Chapter 6

[English text for this chapter is available]

skaṃda uvāca |
karādvigalitaṃ yatra kapālaṃ te maheśvara |
tasya tīrthasya māhātmyaṃ kṛpayā vada me pitaḥ || 1 ||
[Analyze grammar]

śiva uvāca |
atiguhyamidaṃ tīrthaṃ surāsuranamaskṛtam |
brahmahā'pi naro yatra snānamātreṇa śuddhyati || 2 ||
[Analyze grammar]

paṃca tīrthāni tiṣṭhaṃti kapāle pāpamocane |
tatra snānaṃ tapo dānaṃ sarvamakṣayamiṣyate || 3 ||
[Analyze grammar]

piṃḍaṃ vidhāya vidhivannarakāttārayetpitṝn |
pitṛtīrthamidaṃ proktaṃ gayāto'ṣṭaguṇādhikam || 4 ||
[Analyze grammar]

tilatarppaṇato yāṃti pitaraḥ svargamuttamam || 5 ||
[Analyze grammar]

ahorātraṃ sthiro bhūtvā japaniṣṭhaḥ samāhitaḥ |
tasyeṣṭasiddhirmahatī tatkṣaṇādeva jāyate || 6 ||
[Analyze grammar]

pāralaukikakarmāṇi sarvāṇyavyāhatāni ca |
kapālamocane tīrthe nādhikaṃ pitṛkarmaṇi || 7 ||
[Analyze grammar]

skaṃda uvāca |
kutra vā brahmatīrthaṃ vai phalaṃ vā kīdṛśaṃ bhavet |
ke vā tatra vasaṃtīha kṛpayā vada me pitaḥ || 8 ||
[Analyze grammar]

śiva uvāca |
ekadā viṣṇunābhyambhoruhasthasya prajāpateḥ |
vedānmukhāṃbujāddhṛtvā jagmaturmadhukaiṭabhau || 9 ||
[Analyze grammar]

tato hyutthāya śayanātsisṛkṣurabjasaṃbhavaḥ |
sraṣṭuṃ vinā'gamaṃ loke na śaśāka hṛtasmṛtiḥ || 10 ||
[Analyze grammar]

tadā badarikāmetya hariṇā pratipālitām |
tuṣṭāva praṇato bhūtvā bhagavaṃtaṃ sanātanam || 11 ||
[Analyze grammar]

tataḥ kuṃḍātsamudbhūto hayaśīrṣo nijāyudhaḥ |
pītāṃbaradharaḥ śuklaścaturbāhuḥ sudṛptadṛk || 12 ||
[Analyze grammar]

atyadbhutaḥ prakaṭakaṭhoralocanaścalacchaṭāvicchuritameghaḍaṃbaraḥ |
svatejasā hatanikhilaprabhākulaḥ kṛpānvito druhiṇapuraḥsaro'bhavat || 13 ||
[Analyze grammar]

nirīkṣya taṃ vidhirapi vismayākulaḥ praṇamya ca stutimakarotprasannadṛk || 14 ||
[Analyze grammar]

brahmovāca |
namaḥ kamalanābhāya namaste kamalāśraya |
namaste kamalāvāsaviśālavanamāline || 15 ||
[Analyze grammar]

namo vijñānabhātrāya guhāvāsa nivāsine |
hṛṣīkeśāya śāṃtāya tubhyaṃ bhagavate namaḥ || 16 ||
[Analyze grammar]

svabhaktarakṣaṇakṛte dhṛtadehāya śārṅgiṇe |
anaṃtakleśanāśāya gadine brahmaṇe namaḥ || 17 ||
[Analyze grammar]

saṃsāravividhāsāranivṛttikṛtakarmaṇe |
rakṣitre sarvajaṃtūnāṃ viṣṇave jiṣṇave namaḥ || 18 ||
[Analyze grammar]

namo viśvaṃbharāśeṣanivṛttaguṇavṛttaye |
surāsuravarastaṃbhanivṛttisthitikīrtaye || 19 ||
[Analyze grammar]

