Chapter 8

[English text for this chapter is available]

gautama uvāca |
śṛṇu devi purāvṛttaṃ kailāse merudhanvinā |
ādiṣṭastīrthayātrārthamahaṃ liṃgāni vīkṣitum || 1 ||
[Analyze grammar]

rudrakṣetre ca kedāre tathā badarikāśrame |
kāśyāṃ puṇyeṣu deśeṣu tathā śrīparvate śive || 2 ||
[Analyze grammar]

kāṃcīmukhyāsu puṇyāsu purīṣvapyagamaṃ tadā |
ṛṣibhirvibudhaiḥ sārthairgaṇairyogibhiruttamaiḥ || 3 ||
[Analyze grammar]

sthāpitāni ca liṃgāni svayaṃbhūni ca dṛṣṭavān |
tatratatra mahābhāge tīrthāni śivasannidhau || 4 ||
[Analyze grammar]

sevamānaḥ saśiṣyo'haṃ paryaṭanpṛthivīmimām |
evaṃ tīrthāni sarvāṇi gāhamāno vratānvitaḥ || 5 ||
[Analyze grammar]

tapāṃsi yajñakarmāṇi kurvanbhūmiṃ samācaran |
śivasmaraṇasaṃyuktaḥ śivaliṃgāni sannaman || 6 ||
[Analyze grammar]

sarvāṇi bhuvi puṇyāni deśametamupāśrayam |
atra devaṃ mahādevamavikeśaṃ triyaṃbakam || 7 ||
[Analyze grammar]

aruṇādriritikhyātaṃ parvataṃ liṃgamaikṣiṣi |
atra siddhā mahātmāno munayaśca dṛḍhavratāḥ || 8 ||
[Analyze grammar]

kaṃdamūlaphalāhārā dṛṣṭāḥ śoṇādri sevakāḥ |
astauṣamādimaṃ liṃgamaruṇādrimayaṃ mahat || 9 ||
[Analyze grammar]

ādyena brahmaṇā pūrvamarcitaṃ divyacakṣuṣā |
asau yastāmro aruṇa uta babhruḥ sumaṃgalaḥ || 10 ||
[Analyze grammar]

iti vedā stuvaṃti tvāmaruṇādrīśa saṃtatam |
namastāmrāya cāruṇāya śivāya paramātmane || 11 ||
[Analyze grammar]

sarvavedasvarūpāya nityāyāmṛtamūrttaye |
kālāya karuṇārdrāya dṛṣṭipeyāmṛtābdhaye || 12 ||
[Analyze grammar]

bhaktavātsalyapūrṇāya puṇyāya purabhedine |
darśanaṃ tava deveśa sarvadharmaphalapradam || 13 ||
[Analyze grammar]

bhuvi labdhavatā bhūyo nānyatkāryaṃ tapaḥ kvacit |
bhavatā karmabhūreṣā vartatedya nirodhitā || 14 ||
[Analyze grammar]

prārthayate svayaṃ vāsāndevāścātra tvadāśraye |
kālasaṃgrahasaṃjātaṃ phalaṃ labdhaṃ mayādhunā || 15 ||
[Analyze grammar]

anyatkṛtaṃ tapaḥ sarvaṃ tvaddarśanaphalaṃ mama |
īdṛśaṃ tava deveśa rūpamatyadbhutodayam || 16 ||
[Analyze grammar]

ekamadrimayaṃ liṃgaṃ na kvaciddṛṣṭavānbhuvi |
sūryeṃdvagnisusaṃyukta koṇatrayamanoharam || 17 ||
[Analyze grammar]

trimūrtirūpa deveśa dṛśyate te vapurmahat |
śaktitrayasvarūpeṇa kālatrayavidhānakam || 18 ||
[Analyze grammar]

trivedātmaṃ trikoṇāṃgaṃ liṃgaṃ te dṛṣṭamadbhutam |
trailokyarakṣaṇārthāya vitataṃ rūpamāsthitaḥ || 19 ||
[Analyze grammar]

