Chapter 9

[English text for this chapter is available]

śivaśarmovāca |
kā imā rūpalāvaṇya saubhāgyanidhayaḥ striyaḥ |
divyālaṃkāradhāriṇyo divyabhogasamanvitāḥ || 1 ||
[Analyze grammar]

gaṇāvūcatuḥ |
etā vāravilāsinyo yajñabhājāṃ priyaṃkarāḥ |
gītajñā nṛtyakuśalā vādyavidyā vicakṣaṇāḥ || 2 ||
[Analyze grammar]

kāmakelikalābhijñā dyūtavidyāviśāradāḥ |
rasajñā bhāvavedinyaścaturāścocitoktiṣu || 3 ||
[Analyze grammar]

nānādeśa viśeṣajñā nānābhāṣā sukovidāḥ |
saṃketodaṃtanipuṇā naikāsvairacarā mudā || 4 ||
[Analyze grammar]

līlānarmasusābhijñāḥ supralāpeṣu paṃḍitāḥ |
yūnāṃ manāṃsi satataṃ svairhāvai ramayaṃtyamūḥ || 5 ||
[Analyze grammar]

nirmathyamānātkṣīrodātpūrvamapsarasastvamūḥ |
niḥsṛtāstrijagajjeturmohanāstramanobhuvaḥ || 6 ||
[Analyze grammar]

urvaśī menakā raṃbhā caṃdralekhā tilottamā |
vapuṣmatīkāṃtimatī līlāvatyutpalāvatī || 7 ||
[Analyze grammar]

alaṃbuṣā guṇavatī sthūlakeśī kalāvatī |
kalānidhirguṇanidhiḥ karpūratilakorvarā || 8 ||
[Analyze grammar]

anaṃgalatikā cāpi tathā madanamohinī |
cakorākṣī caṃdrakalā tathā munimanoharā || 9 ||
[Analyze grammar]

grāvadrāvā tapodveṣṭī cārunāsā sukarṇikā |
dārusaṃjīvinī suśrīḥ kratuśulkā śubhānanā || 10 ||
[Analyze grammar]

tapaḥśulkā tīrthaśulkā dānaśulkā himāvatī |
paṃcāśvamedhikā caiva rājasūyārthinī tathā || 11 ||
[Analyze grammar]

aṣṭāgnihomikā tadvadvājapeyaśatodbhavā |
ityādyapsarasāṃ śreṣṭhaṃ sahasraṃ ṣaṣṭisaṃmitam || 12 ||
[Analyze grammar]

etasminnapsaroloke vasaṃtyanyā apistriyaḥ |
sadā skhalitalāvaṇyāḥ sadāskhalitayauvanāḥ || 13 ||
[Analyze grammar]

divyāṃbarā divyamālyā divyagaṃdhānulepanāḥ |
divyabhogaiḥ susaṃpannāḥ svecchāvidhṛtavigrahāḥ || 14 ||
[Analyze grammar]

kṛtvā māsopavāsāni skhalaṃti brahmacaryataḥ |
sakṛdeva dvikṛtvo vā triḥkṛtvo daivayogataḥ || 15 ||
[Analyze grammar]

tā imā divyabhoginyo rūpalāvaṇyasaṃpadaḥ |
nivasaṃtyapsaroloke sarvakāmasamanvitāḥ || 16 ||
[Analyze grammar]

kṛtvā vratāni sāṃgāni kāmikāni vidhānataḥ |
bhavaṃti svairacāriṇyo devabhogyā ihāgatāḥ || 17 ||
[Analyze grammar]

pativratadhṛtā nāryo balena balinā dhṛtāḥ |
bhartabuddhyāramaṃtetaṃ kadācittā imā dvija || 18 ||
[Analyze grammar]

bhartari proṣite yāśca brahmacaryavratāḥ sadā |
viplavaṃ te sakṛddaivāttā etā vāmalocanāḥ || 19 ||
[Analyze grammar]

kusumāni sugaṃdhīni suvāsaṃ caṃdanaṃ tathā |
sugauraṃ cāpi karpūraṃ susūkṣmāṇyaṃbarāṇi ca || 20 ||
[Analyze grammar]

