Chapter 12

[English text for this chapter is available]

atha svāmipuṣkariṇī snānāttāmisrādinarakanistāraḥ |
ṛṣaya ūcuḥ |
sūta sarvārthatattvajña vedavedāṃgapāraga |
śrīsvāmipuṣkariṇyāśca vaibhavaṃ vada naḥ prabho || 1 ||
[Analyze grammar]

yasyāḥ smaraṇamātreṇa muktaḥ syānmānavo bhuvi || 2 ||
[Analyze grammar]

śrīsūta uvāca |
svāmitīrthaṃ praśaṃsanti snāṃti vā kathayaṃti ye |
aṣṭāviṃśatibhedāṃste narakānnopabhuñjate || 3 ||
[Analyze grammar]

tāmisramandhatāmisraṃ mahārauravarauravau |
kumbhīpākaṃ kālasūtramasipatravanaṃ tathā || 4 ||
[Analyze grammar]

kṛmibhakṣo'ndhakūpaśca saṃdaṃśaḥ śālmalī tathā |
lālābhakṣo hyavīciśca sārameyādanaṃ tathā || 5 ||
[Analyze grammar]

tathaiva vajrakaṇakaḥ kṣārakardamapātanam |
rakṣogaṇāśanaṃ cāpi śūlaprotanirodhanam || 6 ||
[Analyze grammar]

tirodhānābhidhaṃ viprāstathā sūcīmukhābhidham |
pūyaśoṇitabhakṣaṃ ca viṣāgniparipīḍanam || 7 ||
[Analyze grammar]

aṣṭāviṃśatisaṃkhyātametannarakasaṃcayam |
na yāti manujo viprāḥ svāmitīrthanimajjanāt || 8 ||
[Analyze grammar]

vittāpatyakalatrāṇāṃ yo'nyeṣāmapahārakaḥ |
sa kālapāśabaddho'yaṃ yamadūtairbhayānakaiḥ || 9 ||
[Analyze grammar]

tāmisre narake ghore pātyate bahuvatsaram |
snāti cetsvāmitīrthe sa tasminnāsau nipātyate || 10 ||
[Analyze grammar]

mātaraṃ pitaraṃ viprānyo dveṣṭi puruṣādhamaḥ |
sa kālasūtranarake vistṛtāyutayojane || 11 ||
[Analyze grammar]

adhastādagnisantapte uparyarkamarīcibhiḥ |
khale tāmramaye viprāḥ pātyate kṣudhayārditaḥ || 12 ||
[Analyze grammar]

snāti cetpuṣkariṇyāṃ vai tasminnā'sau nipātyate |
yo vedamārgamullaṃghya vartate kupathe naraḥ || 13 ||
[Analyze grammar]

so'sipatravane ghore pātyate yamakiṃkaraiḥ |
snāti cetsvāmitīrthe tu tasminnā'sau nipātyate || 14 ||
[Analyze grammar]

yo'śnāti paṃktibhedena pakvaṃ sūpādikaṃ naraḥ |
akṛtvā paṃcayajñānvā bhuṃkte mohena sa dvijāḥ || 15 ||
[Analyze grammar]

pātyate'yaṃ yamabhaṭairnarake kṛmibhojane |
bhakṣyamāṇaḥ kṛmiśatairbhakṣayankṛmisaṃcayān || 16 ||
[Analyze grammar]

svayaṃ ca kṛmibhūtaḥ saṃstiṣṭhedyāvadaghakṣayam |
snāti cetsvāmitīrthe vai tasminnā'sau nipātyate || 17 ||
[Analyze grammar]

yo haredvipravittāni snehena balato'pi vā |
anyeṣāmapi vittāni rājā tatpuruṣo'pi vā || 18 ||
[Analyze grammar]

ayomayāgnikuṃḍeṣu saṃdaṃśaiḥ so'pi pīḍitaḥ |
saṃdaṃśe narake ghore pātyate yamapūruṣaiḥ || 19 ||
[Analyze grammar]

