Chapter 13

[English text for this chapter is available]

brahmovāca |
kimāścaryaṃ tvayā dṛṣṭaṃ kimarthaṃ khidyate bhavān |
sadgaṇeṣu kṛtastāpaḥ sa tāpo maraṇāṃtikaḥ || 1 ||
[Analyze grammar]

tasyoccāraṇamātreṇa prāpyate paramaṃ padam |
na gacchaṃti harerlokaṃ kathaṃ bhūpasya śāsanāt || 2 ||
[Analyze grammar]

eko'pi govindakṛtaḥ praṇāmaḥ śatāśvamedhāvabhṛthena tulyaḥ |
yajñasya karttā punareti janma hareḥ praṇāmo na punarbhavāya || 3 ||
[Analyze grammar]

kurukṣetreṇa kiṃ tasya sarasvatyā ca kiṃ tathā |
jihvāgre vartate yasya harirityakṣaradvayam || 4 ||
[Analyze grammar]

brāhmaṇaḥ śvapacīṃ bhuṃjanviśeṣeṇa rajasvalām |
yadi viṣṇuṃ sa maraṇe smarennāpnoti tatpadam || 5 ||
[Analyze grammar]

abhakṣyabhakṣaṇājjātaṃ vihāyāghasya saṃcayam |
prayāti viṣṇusāyujyaṃ yato viṣṇupriyā smṛtiḥ || 6 ||
[Analyze grammar]

evaṃ viṣṇupriyo māso vaiśākho nāma vai yama |
yaddharmaśravaṇādeva mucyate sarvakilbiṣaiḥ || 7 ||
[Analyze grammar]

yātīti kimu vaktavyaṃ tasyānuṣṭhānatatparaḥ |
yasminsaṃgīyate yo hi prīyate puruṣottamaḥ || 8 ||
[Analyze grammar]

kathaṃ na yāti ca gatiṃ tasyā'nuṣṭhānata tparaḥ |
asmākaṃ jagatāṃ nātho janitā puruṣottamaḥ || 9 ||
[Analyze grammar]

tasyeṣṭānmādhave māsi dharmānetānkarotvayam |
tasya viṣṇuḥ prasannātmā sahāye sarvadā sthitaḥ || 10 ||
[Analyze grammar]

na tasya bhūpateḥ saure samarthastvaṃ ca śikṣaṇe |
na vāsudevabhaktānāmaśubhaṃ vidyate kvacit |
janmamṛtyujarāvyādhi bhayaṃ naivopajāyate || 11 ||
[Analyze grammar]

niyogī svāmikāryeṣu yāvacchakti samīhate |
tāvatā sa kṛtārthaḥ syānnarakānnaiva gacchati || 12 ||
[Analyze grammar]

kārye śakti viniṣkrānte svāmine ca nivedayet |
anṛṇastāvatā bhṛtyo niyogī sukhamaśnute || 13 ||
[Analyze grammar]

tasmānniveditārthasya na ṛṇaṃ na ca pātakam |
yatne kṛte svakartavye nāparādhosti dehinaḥ || 14 ||
[Analyze grammar]

tasmādaśakyakārye'sminna viśocitumarhasi || 15 ||
[Analyze grammar]

ityukto brahmaṇā sauriḥ punaratyaṃtakhinnadhīḥ |
uvāca dīnayā vācā galadvāṣpā'kulekṣaṇaḥ || 16 ||
[Analyze grammar]

prāptaṃ tāta mayā sarvaṃ tvadaṃghribhajanena vai |
nā'haṃ yāsye punaḥ kartuṃ niyogaṃ padmasaṃbhava || 17 ||
[Analyze grammar]

praśāsati mahāvīrye bhūpe'sminbhūmimaṇḍale |
cālayitvā svadharmāṃśca tamekaṃ bhūpatiṃ vibho || 17 ||
[Analyze grammar]

kṛtakṛtyo'smi tanayo gayāyāṃ piṇḍado yathā |
kṛpālo tadidaṃ kāryaṃ sādhayasva mamāvyayam || 19 ||
[Analyze grammar]

vijvarastu tato bhūyaḥ śāsanaṃ te karomyaham |
śrutvā brahmā yamenoktaṃ punaściṃtāparāyaṇaḥ || 20 ||
[Analyze grammar]

tamuvāca punarbrahmā sāṃtvayanbahudhāpyamum |
brahmovāca |
na nirgrāhyastvayā rājā viṣṇudharmaparāyaṇaḥ || 21 ||
[Analyze grammar]

yadi cchalayase kopādgacchāmo hyaṃtikaṃ hareḥ |
nivedya sakalaṃ tasmai karma paścāttadīritam || 22 ||
[Analyze grammar]

sa eva karttā lokasya dharmasya paripālakaḥ |
sa ca daṇḍadharo'smākaṃ śāstā karttā niyāmakaḥ || 23 ||
[Analyze grammar]

na tadukte'sti pratyuktirasmākaṃ vihitā vṛṣa |
na rājoktestu pratyuktirdṛśyate kvā'pi bhūtale || 24 ||
[Analyze grammar]

