
[Analyze grammar]

tayāpi dhairyasūtreṇa sunītyā pariguṃphya ca |
netreṃdīvarajāmālā dhruvasyopāyanīkṛtā || 73 ||
[Analyze grammar]

mātrātanmārgarakṣārthaṃ tadā tadanugīkṛtāḥ |
parairavāryaprasarāḥ svāśīrvādāḥ paraḥśatāḥ || 74 ||
[Analyze grammar]

svasaudhātsa vinirgatya bālo'bālaparākramaḥ |
anukūlena marutā darśitādhvā'viśadvanam || 75 ||
[Analyze grammar]

samaruttaruśākhāgra prasāraṇamiṣeṇa saḥ |
kṛtāhūtiriva premṇā vanena vanamāviśat || 76 ||
[Analyze grammar]

samātṛdaivatobhijñaḥ kevalaṃ rājavartmani |
na veda kānanādhvānaṃ kṣaṇaṃ dadhyau nṛpātmajaḥ || 77 ||
[Analyze grammar]

yāvadunmīlya nayane puraḥ paśyati sa dhruvaḥ |
tāvaddadarśa saptarṣīnatarkita gatīnvane || 78 ||
[Analyze grammar]

vāliśeṣvasahāyeṣu bhavedbhāgyaṃ sahāyakṛt |
araṇyānyāṃ raṇe gehe tato bhāgyaṃ hi kāraṇam || 79 ||
[Analyze grammar]

kva rājatanayo bālo gahanaṃ kva ca tadvanam |
balātsvasātpratkurvatyai namaste bhavitavya te || 80 ||
[Analyze grammar]

yatra yasya hi yadbhāvyaṃ śubhaṃ vā'śubhameva ca |
ākṛṣyabhāvinī rajjustatra tasya hi dāpayeta || 81 ||
[Analyze grammar]

anyathā vidadhātyeṣa mānavo buddhivaibhavāt |
bhagavatyā bhavitryā'sau vidadhyādvidhiranyathā || 82 ||
[Analyze grammar]

navayo na ca vai citryaṃ na citraṃ vidadhehitam |
na balaṃ nodyamaḥ puṃsāṃ kāraṇaṃ prākkṛtaṃ kṛtam || 83 ||
[Analyze grammar]

atha dṛṣṭvā sa saptarṣīnsaptasaptyatitejasaḥ |
bhāgyasūtrairivākṛṣyopanītānpramumoda ha || 84 ||
[Analyze grammar]

tilakāṃkita sadbhālānkuśopagrahitāṃgulīn |
kṛṣṇājinopaviṣṭāṃśca yajñasūtrairalaṃkṛtān || 85 ||
[Analyze grammar]

sākṣasūtrakarānkiṃcidvinimīlitalo canān |
sudhautasūkṣmakāṣāyavāsaḥ prāvaraṇānvitāna || 86 ||
[Analyze grammar]

akāṃḍepi mahābhāgānmilitānsaptanīradhīn |
citraṃ vipadvinirmagnānuddidhīrṣūniva prajāḥ || 87 ||
[Analyze grammar]

upagamya vinamraḥ sa prabaddhakarasaṃpuṭaḥ |
dhruvo vijñāpayāṃcakre praṇamya lalitaṃ vacaḥ || 88 ||
[Analyze grammar]

dhruva uvāca |
avaita māṃ munivarāḥ sunītyudarasaṃbhavam |
uttānapādatanayaṃ dhruvaṃ nirviṇṇamānasam || 89 ||
[Analyze grammar]

idaṃ vanamanuprāptaṃ sanāthaṃ yuṣmadaṃghribhiḥ |
prāyonabhijñaṃ sarvatra maharddhyuṣitamānasam || 90 ||
[Analyze grammar]

te dṛṣṭvorjasvalaṃ bālaṃ svabhāva madhurākṛtim |
anarghyanayanepathyaṃ mṛdugaṃbhīrabhāṣiṇam || 91 ||
[Analyze grammar]

upopaveśya śiśukaṃ procurvai vismitā bhṛśam |
ahobālaviśālākṣa mahārāja kumāraka || 92 ||
[Analyze grammar]

vicāryāpi na jānīmo vada nirvedakāraṇam |
adya te hyarthaciṃtā no kvāpamānaḥ prasūrgṛhe || 93 ||
[Analyze grammar]

nīrukcharīrasaṃpattirnivede kiṃ nu kāraṇam |
anavāptābhilāṣāṇāṃ vairāgyaṃ jāyate nṛṇām || 94 ||
[Analyze grammar]

saptadvīpapaterājñaḥ kumārastvaṃ tathā katham |
svabhāvabhinnaprakṛtau lokesminna manogatam || 95 ||
[Analyze grammar]

avagaṃtuṃ hi śakyeta yūno vṛddhasya vā śiśoḥ |
iti śrutvā vacasteṣāṃ sahajapremanirbharam || 96 ||
[Analyze grammar]

vācaṃ jagrāha sa tadā śiśuḥ prāṃśumanorathaḥ |
dhruva uvāca |
preṣito rājasevārthaṃ jananyā'haṃ munīśvarāḥ || 97 ||
[Analyze grammar]

rājāṃkamārurukṣurhi surucyā paribhartsitaḥ |
uttamaṃ cottamīkṛtya māṃ ca manmātaraṃ tathā || 98 ||
[Analyze grammar]

dhikkṛtya praśaśaṃsa svaṃ nirvede kāraṇaṃ tvidam |
niśamyeti śiśorvākyaṃ parasparamavekṣya te || 99 ||
[Analyze grammar]

kṣātrameva śaśaṃsustadaho bālepi na kṣamā || 100 ||
[Analyze grammar]

