Chapter 11

[English text for this chapter is available]

śrīsūta uvāca |
atha kāśyapasya svāmipuṣkariṇīsnānena mahāpātakanāśaḥ |
athātaḥ saṃpravakṣyāmi svāmipuṣkariṇīṃ śubhām |
lakṣīkṛtya kathāmekāṃ pavitrāṃ dvijasattamāḥ || 1 ||
[Analyze grammar]

kāśyapākhyo dvijaḥ pūrvamasmiṃstīrthavare śubhe |
snātvātimahataḥ pāpādvimukto narakapradāt || 2 ||
[Analyze grammar]

ṛṣaya ūcuḥ |
mune kāśyapanāmāsāvakarotkiṃ hi pātakam |
snātvā tīrthavare hyatra yasmānmukto'bhavatkṣaṇāt || 3 ||
[Analyze grammar]

etannaḥ śraddadhānānāṃ brūhi sūta kṛpābalāt |
tvadvaco'mṛtatṛptānāṃ na pipāsāpi vidyate || 4 ||
[Analyze grammar]

śrīsūta uvāca |
śrīsvāmipuṣkariṇyāśca māhātmyapratipādakam |
itihāsaṃ pravakṣyāmi paṭhatāṃ pāpanāśanam || 5 ||
[Analyze grammar]

atha parīkṣidvṛttāntaḥ |
abhimanyusuto rājā parīkṣinnāma nāmataḥ |
adhyāsta hāstinapuraṃ pālayandharmato mahīm || 6 ||
[Analyze grammar]

sa rājā jātu vipine cacāra mṛgayārataḥ |
ṣaṣṭivarṣavayā bhūpaḥ kṣuttṛṣṇāparipīḍitaḥ || 7 ||
[Analyze grammar]

naṣṭamekaṃ sa vipine mārgayanmṛgamādarāt |
dhyānārūḍhaṃ muniṃ dṛṣṭvā prāha bhūpālakottamaḥ || 8 ||
[Analyze grammar]

mayā bāṇena vipine mṛgo viddho'dhunā mune |
dṛṣṭaḥ sa kiṃ tvayā vidvanvidruto bhayakātaraḥ || 9 ||
[Analyze grammar]

samādhiniṣṭho maunitvānna kiṃcidapi so'bravīt |
tato dhanuraṭanyā sa skandhe tasya mahāmuneḥ || 10 ||
[Analyze grammar]

nidhāya mṛtasarpaṃ tu kupitaḥ svapuraṃ yayau |
munestasya sutaḥ kaścicchṛṃgīnāma babhūva vai || 11 ||
[Analyze grammar]

sakhā tasya kṛśākhyo'bhūcchṛṃgiṇo dvijasattamaḥ |
sakhāyaṃ śṛṃgiṇaṃ prāha kṛśākhyaḥ sa sakhā tataḥ || 12 ||
[Analyze grammar]

pitā tava mṛtaṃ sarpaṃ skandhena vahate'dhunā |
mā bhūddarpastava sakhe mā krudhyastvamidaṃ vṛthā || 13 ||
[Analyze grammar]

so'bhavatkupitaḥ śṛṃgī ditsuḥ śāpaṃ nṛpāya vai |
mattāte śavasarpaṃ yo nyastavānmūḍhacetanaḥ || 14 ||
[Analyze grammar]

sa saptarātrānmriyatāṃ saṃdaṣṭastakṣakāhinā |
śaśāpaivaṃ munisutaḥ saubhadreyaṃ parīkṣitam || 15 ||
[Analyze grammar]

