Chapter 19

[English text for this chapter is available]

sūta uvāca |
evaṃ mahāvrataṃ tasyāścaraṃtyā gurusannidhau |
saṃvatsaro vyatīyāya niyamāsaktacetasaḥ || 1 ||
[Analyze grammar]

saṃvatsarāṃte sā bālā tatraiva pitṛmaṃdire |
cakārodyāpanaṃ samyagviprabhojanapūrvakam || 2 ||
[Analyze grammar]

dattvā ca dakṣiṇāṃ tebhyo brāhmaṇebhyo yathārhataḥ |
visṛjya tānnamaskṛtya pitṛbhyāmabhinaṃditā || 3 ||
[Analyze grammar]

upoṣitā svayaṃ tasmindine niyamamāśritā |
jajāpa paramaṃ maṃtramupadiṣṭaṃ mahātmanā || 4 ||
[Analyze grammar]

atha pradoṣasamaye prāpte saṃpūjya śaṃkaram |
tasmingṛhāṃtikamaṭhe gurostasya ca sannidhau || 5 ||
[Analyze grammar]

japārcanaratā sādhvī dhyāyatī parameśvaram |
tasmiñjāgaraṇe rātrāvupaviṣṭā śivāṃtike || 6 ||
[Analyze grammar]

yugmam |
tasyāṃ rātrau tayā sārdhaṃ sa munirjagadaṃbikām |
japadhyāna tapobhiśca toṣayāmāsa pārvatīm || 7 ||
[Analyze grammar]

tasyāśca bhaktyā vratabhāvitāyā munestapoyogasamādhinā ca |
tuṣṭā bhavānī jagadekamātā prādurbabhūvā kṛtasāṃdramūrtiḥ || 8 ||
[Analyze grammar]

prādurbhūtā yadā gaurī tayoragre jaganmayī |
andho'pi tatkṣaṇādeva muniḥ prāpa dṛśordvayam || 9 ||
[Analyze grammar]

tāṃ vīkṣya jagatāṃ dhātrīmāvirbhūtāṃ puraḥsthitām |
nipetatustatpadayoḥ sa muniḥ sā ca kanyakā || 10 ||
[Analyze grammar]

tau bhaktibhāvocchvasitāmalāśayāvānaṃdabāṣpokṣita sarvagātrau |
utthāpya devī kṛpayā pariplutā premṇā babhāṣe mṛduvalgubhāṣiṇī || 11 ||
[Analyze grammar]

devyuvāca |
prītāsmi te muniśreṣṭha vatse prītāsmi te'naghe |
kiṃ vā dadāmyabhimataṃ devānāmapi durlabham || 12 ||
[Analyze grammar]

muniruvāca |
eṣā tu śāradā nāma kanyā tu gatabhatṛkā |
mayā pratiśrutaṃ cāsyai tuṣṭena gatacakṣuṣā || 13 ||
[Analyze grammar]

saha bhartrā ciraṃ kālaṃ vihṛtya sutamuttamam |
labhasveti mayā proktaṃ satyaṃ kuru namo'stu te || 14 ||
[Analyze grammar]

śrīdevyuvāca |
eṣā pūrvabhave bālā drāviḍasya dvijanmanaḥ |
āsīddvitīyā dayitā bhāminī nāma viśrutā || 15 ||
[Analyze grammar]

sā bhartṛpreyasī nityaṃ rūpamādhuryapeśalā |
bhartāraṃ vaśamāninye rūpavaśyādikaitavaiḥ || 16 ||
[Analyze grammar]

asyāṃ cāsaktahṛdayaḥ sa vipro mohayaṃtritaḥ |
kadācidapi naivāgājjyeṣṭhapatnīṃ pativratām || 17 ||
[Analyze grammar]

anabhyāgamanādbhartuḥ sā nārī putravarjitā |
sadā śokena saṃtaptā kālena nidhanaṃ gatā || 18 ||
[Analyze grammar]

asyā gṛhasamīpastho yaḥ kaścidbrāhmaṇo yuvā |
imāṃ vīkṣyātha cārvaṃgīṃ kāmārtaḥ karamagrahīt || 19 ||
[Analyze grammar]

anayā roṣatāmrākṣyā sa viprastu nivāritaḥ |
imāṃ smarandivānaktaṃ nidhanaṃ pratyapadyata || 20 ||
[Analyze grammar]

