Chapter 18

[English text for this chapter is available]

jaiminiruvāca |
tataḥ pravavṛte sutyā nṛpatervājimedhikā |
tasyāṃ trailokyamabhavadekasadmanibhaṃ dvijāḥ || 1 ||
[Analyze grammar]

śāstraiḥ stotrairdivaspṛgbhirvarṇakramasamujjvalaiḥ |
yathāpadasvaranyāsairanye śabdāstirohitāḥ || 2 ||
[Analyze grammar]

dīnebhyo'vāritaṃ tatra dīyante vāñchitāni vai |
naṭanarttakasūtānāṃ sābhūtkalpadrumopamā || 3 ||
[Analyze grammar]

tanmadhye'vabhṛthe snātuṃ kṛtā yatropakārikā |
dakṣiṇe taṭabhūdeśe bilveśvarasamīpataḥ || 4 ||
[Analyze grammar]

niyuktāḥ sevakā rājñā sasaṃbhramamupasthitāḥ |
nyavedayanta nṛpatiṃ kṛtāṃjalipuṭā dvijāḥ || 5 ||
[Analyze grammar]

deva dṛṣṭo mahānvṛkṣastaṭabhūmau mahodadheḥ |
praviṣṭāgrasamudrāṃtaḥ kallolaplavamūlakaḥ || 6 ||
[Analyze grammar]

maṃjiṣṭhavarṇaḥ sarvatra śaṃkhacakrāṃkitaḥ plavan |
snānaveśmasamīpe'sau dṛṣṭo'smābhiḥ paro'dbhutaḥ || 7 ||
[Analyze grammar]

na dṛṣṭapūrvo vṛkṣo'yamudyatsūryanibhoṃ'śunā |
gaṃdhena vāsayansarvā taṭabhūmiṃ sugaṃdhinā || 8 ||
[Analyze grammar]

drumaḥ sādhāraṇo nāyaṃ lakṣyate devabhūruhaḥ |
kaściddevastaruvyājādāgato lakṣyate dhuvam || 9 ||
[Analyze grammar]

niyuktānāṃ vacaḥ śrutvā rājā nāradamabravīt |
tatkiṃ nimittaṃ yaddṛṣṭaṃ taruśreṣṭhaṃ vadaṃti te || 10 ||
[Analyze grammar]

nāradaḥ prahasanvākyamuvāca nṛpasattamam |
pūrṇāhutiḥ samāpnotu yathā syātsaphalaḥ kratuḥ || 11 ||
[Analyze grammar]

upasthitaṃ te tadbhāgyaṃ svapne yaddṛṣṭavānpurā |
śvetadvīpe viśvamūrtirdṛṣṭo yo viṣṇuravyayaḥ || 12 ||
[Analyze grammar]

tadaṃgaskhalitaṃ roma tarutvamupapadyate |
aṃśāvatāraḥ sthāsnuryaḥ pṛthivyāṃ parameṣṭhinaḥ || 13 ||
[Analyze grammar]

tadrūpāvataraṃ yāti bhagavānbhaktavatsalaḥ |
drumo hyapauruṣo yosau bhājanaṃ nāsya darśane || 14 ||
[Analyze grammar]

tvāmṛte puruṣavyāghra pṛthivyāṃ nṛpasattama |
tvadbhāgyavaśataḥ sarvalokānāṃ nayanātithiḥ || 15 ||
[Analyze grammar]

bhaviṣyati mahārāja sarvakalmaṣanāśanaḥ |
samāpyāvabhṛthasnānaṃ taṭāṃte saritāṃ pateḥ || 16 ||
[Analyze grammar]

utsavaṃ sumahatkṛtvā kṛtakautukamaṃgalam |
mahāvedyāṃ sthāpayātra yajñeśaṃ tarurūpiṇam || 17 ||
[Analyze grammar]

vicāryetthaṃ mudā yuktau tāvubhau nṛpanāradau |
susamṛddhau tatra yātau yatrāsau bhagavaddrumaḥ || 18 ||
[Analyze grammar]

taṃ dṛṣṭvā harṣitāḥ sarve brahma sākṣādupasthitam |
menire janmasāphalyaṃ jīvanmuktā mahodayāḥ || 19 ||
[Analyze grammar]

indradyumno'pi nṛpatirmamajjāmṛtasāgare |
svapne dṛṣṭvā jagannāthaṃ yathāsau bhagavatpriyaḥ || 20 ||
[Analyze grammar]

tathā dadarśa taṃ vṛkṣaṃ cakṣuḥśākhaṃ caturbhujam |
svakaṃ śramaṃ manyamānaḥ saphalaṃ nṛpasattamaḥ || 21 ||
[Analyze grammar]

jahau śokaṃ nīlamaṇimādhavāṃtardhijaṃ dvijāḥ |
punaḥ punaḥ praṇamyainaṃ harṣāśrunayano nṛpaḥ || 22 ||
[Analyze grammar]

dvijairāhārayāmāsa taruṃ kallolalolitam |
śaṃkhakāhālamurajaḍhakkāpaṭahaniḥsvanaiḥ || 23 ||
[Analyze grammar]

