Chapter 12

[English text for this chapter is available]

yama uvāca |
śṛṇu me vacanaṃ nātha lopito'haṃ pitāmaha |
maraṇādadhikaṃ manye matpadasya ca khaṇḍanam || 1 ||
[Analyze grammar]

niyogī na niyogaṃ hi karoti kamalāsana |
prabhorvittaṃ samaśnāti sa bhavetkāṣṭhakīṭakaḥ || 2 ||
[Analyze grammar]

yo'śnāti lobhādvittāni prajñāvāṃśca mahīpate |
sa tiryagyoni narake yāti kalpaśatatrayam || 3 ||
[Analyze grammar]

niḥspṛho nā'caredyastu niyogaṃ padmasaṃbhava |
bhuktvā tu narakānghorānsa pumānvāyaso bhavet || 4 ||
[Analyze grammar]

ātmakāryaparo yastu svāmikāryaṃ viluṃpati |
bhavedveśmani pāpātmā ākhuḥ kalpaśatatrayam || 5 ||
[Analyze grammar]

niyogī yaśca bhūtvā vai tiṣṭhannityaṃ svaveśmani |
śaktastu kāryakaraṇe mārjāro jāyate naraḥ || 6 ||
[Analyze grammar]

so'haṃ deva tavādeśātprajā dharmeṇa sādhaye |
puṇyena puṇyakartāraṃ pāpaṃ pāpena karmaṇā || 7 ||
[Analyze grammar]

samyagvicārya munibhirdharmaśāstrānvitaiḥ prabho |
kalpādau vartamānasya yātanā dāpayanmama || 8 ||
[Analyze grammar]

kartuṃ niyogamevaṃ hi tvadīyo naiva śaknuyām |
rājñā kīrtimatā bhagno niyogastava ca kṣitau || 9 ||
[Analyze grammar]

bhayādasya jagannātha pṛthivīṃ sāgarāmbarām |
vaiśākhadharmasahitāṃ pālayanvartate kvacit || 10 ||
[Analyze grammar]

vihāya sarvadharmāṃśca vihāya pitṛpūjanam |
vihāyā'gnisaparyāṃ tu tīrtha yātrādisatkriyāḥ || 11 ||
[Analyze grammar]

yogasāṃkhyāvubhau tyaktvā tyaktvā prāṇanirodhanam |
tyaktvā homaṃ ca svādhyāyaṃ kṛtvā pāpāni bhūriśaḥ || 12 ||
[Analyze grammar]

prayānti vaiṣṇavaṃ lokaṃ kṛtvā vaiśākhasatkriyāḥ |
manujāḥ pitṛbhiḥ sārddhaṃ tathaiva ca pitāmahaiḥ || 13 ||
[Analyze grammar]

teṣāmatītapitaraḥ pitṝṇāṃ pitarastathā |
tathā mātāmahā yāṃti teṣāṃ vai janakādayaḥ || 14 ||
[Analyze grammar]

teṣāmapi ca netāro janitrīṇāṃ ca pūrvajāḥ |
etadduḥkhaṃ punardeva mama mastakabhedanam || 15 ||
[Analyze grammar]

priyāyāḥ pitaro yānti mārjayitvā lipiṃ mama |
pitṝṇāṃ bījajo yastu dhātryā kukṣau dhṛto vibho || 16 ||
[Analyze grammar]

yadaṃkena kṛtaṃ karma tadekenaiva bhujyate |
tannirasya kṛtaṃ sarvaṃ jānaṃstvekaḥ kule tu yaḥ || 17 ||
[Analyze grammar]

tārayettāvubhau pakṣau ṣaḍviṃśoparyalaṃ vibho |
priyāyāścā'pi vai tāta sarve vai kukṣisaṃbhavāḥ || 18 ||
[Analyze grammar]

te'pi sarve jagannātha yānti viṣṇoḥ paraṃ padam |
na me prayojanaṃ deva niyogenedṛśena vai || 19 ||
[Analyze grammar]

vaiśākhadharmanirataḥ sa māṃ tyaktvā vrajeddharim |
triḥsaptakulamuddhatya tyaktapāpo'tiśobhanaḥ || 20 ||
[Analyze grammar]