eṣā saṃmohya bhartāraṃ jyeṣṭhapatnyāṃ parāṅmukham |
cakāra tena pāpena bhavesminvidhavā'bhavat || 21 ||
[Analyze grammar]

yāḥ kurvaṃti striyo loke jāyāpatyośca vipriyam |
tāsāṃ kaumāravaidhavyamekaviṃśatijanmasu || 22 ||
[Analyze grammar]

yadetayā pūrvabhave matpūjā mahatī kṛtā |
tena puṇyena tatpāpaṃ naṣṭaṃ sarvaṃ tadaiva hi || 23 ||
[Analyze grammar]

yo vipro virahārtaḥ sanmṛtaḥ kāmavimohitaḥ |
so'syāḥ pāṇigrahaṃ kṛtvā bhavesminnidhanaṃ gataḥ || 24 ||
[Analyze grammar]

prāgjanmapatiretasyāḥ pāṃḍyarāṣṭreṣu so'dhunā |
jāto vipravaraḥ śrīmānsadāraḥ saparicchadaḥ || 25 ||
[Analyze grammar]

tena bhartrā pratiniśaṃ saiṣā premṇābhisaṃgatā |
svapne ratisukhaṃ yātu śreṣṭhaṃ jāgaraṇādapi || 26 ||
[Analyze grammar]

ṣaṣṭyuttaratriśatayojanadūrasaṃstho deśādito dvijavaraḥ sa ca karmagatyā |
enāṃ vadhūṃ pratiniśaṃ manasobhirāmāṃ svapneṣu paśyati ciraṃ ratimādadhānaḥ || 27 ||
[Analyze grammar]

saiṣā vai svapnasaṃgatyā patyuḥ pratiniśaṃ satī |
kālena lapsyate putraṃ vedavedāṃgapāragam || 28 ||
[Analyze grammar]

etasyāṃ tanayaṃ jātamātmanaścirasaṃgamāt |
so'pi vipro'niśaṃ svapne drakṣyati premabhāvitam || 29 ||
[Analyze grammar]

anayārādhitā pūrve bhave sāhaṃ mahāmune |
asyaiva varadānāya prādurbhūtāsmi sāṃpratam || 30 ||
[Analyze grammar]

sūta uvāca |
athovāca mahādevī tāṃ bālāṃ prati sādaram |
ayi vatse mahābhāge śṛṇu me paramaṃ vacaḥ || 31 ||
[Analyze grammar]

yadā kadāpi bharttāraṃ kvāpi deśe purātanam |
drakṣyasi svapnadṛṣṭaṃ prākjñāsyase tvaṃ vicakṣaṇā || 32 ||
[Analyze grammar]

tvāṃ drakṣyati sa vipropi sunayāṃ svapnalakṣaṇām |
tadā parasparālāpo yuvayoḥ saṃbhaviṣyati || 33 ||
[Analyze grammar]

tadā svatanayaṃ bhadre tasmai dehi bahuśrutam |
phalamasya vratasyāgryaṃ tasya haste samarpaya || 34 ||
[Analyze grammar]

tataḥ prabhṛti tasyaiva vaśe tiṣṭha sumadhyame |
yuvayodaihikaḥ saṃgo mābhūtsvapnaratādṛte || 35 ||
[Analyze grammar]

kālātpaṃcatvamāpanne tasminbrāhmaṇasattame |
agniṃ praviśya tenaiva saha yāsyasi matpadam || 36 ||
[Analyze grammar]

putraste bhavitā subhru sarvalokamanoramaḥ |
saṃpadaśca bhaviṣyaṃti prāpsyate paramaṃ padam || 37 ||
[Analyze grammar]

sūta uvāca |
ityuktvā trijaganmātā dattvā tasyai manoratham |
tayoḥ saṃpaśyatoreva kṣaṇenādarśanaṃ gatā || 38 ||
[Analyze grammar]

sāpi bālā varaṃ labdhvā pārvatyāḥ karuṇānidheḥ |
avāpa paramānaṃdaṃ pūjayāmāsa taṃ gurum || 39 ||
[Analyze grammar]