śamīkākhyaḥ pitā tasya śaptaṃ śrutvā sutena tam |
nṛpaṃ provāca tanayaṃ śṛṅgiṇaṃ munipuṃgavaḥ || 16 ||
[Analyze grammar]

rakṣakaṃ sarvalokānāṃ nṛpaṃ kiṃ śaptavānasi |
arājake vayaṃ loke sthāsyāmaḥ kathamañjasā || 17 ||
[Analyze grammar]

krodhena pātakaṃ bhūyāddayayā prāpyate sukham |
yaḥ samutpāditaṃ kopaṃ kṣamayaiva nirasyati || 18 ||
[Analyze grammar]

iha loke paratrāsāvatyaṃtaṃ sukhamaśnute |
kṣamāyuktā hi puruṣā labhaṃte śreya uttamam || 19 ||
[Analyze grammar]

tataḥ śamīkaḥ svaṃ śiṣyaṃ prāha gauramukhābhidham |
bho gauramukha gatvā tvaṃ vada bhūpaṃ parīkṣitam || 20 ||
[Analyze grammar]

imaṃ śāpaṃ matsutoktaṃ takṣakādhipadaṃśanam |
punarāyāhi śīghraṃ tvaṃ matsamīpaṃ mahāmate || 21 ||
[Analyze grammar]

evamuktaḥ śamīkena yayau gauramukho nṛpam |
sametya cābravīdbhūpaṃ saubhadreyaṃ parīkṣitam || 22 ||
[Analyze grammar]

dṛṣṭvā sarpaṃ pituḥ skaṃdhe tvayā vinihitaṃ mṛtam |
śamīkasya sutaḥ śṛṅgī śaśāpa tvāṃ ruṣānvitaḥ || 23 ||
[Analyze grammar]

etaddinātsaptame'hni takṣakeṇa mahāhinā |
daṣṭo viṣāgninā dagdho bhūyādāśvabhimanyujaḥ || 24 ||
[Analyze grammar]

evaṃ śaśāpa tvāṃ rājañchṛṃgī tasya muneḥ sutaḥ |
etadvaktuṃ pitā tasya prāhiṇonmāṃ tvadaṃtikam || 25 ||
[Analyze grammar]

itīrayitvā taṃ bhūpamāśu gauramukho yayau |
gate gauramukhe paścādrājā śokaparāyaṇaḥ || 26 ||
[Analyze grammar]

abhraṃlihamathottuṅgamekastaṃbhaṃ suvistṛtam |
madhye gaṅgaṃ vyatanuta maṇḍapaṃ nṛpapuṅgavaḥ || 27 ||
[Analyze grammar]

mahāgāruḍamantrajñairoṣadhijñaiścikitsakaiḥ |
takṣakasya viṣaṃ hantuṃ yatnaṃ kurvansamāhitaḥ || 28 ||
[Analyze grammar]

anekadevabrahmarṣirājarṣipravarānvitaḥ |
āste tasminnṛpastuṅge maṇḍape viṣṇubhaktimān || 29 ||
[Analyze grammar]

tasminnavasare vipraḥ kāśyapo māntrikottamaḥ |
rājānaṃ rakṣituṃ prāyāttakṣakasya mahāviṣāt || 30 ||
[Analyze grammar]

saptame'hani viprendro daridro dhanakāmukaḥ |
atrāṃtare takṣako'pi viprarūpī samāyayau || 31 ||
[Analyze grammar]

madhyemārgaṃ vilokyātha kāśyapaṃ pratyabhāṣata |
brāhmaṇa tvaṃ kutra yāsi vada me'dya mahāmune || 32 ||
[Analyze grammar]

iti pṛṣṭastadā'vādītkāśyapastakṣakaṃ dvijaḥ |
parīkṣitaṃ mahārājaṃ takṣako'dya viṣāgninā || 33 ||
[Analyze grammar]

dhakṣyate taṃ śamayituṃ tatsamīpamupaimyaham |
ityuktaḥ sa ca taṃ vipraṃ takṣakaḥ punarabravīt || 34 ||
[Analyze grammar]

takṣako'haṃ dvijaśreṣṭha mayā daṣṭaścikitsitum |
na śakyobdaśatenā'pi mahāmantrāyutairapi || 35 ||
[Analyze grammar]

cikitsituṃ cenmaddaṣṭaṃ śaktirasti tavādhunā |
anekayojanocchrāyaṃ daśāmyujjīvaya drumam || 36 ||
[Analyze grammar]

tato bhavānsamartho hītyevaṃ me bhāti he dvija |
itīrayitvā taṃ vṛkṣamadaśattakṣakastadā || 37 ||
[Analyze grammar]