ityāśvāsya yamaṃ tena sākaṃ kṣīrāṃbudhiṃ yayau |
brahmā tuṣṭāva cinmātraṃ nirguṇaṃ parameśvaram || 25 ||
[Analyze grammar]

sāṃkhyayogairadvitīyamekaṃ taṃ puruṣottamam |
āvirāsīttadā viṣṇurbrahmaṇā saṃstuto hariḥ || 26 ||
[Analyze grammar]

praṇāmaṃ cakratustasmai yamo brahmā ca satvaram |
tāvuvāca mahāviṣṇurmeghagaṃbhīrayā girā || 27 ||
[Analyze grammar]

kasmādyuvāmihā'yātau kiṃ duḥkhaṃ danujairabhūt |
mlānaṃ yamamukhaṃ kasmātkena vā natakaṃdharaḥ || 28 ||
[Analyze grammar]

etadvadasva me brahmannityuktaścāha kaṃjajaḥ |
tvaddāsavarye bhūpāle bhūmiṃ śāsati vai narāḥ || 29 ||
[Analyze grammar]

vaiśākhadharmaniratā yāṃti te paramavyayam |
tato yamapurī śūnyā tena cā'tīvaduḥkhitaḥ || 30 ||
[Analyze grammar]

tena yuddhaṃ cakārā'sau haṃtuṃ daṃḍamathā'dade |
tvaccakreṇa parābhūto yayāvadya mamāntikam || 31 ||
[Analyze grammar]

na ca śakto vayaṃ daṃḍaṃ tvadbhaktānāṃ mahātmanām |
tasmāttvāmeva śaraṇaṃ vayaṃ prāptā mahāvibho || 32 ||
[Analyze grammar]

tasmādbhūpaṃ daṃḍayitvā pālayainaṃ yamaṃ svakam |
ityuktaḥ prahasanprāha brahmāṇaṃ yamameva ca || 33 ||
[Analyze grammar]

lakṣmīṃ vā'pi parityakṣye prāṇāndehamathā'pi vā |
śrīvatsaṃ kaustubhaṃ mālāṃ vaijayaṃtīmathā'pi vā || 34 ||
[Analyze grammar]

śvetadvīpaṃ ca vaikuṃṭhaṃ kṣīrasāgarameva ca |
śeṣaṃ ca garuḍaṃ caiva na bhaktaṃ tyaktumutsahe || 35 ||
[Analyze grammar]

vissṛjya sakalānbhogānmadarthe tyaktajīvitān |
madātmakānmahābhāgānkathaṃ tāṃstyaktumutsahe || 36 ||
[Analyze grammar]

tasmāttvadduḥkhaśamane hyupāyaṃ kalpayāmyaham |
tasya cāyurmayā dattamayutaṃ bhūpaterbhuvi || 37 ||
[Analyze grammar]

gatānyaṣṭau sahasrāṇi tatredānīṃ narāṃtaka |
āyuḥśeṣe tena nīte matsāyujyaṃ gate'pi ca || 38 ||
[Analyze grammar]

bhaviṣyati tato rājā veno nāma durātmavān |
sa luṃpati mahādharmānsarvānetāñchrutīritān || 39 ||
[Analyze grammar]

tadā vaiśākhadharmāśca vicchinnā syurna saṃśayaḥ |
svakṛtenaiva pāpena veno dagdho bhaviṣyati || 40 ||
[Analyze grammar]

paścādahaṃ pṛthurbhūtvā punardharmānpravartaye |
tadā janeṣu prakhyātānvaiśākhoktānkaromyaham || 41 ||
[Analyze grammar]

madbhakto madgataprāṇo yastu vinyastasaṃgrahaḥ |
ekaḥ sahasre bhavitā tasya prakhyāpayeddhi tān || 42 ||
[Analyze grammar]

kaścideva hi jānātu dharmānetānkṣitau mama |
tataste bhavitā kāryaṃ mā viṣīda narāṃtaka || 43 ||
[Analyze grammar]

dāpayiṣyāmi te bhāgaṃ māse'sminmādhave'pi ca |
naraiḥ sarvaiśca vaiśākhadharmaniṣṭhairmahātmabhiḥ || 44 ||
[Analyze grammar]

bhūpenā'pi ca kālena khedaṃ śamaya tena ca |
vīryaśulkaṃ tu te bhāgaṃ śatrorbhuṃkte balādhikāt || 45 ||
[Analyze grammar]

gṛhṇangṛhṇansvakaṃ bhāgaṃ na bhāgī duḥkhamarhati |
tvāmuddiśya na kurvaṃti pratyahaṃ ye narā bhuvi || 46 ||
[Analyze grammar]

snānaṃ cārghyaṃ sodakuṃbhaṃ dadhyannaṃ cāṃtime dine |
vaiśākhe sakalaṃ karma teṣāṃ ca viphalaṃ bhavet || 47 ||
[Analyze grammar]

tasmātkrodhaṃ tyaja nṛpe bhāgade matparāyaṇe |
ye ke cā'pi ca kurvaṃti loke te bhāgadā narāḥ || 48 ||
[Analyze grammar]