dṛśyate vasudhābhāge śoṇādririti viśrutaḥ |
ajānatāṃ ca martyānāṃ samālokanamātrataḥ || 20 ||
[Analyze grammar]

vitaratyakhilānbhogānvyājakaruṇānidhiḥ |
arcayā rahitaṃ liṃgamanyaṃ śūnyamudāhṛtam || 21 ||
[Analyze grammar]

idaṃ tu pūjitaṃ devaiḥ sadā sarvavarapradam |
prasīda karuṇāpūrṇa śoṇācala maheśvara || 22 ||
[Analyze grammar]

trāyasva bhavabhītaṃ māṃ prapannaṃ bhaktavatsala |
draṣṭavyaṃ draṣṭametatte rūpamatyadbhutaṃ mahat || 23 ||
[Analyze grammar]

kṛtārthaya kṛpāsiṃdho śaraṇya śaraṇāgatam |
iti saṃstūyamāno me devaḥ śoṇācaleśvaraḥ || 24 ||
[Analyze grammar]

adarśayatparaṃ rūpaṃ divyamehītyuvāca mām |
prīto'smi bhavataḥ stotrairbhaktyā ca parayā bhṛśam || 25 ||
[Analyze grammar]

atraiva bhavato vāso nityamastu mamāṃtike |
saṃpūjaya ca māṃ nityaṃ bhuvi bhogaiḥ sanātanaiḥ || 26 ||
[Analyze grammar]

tapasā tapa sarveṣāṃ mahattvamiha darśaya |
pūrvaṃ kailāsaśikhare vasaṃtaṃ tvāṃ taponvitam || 27 ||
[Analyze grammar]

ādiśaṃ pṛthivībhāgaṃ śoṇādrau pūjayeti mām |
saptarṣipūjitā pūjā divi me saṃprakāśate || 28 ||
[Analyze grammar]

tathā nityārcanāyukta prakāśaya dharātale |
sarveṣāmeva jaṃtūnāṃ hitāya tvaṃ tapo'dhikaḥ || 29 ||
[Analyze grammar]

bhuvi māṃ pūjayārcābhirāgamoktābhirādarāt |
divyā mama mahāpūjā dṛśyā hi divi daivataiḥ || 30 ||
[Analyze grammar]

prakāśanīyā bhavatā pārthivī vasudhātale |
māhātmyaṃ pūrvamevoktaṃ yathāhamaruṇācalaḥ || 31 ||
[Analyze grammar]

sthito vasuṃdharābhāge mayā prītaṃ tu te bhṛśam |
ye vā saṃpūjayaṃti sma pūrvaṃ māṃ sukṛtādhikāḥ || 32 ||
[Analyze grammar]

tebhyastvamadhiko bhūmau prakāśasva śivārcanam |
ityādiṣṭo hi deveśaṃ praṇamya bhavabhaktimān || 33 ||
[Analyze grammar]

anvapṛcchaṃ dayāpūrṇamaruṇādrīśamānaman |
anāsādyamidaṃ rūpamagnirūpaṃ maheśvaram || 34 ||
[Analyze grammar]

kathamadyārcayāmyenaṃ martyalokocitārcanaiḥ |
ādeśamimamanvarthaṃ kathaṃ vā kalpayāmyaham || 35 ||
[Analyze grammar]

upāyamādiśa śrīmannabhigamyo yathā bhavān |
iti vijñāpito devaḥ śrīmāñchoṇācaleśvaraḥ || 36 ||
[Analyze grammar]

anvagrahīdaśeṣātmā praṇataṃ māṃ dayānidhiḥ |
ahaṃ tu sūkṣmaliṃgāni prakāśiṣye mahītale || 37 ||
[Analyze grammar]