abhavadbhasmasātso'pi vṛkṣotyantasamucchritaḥ |
pūrvameva naraḥ kaścittaṃ vṛkṣamadhirūḍhavān || 38 ||
[Analyze grammar]

takṣakasya viṣolkābhiḥ so'pi dagdho'bhavattadā |
tannaraṃ na vijajñāte tau ca kāśyapatakṣakau || 39 ||
[Analyze grammar]

kāśyapaḥ pratijajñe'tha takṣakasyāpi śṛṇvataḥ |
manmantraśaktiṃ paśyantu sarve viprādayo'dhunā || 40 ||
[Analyze grammar]

itīrayitvā taṃ vṛkṣaṃ bhasmībhūtaṃ viṣāgninā |
ājīvayanmantraśaktyā kāśyapo māntrikottamaḥ || 41 ||
[Analyze grammar]

sa narastena vṛkṣeṇa sākamujjīvito'bhavat |
athābravīttakṣakastaṃ kāśyapaṃ mantrakovidam || 42 ||
[Analyze grammar]

yathā na munivāṅmithyā bhavedevaṃ kuru dvija |
yatte rājā dhanaṃ dadyāttato'pi dviguṇaṃ dhanam || 43 ||
[Analyze grammar]

dadāmyahaṃ nivartasva śīghrameva dvijottama |
ityuktvānargharatnāni tasmai dattvā sa takṣakaḥ || 44 ||
[Analyze grammar]

nyavartayatkāśyapaṃ taṃ brāhmaṇaṃ mantrakovidam |
alpāyuṣaṃ nṛpaṃ matvā jñānadṛṣṭyā sa kāśyapaḥ || 45 ||
[Analyze grammar]

svāśramaṃ prayayau tūṣṇīṃ labdharatnaśca takṣakāt |
so'bravīttakṣakaḥ sarpānsarvānāhūya tatkṣaṇe || 46 ||
[Analyze grammar]

yūyaṃ taṃ nṛpatiṃ prāpya munīnāṃ veṣadhāriṇaḥ |
upahāraphalānyāśu prayacchata parīkṣite || 47 ||
[Analyze grammar]

tathetyuktvā sarvasarpā dadū rājñe phalānyamī |
takṣako'pi tathā tatra kasmiṃścidbadarīphale || 48 ||
[Analyze grammar]

kṛmiveṣadharo bhūtvā vyatiṣṭhaddaṃśituṃ nṛpam |
atha rājā pradattāni sarvairbrāhmaṇarūpakaiḥ || 49 ||
[Analyze grammar]

parīkṣinmantrivṛddhebhyo dattvā sarvaphalānyapi || 50 ||
[Analyze grammar]

kautūhalena jagrāha sthūlamekaṃ kare phalam |
tasminnavasare sūryo'pyastācalamagāhata || 51 ||
[Analyze grammar]

mithyā ṛṣivaco mābhūditi tatratyamānavāḥ |
anyo'nyamavadansarve brāhmaṇāśca nṛpāstadā || 52 ||
[Analyze grammar]

evaṃ vadatsu sarveṣu phale tasminnadṛśyata |
sādhu raktaḥ kṛmiḥ sarvai rājñā cāpi parīkṣitā || 53 ||
[Analyze grammar]

ayaṃ kiṃ māṃ daśedadya krimirityuktavānnṛpaḥ |
nidadhe tatphalaṃ kaṇṭhe sakṛmi dvijasattamāḥ || 54 ||
[Analyze grammar]

takṣako'sminsthitaḥ kaṇṭhe kṛmirūpī phale tadā |
nirgatya tatphalādāśu nṛpadehamaveṣṭayat || 55 ||
[Analyze grammar]

takṣakāveṣṭite bhūpe pārśvasthā dudruvurbhayāt |
anantaraṃ nṛpo viprāstakṣakasya viṣāgninā || 56 ||
[Analyze grammar]

dagdhobhūdbhasmasādāśu saprāsādo balīyasā |
kṛtvaurdhvadehikaṃ tasya nṛpasya sapurohitāḥ || 57 ||
[Analyze grammar]