vaiśākhokte mahādharme teṣāṃ vighnaṃ ca mā kuru |
māmeva ye yajaṃtyaddhā tvāṃ hitvā dharmapālakam || 49 ||
[Analyze grammar]

madājñayā mahābhāga tadā daṃḍaṃ ca tvaṃ kuru |
nṛpādbhāgaṃ dāpayituṃ sunaṃdaṃ preṣayāmi ca || 50 ||
[Analyze grammar]

macchāsanātsa vai gatvā bhāgaṃ te dāpayiṣyati |
tiṣṭhatyevaṃ yame svasya sannidhau garuḍāsanaḥ || 51 ||
[Analyze grammar]

sunandaṃ preṣayāmāsa nṛpaṃ bodhayituṃ vibhuḥ |
so'pi gatvā bodhayitvā pārśvaṃ ca punarāgamat || 52 ||
[Analyze grammar]

ityāśvāsya yamaṃ viṣṇustatraivāntaradhīyata |
yamaṃ svayaṃ sāṃtvayitvā samanujñāpya vegataḥ || 53 ||
[Analyze grammar]

ativismayamāpanno yayau dhāma sahānugaiḥ |
yamo'pi svapurīṃ prāyātkiṃcitsaṃhṛṣṭamānasaḥ || 54 ||
[Analyze grammar]

paścādviṣṇornideśena sunandaparibodhitaḥ |
bhāgadāḥ sakalā lokā ye vaiśākhaparāyaṇāḥ || 55 ||
[Analyze grammar]

dharmarājaṃ puraskṛtya ye na kurvaṃti mānavāḥ |
teṣāṃ hi svayamādatte puṇyaṃ vaiśākhasaṃbhavam || 56 ||
[Analyze grammar]

kuryācca pratyahaṃ snānaṃ dadyādarghyaṃ yamāya vai |
vaiśākhe sakalaṃ puṇyamanyathā viphalaṃ bhavet || 57 ||
[Analyze grammar]

sodakumbhaṃ ca dadhyannaṃ paurṇamāsyāṃ ca mādhave |
dharmarājaṃ samuddiśya dātavyaṃ prathamaṃ janaiḥ || 58 ||
[Analyze grammar]

paścātpitṝnsamuddiśya gurumuddiśya vai naraḥ |
madhusūdanamuddiśya paścāddevaṃ janārdanam || 59 ||
[Analyze grammar]

śītalodakadadhyannaṃ tāṃbūlaṃ ca sadakṣiṇam |
saphalaṃ kāṃsyapātrasthaṃ brāhmaṇāya nivedayet || 60 ||
[Analyze grammar]

dadyācca pratimāṃ divyāṃ madhusūdanadevatām |
māsadharmapravaktre ca dadyādviprāya sīdate || 61 ||
[Analyze grammar]

tameva dharmavaktāraṃ pūjayedvibhavaiḥ svakaiḥ |
ityādiṣṭaḥ sunandena tathā rājā cakāra ha || 62 ||
[Analyze grammar]

sa nītvā cāyuṣaḥ śeṣaṃ bhuktvā bhogānyathepsitān |
putrapautrādibhiryukto jagāma harimaṃdiram || 63 ||
[Analyze grammar]

vaikuṇṭhasthe nṛpe tasminveno rājā'dhamo'bhavat |
sarve dharmāśca vaiśākhadharmā api viśeṣataḥ || 64 ||
[Analyze grammar]

durātmanā ca tenaiva luptā eva babhūvire |
na prakhyātāḥ punarbhūmau bhūriśo mokṣahetavaḥ || 65 ||
[Analyze grammar]

yaḥ kaścinnaiva jānāti vaiśākhoktānimāñcchubhān |
bahujanmārjite puṇyaparipāka upāgate || 66 ||
[Analyze grammar]

vaiśākhokteṣu dharmeṣu matirātyantikī bhavet |
maithila uvāca |
pūrvamanvaṃtarastho hi veno rājā durātmavān || 67 ||
[Analyze grammar]

ayaṃ vaivasvatastho hi rājā cekṣvākunaṃdanaḥ |
iti śrutaṃ mayā pūrvamidānīṃ cocyate tvayā || 68 ||
[Analyze grammar]

ayaṃ vaikuṇṭhagaḥ paścādveno rājā bhaviṣyati |
ityetaṃ saṃśayaṃ chiṃdhi śrutadeva mahāmate || 69 ||
[Analyze grammar]

śrutadeva uvāca |
purāṇeṣu ca vaiṣamyaṃ yugakalpavyavasthayā |
na cāprāmāṇyaśaṃkā te kathāyā vyatyaye kvacit || 70 ||
[Analyze grammar]

gate dainaṃdine kalpe yathaiṣā śāśvatī śubhā |
mārkaṇḍeyena me proktā sā coktā tava bhūpate || 71 ||
[Analyze grammar]

tasmānna khyātimāyānti dharmā vaiśākhasaṃbhavāḥ |
kaścideva hi jānāti virakto viṣṇutatparaḥ || 72 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāṃbarīṣasaṃvāde yamaduḥkhasāṃtvanaṃ nāma trayodaśo'dhyāyaḥ || 13 ||
[Analyze grammar]