Chapter 10

[English text for this chapter is available]

śivaśarmovāca |
ramayaṃtī manotīva keyaṃ kasyeyamīśituḥ |
nayanānaṃdasaṃdohadāyinīpūranuttamā || 1 ||
[Analyze grammar]

gaṇāvūcatuḥ |
śivaśarmanmahābhāgasutīrthaphalitadruma |
loko'tra ramate vipra sahasākṣapurī tviyam || 2 ||
[Analyze grammar]

tapobalena mahatā vihitā viśvakamarṇā |
divāpi kaumudī yasyāḥ saudhaśreṇīśriyaṃ śrayet || 3 ||
[Analyze grammar]

yadākalānidhiḥ kvāpi darśe 'dṛśyatvamāvahet |
tadā svapreyasīṃ jyotsnāṃ saudheṣveṣu nigūhayet || 4 ||
[Analyze grammar]

yadacchabhittau vīkṣya svamanyayopidviśaṃkitā |
mugdhānāśuviśeccitramapisvāṃcitraśālikām || 5 ||
[Analyze grammar]

harmyeṣu nīlamaṇibhirnirmiteṣvatranirbhayam |
svanīlimānamādhāya tamohaḥsvapi tiṣṭhati || 6 ||
[Analyze grammar]

caṃdrakāṃtaśilājālasrutamātrāmalaṃjalam |
tatra cādāya kalaśairnecchaṃtyanyajjalaṃ janāḥ || 7 ||
[Analyze grammar]

kuviṃdā na ca saṃtyatra na ca te paśyato harāḥ |
cailānyalaṃkṛtīratra yataḥ kalpadrumorpayet || 8 ||
[Analyze grammar]

gaṇakā nātra vidyaṃte ciṃtāvidyāviśāradāḥ |
yataściketi sarveṣāṃ ciṃtā ciṃtāmaṇirdrutam || 9 ||
[Analyze grammar]

sūpakārā na saṃtyatra rasakarma vicakṣaṇāḥ |
dugdhe sarvarasānekā kāmadhenuratoyataḥ || 10 ||
[Analyze grammar]

kīrtiruccaiḥśravā yasya sarvato vājirājiṣu |
ratnamuccaiḥśravāḥ sotra hayānāṃ pauruṣādhikaḥ || 11 ||
[Analyze grammar]

airāvato daṃtivaraścaturdaṃtotra rājate |
dvitīya iva kailāso jaṃgamasphaṭikojjvalaḥ || 12 ||
[Analyze grammar]

taruratnaṃpārijātaḥ strīratnaṃ sorvaśī tviha |
naṃdanaṃ vanaratnaṃ ca ratnaṃ maṃdākinī hyapām || 13 ||
[Analyze grammar]

trayastriṃśatsurāṇāṃ yā koṭiḥ śruti samīritā |
pratīkṣate sā'vasaraṃ sevāyai pratyahaṃtviha || 14 ||
[Analyze grammar]

svargeṣviṃdrapadādanyanna viśiṣyeta kiṃcana |
yadyattrilokyāmaiśvaryaṃ na tattulyamanena hi || 15 ||
[Analyze grammar]

aśvamedhasahasrasya labhyaṃ vinimayena yat |
kiṃ tena tulyamanyatsyātpavitramathavā mahata || 16 ||
[Analyze grammar]

arciṣmatī saṃyaminī puṇyavatyamalāvatī |
gaṃdhavatyalakeśī ca naitattulyā mahardhibhiḥ || 17 ||
[Analyze grammar]

ayameva sahasrākṣastvayameva divaspatiḥ |
śatamanyurayaṃ devo nāmānyetāni nāmataḥ || 18 ||
[Analyze grammar]

saptāpi lokapālā ye ta enaṃ samupāsate |
nāradādyairmunivarairayamāśīrbhirīḍyate || 19 ||
[Analyze grammar]

etatsthairyeṇa sarveṣāṃ lokānāṃ sthairyamiṣyate |
parājayānmaheṃdrasya trailokyaṃ syātparājitam || 20 ||
[Analyze grammar]