itīritaḥ surapatinā maheśvaro hṛdisthito'khilavidaśeṣakarmabhiḥ |
tato'ntaraṃ sapadi gato nibadhya tau suradruhau kila nijaghāna līlayā || 20 ||
[Analyze grammar]

tato nigamamādāya brahmaṇoṃ'tikamāyayau |
dattvā svanigamaṃ tasmai svastho'bhūtsa samīḍitaḥ || 21 ||
[Analyze grammar]

tataḥ prabhṛti tattīrthaṃ brahmaṇā prakaṭīkṛtam |
brahmakuṃḍamiti khyātaṃ triṣu lokeṣu viśrutam || 22 ||
[Analyze grammar]

yasya darśanamātreṇa mahāpātakino janāḥ |
vimuktakilbiṣāḥ sadyo brahmalokaṃ vrajaṃti te || 23 ||
[Analyze grammar]

snānaṃ kurvaṃti ye lokā vratacaryāmathāpi vā |
brahmalokamatikramya viṣṇulokaṃ vrajaṃti te || 24 ||
[Analyze grammar]

skaṃda uvāca |
tataḥ kimakaroddhātā labdhvā vedāñjanārddanāt |
etadanyacca sarvaṃ me kṛpayā vada sāṃpratam || 25 ||
[Analyze grammar]

mahādeva uvāca |
caturṇāmapi vedānāṃ dṛṣṭvā badarikāśramam |
matirna jāyate gaṃtuṃ brahmaṇā saha putraka || 26 ||
[Analyze grammar]

tatastu vikalaṃ dṛṣṭvā brahmāṇaṃ janavāsinaḥ |
siddhāstu vidhivatstutvā praṇipatyedamabruvan || 27 ||
[Analyze grammar]

siddhā ūcuḥ |
ājñā bhagavataḥ kāryā sarvaiḥ sthāvarajaṃgamaiḥ |
bhagavānsarvajaṃtūnāṃ karttā hartā pitā guruḥ || 28 ||
[Analyze grammar]

sthitirbrahmāṃtike vaśca hariṇaivānukalpitā |
nivṛttirvartate caiṣā tathāpyetannirāmayam || 29 ||
[Analyze grammar]

ekāṃte dravarūpeṇa mūrtirvo'trāvatiṣṭhatām |
dvitīyā brahmaṇā sārddhaṃ brahmalokaṃ vrajetpunaḥ || 30 ||
[Analyze grammar]

tataḥ sahṛdayā vedā dvaidhīkṛtātmarūpakāḥ |
brahmaṇā brahmalokaṃ te yayuḥ sārddhaṃ praharṣitāḥ || 31 ||
[Analyze grammar]

tatastrilokaṃ vidhivatsasarja caturānanaḥ |
dravarūpeṣu vedeṣu snānadānatapaḥkriyāḥ |
kṛtā viccheditā na syuryāvadābhūtasaṃplavam || 32 ||
[Analyze grammar]

phalamuddiśya kurvaṃti upavāsatrayaṃ narāḥ |
caturṇāmapi vedānāṃ vyākhyātāro na saṃśayaḥ || 33 ||
[Analyze grammar]

anukrameṇa tiṣṭhaṃti vedāścatvāra eva ca |
ṛgyajuḥsāmātharvākhyā bhagavatpārśvavartinaḥ || 34 ||
[Analyze grammar]

ye puṇyavaṃto'kaluṣā vedavedāṃgapāragāḥ |
te vedaghoṣaṃ viralāḥ śṛṇvaṃtyapi kalau yuge || 35 ||
[Analyze grammar]

caturṇāmapi vedānāmudagasti sarasvatī |
japtātha sā nṛṇāṃ haṃti jaḍatāṃ jalarūpiṇī || 36 ||
[Analyze grammar]

sarasvatyā jale sthitvā japaṃ kṛtvā samāhitaḥ |
manostasya na vicchedaḥ kadācidapi jāyate || 37 ||
[Analyze grammar]

vedavyāso'pi bhagavānyatprasādādudāradhīḥ |
purāṇasaṃhitārthajño'bhavadatra na saṃśayaḥ || 38 ||
[Analyze grammar]

