Chapter 11

[English text for this chapter is available]

sūta uvāca |
piṃgalā nāma yā veśyā mayā pūrvamudāhṛtā |
śivabhaktārcanātpuṇyāttyaktvā pūrvakalevaram || 1 ||
[Analyze grammar]

candrāṃgadasya sā bhūyaḥ sīmaṃtinyāmajāyata |
rūpaudāryaguṇopetā nāmnā vai kīrtimālinī || 2 ||
[Analyze grammar]

bhadrāyurapi tatraiva rājaputro vaṇikpateḥ |
vavṛdhe sadane bhānuḥ śucāviva mahātapāḥ || 3 ||
[Analyze grammar]

tasyāpi vaiśyanāthasya kumārastveka uttamaḥ |
sa nāmnā sunayaḥ prokto rājasūnoḥ sakhā'bhavat || 4 ||
[Analyze grammar]

tāvubhau paramasnigdhau rājavaiśyakumārakau |
citrakrīḍāvudārāṃgau ratnābharaṇamaṃḍitau || 5 ||
[Analyze grammar]

tasya rājakumārasya brāhmaṇaiḥ sa vaṇikpatiḥ |
saṃskārānkārayāmāsa svaputrasyāpi vistarāt || 6 ||
[Analyze grammar]

kāle kṛtopanayanau guruśuśrūṣaṇe ratau |
cakratuḥ sarvavidyānāṃ saṃgrahaṃ vinayānvitau || 7 ||
[Analyze grammar]

atha rājakumārasya prāpte ṣoḍaśahāyane |
sa eva ṛṣabho yogī tasya veśmanyupāyayau || 8 ||
[Analyze grammar]

sā rājñī sa kumāraśca śivayoginamāgatam |
muhurmuhuḥ praṇamyobhau pūjayāmāsaturmudā || 9 ||
[Analyze grammar]

tābhyāṃ ca pūjitaḥ so'tha yogīśo hṛṣṭamānasaḥ |
taṃ rājaputramuddiśya babhāṣe karuṇārdradhīḥ || 10 ||
[Analyze grammar]

śivayogyuvāca |
kaccitte kuśalaṃ tāta tvanmātuścāpyanāmayam |
kaccittvaṃ sarvavidyānāmakārṣīśca pratigraham || 11 ||
[Analyze grammar]

kaccidgurūṇāṃ satataṃ śuśrūṣātatparo bhavān |
kaccitsmarasi māṃ tāta tava prāṇapradaṃ gurum || 12 ||
[Analyze grammar]

evaṃ vadati yogīśe rājñī sā vinayānvitā |
svaputraṃ pādayostasya nipātyainamabhāṣata || 13 ||
[Analyze grammar]

eṣa putrastava guro tvamasya prāṇadaḥ pitā |
eṣa śiṣyastu saṃgrāhyo bhavatā karuṇātmanā || 14 ||
[Analyze grammar]

ato bandhubhirutsṛṣṭamanāthaṃ paripālaya |
asmai samyaksatāṃ mārgamupadeṣṭuṃ tvamarhasi || 15 ||
[Analyze grammar]

iti prasādito rājñyā śivayogī mahāmatiḥ |
tasmai rājakumārāya sanmārgamupadiṣṭavān || 16 ||
[Analyze grammar]

ṛṣabha uvāca |
śrutismṛtipurāṇeṣu prokto dharmaḥ sanātanaḥ |
varṇāśramānurūpeṇa niṣevyaḥ sarvadā janaiḥ || 17 ||
[Analyze grammar]

bhaja vatsa satāṃ mārgaṃ sadeva caritaṃ cara |
na devājñāṃ vilaṃghethā mā kārṣīrdevahelanam || 18 ||
[Analyze grammar]

godevaguruvipreṣu bhaktimānbhava sarvadā |
cāṃḍālamapi saṃprāptaṃ sadā saṃbhāvayātithim || 19 ||
[Analyze grammar]

satyaṃ na tyaja sarvatra prāpte'pi prāṇasaṃkaṭe |
gobrāhmaṇānāṃ rakṣārthamasatyaṃ tvaṃ vada kvacit || 20 ||
[Analyze grammar]

parasveṣu parastrīṣu devabrāhmaṇa vastuṣu |
tṛṣṇāṃ tyaja mahābāho durlabheṣvapi vastuṣu || 21 ||
[Analyze grammar]

satkathāyāṃ sadācāre sadvrate ca sadāgame |
dharmādisaṃgrahe nityaṃ tṛṣṇāṃ kuru mahāmate || 22 ||
[Analyze grammar]

snāne jape ca home ca svādhyāye pitṛtarpaṇe |
godevātithipūjāsu nirālasyo bhavānagha || 23 ||
[Analyze grammar]