danujā manujā daityāstapasyaṃtyugrasaṃyamāḥ |
gaṃdharva yakṣarakṣāṃsi maheṃdrapadalipsavaḥ || 21 ||
[Analyze grammar]

sagarādyā mahīpālā vājimedhavidhāyakāḥ |
kṛtavaṃto mahāyatnaṃ śakraiśvaryajighṛkṣavaḥ || 22 ||
[Analyze grammar]

niṣpratyūhaṃ kratuśataṃ yaḥ kaścitkurute'vanau |
jiteṃdriyomarāvatyāṃ sa prāpnoti pulomajām || 23 ||
[Analyze grammar]

asamāptakratuśatā vasaṃtyatra mahībhujaḥ |
jyotiṣṭomādibhiryāgairye yajaṃtyapi te dvijāḥ || 24 ||
[Analyze grammar]

tulāpuruṣadānādi mahādānāni ṣoḍaśa |
ye yacchaṃtyamalātmānaste labhaṃte'marāvatīm || 25 ||
[Analyze grammar]

aklībavādino dhīrāḥ saṃgrāmeṣvaparāṅmukhāḥ |
vikrāṃtā vīraśayane te'tra tiṣṭhaṃti bhūbhujaḥ || 26 ||
[Analyze grammar]

ityuddeśātsamākhyātā maheṃdranagarī sthitiḥ |
yāyajūkā vasaṃtyatra yajñavidyāviśāradāḥ || 27 ||
[Analyze grammar]

imāmarciṣmatīṃ paśya vītihotrapurīṃ śubhām |
jātavedasi ye bhaktāste vasaṃtyatra suvratāḥ || 28 ||
[Analyze grammar]

agnipraveśaṃ ye kuryurdṛḍhasattvā jiteṃdriyāḥ |
striyo vā sattvasaṃpannāste sarve agnitejasaḥ || 29 ||
[Analyze grammar]

agnihotraratā viprāstathāgnibrahmacāriṇaḥ |
paṃcāgnivratino ye vai te'gnilokegnitejasaḥ || 30 ||
[Analyze grammar]

śīte śītāpanutyai yastvidhmabhārānprayacchati |
kuryādagniṣṭikāṃ vā'tha sa vasedagnisannidhau || 31 ||
[Analyze grammar]

anāthasyāgnisaṃskāraṃ yaḥ kuryācchraddhayānvitaḥ |
aśaktaḥ prerayedanyaṃ sogniloke mahīyate || 32 ||
[Analyze grammar]

jaṭharāgnivivṛddhyai yo dadyādāgneyamauṣadham |
maṃdāgnaye sa puṇyātmā vahniloke vasecciram || 33 ||
[Analyze grammar]

yajñopaskara vastūni yajñārthaṃ draviṇaṃ tu vā |
yathāśakti pradadyādyo hyarciṣmatyāṃvasetsa vai || 34 ||
[Analyze grammar]

agnireko dvijātīnāṃ niḥśreyasakaraḥ paraḥ |
gururdevo vrataṃ tīrthaṃ sarvamagnirviniścitam || 35 ||
[Analyze grammar]

apāvanāni sarvāṇi vahnisaṃsargataḥ kṣaṇāt |
pāvanāni bhavaṃtyeva tasmādyaḥ pāvakaḥ smṛtaḥ || 36 ||
[Analyze grammar]

api vedaṃ viditvā yastyaktvā vai jātavedasam |
anyatra badhnāti ratiṃ brāhmaṇo na sa vedavit || 37 ||
[Analyze grammar]

aṃtarātmā hyayaṃ sākṣānniścito hyāśuśukṣaṇiḥ |
māṃsagrāsānpacetkukṣau strīṇāṃ no māṃsapeśikām || 38 ||
[Analyze grammar]

taijasī śāṃbhavī mūrtiḥ pratyakṣā dahanātmikā |
kartrī haṃtrī pālayitrī vinaināṃ kiṃ vilokyate || 39 ||
[Analyze grammar]

citrabhānurayaṃ sākṣānnetraṃ tribhuvaneśituḥ |
aṃdhaṃ tamomaye loke vinainaṃ kaḥ prakāśakaḥ || 40 ||
[Analyze grammar]

dhūpapradīpanaivedya payo dadhi ghṛtaikṣavam |
etadbhuktaṃ niṣevaṃte sarve divi divaukasaḥ || 41 ||
[Analyze grammar]