trayāṇāmapi lokānāṃ hitāya jagatāṃ patiḥ |
sthāpayāmāsa vidhinā vāṇīṃ vāgvibhavapradām || 39 ||
[Analyze grammar]

darśanasparśanasnānapūjāstutyabhivandanaiḥ |
sarasvatyā na vicchedaḥ kule tasya kadācana || 40 ||
[Analyze grammar]

mantrasiddhirviśeṣeṇa sarasvatyāstaṭe nṛṇām |
japatāmaciraṇaiva jāyate nātra saṃśayaḥ || 41 ||
[Analyze grammar]

bahunā kimihoktena vāṇī vāgvibhavapradā |
dravarūpadharā nṛṇāṃ darśanātpūtirujjvalā || 42 ||
[Analyze grammar]

tato'rvāgdakṣiṇe bhāge dravadhāreti viśrutam |
tīrthamiṃdrapadaṃ yatra tapaścakre puraṃdaraḥ || 43 ||
[Analyze grammar]

sudāruṇaṃ tapaḥ kṛtvā paritoṣya janārddanam |
padamaiṃdraṃ samālebhe surāsuranamaskṛtam || 44 ||
[Analyze grammar]

tapo dānaṃ japo homo vratāni niyamā yamāḥ |
tatrānantaguṇaṃ proktaṃ tattīrthamatidurlabham || 45 ||
[Analyze grammar]

pratimāse trayodaśyāṃ śuklāyāṃ haritoṣaṇe |
snātvā sutīrthe sutrāmācchandaṃ copetya saṃgataḥ || 46 ||
[Analyze grammar]

upavāsadvayaṃ kṛtvā pūjayitvā janārddanam |
sarvapāpavinirmuktaḥ śakraloke mahīyate || 47 ||
[Analyze grammar]

tatraiva mānasodbhedaḥ sarvapāpapraṇāśanaḥ |
durlabhaḥ sarvajaṃtūnāṃ yatra te syurmaharṣayaḥ || 48 ||
[Analyze grammar]

mānasaṃ cidacidgranthimudgrathnaṃti ca sarvataḥ |
mānasodbheva ityākhyā ṛṣibhiḥ parigīyate || 49 ||
[Analyze grammar]

bhiṃdaṃti hṛdayagraṃthīśchiṃdanti bahusaṃśayam |
karmāṇi kṣapayantyasmānmānasodbheda ityabhūt || 50 ||
[Analyze grammar]

yadi bhāgyavaśādatra biṃdumātraṃ labhennaraḥ |
tatkṣaṇānmuktimāpnoti kimatastvadhikaṃ bhavet || 51 ||
[Analyze grammar]

giridarīnilaye nivasatyamī ṛṣigaṇāḥ phalamūlajalāśanāḥ |
jitamanoviṣayāḥ śitabuddhayaḥ kalibhayādiva pāpabhayākulāḥ || 52 ||
[Analyze grammar]

phalasamīraṇagahvaranirjharāśramabharādupalabdhapaṭottamāḥ |
triṣavaṇakramanirjitadurjayendriyaparākramaṇā munayastvamī || 53 ||
[Analyze grammar]

sādhanāni bahūnyeva kāyakleśakarāṇyaho |
sulabhaṃ sādhanaṃ loke mānasodbhedadarśanam || 54 ||
[Analyze grammar]

yasmindine jalaṃ caitallabhate puṇyavāñjanaḥ |
bhavati vyāsasadṛśo yamapitṛsamaḥ kramāt || 55 ||
[Analyze grammar]

kāmyatīrthamidaṃ nṝṇāṃ kāmanāvaśakṛtpunaḥ |
akāmatastu muktiḥ syādubhayoreṣa niścayaḥ || 56 ||
[Analyze grammar]

yadi kaścitpramādena kāmanāṃ kurute naraḥ |
phalaṃ bhuktvā punarmuktirbhavatyeva na saṃśayaḥ || 57 ||
[Analyze grammar]

maharādiṣu lokeṣu bhuktvā bhogānyathepsitān |
bhoge bhukte punaryāti kāmanāvaśato janaḥ || 58 ||
[Analyze grammar]

