Chapter 1

[English text for this chapter is available]

atha śrīmadbhāgavatamāhātmyaṃ prārabhyate |
vyāsa uvāca |
śrīsaccidānandaghanasvarūpiṇe kṛṣṇāya cānantasukhābhivarṣiṇe |
viśvodbhavasthānanirodhahetave numo vayaṃ bhaktirasāptaye'niśam || 1 ||
[Analyze grammar]

naimiṣe sūtamāsīnamabhivādya mahāmatim |
kathāmṛtarasāsvādakuśalā ṛṣayo'bruvan || 2 ||
[Analyze grammar]

ṛṣaya ūcuḥ |
vajraṃ śrīmāthure deśe svapautraṃ hastināpure |
abhiṣicya gate rājñi tau kathaṃ kiṃ ca cakratuḥ || 3 ||
[Analyze grammar]

sūta uvāca |
nārāyaṇaṃ namaskṛtya naraṃ caiva narottamam |
devīṃ sarasvatīṃ vyāsaṃ tato jayamudīrayet || 4 ||
[Analyze grammar]

mahāpathaṃ gate rājñi parīkṣitpṛthivīpatiḥ |
jagāma mathurāṃ viprā vajranābhadidṛkṣayā || 5 ||
[Analyze grammar]

pitṛvyamāgataṃ jñātvā vajraḥ premapariplutaḥ |
abhigamyābhivādyātha nināya nijamandiram || 6 ||
[Analyze grammar]

pariṣvajya sa taṃ vīraḥ kṛṣṇaikagatamānasaḥ |
rohiṇyādyā hareḥ patnīrvavandāyatanāgataḥ || 7 ||
[Analyze grammar]

tābhiḥ sammānito'tyarthaṃ parīkṣitpṛthivīpatiḥ |
viśrāntaḥ sukhamāsīno vajranābhamuvāca ha || 8 ||
[Analyze grammar]

śrīparīkṣiduvāca |
tāta tvatpitṛbhirnūnamasmatpitṛpitāmahāḥ |
uddhṛtā bhūriduḥkhaughādahaṃ ca parirakṣitaḥ || 9 ||
[Analyze grammar]

na pārayāmyahaṃ tāta sādhu kṛtvopakārataḥ |
tvāmataḥ prārthayāmyaṅga sukhaṃ rājye'nuyujyatām || 10 ||
[Analyze grammar]

kośasainyādijā cintā tathāridamanādijā |
manāgapi na kāryā te susevyāḥ kintu mātaraḥ || 11 ||
[Analyze grammar]

nivedya mayi kartavyaṃ sarvādhiparivarjjanam |
śrutvaitatparamaprīto vajrastaṃ pratyuvāca ha || 12 ||
[Analyze grammar]

śrīvajranābha uvāca |
rājannucitametatte yadasmāsu prabhāṣate |
tvatpitropakṛtaścāhaṃ dhanurvidyāpradānataḥ || 13 ||
[Analyze grammar]

tasmānnālpāpi me cintā kṣātraṃ dṛḍhamupeyuṣaḥ |
kintvekā paramā cintā tatra kiñcidvicāryyatām || 14 ||
[Analyze grammar]

māthure tvabhiṣikto'pi sthito'haṃ nirjane vane |
kva gatā vai prajā'tratyā yatra rājyaṃ prarocate || 15 ||
[Analyze grammar]

ityukto viṣṇurātastu nandādīnāṃ purohitam |
śāṃḍilyamājuhāvāśu vajrasaṃdehanuttaye || 16 ||
[Analyze grammar]

athoṭajaṃ vihāyāśu śāṃḍilyaḥ samupāgataḥ |
pūjito vajranābhena niṣasādāsanottame || 17 ||
[Analyze grammar]

upodghātaṃ viṣṇurātaścakārāśu tatastvasau |
uvāca paramaprītastāvubhau parisāntvayan || 18 ||
[Analyze grammar]

śrīśāṃḍilya uvāca |
śṛṇutaṃ dattacittau me rahasyaṃ vrajabhūmijam |
vrajanaṃ vyāptirityuktyā vyāpanādvraja ucyate || 19 ||
[Analyze grammar]

guṇātītaṃ paraṃ brahma vyāpakaṃ vraja ucyate |
sadānandaṃ paraṃ jyotirmuktānāṃ padamavyayam || 20 ||
[Analyze grammar]

tasminnandātmajaḥ kṛṣṇaḥ sadānandāṃgavigrahaḥ |
ātmārāmaścāptakāmaḥ premāktairanubhūyate || 21 ||
[Analyze grammar]