śivaśarmovāca |
koyaṃ kṛśānuḥ kasyāyaṃ sūnuḥ kathamidaṃ padam |
āgneyaṃ labdhametena brūtametanmamāgrataḥ || 42 ||
[Analyze grammar]

gaṇāvūcatuḥ |
ākarṇaya mahāprājña varṇayāvo yathātatham |
yoyaṃ yasya yathā'nena prāpi jyotiṣmatīpurī || 43 ||
[Analyze grammar]

narmadāyāstaṭe ramye pure narmapure purā |
purāribhaktaḥ puṇyātmā'bhavadviśvānaro muniḥ || 44 ||
[Analyze grammar]

brahmacaryāśrame niṣṭho brahmayajñarataḥsadā |
śāṃḍilyagotraḥ śucimānbrahmatejo nidhirvaśī || 45 ||
[Analyze grammar]

vijñātākhilaśāstrārtho laukikācāracaṃcuraḥ |
kadācicciṃtayāmāsa hṛdi dhyātvā maheśvaram || 46 ||
[Analyze grammar]

caturṇāmapyāśramāṇāṃ kotīva śreyase satām |
yasminprāpnoti saṃkṣuṇṇe paratreha ca vā sukham || 47 ||
[Analyze grammar]

idaṃ śreyastvidaṃ śreyastvidaṃ tu sukaraṃ bhavet |
itthaṃ sarvaṃ samāloḍya gārhasthyaṃ praśaśaṃsa ha || 48 ||
[Analyze grammar]

brahmacārī gṛhastho vā vānaprastho'tha bhikṣukaḥ |
eṣāmādhārabhūtosau gṛhastho nānyatheti ca || 49 ||
[Analyze grammar]

devairmanuṣyaiḥ pitṛbhistiryagbhiścopajīvyate |
gṛhasthaḥ pratyahaṃ yasmāttasmācchreṣṭho gṛhāśramī || 50 ||
[Analyze grammar]

asnātvā cāpyahutvā vā'dattvā vāśnāti yo gṛhī |
devādīnāmṛṇī bhūtvā narakaṃ pratipadyate || 51 ||
[Analyze grammar]

asnātāśī malaṃ bhuṃkte tvajapī pūyaśoṇitam |
ahutāśī kṛmīnbhuṃktepyadattvāviḍvibhojanaḥ || 52 ||
[Analyze grammar]

brahmacaryaṃ hi gārhasthye yādṛkkalpanayojjhitam |
svabhāvacapale citte kva tādṛgbrahmacāriṇi || 53 ||
[Analyze grammar]

haṭhādvā lokabhītyā vā svārthādvā brahmacaryabhāk |
saṃkalpayati citte cetkṛtamapyakṛtaṃ tadā || 54 ||
[Analyze grammar]

paradāraparityāgātsvadāraparituṣṭitaḥ |
ṛtukālābhigāmitvādbrahmacārī gṛhīritaḥ || 55 ||
[Analyze grammar]

vimuktarāgadveṣo yaḥ kāmakrodhavivarjitaḥ |
sāgniḥ sadāraḥ sa gṛhī vānaprasthādviśiṣyate || 56 ||
[Analyze grammar]

vairāgyādgṛhamutsṛjya gṛhadharmānhṛdi smaret |
sa bhavedubhayabhraṣṭo vānaprastho na vā gṛhī || 57 ||
[Analyze grammar]

ayācitopasthitayā yo vṛttyā vartate gṛhī |
yena kenāpi saṃtuṣṭo bhikṣukātsa viśiṣyate || 58 ||
[Analyze grammar]

