Chapter 13

[English text for this chapter is available]

atha dharmaguptacaritravarṇanam |
śrīsūta uvāca |
bhūyopi saṃpravakṣyāmi svāmitīrthasya vaibhavam |
yuṣmākamādareṇā'haṃ naimiṣāraṇyavāsinaḥ || 1 ||
[Analyze grammar]

nandonāma mahārājaḥ somavaṃśasamudbhavaḥ |
dharmeṇa pālayāmāsa sāgarāntāṃ dharāmimām || 2 ||
[Analyze grammar]

tasya putraḥ samabhavaddharmagupta iti smṛtaḥ |
rājyarakṣādhuraṃ nando nijaputre nidhāya saḥ || 3 ||
[Analyze grammar]

jiteṃdriyo jitāhāraḥ praviveśa tapovanam |
tāte tapovanaṃ yāte dharmaguptābhidho nṛpaḥ || 4 ||
[Analyze grammar]

medinīṃ pālayāmāsa dharmajño nītitatparaḥ |
īje vahuvidhairyajñairdevānindra purogamān || 5 ||
[Analyze grammar]

brāhmaṇānāṃ dadau vittaṃ kṣetrāṇi ca bahūni saḥ |
sarve svadharmaniratāstasminrājani śāsati || 6 ||
[Analyze grammar]

kadācinnābhavanpīḍāstasmiṃścorādisaṃbhavāḥ |
kadāciddharmagupto'yamāruhya turagottamam || 7 ||
[Analyze grammar]

vanaṃ viveśa vipreṃdrā mṛgayārasakautukī |
tamālatālahintālakuravākuladiṅmukhe || 8 ||
[Analyze grammar]

vicacāra vane tasminsiṃsahavyāghrabhayānake |
mattālikulasannādasaṃmūrcchitadigantare || 9 ||
[Analyze grammar]

padmakalhārakumudanīlotpalavanākule |
taṭāke rasasaṃpūrṇe tapasvijanamaṇḍite || 10 ||
[Analyze grammar]

tasminvane sañcarato dharmaguptasya bhūpateḥ |
abhūdvibhāvarī viprāstamasāvṛtadiṅmukhā || 11 ||
[Analyze grammar]

rājā'pi paścimāṃ sandhyāmupāsya vinayānvitaḥ |
jajāpa ca vane tatra gāyatrīṃ vedamātaram || 12 ||
[Analyze grammar]

siṃhavyāghrādibhītyāsminvṛkṣamekaṃ samāśrite |
rājaputre tadabhyāśamṛkṣaḥ siṃhabhayārditaḥ || 13 ||
[Analyze grammar]

anvadhāvata vṛkṣaṃ tamekaḥ siṃho vanecaraḥ |
anudrutaḥ sa siṃhena ṛkṣo vṛkṣamupāruhat || 14 ||
[Analyze grammar]

āruhya ṛkṣo vṛkṣaṃ taṃ dadarśa jagatīpatim |
vṛkṣasthitaṃ mahātmānaṃ mahābalaparākramam || 15 ||
[Analyze grammar]

uvāca bhūpatiṃ dṛṣṭvā ṛkṣoyaṃ vanagocaraḥ |
mā bhītiṃ kuru rājeṃdra vatsyāvo rajanīmiha || 16 ||
[Analyze grammar]

mahāsattvo mahākāyo mahādaṃṣṭrasamākulaḥ |
vṛkṣamūlaṃ samāyātaḥ siṃho'yamatibhīṣaṇaḥ || 17 ||
[Analyze grammar]

rātryardhaṃ bhaja nidrāṃ tvaṃ rakṣyamāṇo mayodyataḥ |
tataḥ prasuptaṃ māṃ rakṣa śarvaryardhaṃ mahāmate || 18 ||
[Analyze grammar]

iti tadvākyamākarṇya supte nandasute hariḥ |
provāca ṛkṣaṃ supto'yaṃ nṛpo me tyajyatāmiti || 19 ||
[Analyze grammar]

taṃ siṃhamabravīdṛkṣo dharmajño dvijasattamāḥ |
bhavāndharmaṃ na jānīte mṛgarāja vanecara || 20 ||
[Analyze grammar]

viśvāsaghātināṃ loke mahākaṣṭaṃ bhavatyaho |
na hi mitradruhāṃ pāpaṃ naśyedyajñāyutairapi || 21 ||
[Analyze grammar]