āgamoktakriyābhedaiḥ pūjāṃ me pratipādaya |
paṃcāvaraṇasaṃyuktaṃ liṃgaṃ me sūkṣmamadbhutam || 38 ||
[Analyze grammar]

aruṇādrīśvarābhikhyaṃ saṃpūjaya tapobalaiḥ |
ityādiśya mahādevaḥ svayaṃbhu vimalaṃ mahat || 39 ||
[Analyze grammar]

rūpaṃ me darśayāmāsa sūkṣmaliṃgātmanā śivaḥ |
ālokya vimalaṃ liṃgaṃ sūkṣmaṃ tatsvayamucchritam || 40 ||
[Analyze grammar]

aśeṣā'varaṇopetaṃ kṛtārthahṛdayo'bhavam |
punarvyajñāpayaṃ devaṃ śambhumāśritavatsalam || 41 ||
[Analyze grammar]

āgamoktaprakārāṇāmanirīkṣyatvamāgatam |
kathaṃ tu tava rūpāṇāṃ nāmabhedānviyojitān || 42 ||
[Analyze grammar]

jānīyāṃ karuṇāmūrte svayamīśvara matprabho |
pūjakāstava ke vā syurmaṃdiraṃ vātra kīdṛśam || 43 ||
[Analyze grammar]

kathaṃ stotraṃ kathaṃ pūjā ke vātra paricārakāḥ |
sthānarakṣā kathaṃ vā syātke vātmaparirakṣakāḥ || 44 ||
[Analyze grammar]

kathaṃ vā mānuṣī pūjā nityā saṃvardhate tava |
āgatā bahavo devāḥ śraddheyaṃ manujaiḥ katham || 45 ||
[Analyze grammar]

prasīda parameśāna svayamājñāpayākhilam |
evaṃ vijñāpito devaḥ śoṇādrīśaḥ svayaṃ prabhuḥ || 46 ||
[Analyze grammar]

ājñāpayattadā devo viśvakarmāṇamāgatam |
sṛja tvaṃ nagaraṃ divyamaruṇākhyaṃ guṇādhikam || 47 ||
[Analyze grammar]

maṃdiraṃ mama divyaṃ ca mahāmaṇigaṇojjvalam |
tauryatrikaṃ saparyāṃgaṃ tanme sarvaṃ prakalpaya || 48 ||
[Analyze grammar]

ābabhāṣe śivaḥ śrīmānnāmabhedārcanakramam |
vrataṃ ca karuṇāmūrttiraruṇādrīśvaraḥ śivaḥ || 49 ||
[Analyze grammar]

śṛṇu tanme ca ye sṛṣṭā pūjārthaṃ paricārakāḥ |
śṛṇu gautama sarvaṃ me mānuṣaṃ pūjanakramam || 50 ||
[Analyze grammar]

ya eṣa sarvalokānāṃ kṣemāya prathate bhuvi |
idaṃ tejomayaṃ liṃgamatulaṃ dṛśyate mahat || 51 ||
[Analyze grammar]

aruṇādrīśvarābhikhyaṃ pūjyatāṃ satataṃ tvayā |
śaktirmamottare bhāge pūjyā nityodayā mudā || 52 ||
[Analyze grammar]

dadhatī sthānamāhātmyamapītakucanāmikā |
aruṇācalarājoyamavibhāgaḥ priyānvitaḥ || 53 ||
[Analyze grammar]

utsavārtho mahādevaḥ pūjyo bhogasutāvṛtaḥ |
bodhado bhaktalokasya dattābhayakaraḥ śivaḥ || 54 ||
[Analyze grammar]

sāraṃgaṃ paraśuṃ vibhratprasannavadanaḥ sadā |
umāskandeśvaraḥ śambhurdivyaratnavibhūṣaṇaḥ || 55 ||
[Analyze grammar]