prāthayedyatkvacitkiṃcidduṣprāpaṃ vā bhaviṣyati |
aśaneṣu na saṃtuṣṭaḥ sa yatiḥ patito bhavet || 59 ||
[Analyze grammar]

guṇāguṇavicāryetthaṃ sa vai viśvānaro dvijaḥ |
udvavāha vidhānena svocitāṃ kulakanyakām || 60 ||
[Analyze grammar]

agniśuśrūṣaṇarataḥ paṃcayajñaparāyaṇaḥ |
ṣaṭkarmanirato nityaṃ devapitratithipriyaḥ || 61 ||
[Analyze grammar]

dharmārthakāmānyuktātmā sorjayansvasvakālataḥ |
parasparamasaṃkocaṃ daṃpatyorānukūlyataḥ || 62 ||
[Analyze grammar]

pūrvāhṇe daivikaṃ karma sokarotkarmakāṃḍavit |
madhyaṃdine manuṣyāṇāṃ pitṝṇāmaparāhnake || 63 ||
[Analyze grammar]

evaṃ bahutithe kāle gate tasyāgrajanmanaḥ |
bhāryā śuciṣmatī nāma kāmapatnī vasuvratā || 64 ||
[Analyze grammar]

apaśyaṃtyaṃkuramapi saṃtateḥ svargasādhanam |
vijñāya śaṃkaṃraṃ kāṃtaṃ praṇipatya vyajijñapat || 65 ||
[Analyze grammar]

śuciṣmatyuvāca |
āryaputrāryadhiṣaṇa prāṇanātha priyavrata |
na durlabhaṃ mamāstīha kiṃcittvaccaraṇārcanāt || 66 ||
[Analyze grammar]

ye vai bhogāḥ samucitāḥ strīṇāṃ te tvatprasādataḥ |
alaṃkṛtya mayā bhuktāḥ prasaṃgādvacmi tānyapi || 67 ||
[Analyze grammar]

suvāsāṃsi suvāsāśca suśayyā sunitaṃbinī |
sraktāṃbūlānnapānāśca aṣṭau bhogāḥ svadharmiṇām || 68 ||
[Analyze grammar]

ekaṃ me prārthitaṃ nātha cirāya hṛdisaṃsthitam |
gṛhasthānāṃ samucitaṃ tattvaṃ dātumihārhasi || 69 ||
[Analyze grammar]

viśvānara uvāca |
kimadeyaṃ hi suśroṇi tava priyahitaiṣiṇi |
tatprārthaya mahābhāge prayacchāmyavilaṃbitam || 70 ||
[Analyze grammar]

maheśituḥ prasādena mama kiṃcinna durlbham |
ihāmutra ca kalyāṇi sarvakalyāṇakāriṇaḥ || 71 ||
[Analyze grammar]

iti śrutvā vacaḥ patyustasya sā patidevatā |
uvāca hṛṣṭavadanā yadi deyo varo mama || 72 ||
[Analyze grammar]

varayogyāsmi cennātha nānyaṃ varamahaṃ vṛṇe |
maheśasadṛśaṃ putraṃ dehi māheśvarānava || 73 ||
[Analyze grammar]

iti tasyā vacaḥ śrutvā śuciṣmatyāḥ śucivrataḥ |
kṣaṇaṃ samādhimādhāya hṛ dyetatsamaciṃtayat || 74 ||
[Analyze grammar]

aho kimetayā tanvyā prārthitaṃ hyatidurlabham |
manorathapathāddūramastuvā sa hi sarvakṛt || 75 ||
[Analyze grammar]

tenaivāsyā mukhe sthitvā vāksvarūpeṇa śaṃbhunā |
vyāhṛtaṃ ko'nyathākartumutsaheta bhavedidam || 76 ||
[Analyze grammar]

tataḥ provāca tāṃ patnīmekapatnivrate sthitaḥ |
viśvānaramuniḥ śrīmāniti kāṃte bhaviṣyati || 77 ||
[Analyze grammar]