brahmahatyādipāpānāṃ kathañcinniṣkṛtirbhavet |
viśvāsaghātināṃ pāpaṃ na naśyejjanmakoṭibhiḥ || 22 ||
[Analyze grammar]

nāhaṃ meruṃ mahābhāraṃ manye pañcāsya bhūtale |
mahābhāramimaṃ manye lokaviśvāsaghātakam || 23 ||
[Analyze grammar]

evamukto'tha ṛkṣeṇa siṃhastūṣṇīṃ babhūva ha |
dharmagupte prabuddhe tu ṛkṣaḥ suṣvāpa bhūruhe || 24 ||
[Analyze grammar]

tataḥ siṃho'bravīdbhūpamenamṛkṣaṃ tyajasva me |
evamukto'tha siṃhena rājā suptamaśaṃkitaḥ || 25 ||
[Analyze grammar]

svāṃkanyastaśiraskaṃ tamṛkṣaṃ tatyāja bhūtale |
pātyamānastato rājñā samālambitapādapaḥ || 26 ||
[Analyze grammar]

ṛkṣaḥ puṇyavaśādvṛkṣānna papāta mahītale |
sa ṛkṣo nṛpamabhyetya kopādvākyamabhāṣata || 27 ||
[Analyze grammar]

kāmarūpadharo rājannahaṃ bhṛgukulodbhavaḥ |
dhyānakāṣṭhābhidho nāmnā ṛkṣarūpamadhārayam || 28 ||
[Analyze grammar]

kasmādanāgasaṃ suptamatyākṣīnmāṃ bhavānnṛpa |
macchāpādatiśīghraṃ tvamunmattaścara bhūtale || 29 ||
[Analyze grammar]

iti śaptvā munirbhūpaṃ tataḥ siṃhamabhāṣata |
na siṃhastvaṃ mahāyakṣaḥ kuberasacivaḥ purā || 30 ||
[Analyze grammar]

himavadgirimāsādya kadācittaṃ vadhūsakhaḥ |
ajñānādgautamābhyāśe vihāramatanormudā || 31 ||
[Analyze grammar]

gautamo'pyuṭajāddaivātsamidāharaṇāya vai |
nirgatastvāṃ vivasanaṃ dṛṣṭvā śāpamudāharat || 32 ||
[Analyze grammar]

yasmānmamāśrame'dya tvaṃ vivastraḥ sthitavānasi |
ataḥ siṃhatvamadyaiva bhavitā te na saṃśayaḥ || 33 ||
[Analyze grammar]

iti gautamaśāpena siṃhatvamagamatpurā |
kuberasacivo yakṣo bhadranāmā bhavānpurā || 34 ||
[Analyze grammar]

kubero dharmaśīlo hi tadbhṛtyāśca tathaiva hi |
ataḥ kimarthaṃ tvaṃ haṃsi māmṛṣiṃ vanagocaram || 35 ||
[Analyze grammar]

etatsarvamahaṃ dhyānājjānāmi hi mṛgādhipa |
ityukto dhyānakāṣṭhena tyaktvā siṃhatvamāśu saḥ || 36 ||
[Analyze grammar]

yakṣarūpaṃ gato divyaṃ kuberasacivātmakam |
dhyānakāṣṭhamasāvāha prāṃjaliḥ praṇato munim || 37 ||
[Analyze grammar]

adya jñātaṃ mayā sarvaṃ pūrvavṛttaṃ mahāmune |
gautamaḥ śāpakāle me śāpāntamapi coktavān || 38 ||
[Analyze grammar]

dhyānakāṣṭhena saṃvāda ṛkṣarūpeṇa te yadā |
tadā nirdhūya siṃhatvaṃ yakṣarūpamavāpsyasi || 39 ||
[Analyze grammar]

iti māmabravīdbrahmangautamo munipuṅgavaḥ |
adya siṃhatvanāśānme jānāmi tvāṃ mahāmune || 40 ||
[Analyze grammar]

dhyānakāṣṭhābhidhaṃ śuddhaṃ kāmarūpadharaṃ sadā |
ityuktvā taṃ praṇamyātha dhyānakāṣṭhaṃ sa yakṣarāṭ || 41 ||
[Analyze grammar]

vimānavaramāruhya prayayāvalakāpurīm |
unmattarūpaṃ taṃ dṛṣṭvā mantriṇastu nṛpottamam || 42 ||
[Analyze grammar]