maṃtriṇastatsutaṃ rājye janamejayanāmakam |
rājānamabhyaṣiñcanvai jagadrakṣaṇavācchayā || 58 ||
[Analyze grammar]

takṣakādrakṣituṃ bhūpamāyātaḥ kāśyapābhidhaḥ |
yo brāhmaṇo muniśreṣṭhaḥ sa sarvairniṃdito janaiḥ || 59 ||
[Analyze grammar]

babhrāma sakalāndeśāñchiṣṭaiḥ sarvaiśca dūṣitaḥ |
avasthānaṃ na lebhe sa grāme vāpyāśrame'pi vā || 60 ||
[Analyze grammar]

yānyāndeśānasau yātastatra tatra mahājanaiḥ |
tattaddeśānnirastaḥ sañchākalyaṃ śaraṇaṃ yayau || 61 ||
[Analyze grammar]

praṇamya śākalyamuniṃ kāśyapo nindito janaiḥ |
idaṃ vijñāpayāmāsa śākalyāya mahātmane || 62 ||
[Analyze grammar]

kāśyapa uvāca |
bhagavansarvadharmajña śākalya harivallabha |
munayo brāhmaṇāścānye māṃ nindaṃti suhṛjjanāḥ || 63 ||
[Analyze grammar]

nāsyāhaṃ kāraṇaṃ jāne kiṃ māṃ nindaṃti mānavāḥ |
brahmahatyā surāpānagurustrīgamanaṃ tathā || 64 ||
[Analyze grammar]

steyaṃ saṃsargadoṣo vā mayā nācaritaṃ kvacit |
anyānyapi ca pāpāni na kṛtāni mayā mune || 65 ||
[Analyze grammar]

tathā'pi nindaṃti janā vṛthā māṃ bāndhavādayaḥ |
jānāsi cettvaṃ śākalya mayā doṣaṃ kṛtaṃ vada || 66 ||
[Analyze grammar]

ukto'tha kāśyapenaiva śākalyākhyo mahāmuniḥ |
kṣaṇaṃ dhyātvā babhāṣe taṃ kāśyapaṃ dvijasattamāḥ || 67 ||
[Analyze grammar]

atha śākalyoktadharmāḥ |
śākalya uvāca |
parīkṣitaṃ mahārājaṃ takṣakādrakṣituṃ bhavān |
āyāsīdardhamārge tu takṣakeṇa nivāritaḥ || 68 ||
[Analyze grammar]

cikitsituṃ samartho'pi viṣarogādipīḍitam |
yo na rakṣati lokesmiṃstamāhurbrahmaghātakam || 69 ||
[Analyze grammar]

krodhātkāmādbhayāllobhānmātsaryānmohato'pi vā |
yo na rakṣati vipreṃdra viṣarogāturaṃ naram || 70 ||
[Analyze grammar]

brahmahā ca surāpī vā steyī ca gurutalpagaḥ |
saṃsargadoṣaduṣṭaśca nāpi tasya viniṣkṛtiḥ || 71 ||
[Analyze grammar]

kanyāvikrayiṇaścāpi hayavikrayiṇastathā |
kṛtaghnasyā'pi śāstreṣu prāyaścittaṃ tu vidyate || 72 ||
[Analyze grammar]

viṣarogāturaṃ yastu samartho'pi na rakṣati |
na tasya niṣkṛtiḥ proktā prāyaścittāyutairapi || 73 ||
[Analyze grammar]

na tena saha paṅktau ca bhuñjīta sukṛtī janaḥ |
na tena saha bhāṣeta na paśyettaṃ naraṃ kvacit || 74 ||
[Analyze grammar]

tatsaṃbhāṣaṇamātreṇa mahāpātakabhāgbhavet |
parīkṣitsa mahārājaḥ puṇyaślokaśca dhārmikaḥ || 75 ||
[Analyze grammar]

viṣṇubhakto mahāyogī cāturvarṇyasya rakṣitā |
vyāsaputrāddharikathāṃ śrutavānbhaktipūrvakam || 76 ||
[Analyze grammar]

arakṣitvā nṛpaṃ taṃ tu vacasā takṣakasya yat |
nivṛttastena viprendrairbāndhavairapi dūṣyase || 77 ||
[Analyze grammar]