itthamāśvāsya tāṃ patnīṃ jagāma tapase muniḥ |
yatra viśveśvaraḥ sākṣātkāśīnāthodhitiṣṭhati || 78 ||
[Analyze grammar]

prāpya vārāṇasīṃ tūrṇaṃ dṛṣṭvātha maṇikarṇikām |
tatyāja tāpatritayamapijanmaśatārjitam || 79 ||
[Analyze grammar]

dṛṣṭvā sarvāṇi liṃgāni viśveśa pramukhāni ca |
snātvā sarveṣu kuṃḍeṣu vāpīkūṭasaraḥsu ca || 80 ||
[Analyze grammar]

natvā vināyakānsarvāngaurīḥ sarvāḥ praṇamya ca |
saṃpūjya kālarājaṃ ca bhairavaṃ pāpabhakṣaṇam || 81 ||
[Analyze grammar]

daṇḍanāyakamukhyāṃśca gaṇānstutvā prayatnataḥ |
ādikeśavamukhyāṃśca keśavānparitoṣya ca || 82 ||
[Analyze grammar]

lolārkamukhya sūryāṃśca praṇamya ca punaḥ punaḥ |
kṛtvā piṇḍapradānāni sarvatīrtheṣvataṃdritaḥ || 83 ||
[Analyze grammar]

sahasrabhojanādyaiśca yatīnviprānpratarpya ca |
mahāpūjopacāraiśca liṃgānyabhyarcya bhaktitaḥ || 84 ||
[Analyze grammar]

asakṛccintayāmāsa kiṃ liṃgaṃ kṣiprasiddhidam |
yatra niścalatāmeti tapastanayakāmyayā || 85 ||
[Analyze grammar]

śrīmadoṃkāranāthaṃ vā kṛttivāseśvaraṃ kimu |
kāleśaṃ vṛddhakāleśaṃ kalaśeśvarameva ca || 86 ||
[Analyze grammar]

kedāreśaṃ tu kāmeśaṃ candreśaṃ vā trilocanam |
jyeṣṭheśaṃ jaṃbukeśaṃ vā jaigīṣavyeśvaraṃ tu vā || 87 ||
[Analyze grammar]

daśāśvamedhamīśānaṃ drumi caṃḍeśameva ca |
dṛkkeśaṃ garuḍeśaṃ ca gokarṇeśaṃ gaṇeśvaram || 88 ||
[Analyze grammar]

ḍhuṃḍhyāśāgajasiddhākhyaṃ dharmeśaṃ tārakeśvaram |
nandikeśaṃ nivāseśaṃ patrīśaṃ prītikeśvaram || 89 ||
[Analyze grammar]

parvateśaṃ paśupatiṃ brahmeśaṃ madhyameśvaram |
bṛhaspatīśvaraṃ vātha vibhāṃḍeśvarameva ca || 90 ||
[Analyze grammar]

bhārabhūteśvaraṃ kiṃ vā mahālakṣmīśvaraṃ tu vā |
marutteśaṃ tu mokṣeśaṃ gaṃgeśaṃ narmadeśvaram || 91 ||
[Analyze grammar]

mārkaṃḍaṃ maṇikarṇīśa ratneśvaramathāpi vā |
athavā yoginīpīṭhaṃ sādhakasyaiva siddhidam || 92 ||
[Analyze grammar]

yāmuneśaṃ lāṃgalīśaṃ śrīmadviśveśvaraṃ vibhum |
avimukteśvaraṃ vātha viśālākṣīśameva ca || 93 ||
[Analyze grammar]

vyāghreśvaraṃ varāheśaṃ vyāseśaṃ vṛṣabhadhvajam |
varuṇeśaṃ vidhīśaṃ vā vasiṣṭheśaṃ śanīśvaram || 94 ||
[Analyze grammar]

someśvaraṃ kimindreśaṃ svarlīnaṃ saṃgameśvaram |
hariścaṃdreśvaraṃ kiṃ vā harikeśeśvaraṃ tu vā || 95 ||
[Analyze grammar]

trisaṃdhyeśaṃ mahādevamupaśāṃti śivaṃ tathā |
bhavānīśaṃ kapardīśaṃ kaṃdukeśaṃ makheśvaram || 96 ||
[Analyze grammar]

mitrāvaruṇasaṃjñaṃ vā kimeṣāmāśuputradam |
kṣaṇaṃ vicārya sa muniriti viśvānaraḥ sudhīḥ || 97 ||
[Analyze grammar]