pituḥ sakāśamāninyū revātīre nṛpottamam |
tasmai nivedayāmāsurmatibhraṃśaṃ sutasya ca || 43 ||
[Analyze grammar]

jñātvā tu putravṛttāntaṃ pitā vai naṃdanastadā || 44 ||
[Analyze grammar]

atha jaiminivākyātsvāmitīrthasnātasya dharmaguptasyonmādanivṛttiḥ |
putramādāya sahasā jaiminerantikaṃ yayau |
tasmai nivedayāmāsa putravṛttāntamāditaḥ || 45 ||
[Analyze grammar]

bhagavañjaimine putro mamādyonmattatāṃ gataḥ |
asyonmādavināśāya brūhyupāyaṃ mahāmune || 46 ||
[Analyze grammar]

iti pṛṣṭaściraṃ dadhyau jaiminirmunipuṃgavaḥ |
dhyātvā tu suciraṃ kālaṃ nṛpanandanamabravīt || 47 ||
[Analyze grammar]

dhyānakāṣṭhasya śāpena hyunmattaste suto'bhavat |
tasya śāpasya mokṣārthamupāyaṃ prabravīmi te || 48 ||
[Analyze grammar]

suvarṇamukharītīre veṃkaṭenāma parvate |
sarvapāpahare puṇye nānādhātuvinirmite || 49 ||
[Analyze grammar]

svāmipuṣkariṇī ceti tīrthamasti mahattaram |
pavitrāṇāṃ pavitraṃ hi maṃgalānāṃ ca maṃgalam || 50 ||
[Analyze grammar]

śrutisiddhaṃ mahāpuṇyaṃ brahmahatyādiśodhakam |
nītvā tatra sutaṃ te'dya snāpayasva mahāmate || 51 ||
[Analyze grammar]

unmādastatkṣaṇādeva tasya naśyenna saṃśayaḥ |
ityuktastaṃ praṇamyāsau jaiminiṃ munipuṃgavam || 52 ||
[Analyze grammar]

nandaḥ putraṃ samādāya svāmipuṣkariṇīṃ yayau |
tatra ca snāpayāmāsa putraṃ niyamapūrvakam || 53 ||
[Analyze grammar]

snānamātrāttataḥ sadyo naṣṭonmādo'bhavatsutaḥ |
svayaṃ sasnau sa nando'pi svāmipuṣkariṇījale || 54 ||
[Analyze grammar]

uṣitvā dinamekaṃ tu sahaputraḥ pitā tadā |
sevitvā veṃkaṭeśaṃ ca śrīnivāsaṃ kṛpānidhim || 55 ||
[Analyze grammar]

putramāpṛcchya nandastaṃ prayayau tapase vanam |
gate pitari putro'pi dharmagupto nṛpo dvijāḥ || 56 ||
[Analyze grammar]

pradadau veṃkaṭeśasya bahuvittāni bhaktitaḥ |
brāhmaṇebhyo dhanaṃ dhānyaṃ kṣetrāṇi ca dadau tadā || 57 ||
[Analyze grammar]

prayayau mantribhiḥ sārdhaṃ svāṃ purīṃ tadanantaram |
dharmeṇa pālayāmāsa rājyaṃ nihatakaṇṭakam || 58 ||
[Analyze grammar]

pitṛpaitāmahaṃ viprā dharmaguptotidhārmikaḥ |
unmādairapyapasmārairgrahairduṣṭaiśca ye narāḥ || 59 ||
[Analyze grammar]

grastā bhavanti viprendrāste'pi cātra nimajjanāt |
puṣkariṇyāṃ vimuktāḥ syuḥ satyaṃ satyaṃ vadāmyaham || 60 ||
[Analyze grammar]

svāmipuṣkariṇīṃ tyaktvā tīrthamanyadvrajettu yaḥ |
snigdhaṃ sa gopayastyaktvā snuhīkṣīraṃ prayācate || 61 ||
[Analyze grammar]

svāmitīrthaṃ svāmitīrthaṃ svāmitīrthamiti dvijāḥ |
triḥpaṭhanto narā evaṃ yatra kvāpi jalāśaye || 62 ||
[Analyze grammar]

snāṃti sarve narāste vai yāsyanti brahmaṇaḥ padam |
evaṃ vaḥ kathitā viprā dharmaguptakathā śubhā || 63 ||
[Analyze grammar]

yasyāḥ śravaṇamātreṇa brahmahatyā vinaśyati || 64 ||
[Analyze grammar]