tasyāṃ rātryāṃ vyatītāyāṃ sa munirlabdhalocanaḥ |
tasyāḥ pitrośca tatsarvaṃ rahasyācaṣṭa dharmavit || 40 ||
[Analyze grammar]

atha sarvānupāmaṃtrya śāradāṃ ca yaśasvinīm |
vidhāyānugrahaṃ teṣāṃ yayau svairagatirmuniḥ || 41 ||
[Analyze grammar]

evaṃ dineṣu gacchatsu sā bālā ca pratikṣaṇam |
bhartuḥ samāgamaṃ lebhe svapne sukha vivardhanam || 42 ||
[Analyze grammar]

gauryā varapradānena śāradā viśadavratā |
dadhāra garbhaṃ svapnepi bhartuḥ saṃgānubhāvataḥ || 43 ||
[Analyze grammar]

tāṃ śrutvā bhartṛrahitāṃ śāradāṃ garbhiṇī satīm |
sarve dhigiti procustāṃ jāriṇīti jagurjanāḥ || 44 ||
[Analyze grammar]

saṃparetasya tadbharturye jātikulavabāṃdhavāḥ |
tāṃ vārtāṃ duḥsahāṃ śrutvā yayustatpitṛmaṃdiram || 45 ||
[Analyze grammar]

atha sarve samāyātā grāmavṛddhāśca paṃḍitāḥ |
samājaṃ cakrire tatra kulavṛddhaiḥ samanvitam || 46 ||
[Analyze grammar]

antarvatnīṃ samāhūya śāradāṃ vinatānanām |
atarjayansusaṃkruddhāḥ kecidāsanparāṅmukhāḥ || 47 ||
[Analyze grammar]

ayi jāriṇi durbuddhe kimetatte viceṣṭitam |
asmatkule suduṣkīrttiṃ kṛtavatyasi bāliśe || 48 ||
[Analyze grammar]

iti saṃtarjayaṃtaste grāmavṛddhā manīṣiṇaḥ |
sarve saṃmaṃtrayāmāsuḥ kiṃ kurma iti bhāṣiṇaḥ || 49 ||
[Analyze grammar]

tatrocuḥ ke ca vṛddhāstāṃ bālāṃ prati vinirdayāḥ |
eṣā pāpamatirbālā kuladvayavināśinī || 50 ||
[Analyze grammar]

kṛtvāsyāḥ keśavapanaṃ chittvā karṇau ca nāsikām |
nirvāsyatāṃ bahirgrāmātparityajya svagotrataḥ || 51 ||
[Analyze grammar]

iti sarve samālocya tāṃ tathā kartumudyatāḥ |
athāṃtarikṣe saṃbhūtā śuśruve vāgagocarā || 52 ||
[Analyze grammar]

anayā na kṛtaṃ pāpaṃ na caiva kuladūṣaṇam |
vratabhaṃgo na caitasyāssucaritreyamaṃganā || 53 ||
[Analyze grammar]

itaḥ paramiyaṃ nārī jāriṇīti vadaṃti ye |
teṣāṃ doṣavimūḍhānāṃ sadyo jihvā vidīryate || 54 ||
[Analyze grammar]

ityaṃtarikṣe janitāṃ vāṇīṃ śrutvā'śarīriṇīm |
sarve prajahṛṣustasyā jananījanakādayaḥ || 55 ||
[Analyze grammar]

tataḥ sasaṃbhramāḥ sarve grāmavṛddhāḥ sabhājanāḥ |
muhūrttaṃ maunamālaṃbya bhītāstasthuradhomukhāḥ || 56 ||
[Analyze grammar]

tatra kecidaviśvastā mithyāvāṇītyavādiṣuḥ |
teṣāṃ jihvā dvidhā bhinnā vavamuste kṛmīnkṣaṇāt || 57 ||
[Analyze grammar]

tataḥ saṃpūjayāmāsustāṃ bālāṃ jñātibāṃdhavāḥ |
bāṃdhavāśca striyo vṛddhāḥ śaśaṃsuḥ sādhusādhviti || 58 ||
[Analyze grammar]

mumucuḥ kecidānaṃdabāṣpabiṃdūnkulottamāḥ |
kulastriyaḥ pramuditāstāmuddiśya samāśvasan || 59 ||
[Analyze grammar]

atha tatrāpare procurdevo vadati nānṛtam |
kathameṣāṃ dadhau garbhaṃ śīlānna calitā dhruvam || 60 ||
[Analyze grammar]