ājñātaṃ vismṛtaṃ tāvatphalito me manorathaḥ |
siddhaiḥ saṃsevitaṃ liṃgaṃ sarvasiddhikaraṃ param || 98 ||
[Analyze grammar]

darśanātsparśanādyasya mano nirvṛtibhāgbhavet |
udghāṭitaṃ sadaivāste svargadvāraṃ hi yatra vai || 99 ||
[Analyze grammar]

divāniśaṃ pūjanārthaṃ vijñāpya tridaśeśvaram |
pañcamudre mahāpīṭhe siddhide sarvajaṃtuṣu || 100 ||
[Analyze grammar]

yatra sā vikaṭā devī prakaṭā siddhirūpiṇī |
yatra sthitānāṃ bhaktānāṃ sākṣātsiddhivināyakaḥ || 1 ||
[Analyze grammar]

nirdhūya vighnajālāni sarvāḥ siddhīḥ prayacchati |
avimukte mahākṣetre siddhikṣetraṃ hi tatparam || 2 ||
[Analyze grammar]

yatra vīreśvaraṃ liṃgaṃ mahāguhyatamaṃ matam |
tilāṃtarāpi no kāśyāṃ bhūmirliṃgaṃ vinā kvacit || 3 ||
[Analyze grammar]

paraṃ vīreśa sadṛśaṃ na liṃgaṃ tvāśusiddhidam |
dharmadaṃ cārthadaṃ samyakkāmadaṃ mokṣadaṃ tathā || 4 ||
[Analyze grammar]

yathā vīreśvaraṃ liṃgaṃ kāśyāṃ nānyattathā dhuvam |
paṃcasvarotra gaṃdharvaḥ parāṃ siddhimagātpurā || 5 ||
[Analyze grammar]

vidyādharaḥ svacchavidyo vasupūrṇaśca yakṣarāṭ |
nṛtyaṃtī nijabhāvena purāhyatrāpsarovarā || 6 ||
[Analyze grammar]

sadehā kokilālāpā liṃgamadhye layaṃ gatā |
ṛṣirvedaśirā nāma japanvai śatarudriyam || 7 ||
[Analyze grammar]

mantrajyotirmaye liṃge saśarīro viśatpurā |
candramauli bharadvājāvubhau pāśupatottamau || 8 ||
[Analyze grammar]

vīreśvaraṃ samabhyarcya gāyamānau layaṃ gatau |
śaṃkhacūḍo hi nāgeṃdraḥ svaphaṇāmaṇibhirniśi || 9 ||
[Analyze grammar]

ṣaṇmāsātsiddhimagamadbahunīrājanairiha |
kinnarī haṃsapadyatra bhartrā veṇupriyeṇa vai || 110 ||
[Analyze grammar]

gāyaṃtī susvaraṃ yātā parāṃ nirvāṇabhūmikām |
asaṃkhyātāḥ sahasrāṇi siddhāḥ siddhimihāgatāḥ || 11 ||
[Analyze grammar]

siddhaliṃgamihākhyātaṃ tasmādvīreśvaraṃ param || 12 ||
[Analyze grammar]

vīreśvaraṃ samārādhya bhraṣṭarājyo jayadrathaḥ |
hatvā ripūnaskhalitaṃ rājyaṃ prāpa videhajaḥ || 13 ||
[Analyze grammar]

vidūratho'tha nṛpatiraputraḥ putravānabhūt |
vīreśvaraprasādena magadhādhipatirvaśī || 14 ||
[Analyze grammar]