puruṣārthasamāvāptyai yatanīyaṃ manīṣibhiḥ |
mānasodbhedane tīrthe nāpetyatreti me matiḥ || 59 ||
[Analyze grammar]

mānasodbhedanātpratyagdiśi sarvamanoharam |
vasudhāreti vikhyātaṃ tīrthaṃ trailokyadurlabham || 60 ||
[Analyze grammar]

trilokyāṃ sarvatīrthebhyaḥ śreṣṭho badarikāśramaḥ |
śrutvā tannāradātsarve vasavaḥ samupāgatāḥ || 61 ||
[Analyze grammar]

triṃśadvarṣasahasrāṇi tapaḥ paramadāruṇam |
dalāṃbuprāśanāścakrustataḥ siddhimupāyayuḥ || 62 ||
[Analyze grammar]

bhagavaddarśanātprāptānaṃdanirvṛttaviklamāḥ |
hṛdayānandasaṃdohapraphullitamukhāṃbujāḥ || 63 ||
[Analyze grammar]

dṛṣṭvā nārāyaṇaṃ devaṃ varaṃ labdhvā manoramam |
haribhaktisukhaiśvaryyaṃ paraṃ labdhvā mudaṃ yayuḥ || 64 ||
[Analyze grammar]

atra snātvā jalaṃ pītvā pūjayitvā janārddanam |
iha loke sukhaṃ bhuktvā yātyaṃte paramaṃ padam || 65 ||
[Analyze grammar]

atra puṇyavatāṃ jyotirdṛśyate jalamadhyataḥ |
yaddṛṣṭvā na punarbhūyo garbhavāsaṃ prapadyate || 66 ||
[Analyze grammar]

ye'śuddhapitṛjāḥ pāpāḥ pāṣaṃḍamativṛttayaḥ |
na teṣāṃ śirasi prāyaḥ pataṃtyāpaḥ kadācana || 67 ||
[Analyze grammar]

dinatrayaṃ śucirbhūtvā pūjayitvā janārdanam |
upoṣya bhagavadbhaktyā siddhānpaśyaṃti sādhavaḥ || 68 ||
[Analyze grammar]

ye tatra capalāstathyaṃ na vadaṃti ca lolupāḥ |
parihāsaparadravyaparastrīkapaṭāgrahāḥ || 69 ||
[Analyze grammar]

malacailāvṛtā'śāṃtā'śucayastyaktasatkriyāḥ |
teṣāṃ malinacittānāṃ phalamatra na jāyate || 70 ||
[Analyze grammar]

ye tatra sādhakāḥ śāṃtā viralā vidhivartmagāḥ |
teṣāṃ japastapohomo dānavratajapakriyāḥ || 71 ||
[Analyze grammar]

kriyamāṇā yathāśaktyā hyakṣayyaphaladāyakāḥ || 72 ||
[Analyze grammar]

yatkiṃcicchubhakarmāṇi kriyamāṇāni dehinām |
mahadādiphalaṃ dadyurniḥśreyasamanuttamam || 73 ||
[Analyze grammar]

śrāvaṇīyamiha kiṃ phalādhikaṃ yatra yāṃti vibudhāḥ phalārthinaḥ |
pūjitādanu hareḥ priyārthinaḥ svargamārganiratāḥ pramodinaḥ || 74 ||
[Analyze grammar]

yatra saṃti na ca vighnakāriṇaḥ karmaṇāṃ haribhayātsusidhyati |
nirviśaṃti ca phalaṃ vivekinaḥ karmamārganiratāḥ sudehinaḥ || 75 ||
[Analyze grammar]

ye paṭhaṃtyatha ca pāṭhayaṃtyaho puṇyatīrthaviṣayaṃ prakāśitam |
bhaktibhāvasamalaṃkṛtāśca te saṃprayānti harimaṃdiraṃ śubham || 76 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe badarikāśramamāhātmye śivakārttikeyasaṃvāde vasudhārātīrthamāhātmyavarṇanaṃnāma ṣaṣṭho'dhyāyaḥ || 6 ||
[Analyze grammar]