parṇāni ṛjutārāṇi jīrṇāni kaṭhināni ca |
sāgrāṇi svarṇavarṇāni sthūlanīlaśirāṇi ca || 21 ||
[Analyze grammar]

suvāsopaskarāḍhyāni nāgavallyā dvijottama |
śayyāvicitrābharaṇā ratiśālocitāni ca || 22 ||
[Analyze grammar]

bahukautukavastūni samarcyadvijadaṃpatī |
bhogadānamidaṃ kāmyaṃ pratisaṃkramaṇaṃ raveḥ || 23 ||
[Analyze grammar]

kiṃvā prativyatīpātamekasaṃvatsarāvadhi |
kodāditi ca maṃtreṇa yā dadyādvaravarṇinī || 24 ||
[Analyze grammar]

kāmarūpadharo devaḥ prīyatāmiti vādinī |
sā śreṣṭhā'psarasāṃ madhye vasetkalpamihāṃganā || 25 ||
[Analyze grammar]

kanyārūpadharākācidyābhuktā kenacitkvacit |
devarūpeṇa taṃ kālamārabhya brahmacāriṇī || 26 ||
[Analyze grammar]

tadeva vṛttaṃ dhyāyaṃtī nidhanaṃ yāti kālataḥ |
divyarūpadharā seha jāyate divya bhogabhāk || 27 ||
[Analyze grammar]

nidānamapsarolokasyetiśṛṇvandvijāgraṇīḥ |
sauraṃ lokamatha prāpya kṣaṇena sa vimānagaḥ || 28 ||
[Analyze grammar]

yathā kadaṃbakusumaṃ kiṃjalkaiḥ sarvatovṛtam |
dedīpyamānaṃ hi tathā samaṃtādbhānubhānubhiḥ || 29 ||
[Analyze grammar]

dūrādraviṃ sa vijñāya dhṛtatāmarasadvayam |
navabhiryojanānāṃ ca sahasraiḥ saṃmitena ha || 30 ||
[Analyze grammar]

vicitreṇaikacakreṇa saptasaptiyutena ca |
anūruṇādhiṣṭhitena puratodhṛtaraśminā || 31 ||
[Analyze grammar]

apsaromunigaṃdharva sarpagrāmaṇi nairṛtaiḥ |
syaṃdanenātijavinā praṇanāma kṛtāṃjaliḥ || 32 ||
[Analyze grammar]

tasya praṇāmaṃdevopi bhrūbhaṃgenānumanya ca |
atidūraṃ nabhovartma vyaticakrāma sakṣaṇāt || 33 ||
[Analyze grammar]

prakrāṃte dyumaṇau dūraṃ śivaśarmātiśarmavān |
provāca bhagavadbhaktau kathaṃ labhyaṃ raveḥ padam || 34 ||
[Analyze grammar]

etadicchāmyahaṃ śrotumācakṣāthāṃ mamāgrataḥ |
satāṃ sāptapadī maitrī tanme maitryā praṇoditau || 35 ||
[Analyze grammar]

gaṇāvūcatuḥ |
śṛṇu dvija mahāprājña tvayyakathyaṃ na kiṃcana |
satsaṃgādeva sādhūnāṃ satkathā saṃpravartate || 36 ||
[Analyze grammar]

niyaṃtā sarvabhūtānāṃ ya ekaḥkāraṇaṃ param |
anāmā gotrarahito rūpādi parivarjitaḥ || 37 ||
[Analyze grammar]