krodhaṃ dveṣaṃ bhayaṃ śāṭhyaṃ paiśunya masadāgraham |
kauṭilyaṃ daṃbhamudvegaṃ yatnena parivarjaya || 24 ||
[Analyze grammar]

kṣātradharmarato'pi tvaṃ vṛthā hiṃsāṃ parityaja |
śuṣkavairaṃ vṛthālāpaṃ paranidāṃ ca varjaya || 25 ||
[Analyze grammar]

mṛgayā dyūtapāneṣu strīṣu strīvijiteṣu ca |
atyāhāramatikrodhamatinidrāmatiśramam || 26 ||
[Analyze grammar]

atyālāpamatikrīḍāṃ sarvadā parivarjaya || 27 ||
[Analyze grammar]

atividyāmatiśraddhāmatipuṇyamatismṛtim |
atyutsāhamatikhyātimatidhairyaṃ ca sādhaya || 28 ||
[Analyze grammar]

sakāmo nijadāreṣu sakrodho nija śatruṣu |
salobhaḥ puṇyanicaye sābhyasūyo hyadharmiṣu || 29 ||
[Analyze grammar]

sadveṣo bhava pākhaṇḍe sarāgaḥ sajjaneṣu ca |
durbodho bhava durmaṃtre badhiraḥ piśunoktiṣu || 30 ||
[Analyze grammar]

dhūrttaṃ caṃḍaṃ śaṭhaṃ krūraṃ kitavaṃ capalaṃ khalam |
patitaṃ nāstikaṃ jihmaṃ dūrataḥ parivarjaya || 31 ||
[Analyze grammar]

ātmapraśaṃsā mā kārṣīḥ parijñāteṃgito bhava |
dhane sarvakuṭuṃbe ca nātyāsaktaḥ sadā bhava || 32 ||
[Analyze grammar]

patnyāḥ pativratāyāśca jananyāḥ śvaśurasya ca |
satāṃ gurośca vacane viśvāsaṃ kuru sarvadā || 33 ||
[Analyze grammar]

ātmarakṣāparo nityamapramatto dṛḍhavrataḥ |
viśvāsaṃ naiva kurvīthāḥ svabhṛtyeṣvapi kutra cit || 34 ||
[Analyze grammar]

viśvastaṃ mā vadhīḥ kaṃcidapi coraṃ mahāmate |
apāpeṣu na śaṃkethāḥ satyānna calito bhava || 35 ||
[Analyze grammar]

anāthaṃ kṛpaṇaṃ vṛddhaṃ striyaṃ bālaṃ nirāgasam |
parirakṣa dhanaiḥ prāṇairbuddhyā śaktyā balena ca || 36 ||
[Analyze grammar]

api śatruṃ vadhasyārhaṃ mā vadhīḥ śaraṇāgatam |
apyapātraṃ supātraṃ vā nīco vāpi mahattamaḥ || 37 ||
[Analyze grammar]

yo vā ko vāpi yāceta tasmai dehi śiropi ca |
api yatnena mahatā kīrtimeva sadārjaya || 38 ||
[Analyze grammar]

rājñāṃ ca viduṣāṃ caiva kīrtireva hi bhūṣaṇam |
satkīrtiprabhavā lakṣmīḥ puṇyaṃ satkīrtisaṃbhavam || 39 ||
[Analyze grammar]

satkīrtyā rājate lokaścaṃdraścaṃdrikayā nyathā |
gajāśvahemanicayaṃ ratnarāśiṃ nagopamam || 40 ||
[Analyze grammar]

akīrtyopahataṃ sarvaṃ tṛṇavanmuṃca satvaram |
mātuḥ kopaṃ pituḥ kopaṃ guroḥ kopaṃ dhanavya yam || 41 ||
[Analyze grammar]

putrāṇāmaparādhaṃ ca brāhmaṇānāṃ kṣamasva bhoḥ |
yathā dvijaprasādaḥ syāttathā teṣāṃ hitaṃ cara || 42 ||
[Analyze grammar]

rājānaṃ saṃkaṭe magnamuddhareyurdvijottamā |
āyuryaśo balaṃ saukhyaṃ dhanaṃ puṇyaṃ prajonnatiḥ || 43 ||
[Analyze grammar]

karmaṇā yena jāyeta tatsevyaṃ bhavatā sadā |
deśaṃ kālaṃ ca śaktiṃ ca kāryaṃ cā kāryameva ca || 44 ||
[Analyze grammar]

samyagvicārya yatnena kuru kāryaṃ ca sarvadā |
na kuryāḥ kasyacidbādhāṃ parabādhāṃ nivāraya || 45 ||
[Analyze grammar]