snāti cetsvāmitīrthe tu tasminnāsau nipātyate |
agamyāṃ yobhigaccheta striyaṃ vai puruṣādhamaḥ || 20 ||
[Analyze grammar]

agamyaṃ puruṣaṃ yoṣidabhigaccheta vā dvijāḥ |
tāvayomayanārīṃ ca puruṣaṃ cāpyayomayam || 21 ||
[Analyze grammar]

taptāvāliṅgya tiṣṭhantau yāvaccandradivākaram |
sūcyākhye narake ghore pātyete yamakiṃkaraiḥ || 22 ||
[Analyze grammar]

snāti cetsvāmitīrthe ca tasminnāsau nipāpyate |
bādhate sarvajantūnyo nānopāyairupadravaiḥ || 23 ||
[Analyze grammar]

śālmalīnarake ghore pātyate bahukaṇṭake |
snāti cetsvāmitīrthe tu tasminnāsau nipātyate || 24 ||
[Analyze grammar]

rājā vā rājabhṛtyo vā yaḥ pāṣaṇḍamanudrutaḥ |
bhedako dharmasetūnāṃ vaitaraṇyāṃ nipātyate || 25 ||
[Analyze grammar]

snāti cetsvāmitīrthe tu tasminnāsau nipātyate |
vṛṣalīsaṅgaduṣṭo vā śaucādyācāravarjitaḥ || 26 ||
[Analyze grammar]

tyaktalajjastyaktavedaḥ paśucaryārataḥ sadā |
sa pūyaviṣṭhāmūtrāsṛkchleṣmapittādipūrite || 27 ||
[Analyze grammar]

atibībhatsanarake pātyate yamakiṃkaraiḥ |
snāti cetsvāmitīrthe tu tasminnāsau nipātyate || 28 ||
[Analyze grammar]

yaḥ śvabhirmṛgayurvanyānbāṇairvā bādhate mṛgān |
sa vidhyamāno bāṇaughaiḥ paratra yamakiṃkaraiḥ || 29 ||
[Analyze grammar]

prāṇarodhākhyanarake pātyate yamakiṃkaraiḥ |
snāti cetsvāmitīrthe tu tasminnāsau nipātyate || 30 ||
[Analyze grammar]

dāmbhiko yaḥ paśūnyajñe vidhyanuṣṭhānavarjitaḥ |
hantyasau paralokeṣu vaiśase narake dvijāḥ || 31 ||
[Analyze grammar]

kartyamāno yamabhaṭaiḥ pātyate yamakiṃkaraiḥ |
snāti cetpuṣkariṇyāṃ vai tasminnāsau nipātyate || 32 ||
[Analyze grammar]

ātmabhāryāṃ savarṇāṃ yo retaḥ pāyayate yadi |
paratra retaḥpāyī sa retaḥkuṇḍe nipātyate || 33 ||
[Analyze grammar]

snāti cetpuṣkariṇyāṃ vai tasminnāsau nipātyate |
yo dasyurmārgamāśritya garado grāmadāhakaḥ || 34 ||
[Analyze grammar]

vaṇigdravyāpahārī ca sa paratra dvijottamāḥ |
vajradaṃṣṭrābhidhe ghore pātyate narake ciram || 35 ||
[Analyze grammar]

snāti cetsvāmitīrthe tu tasminnāsau nipātyate |
vidyante yāni cānyāni narakāṇi paratra vai || 36 ||
[Analyze grammar]

tāni nāpnoti manujaḥ svāmitīrthanimajjanāt |
puṣkariṇyāṃ sakṛtsnānādaśvamedhaphalaṃ labhet || 37 ||
[Analyze grammar]