iti sarvānsabhyajanā nsaṃśayāviṣṭacetasaḥ |
vilokya vṛddhastatraiko sarvajño lokatattvavit || 61 ||
[Analyze grammar]

māyāmayamidaṃ viśvaṃ dṛśyate śrūyate ca yat |
kiṃ bhāvyaṃ kimabhāvyaṃ vā saṃsāre'sminkṣaṇātmake || 62 ||
[Analyze grammar]

anirūpyamabhūtārthaṃ māyayā jāyate sphuṭam |
īśvarasya vaśe māyā tasya ko veda ceṣṭitam || 23 ||
[Analyze grammar]

yūpaketośca rājarṣeḥ śukraṃ nipatitaṃ jale |
saśukraṃ tajjalaṃ pītvā veśyā garbhaṃ dadhau kila || 64 ||
[Analyze grammar]

munervibhāṃḍakasyāpi śukraṃ pītvā sahāṃbhasā |
hariṇī garbhiṇī bhūtvā ṛṣyaśṛṃgamasūyata || 65 ||
[Analyze grammar]

surāṣṭrasya tathā rājñaḥ karaṃ spṛṣṭvā mṛgāṃganā |
tatkṣaṇādgarbhiṇī bhūtvā muniṃ prāsūta tāpasam || 66 ||
[Analyze grammar]

tathā satyavatī nārī śapharīgarbhasaṃbhavā |
tathaiva mahiṣīgarbho jātaśca mahiṣāsuraḥ || 67 ||
[Analyze grammar]

tathā saṃti purā nāryaḥ kāruṇyādgarbhasaṃbhavāḥ |
tathā hi vasudevena rohiṇyā stanayo'bhavat || 68 ||
[Analyze grammar]

devatānāṃ maharṣīṇāṃ śāpena ca vareṇa ca |
ayuktamapi yatkarma yujyate nātra saṃśayaḥ || 69 ||
[Analyze grammar]

sāṃbasya jaṭharājjātaṃ musalaṃ muniśāpataḥ |
yuvanāśvasya garbho'bhūnmunīnāṃ maṃtragauravāt || 70 ||
[Analyze grammar]

nūnameṣāpi kalyāṇī maharṣeḥ pādasevanāt |
mahāvratānubhāvācca dhatte garbhamaniṃ ditā || 71 ||
[Analyze grammar]

asminnarthe rahasyenāṃ satyaṃ pṛcchaṃtu yoṣitaḥ |
tato nivṛttasaṃdeho bhaviṣyati mahājanaḥ || 72 ||
[Analyze grammar]

tatastadvacanādeva tāmapṛcchanstriyo mithaḥ |
tābhyaḥ śaśaṃsa tatsarvaṃ sā svavṛttaṃ mahādbhutam || 73 ||
[Analyze grammar]

vijānaṃtastataḥ sarve mānayitvā ca tāṃ satīm |
modamānāḥ praśaṃsaṃtaḥ prayayuḥ svaṃ svamālayam || 74 ||
[Analyze grammar]

atha kāle śubhe prāpte śāradā vimalāśayā |
asūta tanayaṃ bālā bālārkasamatejasam || 75 ||
[Analyze grammar]

sa kumāro mahodāralakṣaṇaḥ kamalekṣaṇaḥ |
avāpya mahatīṃ vidyāṃ bālya eva mahāmatiḥ || 76 ||
[Analyze grammar]

athopanīto guruṇā kāle lokamanoramaḥ |
sa śāradeya eveti loke khyāti mavāpa ha || 77 ||
[Analyze grammar]

ṛgvedamaṣṭame varṣe navame yajuṣāṃ gaṇam |
daśame sāmavedaṃ ca līlayādhyagamatsudhīḥ || 78 ||
[Analyze grammar]

atha trilokamahite saṃprāpte śivaparvaṇi |
gokarṇaṃ prayayuḥ sarve janāḥ sarvanivāsinaḥ || 79 ||
[Analyze grammar]