āvirbhāva tirobhāvau yadbhūnartanavartinau |
sa eva vakti satataṃ sarvātmā vedapūruṣaḥ || 38 ||
[Analyze grammar]

yosāvādityapuruṣaḥ sosāvahamiti sphuṭam |
aṃdhatamaḥ praviśaṃti ye caivānyamupāsate || 39 ||
[Analyze grammar]

niścitārthāṃ śrutimimāṃ brāhmaṇāso dvijottama |
tamekamupatiṣṭhaṃte niścityeti punaḥpunaḥ || 40 ||
[Analyze grammar]

upalabhya ca sāvitrīṃ nopatiṣṭheta yaḥ parām |
kāle trikālaṃ saptāhātsa patennātra saṃśayaḥ || 41 ||
[Analyze grammar]

tāvatprātarjapaṃstiṣṭhedyāvadardhodayo raveḥ |
āsanastho japenmaunī pratyagātārakodayāt || 42 ||
[Analyze grammar]

sādityāṃ madhyamāṃ saṃdhyāṃ japedādityasaṃmukhaḥ |
kālalopo na kartavyastataḥ kālaṃ pratīkṣayet || 43 ||
[Analyze grammar]

kāle phalaṃtyoṣadhayaḥ kāle puṣpaṃti pādapāḥ |
varṣaṃti toyadāḥ kāle tasmātkālaṃ na laṃghayet || 44 ||
[Analyze grammar]

maṃdehadehanāśārthamudayāstamaye raviḥ |
samīhate dvijotsṛṣṭaṃ maṃtratoyāṃjalitrayam || 45 ||
[Analyze grammar]

gāyatrīmaṃtratoyāḍhyaṃ dattaṃ yenāṃjalitrayam |
kāle savitre kiṃ na syāttena dattaṃ jagattrayam || 46 ||
[Analyze grammar]

kiṃ kiṃ na savitā sūte kāle samyagupāsitaḥ |
āyurārogyamaiśvaryaṃ vasūni sapaśūni ca || 47 ||
[Analyze grammar]

mitraputra kalatrāṇi kṣetrāṇi vividhāni ca |
bhogānaṣṭavidhāṃścāpi svargaṃ cāpyapavargakam || 48 ||
[Analyze grammar]

aṣṭādaśa suvidyāsu mīmāṃsātigarīyasī |
tatopi tarkaśāstrāṇi purāṇaṃ tebhya eva ca || 49 ||
[Analyze grammar]

tatopi dharmaśāstrāṇi tebhyo gurvī śrutirdvija |
tatopyupaniṣacchreṣṭhā gāyatrī ca tatodhikā || 50 ||
[Analyze grammar]

durlabhā sarvamaṃtreṣu gāyatrī praṇavānvitā |
na gāyatryādhikaṃ kiṃcittrayīṣu parigīyate || 51 ||
[Analyze grammar]

na gāyatrī samo maṃtro na kāśī sadṛśī purī |
na viśveśa samaṃ liṃgaṃ satyaṃsatyaṃ punaḥpunaḥ || 52 ||
[Analyze grammar]

gāyatrī vedajananī gāyatrī brāhmaṇaprasūḥ |
gātāraṃ trāyate yasmādgāyatrī tena gīyate || 53 ||
[Analyze grammar]

vācyavācakasaṃbaṃdho gāyatryāḥ saviturdvayoḥ |
vācyosau savitā sākṣādgāyatrīvācikāparā || 54 ||
[Analyze grammar]

prabhāveṇaiva gāyatryāḥ kṣatriyaḥ kauśiko vaśī |
rājarṣitvaṃ parityajya brahmarṣipadamīyivān || 55 ||
[Analyze grammar]

sāmarthyaṃ prāpa cātyuccairanyadbhuvanasarjane |
kiṃ kiṃ na dadyādgāyatrī samyagevamupāsitā || 56 ||
[Analyze grammar]

na brāhmaṇo vedapāṭhānna śāstrapaṭhanādapi |
devyāstrikālamabhyāsādbāhmaṇaḥ syāddhi nānyathā || 57 ||
[Analyze grammar]

gāyatryeva paraṃ viṣṇurgāyatryeva paraḥśivaḥ |
gāyatryeva parobrahmā gāyatryeva trayī tataḥ || 58 ||
[Analyze grammar]

devatrayaṃ sa bhagavānaṃśumālī divākaraḥ |
sarveṣāṃ mahasāṃ rāśiḥ kālakālapravartakaḥ || 59 ||
[Analyze grammar]