corānduṣṭāṃśca bādhethāḥ sunītyā śaktimattayā |
snāne jape ca home ca daive pitrye ca karmaṇi || 46 ||
[Analyze grammar]

atvaro bhava nidrāyāṃ bhojane bhava satvaraḥ |
dākṣiṇyayuktamaśaṭhaṃ satyaṃ janamanoharam || 47 ||
[Analyze grammar]

alpākṣaramanaṃtārthaṃ vākyaṃ brūhi mahāmate |
abhīto bhava sarvatra vipakṣeṣu vipatsu ca || 48 ||
[Analyze grammar]

bhīto bhava brahmakule na pāpe guruśāsane |
jñātibaṃdhuṣu vipreṣu bhāryāsu tanayeṣu ca || 49 ||
[Analyze grammar]

samabhāvena vartethāstathā bhojanapaṃktiṣu |
satāṃ hitopadeśeṣu tathā puṇya kathāsu ca || 50 ||
[Analyze grammar]

vidyāgoṣṭhīṣu dharmyāsu kvacinmā bhūḥ parāṅmukhaḥ |
śucau puṇyajalasyāṃte prakhyāte brahmasaṃkule || 51 ||
[Analyze grammar]

mahādeśe śivamaye vastavyaṃ bhavatā sadā |
kulaṭā gaṇikā yatra yatra tiṣṭhati kāmukaḥ || 52 ||
[Analyze grammar]

durdeśe nīcasaṃbādhe kadācidapi mā vasa |
ekamevāśritopi tvaṃ śivaṃ tribhuvaneśvaram || 53 ||
[Analyze grammar]

sarvāndevānupāsīthāstaddināni ca mānayan |
sadā śuciḥ sadā dakṣaḥ sadā śāṃtaḥ sadā sthiraḥ || 54 ||
[Analyze grammar]

sadā vijita ṣaḍvargaḥ sadaikāṃto bhavānagha |
viprānvedavidaḥ śāṃtānyatīṃśca niyatojvalān || 55 ||
[Analyze grammar]

yugmam |
puṇyavṛkṣānpuṇyanadīḥ puṇyatīrthaṃ mahatsaraḥ |
dhenuṃ ca vṛṣabhaṃ ratnaṃ yuvatīṃ ca pativratām || 56 ||
[Analyze grammar]

ātmano gṛhadevāṃśca sahasaiva namaskuru |
utthāya samaye brāhme svācamya vimalāśayaḥ || 57 ||
[Analyze grammar]

namaskṛtyātmaguruve dhyātvā devamumāpatim |
nārāyaṇaṃ ca lakṣmīśaṃ brahmāṇaṃ ca vināyakam || 58 ||
[Analyze grammar]

skandaṃ kātyāyanīṃ devīṃ mahālakṣmīṃ sarasvatīm |
indrādīnatha lokeśānpuṇyaślokānṛṣīnapi || 59 ||
[Analyze grammar]

ciṃtayitvātha mārttaṃḍamudyaṃtaṃ praṇametsadā |
gaṃdhaṃ puṣpaṃ ca tāṃbūlaṃ śākaṃ pakvaphalādikam || 60 ||
[Analyze grammar]

śivāya dattvopabhuṃkṣva bhakṣyaṃ bhojyaṃ priyaṃ navam |
yaddattaṃ yatkṛtaṃ japtaṃ yatsnātaṃ yaddhutaṃ smṛtam || 61 ||
[Analyze grammar]

yacca taptaṃ tapaḥ sarvaṃ tacchivāya nivedaya |
bhuṃjānaśca paṭhanvāpi śayāno viharannapi |
paśyañchṛṇnvavadangṛhṇañchivamevānuciṃtaya || 62 ||
[Analyze grammar]

rudrākṣakaṃkaṇalasatkaradaṃḍayugmo mālāṃtarāladhṛtabhasma sitatripuṃḍūḥ |
paṃcākṣaraṃ paripaṭhanparamaṃtrarājaṃ dhyāyansadā paśupateścaraṇaṃ ramethāḥ || 63 ||
[Analyze grammar]

iti saṃkṣepato vatsa kathito dharmasaṃgrahaḥ |
anyeṣu ca purāṇeṣu vistareṇa prakīrtitaḥ || 64 ||
[Analyze grammar]

athāparaṃ sarvapurāṇaguhyaṃ niḥśeṣapāpaughaharaṃ pavitram |
jayapradaṃ sarvavipadvimocanaṃ vakṣyāmi śaivaṃ kavacaṃ hitāya te || 65 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmakhaṇḍe bhadrāyuṃ prati ṛṣabhopadeśavarṇanaṃ nāmaikādaśo'dhyāyaḥ || 11 ||
[Analyze grammar]