śāradāpi svaputreṇa gokarṇaṃ prayayau satī || 80 ||
[Analyze grammar]

tatrāpaśyatsamāyātaṃ sadā svapneṣu lakṣitam |
pūrvajanmani bharttāraṃ dvijabaṃdhujanāvṛtam || 81 ||
[Analyze grammar]

taṃ dṛṣṭvā premanirviṇṇā pulakāṃkitavigrahā |
niruddhabāṣpaprasarā tasthau tannyastalocanā || 82 ||
[Analyze grammar]

sa ca vipro'pi tāṃ dṛṣṭvā rūpalakṣaṇalakṣitām |
svapne sadā bhujyamānāmātmano ratidāyinīm || 83 ||
[Analyze grammar]

taṃ kumāramapi svapne dṛṣṭvā cātma śarīrajam |
vilokya vismayāviṣṭastadaṃtikamupāyayau || 84 ||
[Analyze grammar]

bhadre tvāṃ praṣṭumicchāmi yatkiṃcinmanasi sthitam |
iti prathamamābhāṣya rahaḥ sthānaṃ nināya tām || 85 ||
[Analyze grammar]

kā tvaṃ kathaya vāmoru kasya bhāryāsi suvrate |
ko deśaḥ kasya vā putrī kinnāmetyabravīcca tām || 86 ||
[Analyze grammar]

iti tena samāpṛṣṭā sā nārī bāṣpalocanā |
vyājahārātmanovṛttaṃ bālye vaidhavyakāraṇam || 87 ||
[Analyze grammar]

punaḥ papraccha tāṃ bālāṃ putraḥ kasyāyamuttamaḥ |
kathaṃ dhṛto vā jaṭhare bālo'yaṃ caṃdrasannibhaḥ || 88 ||
[Analyze grammar]

|śāradovāca |
eṣa me tanayaḥ svāminsarvavidyāviśāradaḥ |
śāradeya iti prokto mama nāmnaiva kalpitaḥ || 69 ||
[Analyze grammar]

iti tasyā vacaḥ śrutvā vihasya brāhmaṇottamaḥ |
provāca kaṣṭātkaṣṭaṃ hi caritaṃ tava bhāmini || 90 ||
[Analyze grammar]

pāṇigrahaṇamātraṃ te kṛtvā bharttā mṛtaḥ kila |
kathaṃ cāyaṃ suto jātastasya kāraṇamucyatām || 91 ||
[Analyze grammar]

iti tenoditāṃ vāṇīmākarṇyātīva lajjitā |
kṣaṇaṃ cāśrumukhī bhūtvā dhairyāditthamabhāṣata || 92 ||
[Analyze grammar]

śāradovāca |
tadalaṃ parihāsoktyā tvaṃ māṃ vetsi mahāmate |
tvāmahaṃ vedmi cārthe'sminpramāṇaṃ mana āvayoḥ || 93 ||
[Analyze grammar]

ityuktvā sarvamāvedya devyā dattaṃ varādikam |
vratasyārdhaṃ kumāraṃ taṃ dadau tasmai dhṛtavratam || 94 ||
[Analyze grammar]

so'pi pramudito vipraḥ kumāraṃ pratigṛhya tam |
pitroranumatenaiva tāṃ nināya nijālayam || 95 ||
[Analyze grammar]

sāpi sthitvā bahūnmāsāṃstasya viprasya maṃdire |
tasminkālavaśaṃ prāpte praviśyāgniṃ tamanvagāt || 96 ||
[Analyze grammar]

tatastau daṃpatī bhūtvā vimānaṃ divyamāsthitau |
divyabhogasamāyuktau jagmatuḥ śivamaṃdiram || 97 ||
[Analyze grammar]

ityetatatpuṇyamākhyānaṃ mayā samanuvarṇitam |
paṭhatāṃ śṛṇvatāṃ samyagbhuktimuktiphalapradam || 98 ||
[Analyze grammar]

āyurārogyasaṃpattidhanadhatyavivarddhanam |
strīṇāṃ maṃgalasaubhāgyasaṃtānasukhasādhanam || 99 ||
[Analyze grammar]

etanmahākhyānamaghaughanāśanaṃ gaurīmaheśavratapuṇyakīrtanam |
bhaktyā sakṛdyaḥ śṛṇuyācca kīrttayedbhuktvā sa bhogānpadameti śāśvatam || 100 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe śāradākhyānavarṇanaṃ nāmaikonaviṃśo'dhyāyaḥ || 19 ||
[Analyze grammar]