arkamuddiśya satatamasmallokanivāsinaḥ |
śrutiṃ hyudāharaṃtīmāṃ sārāsāravivekinaḥ || 60 ||
[Analyze grammar]

eṣo ha devaḥ pradiśonu sarvāḥ pūrvo ha jātaḥ sa u garbhe aṃtaḥ |
sa eva jātaḥ sa janiṣyamāṇaḥ pratyaṅjānāstiṣṭhati sarvatomukhaḥ || 61 ||
[Analyze grammar]

sadaivamupatiṣṭheransaurasūktairataṃdritāḥ |
ye namaṃtyatra te viprā viprā bhāskarasannibhāḥ || 62 ||
[Analyze grammar]

puṣyārkepyatha hastārke mūlārkepyathavā dvija |
uttarārke'tha yatkāryaṃ tatphalatyeva nānyathā || 63 ||
[Analyze grammar]

pauṣe māsyarkadivase yaḥ snātvā bhāskarodaye |
dānahomaṃjapaṃkuryādarcāmarkasya suvrata || 64 ||
[Analyze grammar]

śraddhāvānekabhaktaśca kāmakrodhavivarjitaḥ |
sahāpsarobhirdyutimānsa vasedatra bhogavān || 65 ||
[Analyze grammar]

ayane viṣuve cāpi ṣaḍaśītimukheṣu vā |
viṣṇupadyāṃ ca ye dadyurmahādānāni suvratāḥ || 66 ||
[Analyze grammar]

tilāñjuhvati sājyāṃśca brāhmaṇānbhojayaṃti ca |
pitṝnuddiśya ca śrāddhaṃ ye kurvaṃti vipaścitaḥ || 67 ||
[Analyze grammar]

mahāpūjāṃ ca ye kuryurmahāmaṃtrāñjapaṃti ca |
te'tra vaikartane loke vikartanasamaprabhā || 68 ||
[Analyze grammar]

na daridrā na ca duḥkhārtā na vyādhi paripīḍitāḥ |
saṃkrameṣvarkabhaktā ye na virūpā na durbhagāḥ || 69 ||
[Analyze grammar]

saṃkrameṣu na yairdattaṃ na snātaṃ tīrthavāriṣu |
viśeṣahomo na kṛtaḥ kapilājyāplutaistilaiḥ || 70 ||
[Analyze grammar]

te dṛśyaṃte pratidvāraṃ vihīna nayanānanāḥ |
dehidehīti jalpaṃto dehinaḥ sapaṭaccarāḥ || 71 ||
[Analyze grammar]

samaṃ kṛṣṇalakenāpi yo dadyātkāṃcanaṃ kṛtī |
sūryagrahe kurukṣetre sa vasedatra puṇyabhāk || 72 ||
[Analyze grammar]

sarvaṃ gaṃgāsamaṃ toyaṃ sarve brahmasamā dvijāḥ |
sarvaṃ deyaṃ svarṇasamaṃ rāhugraste divākare || 73 ||
[Analyze grammar]

dattaṃ japtaṃ hutaṃ snātaṃ yatkiṃcitsadanuṣṭhitam |
bhānūparāge śrāddhādi taddheturbradhna saṃnidhe || 74 ||
[Analyze grammar]

ravivāre saṃkramaśceduparāgo'thavābhavet |
tadā yadarjitaṃ puṇyaṃ tadihākṣayamāpyate || 75 ||
[Analyze grammar]

bhānuvāro yadā ṣaṣṭhyāṃ saptamyāmatha jāyate |
tadā yatsukṛtaṃ karma kṛtaṃ tadiha bhujyate || 76 ||
[Analyze grammar]

haṃso bhānuḥ sahasrāṃśustapanastāpano ravi |
vikartano vivasvāṃśca viśvakarmā vibhāvasuḥ || 77 ||
[Analyze grammar]

viśvarūpo viśvakartā mārtaṃḍo mihiroṃ'śumān |
ādityaścoṣṇaguḥ sūryo'ryamā bradhno divākaraḥ || 78 ||
[Analyze grammar]