ṛṣaya ūcuḥ |
kimasmābhiraho kāryaṃ kastavāsti manorathaḥ |
jñāto bhavatu tāvatsa naḥ śravo gocarī kuru || 1 ||
[Analyze grammar]

dhruva uvāca |
munayo mama yo baṃdhuruttamaścottamottamaḥ |
pitrā dattaṃ ca so'dhyāstāṃ tadbhadrāsanamuttamam || 2 ||
[Analyze grammar]

bhavatkṛtaṃ hi sāhāyyametadicchāmi suvratāḥ |
prāyo jāne na bālatvādupadeśastaducyatām || 3 ||
[Analyze grammar]

ananyanṛpabhuktaṃ yadyadanyebhyaḥ samucchritam |
iṃdrādiduravāpaṃ yatkathaṃ labhyaṃ durāsadam || 4 ||
[Analyze grammar]

pitrotsṛṣṭaṃ na kāṃkṣāmi kāṃkṣāmi svabhujājitam |
manorathapathātītaṃ bhavedyatpiturapyaho || 5 ||
[Analyze grammar]

pitṛsaṃpattibhoktāraḥ prāyaśo na yaśodhanāḥ |
narottamāstu te jñeyā ye pitrādhikyadarśinaḥ || 6 ||
[Analyze grammar]

upārjitaṃ hi pitrā ye nāśayaṃti yaśaḥśrutam |
dhanaṃ nidhanamevāstu teṣāṃ durvṛttacetasām || 7 ||
[Analyze grammar]

iti śrutvā vacastasya munayaḥ sunayorjitam |
yathārthameva pratyūcurmarīcyādyāstathā dhruvam || 8 ||
[Analyze grammar]

marīciruvāca |
anarcitācyutapadaḥ padamāpadyate katham |
yathātathātvamātthāṃga nātathyaṃ kathayāmyaham || 9 ||
[Analyze grammar]

atriruvāca |
anāsvāditagoviṃdapadāṃbujarajorasaḥ |
manorathapathātītaṃ sphītaṃ nākalayetpadam || 110 ||
[Analyze grammar]

aṃgirā uvāca |
adavīyaḥ padaṃ tasya sarvāsāṃ saṃpadāmiha |
kamalākāṃtakāṃtāṃghri kamale yaḥ suśīlayet || 11 ||
[Analyze grammar]

pulastya uvāca |
yasya smaraṇamātreṇa mahāpātakasaṃtatiḥ |
paramāṃtamavāpnoti sa viṣṇuḥ sarvado dhruva || 12 ||
[Analyze grammar]

pulaha uvāca |
yadāhuḥ paramaṃ brahma pradhāna puruṣātparam |
yanmāyayā tataṃ sarvaṃ sarvaṃ dāsyati socyutaḥ || 13 ||
[Analyze grammar]

kraturuvāca |
yo yajñapuruṣo viṣṇurvedavedyo janārdanaḥ |
aṃtarātmā'sya jagataḥ tuṣṭaḥ kiṃ na yacchati || 14 ||
[Analyze grammar]

vasiṣṭha uvāca |
yadbhrūnartanavartinyaḥ siddhayo'ṣṭau nṛpātmaja |
tamārādhya hṛṣīkeśamapavargopyadūrataḥ || 15 ||
[Analyze grammar]

dhruva uvāca |
satyamuktaṃ munīśānā viṣṇorārādhanaṃ prati |
kathaṃ vā bhagavānījyaḥ savidhiścopadiśyatām || 16 ||
[Analyze grammar]

munaya ūcuḥ |
tiṣṭhatā gacchatā vāpi svapatā jāgratā tathā |
śayānenopaviṣṭena japyo nārāyaṇaḥ sadā || 17 ||
[Analyze grammar]

dvādaśākṣaramaṃtreṇa vāsudevātmakena ca |
dhyāyaṃścaturbhujaṃ viṣṇuṃ japtvā siddhiṃ na ko gataḥ || 18 ||
[Analyze grammar]

atasīpuṣpasaṃkāśaṃ pītavāsasamacyutam |
kṣaṇaṃ sarvātmakaṃ paśyanko na sidhyati bhūtale || 19 ||
[Analyze grammar]

putrānkalatramitrāṇi rājyaṃ svargāpavargakam |
vāsudevaṃ japanmartyaḥ sarvaṃ prāpnotyasaṃśayam || 120 ||
[Analyze grammar]

vāsudeva japāsaktānapipāpakṛto janān |
nopaspṛśaṃti vai vighnā yamadūtāśca dāruṇāḥ || 21 ||
[Analyze grammar]

pitāmahena tepyeṣa mahāmaṃtra upāsitaḥ |
manunā rājyakāmena vaiṣṇavena maharddhinā || 22 ||
[Analyze grammar]

tvamapyetena maṃtreṇa vāsudevaparo bhava |
yathābhilaṣitāmṛddhiṃ kṣipramāpnuhi sattama || 23 ||
[Analyze grammar]

ityuktvāṃ'tarhitāḥ sarve mahātmāno munīśvarāḥ |
vāsudevamanā bhūtvā dhruvopi tapase gataḥ || 124 ||
[Analyze grammar]

iti śrīskāṃde mahāpurāṇa ekāśītisāhasyāṃ saṃhitāyāṃ caturthe kāśīkhaṃḍe pūvārddhe dhruvalokavarṇane dhuvopadeśonāmaikonaviṃśatitamo'dhyāyaḥ || 19 ||
[Analyze grammar]