gītavāditraninadairjayaśabdaiḥ sahasraśaḥ |
sugaṃdhipuṣpāṃjalibhirākāśātpatitairmuhuḥ || 24 ||
[Analyze grammar]

parito dhūpapātraiśca kṛṣṇāgurusudhūpitaiḥ |
veśyābhiryauvanonmattasurūpābhiḥ pracālitaiḥ || 25 ||
[Analyze grammar]

ratnadaṇḍaprakīrṇaiśca vījyamānaṃ samaṃtataḥ |
patākābhirdivyapaṭṭadukūlābhiḥ suśobhitam || 26 ||
[Analyze grammar]

rājarṣirājavṛndaiśca turagaiḥ pattibhirvṛtam |
māgadhairvaṃdyamānaṃ tu stūyamānaṃ maharṣibhiḥ || 27 ||
[Analyze grammar]

ṛtvigbhirbrāhmaṇaiścaiva vidvadbhiḥ śrotriyaistathā |
rājanyairvaiśyakulajaiḥ sacchūdraiḥ paricāritam || 28 ||
[Analyze grammar]

stotrairbahuvidhaiḥ śrautaiḥ smārtaiḥ paurāṇikaistathā |
stūyamānaṃ taruṃ viṣṇorbhūrloke pariveṣṭitam || 29 ||
[Analyze grammar]

sraggandhālaṃkṛtaṃ divyaṃ mahāvedīṃ vininyatuḥ |
vitānavaracitrāyāṃ veṣṭitāyāṃ niraṃtaram || 30 ||
[Analyze grammar]

vedyāṃ taṃ sthāpayāmāsuriṃdradyumnasya śāsanāt |
vacasā nāradasyainaṃ pūjayāmāsa pārthivaḥ || 31 ||
[Analyze grammar]

sahasrairupacārāṇāṃ divyarūpairnṛpottamaḥ |
pūjāvasāne papraccha nāradaṃ munisattamam || 32 ||
[Analyze grammar]

kīdṛśyaḥ pratimā viṣṇorghaṭayiṣyati kaḥ punaḥ |
tacchrutvā taṃ muniḥ prāha aciṃtyamahimā guruḥ || 33 ||
[Analyze grammar]

ko veda tasya ceṣṭāṃ vai sarvalokottarāṃ nṛpa |
sraṣṭā yo jagatāṃ tasyāpyeṣā saṃśayagocarā || 34 ||
[Analyze grammar]

vicārayaṃtau tāvitthaṃ yāvannāradapārthivau |
aśarīrā tato vāṇī śuśruve cāṃtarikṣataḥ || 35 ||
[Analyze grammar]

tatra vismayamānānāṃ sarveṣāmeva śṛṇvatām |
apauruṣeyo bhagavānavicārapathe sthitaḥ || 36 ||
[Analyze grammar]

suguptāyāṃ mahāvedyāṃ svayaṃ so'vatariṣyati |
pracchādyatāṃ dinānyeṣā yāvatpaṃcadaśāni vai || 37 ||
[Analyze grammar]

upasthito'yaṃ yo vṛddhaḥ śastrapāṇistu varddhakiḥ |
enamaṃtaḥ praveśyaiva dvāraṃ badhnaṃtu yatnataḥ || 38 ||
[Analyze grammar]

bahirvādyāni kurvaṃtu yāvattu ghaṭanā bhavet |
śruto hi ghaṭanāśabdo bādhiryāṃdhatvadāyakaḥ || 39 ||
[Analyze grammar]

narake vasatiṃ caiva kuryātsaṃtānanāśanam |
nāṃtaḥpraveśanaṃ kuryānna paśyecca kadācana || 40 ||
[Analyze grammar]

niyuktādanyaḥ paśyeccedrājño rāṣṭrasya caiva ha |
draṣṭuścāpi mahābhītiraṃdhatā cakṣuṣoryuge || 41 ||
[Analyze grammar]

tasmānnāvekṣaṇaṃ kāryaṃ yāvatpratimanirmitiḥ |
nirvyūḍhastu svayaṃ daivaḥ kṛtyāṃte tu vadiṣyati || 42 ||
[Analyze grammar]

yatkāryaṃ prayatnena sarvalokasukhāvaham |
tacchrutvā nāradādyāste yathoktaṃ viṣṇunā svayam || 43 ||
[Analyze grammar]

cikīrṣaṃti tathā karttuṃ tatrāyātaśca varddhakiḥ |
provāca nṛpatiṃ so'tha svapne dṛṣṭāstu yāstvayā || 44 ||
[Analyze grammar]

tā evāhaṃ ghaṭiṣyāmi dāruṇā divyarūpiṇā |
ityuktvāṃtardadhe vedyāṃ vṛddhavarddhakirūpadhṛk || 45 ||
[Analyze grammar]

vaṃcanārthaṃ manuṣyāṇāṃ sākṣānnārāyaṇo vibhuḥ || 46 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde'ṣṭādaśo'dhyāyaḥ || 18 ||
[Analyze grammar]