ātmā tu rādhikā tasya tayaiva ramaṇādasau |
ātmārāmatayā prājñaiḥ procyate gūḍhavedibhiḥ || 22 ||
[Analyze grammar]

kāmāstu vāñchitāstasya gāvo gopāśca gopikāḥ |
nityāḥ sarve vihārādyā āptakāmastatastvayam || 23 ||
[Analyze grammar]

rahasyaṃ tvidametasya prakṛteḥ paramucyate |
prakṛtyā khelatastasya līlā'nyairanubhūyate || 24 ||
[Analyze grammar]

sargasthityapyayā yatra rajaḥsattvatamoguṇaiḥ |
līlaivaṃ dvividhā tasya vāstavī vyāvahārikī || 25 ||
[Analyze grammar]

vāstavī tatsvasaṃvedyā jīvānāṃ vyāvahārikī |
ādyāṃ vinā dvitīyā na dvitīyā nādyagā kvacit || 26 ||
[Analyze grammar]

āvayorgocareyaṃ tu tallīlā vyāvahārikī |
yatra bhūrādayo lokā bhuvi māthuramaṇḍalam || 27 ||
[Analyze grammar]

atraiva vrajabhūmiḥ sā yatra tattvaṃ sugopitam |
bhāsate premapūrṇānāṃ kadācidapi sarvataḥ || 28 ||
[Analyze grammar]

kadāciddvāparasyānte raholīlādhikāriṇaḥ |
samavetā yadā'tra syuryathedānīṃ tadā hariḥ || 29 ||
[Analyze grammar]

svaiḥ sahāvataretsveṣu samāveśārthamīpsitāḥ |
tadā devādayo'pyanye'vataranti samantataḥ || 30 ||
[Analyze grammar]

sarveṣāṃ vāñchitaṃ kṛtvā harirantarhito'bhavat |
tenātra trividhā lokāḥ sthitāḥ pūrvaṃ na saṃśayaḥ || 31 ||
[Analyze grammar]

nityāstallipsavaścaiva devādyāśceti bhedataḥ |
devādyāsteṣu kṛṣṇena dvārikāṃ prāpitāḥ purā || 32 ||
[Analyze grammar]

punarmauśalamārgeṇa svādhikāreṣu cāpitāḥ |
tallipsūṃśca sadā kṛṣṇaḥ premānandaikarūpiṇaḥ || 33 ||
[Analyze grammar]

vidhāya svīyanityeṣu samāveśitavāṃstadā |
nityāḥ sarve'pyayogyeṣu darśanābhāvatāṃ gatāḥ || 34 ||
[Analyze grammar]

vyāvahārikalīlāsthāstatra yannādhikāriṇaḥ |
paśyantyatrāgatāstasmānnirjjanatvaṃ samantataḥ || 35 ||
[Analyze grammar]

tasmāccintā na te kāryā vajranābha madājñayā |
vāsayātra bahūngrāmānsaṃsiddhiste bhaviṣyati || 36 ||
[Analyze grammar]

kṛṣṇalīlānusāreṇa kṛtvā nāmāni sarvataḥ |
tvayā vāsaya tā grāmānsaṃsevyā bhūriyaṃ parā || 37 ||
[Analyze grammar]

govarddhane dīrghapure mathurāyāṃ mahāvane |
nandigrāme bṛhatsānau kāryā rājyasthitistvayā || 38 ||
[Analyze grammar]

nadyadridroṇikuṇḍādikuñjānsaṃsevatastava |
rājye prajāḥ susaṃpannāstvaṃ ca prīto bhaviṣyasi || 39 ||
[Analyze grammar]

saccidānandabhūreṣā tvayā sevyā prayatnataḥ |
tava kṛṣṇasthalānyatra sphurantu madanugrahāt || 40 ||
[Analyze grammar]

vajra saṃsevanādasyā uddhavastvāṃ miliṣyati |
tato rahasyametasmātprāpsyasi tvaṃ samātṛkaḥ || 41 ||
[Analyze grammar]

evamuktvā tu śāṇḍilyo gataḥ kṛṣṇamanusmaran |
viṣṇurāto'tha vajraśca parāṃ prītimavāpatuḥ || 42 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīmadbhāgavatamāhātmye śāḍilyopadiṣṭavrajabhūmimāhātmyavarṇanaṃnāma prathamo'dhyāyaḥ || 1 ||
[Analyze grammar]