vasudattotra ca vaṇiksutāṃ vasusutopamām |
abdamabhyarcya vīreśaṃ ratnadattopyavāptavān || 15 ||
[Analyze grammar]

ahamapyatra vīreśaṃ samārādhyatrikālataḥ |
āśu putramavāpsyāmi yathābhilaṣitaṃ striyā || 16 ||
[Analyze grammar]

iti kṛtvā matiṃ dhīro vipro viśvānaraḥ kṛtī |
candrkūpajalaiḥ snātvā jagrāha niyamaṃ vratī || 17 ||
[Analyze grammar]

ekāhārobhavanmāsaṃ māsaṃ naktāśanobhavata |
ayācitāśano māsaṃ māsaṃ tyaktāśanaḥ punaḥ || 18 ||
[Analyze grammar]

payovratobhavanmāsaṃ māsaṃ śākaphalāśanaḥ |
māsaṃ muṣṭitilāhāro māsaṃ pānīyabhojanaḥ || 19 ||
[Analyze grammar]

paṃcagavyāśano māsaṃ māsaṃ cāṃdrāyaṇavratī |
māsaṃ kuśāgrajalabhuṅmāsaṃ śvasanabhakṣaṇaḥ || 120 ||
[Analyze grammar]

atha trayodaśe māsi snātvā tripathagāṃbhasi |
pratyūṣa eva vīreśaṃ yāvadāyāti sa dvijaḥ || 21 ||
[Analyze grammar]

tāvadvilokayāṃcakre madhye liṃgaṃ tapodhanaḥ |
vibhūtibhūṣitaṃ bālamaṣṭavarṣākṛtiṃ śubham || 22 ||
[Analyze grammar]

ākarṇapūrṇanetraṃ ca suraktadaśanacchadam |
cārupiṃgajaṭāmauliṃ nagnaṃ prahasitānanam || 23 ||
[Analyze grammar]

śaiśavocitanepathyadhāriṇaṃ cittahāriṇam |
paṭhaṃtaṃ śrutisūktāni hasaṃtaṃ ca svalīlayā || 24 ||
[Analyze grammar]

tamālokya stutiṃ cakre romakaṃcukito mudā |
proccaradgadgadālāpo namostviti punaḥ punaḥ || 25 ||
[Analyze grammar]

viśvānara uvāca |
ekabrahmaivādvitīyaṃ samastaṃ satyaṃ satyaṃ nehanānāsti kiṃcit |
eko rudro na dvitīyovatasthe tasmādekaṃ tvāṃ prapadye maheśam || 26 ||
[Analyze grammar]

ekaḥ kartā tvaṃ hi sarvasya śaṃbho nānārūpeṣvekarūposya rūpaḥ |
yadvatpratyapsvarka ekopyanekastasmānnānyaṃ tvāṃ vineśaṃ prapadye || 27 ||
[Analyze grammar]

rajjau sarpaḥ śuktikāyāṃ ca rūpyaṃnairaḥpūrastanmṛgākhye marīcau |
yadvattadvadviṣvageṣa prapaṃco yasmiñjñāte taṃ prapadye maheśam || 28 ||
[Analyze grammar]

toye śaityaṃ dāhakatvaṃ ca vahnau tāpo bhānau śīta bhānauprasādaḥ |
puṣpe gaṃdho dugdhamadhyepi sarpiryattacchaṃbho tvaṃ tatastvāṃ prapadye || 29 ||
[Analyze grammar]