sa tyaktvā mama mārgaṃ hi prayāti harimaṃdiram |
na yajñaistādṛśairdeva gatiṃ prāpnoti mānavaḥ || 21 ||
[Analyze grammar]

sarvatīrthairna dānādyairna tapobhiśca na vrataiḥ |
api vā sakalairdharmairyukto nā'pnoti tāṃ gatim || 22 ||
[Analyze grammar]

prayāgapātādraṇamadhyapātādbhṛgośca pātānmaraṇācca kāśyām |
na tāṃ gatiṃ yāṃti janāśca sarve vaiśākhaniṣṭhena ca yā prapadyate || 23 ||
[Analyze grammar]

prātaḥ snātvā devapūjāṃ ca kṛtvā śrutvā kathāṃ māsamāhātmyasaṃjñām |
dharmānkṛtvā cocitānvaiṣṇavāṃśca sa vai bhavedviṣṇulokaikanāthaḥ || 24 ||
[Analyze grammar]

apramāṇamahaṃ manye lokaṃ viṣṇorjagatpateḥ |
yo na pūryeta koṭyoghaiḥ sarvataḥ kamalāsana || 25 ||
[Analyze grammar]

mādhavāvasatheneha samastena pitāmaham |
vikarmasthā'vikarmasthāḥ śucayo'śucayastathā || 26 ||
[Analyze grammar]

kṛtvā vaiśākhakṛtyāni lokā yānti nṛpā'jñayā |
yo'smākaṃ hi mahacchatrurbhavatāṃ ca viśeṣataḥ || 27 ||
[Analyze grammar]

nigrāhyo jagatāṃ nātha bhavatā'sau mahīpatiḥ |
hitvā hi sakalāndharmānsakṛdvaiśākhasnānataḥ || 28 ||
[Analyze grammar]

asaṃskṛtajanā yāṃti vaikuṇṭhaṃ harimaṃdiram |
asmābhistu kṛtopekṣo liṇupādaikasaṃśrayaḥ || 29 ||
[Analyze grammar]

samastaṃ neṣyate lokaṃ pārthivo nātra saṃśayaḥ |
eṣa daṇḍapaṭo hyadya tava padbhyāṃ niveditaḥ || 30 ||
[Analyze grammar]

lokapālatvamatulamarjitaṃ tena bhūbhujā |
kimapatyena jātena mātuḥ kleśaṃkareṇa vai || 31 ||
[Analyze grammar]

yo na pātayate śatruṃ jyeṣṭhamāsīva bhāskaraḥ |
vṛthāsutā hi yuvatirjātā ceddhi kuputriṇī || 32 ||
[Analyze grammar]

na tasyāḥ sphurate kīrtirghanasyeva śatahradā |
yatpiturnoddharetpāpādvidyayā vā balena vā || 33 ||
[Analyze grammar]

māturjaṭharajo rogaḥ sa prasūto dharātale |
dharme cā'rthe ca kāme ca yatpratīpo bhavetsutaḥ || 34 ||
[Analyze grammar]

mātṛhā hyucyate sadbhiḥ sa putraḥ puruṣādhamaḥ |
tanmātā nṛpapatnī ca lokavikhyātasatkriyā || 35 ||
[Analyze grammar]

ekaiva vīrasūrloke vīraḥ sa nātra saṃśayaḥ |
yathā vai kīrtimāñjāto mallipermārjanāya vai || 36 ||
[Analyze grammar]

nedaṃ vyavasitaṃ deva kenacitkṣatriyeṇa hi |
purāṇeṣu jagannātha na śrutaṃ paṭamārjanam || 37 ||
[Analyze grammar]

so'haṃ na jānāmi jagatpatīśa ṛte kṣitīśaṃ haritatparaṃ tam |
pracodayantaṃ paṭahaṃ sughoṣādvilopayānaṃ mama veśmamārgam || 38 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe vaiśākhamāsamāhātmye nāradāmbarīṣasaṃvāde yamaduḥkhanirūpaṇaṃnāma dvādaśo'dhyāyaḥ || 12 ||
[Analyze grammar]