sa parīkṣinmahārājo yadyapi kṣaṇajīvitaḥ |
tathāpi yāvanmaraṇaṃ budhaiḥ kāryaṃ cikitsitam || 78 ||
[Analyze grammar]

yāvatkaṇṭhagatāḥ prāṇā mumūṣormānavasya hi |
tāvaccikitsā kartavyā kālasya kuṭilā gatiḥ || 79 ||
[Analyze grammar]

iti prāhuḥ purā ślokaṃ bhiṣagvidyābdhipāragāḥ |
tataścikitsāśakto'pi yasmādakṛtabheṣajaḥ || 80 ||
[Analyze grammar]

ardhamārge nivṛttaśca tena tvaṃ garhito hyasi |
śākalyenaivamuditaḥ kāśyapaḥ pratyabhāṣata || 81 ||
[Analyze grammar]

kāśyapa uvāca |
mamaitaddoṣaśāṃtyarthamupāyaṃ vada suvrata |
yena māṃ pratigṛhṇīyurbāndhavāḥ sasuhṛjjanāḥ || 82 ||
[Analyze grammar]

kṛpāṃ mayi kuruṣva tvaṃ śākalya harivallabha |
kāśyapenaivamuktastu śākalyo'pi munīśvaraḥ || 83 ||
[Analyze grammar]

kṣaṇaṃ dhyātvā jagādaivaṃ kāśyapaṃ kṛpayā tadā || 84 ||
[Analyze grammar]

śākalya uvāca |
asya pāpasya śāntyarthamupāyaṃ pravadāmi te |
tatkartavyaṃ tvayā śīghraṃ vilambaṃ mā kṛthā dvija || 85 ||
[Analyze grammar]

suvarṇamukharītīre lakṣmīpatinivāsabhūḥ |
veṃkaṭādririti khyātaḥ sarvalokeṣu pūjitaḥ || 86 ||
[Analyze grammar]

tasmiñcheṣagirau puṇye surāsuranamaskṛte |
brahmahatyāsurāpānasvarṇasteyādināśake || 87 ||
[Analyze grammar]

svāmipuṣkariṇī ceti sarvapāpāpanodinī |
uttare śrīnivāsasya vartate maṃgalapradā || 88 ||
[Analyze grammar]

taṃ gatvā veṃkaṭaṃ śailaṃ svāmipuṣkariṇīṃ śubhām |
snātvā saṃkalpapūrvaṃ tu varāhasvāminaṃ harim || 89 ||
[Analyze grammar]

sevitvā paścime tīre nirgatya harimandiram |
gatvā tatra vidhānena svarṇācalanivāsinam || 90 ||
[Analyze grammar]

śrīnivāsaṃ paraṃ devaṃ bhaktānāmabhayapradam |
śaṅkhacakradharaṃ devaṃ vanamālāvibhūṣitam || 91 ||
[Analyze grammar]

dṛṣṭvā nirdhūtapāpo'si saṃśayaṃ mā kṛthā dvija |
śākalyenaivamuktastu kāśyapo munipuṃgavaḥ || 92 ||
[Analyze grammar]

gatvā veṃkaṭaśailendraṃ surāsuranamaskṛtam |
puṣkariṇyāṃ śubhāyāṃ tu snāto niyamapūrvakam || 93 ||
[Analyze grammar]

svastho'bhūtkāśyapo vipro bhiṣagvidyābdhipāragaḥ |
sarve baṃdhujanā viprāḥ kāśyapaṃ brāhmaṇottamam || 94 ||
[Analyze grammar]

pūjayitvā vidhānena pūjyo'si na ca saṃśayaḥ |
evaṃ vaḥ kathitaṃ viprā veṃkaṭācalavaibhavam || 95 ||
[Analyze grammar]

yaḥ śṛṇoti naro bhaktyā viṣṇuloke mahīyate || 96 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṃḍe śrīveṅkaṭācalasthasvāmipuṣkariṇīmāhātmye kāśyapadoṣanivṛttirnāmaikādaśo'dhyāyaḥ || 11 ||
[Analyze grammar]