ātmavidyā bhavetsākṣānmuktiścāpi caturvidhā |
na pāpe ramate buddhirna bhaveduḥkhameva vā || 38 ||
[Analyze grammar]

tulāpuruṣadānena yatphalaṃ labhyate naraiḥ |
tatphalaṃ labhyate pumbhiḥ svāmitīrthanimajjanāt || 39 ||
[Analyze grammar]

gosahasrapradānena yatpuṇyaṃ hi bhavennṛṇām |
tatpuṇyaṃ labhate martyaḥ svāmitīrthanimajanāt || 40 ||
[Analyze grammar]

dharmārthakāmamokṣāṇāṃ yaṃ yamicchati pūruṣaḥ |
taṃ taṃ sadyaḥ samāpnoti svāmitīrthanimajjanāt || 41 ||
[Analyze grammar]

mahāpātakayukto vā yukto vā sarvapātakaiḥ |
sadyaḥ pūto bhavedviprāḥ svāmitīrthanimajjanāt || 42 ||
[Analyze grammar]

prajñā lakṣmīryaśaḥ saṃpajjñānaṃ dharmo viraktatā |
manaḥśuddhirbhavennṛṇāṃ svāmitīrthaniṣevaṇāt || 43 ||
[Analyze grammar]

brahmahatyā'yutaṃ cāpi surāpānāyutaṃ tathā |
ayutaṃ gurudārāṇāṃ gamanaṃ pāpakāriṇām || 44 ||
[Analyze grammar]

steyāyutaṃ suvarṇānāṃ tatsaṃsargāśca koṭiśaḥ |
śīghraṃ vilayamāyānti svāmitīrthanimajjanāt || 45 ||
[Analyze grammar]

brahmahatyāsamānāni surāpānasamāni ca |
gurustrīgamanenāpi yāni tulyāni cāstikāḥ || 46 ||
[Analyze grammar]

suvarṇasteyatulyāni tatsaṃsargasamāni ca |
tāni sarvāṇi naśyanti svāmitīrthanimajjanāt || 47 ||
[Analyze grammar]

atha svāmitīrthamahimāśraddhālūnāṃ mahānarakaprāptiḥ |
ukteṣveteṣu sandeho na karttavyaḥ kadācana |
jihvāgre paraśuṃ taptaṃ prakṣipaṃti ca kiṃkarāḥ || 48 ||
[Analyze grammar]

arthavādamimaṃ sarvaṃ bruvanvai narakaṃ vrajet |
sūkaraḥ sa hi vijñeyaḥ sarvakarmabahiṣkṛtaḥ || 49 ||
[Analyze grammar]

aho maurkhyamaho maurkhyamaho maurkhyaṃ dvijottamāḥ |
svāmitīrthābhidhe tīrthe sarvapātakanāśane || 50 ||
[Analyze grammar]

advaitajñānade puṃsāṃ bhuktimuktipradāyini |
iṣṭakāmaprade nityaṃ tathaivājñānanāśane || 51 ||
[Analyze grammar]

sthite'pi tadvihāyāyaṃ ramatenyatra vai janaḥ |
aho mohasya māhātmyaṃ mayā vaktuṃ na śakyate || 52 ||
[Analyze grammar]

snātasya svāmitīrthe tu nāntakādbhayamasti vai |
svāmitīrthaṃ ca paśyaṃti tatra snāṃti ca ye narāḥ || 53 ||
[Analyze grammar]

stuvanti ca praśaṃsaṃti spṛśaṃti ca namanti ca |
na pibanti hi te stanyaṃ mātṝṇāṃ dvijapuṃgavāḥ || 54 ||
[Analyze grammar]

evaṃ vaḥ kathitaṃ viprāḥ svāmitīrthasya vaibhavam |
bhuktimuktipradaṃ nṛṇāṃ sarvapāpanibarhaṇam || 55 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye śrī svāmipuṣkariṇītīrthamahimānuvarṇanaṃ nāma dvādaśo'dhyāyaḥ || 12 ||
[Analyze grammar]