dvādaśātmā saptahayo bhāskaro haskaraḥ khagaḥ |
suraḥ prabhākaraḥ śrīmāṃllokacakṣurgraheśvaraḥ || 79 ||
[Analyze grammar]

trilokeśo lokasākṣītamoriḥ śāśvataḥ śuciḥ |
gabhastihastastīvrāṃśustaraṇiḥ sumahoraṇiḥ || 80 ||
[Analyze grammar]

dyumaṇirharidaśvorko bhānumānbhayanāśanaḥ |
chandośvo vedavedyaśca bhāsvānpūṣā vṛṣākapiḥ || 81 ||
[Analyze grammar]

ekacakraratho mitro maṃdehāristamisrahā |
daityahā pāpahartā ca dharmodharma prakāśakaḥ || 82 ||
[Analyze grammar]

helikaścitrabhānuśca kalighnastārkṣyavāhanaḥ |
dikpatiḥ padminīnāthaḥ kuśeśayakaro hariḥ || 83 ||
[Analyze grammar]

gharmaraśmirdurnirīkṣyaścaṃḍāṃśuḥ kaśyapātmajaḥ |
ebhiḥ saptatisaṃkhyākaiḥ puṇyaiḥ sūryasya nāmabhiḥ || 84 ||
[Analyze grammar]

praṇavādi caturthyaṃtairnamaskāra samanvitaiḥ |
pratyekamuccarannāma dṛṣṭvādṛṣṭvā divākaram || 85 ||
[Analyze grammar]

vigṛhya pāṇiyugmena tāmrapātraṃ sunirmalam |
jānubhyāmavaniṃ gatvā paripūrya jalena ca || 86 ||
[Analyze grammar]

karavīrādi kusumai raktacaṃdanamiśritaiḥ |
dūrvāṃkurairakṣataiśca nikṣiptaiḥ pātramadhyataḥ || 87 ||
[Analyze grammar]

dadyādarghyamanarghyāya savitre dhyānapūrvakam |
upamauli samānīya tatpātraṃ nānyadṛṅmanāḥ || 88 ||
[Analyze grammar]

pratimaṃtraṃ namaskuryādudayāstamaye ravim |
anayā nāmasaptatyā mahāmaṃtrarahasyayā || 89 ||
[Analyze grammar]

evaṃ kurvannaro jātu na daridro na duḥkhabhāk |
vyādhibhirmucyate ghorairapijanmāṃtarārjitaiḥ || 90 ||
[Analyze grammar]

vinauṣadhairvinā vaidyairvināpathyaparigrahaiḥ |
kālena nidhanaṃ prāptaḥ sūryaloke mahīyate || 91 ||
[Analyze grammar]

ityekadeśaḥ kathito bhānulokasya sattama |
mahātejonidherasya koviśeṣamavaityaho || 92 ||
[Analyze grammar]

svakarṇaviṣayīkurvannitipuṇyakathāmimām |
kṣaṇādālokayāṃcakre maheṃdrasya mahāpurīm || 93 ||
[Analyze grammar]

agastiruvāca |
śrutvā saurīṃ kathametāmapsarolokasaṃyutām |
na daridro bhavetkvāpi nādharmeṣu pravartate || 94 ||
[Analyze grammar]

brāhmaṇaiḥ satataṃ śrāvyamidamākhyānamuttamam |
vedapāṭhena yatpuṇyaṃ tatpuṇyaphaladāyakam || 95 ||
[Analyze grammar]

brāhmaṇāḥ kṣatriyā vaiśyāḥ śṛṇvaṃto'dhyāyamuttamam |
pātakāni visṛjyeha gatiṃ yāsyaṃtyanuttamām || 96 ||
[Analyze grammar]

iti śrīskāṃdamahāpurāṇa ekāśītisāhasryāṃ saṃhitāyāṃ caturthe kāśīkhaṃḍe pūrvārdhe apsaraḥsūryalokavarṇanaṃnāmanavamo'dhyāyaḥ || 9 ||
[Analyze grammar]