śabdaṃ gṛhṇāsyaśravāstvaṃ hi jighreraghrāṇastvaṃ vyaṃghrirāyāsi dūrāt |
vyakṣaḥ paśyestvaṃ rasajñopyajihvaḥ kastvāṃ samyagvettyatastvāṃ prapadye || 130 ||
[Analyze grammar]

novedastvāmīśa sākṣāddhivedano vā viṣṇurnovidhātā'khilasya |
no yogīṃdrāneṃdramukhyāśca devā bhakto veda tvāmatastvāṃ prapadye || 31 ||
[Analyze grammar]

no te gotraṃ neśajanmāpinākhyāno vā rūpaṃ naiva śīlaṃ na deśaḥ |
itthaṃbhūtopīśvarastvaṃ trilokyāḥ sarvānkāmānpūrayestadbhaje tvām || 32 ||
[Analyze grammar]

tvattaḥ sarvaṃ tvaṃ hi sarvaṃ smarāre tvaṃ gaurīśastvaṃ ca nagno'tiśāṃtaḥ |
tvaṃ vai vṛddhastvaṃ yuvā tvaṃ ca bālastattvaṃ yatkiṃnāsyatastvāṃ natosmi || 33 ||
[Analyze grammar]

stutveti bhūmau nipapāta vipraḥ sa daṃḍavadyāvadatīva hṛṣṭaḥ |
tāvatsa bālokhilavṛddhavṛddhaḥ provāca bhūdeva varaṃ vṛṇīhi || 34 ||
[Analyze grammar]

tata utthāya hṛṣṭātmā munirviśvānaraḥ kṛtī |
pratyabravītkimajñātaṃ sarvajñasya tava prabho || 35 ||
[Analyze grammar]

sarvāṃtarātmā bhagavānsarvaḥ sarvaprado bhavān |
yācñāṃ pratiniyuṃkte māṃ kimīśo dainyakāriṇīm || 36 ||
[Analyze grammar]

iti śrutvā vacastasya devo viśvānarasya ha |
śuceḥ śucivratasyāśu śucismitvābravīcchiśuḥ || 37 ||
[Analyze grammar]

bāla uvāca |
tvayā śuce śuciṣmatyāṃ yobhilāṣaḥ kṛto hṛdi |
acireṇaivakālena sa bhaviṣyatyasaṃśayaḥ || 38 ||
[Analyze grammar]

tava putratvameṣyāmi śuciṣmatyāṃ mahāmate |
khyāto gṛhapatirnāmnā śuciḥ sarvāmarapriyaḥ || 39 ||
[Analyze grammar]

abhilāṣāṣṭakaṃ puṇyaṃ stotrametattvayeritam |
abdaṃ trikālapaṭhanātkāmadaṃ śivasaṃnidhau || 140 ||
[Analyze grammar]

etatstotrasya paṭhanaṃ putra pautra dhanapradam |
sarvaśāṃtikaraṃ cāpi sarvāpatparināśanam || 41 ||
[Analyze grammar]

svargāpavarga saṃpattikārakaṃ nātra saṃśayaḥ |
prātarutthāya susnāto liṃgamabhyarcya śāṃbhavam || 42 ||
[Analyze grammar]

varṣaṃ japannidaṃ stotramaputraḥ putravānbhavet |
vaiśākhe kārtike māghe viśeṣaniyamairyutaḥ || 43 ||
[Analyze grammar]

yaḥ paṭhetsnānasamaye sa labhetsakalaṃ phalam |
kārtikasya tu māsasya prasādādahamavyayaḥ || 44 ||
[Analyze grammar]

tava putratvameṣyāmi yastvanyastatpaṭhiṣyati |
abhilāṣāṣṭakamidaṃ na deyaṃ yasya kasyacit || 45 ||
[Analyze grammar]

gopanīyaṃ prayatnena mahāvaṃdhyāprasūtikṛt |
striyā vā puruṣeṇāpi niyamālliṃga saṃnidhau || 46 ||
[Analyze grammar]

abdaṃ japtamidaṃ stotraṃ putradaṃ nātra saṃśayaḥ |
ityuktvāṃtardadhe bālaḥ sopi vipro gṛhaṃ gataḥ || 147 ||
[Analyze grammar]

iti śrīskāṃde mahāpurāṇa ekāśītisāhasyāṃ saṃhitāyāṃ caturthe kāśīkhaṇḍe pūvārddhe iṃdrāgnilokavarṇanaṃnāma daśamo'dhyāyaḥ || 10 ||
[Analyze grammar]