ābhayā bhāsayaṃllokānavikuṇṭhaśriyānvitaḥ |
śakterutsavabhadre ca saṃpūjyā suṃdareśvarī || 56 ||
[Analyze grammar]

sarvabhūṣaṇasaṃyuktā śṛṅgārarasavarddhanī |
bālo gaṇapatiḥ pūjyaḥ purastādbhūtinandanaḥ || 57 ||
[Analyze grammar]

madaṃtikamalaṃkurvanbhakṣyairbhojyairbahūdayaiḥ |
matpārśvamavimuṃcaṃtī śoṇarekhāṃcitekṣaṇā || 58 ||
[Analyze grammar]

utsavārthā parā śaktiraṃtikasthaiva pūjyatām |
mukharāṃghripatiḥ śrīmānnṛtyaṃstāṃḍavapaṇḍitaḥ || 59 ||
[Analyze grammar]

utsavārthaṃ samabhyarcyaścakṣuragre'mṛteśvaraḥ |
śaktiścānyā mahābhāgā saṃpūjyā bhūvināyakā || 60 ||
[Analyze grammar]

dvāre nandī mahākālaḥ purastātsūryasaṃnibhaḥ |
bhaktānāṃ mama sarveṣāṃ pūjanaṃ cāpi kalpyatām || 61 ||
[Analyze grammar]

dakṣiṇe mātaraḥ pūjyā vighnaśāstṛsamanvitāḥ |
saṃpūjyo nairṛte koṇe vighnanāśo vināyakāḥ || 62 ||
[Analyze grammar]

skandaḥ śaktidharaścaivaiśānakoṇe samarcyatām |
liṃgāni ca manojñāni pūjanīyānyanantaram || 63 ||
[Analyze grammar]

maṃdiraṃ mama saṃpūjya dakṣiṇāmūrti dakṣiṇam |
paścime viṣṇurūpāṃkamagnirūpānvitaṃ tathā || 64 ||
[Analyze grammar]

uttare brahmarūpāṃkaṃ pūrve sāraṃgabhūyutam |
sarvadevaguṇopetaṃ sarvaśaktisamanvitam || 65 ||
[Analyze grammar]

apītakucanāthāyāḥ sarvaśaktisamanvitam |
maṃdiraṃ guru saṃpūjya dikpālakavadhūvṛtam || 66 ||
[Analyze grammar]

maṃdirasyāvanārthāya devīrvaibhavanāyakāḥ || 67 ||
[Analyze grammar]

kṣetrapālaṃ tu saṃpūjya sarvāvaraṇasaṃyutam |
putrasya trāṇamāyātā pūjyāruṇagirīśvarī || 68 ||
[Analyze grammar]

kālī bahuvidhāścānyā devatā vidhipālakāḥ |
utsavā vividhāḥ kalpyāḥ pratimāsamahodayāḥ || 69 ||
[Analyze grammar]

sṛjasva kanyakā divyāḥ śivadevārhaṇe ratāḥ |
nṛttagītakalābhijñā rūpasaubhāgyasaṃyutāḥ || 70 ||
[Analyze grammar]

cāruvibhramasaṃyuktāḥ kāmadā nityapāvanāḥ |
śiṣyānādiśa vedajñānsadācārasamujjvalān || 71 ||
[Analyze grammar]

divyopacārasaṃsiddhyai subhagāñchuddhacetasaḥ |
dīkṣitānvimalāñchuddhāñchaivāgamaviśāradān || 72 ||
[Analyze grammar]

śaivācāraprasiddhyarthamādiśābhyarcane mama |
mārddalāñchāṃkhikānvaiṇāṃstālikānveṇuvādakān || 73 ||
[Analyze grammar]

śaulbikānsṛja sadvidyāṃścaturvidyāviśāradān |
kṣatriyānvividhānvaiśyāñchūdrāṃśca śivasaṃmatān || 74 ||
[Analyze grammar]

catvāraśca maṭhāḥ kalpyāścaturdiktīrthavāsinām |
munīnāṃ śivabhaktānāṃ nirāśānāṃ nivāsataḥ || 75 ||
[Analyze grammar]

teṣu sthitā munīṃdrā me rakṣaṃtu śivapūjanam |
bhikṣamāṇāḥ punaḥ śaivā bhaktāḥ pāśupatā api || 76 ||
[Analyze grammar]

pālayaṃtu sadānye ca yuktāḥ kāpālikā api |
sarveṣāṃ jāyamānānāṃ jātānāṃ saṃbhaviṣyatām || 77 ||
[Analyze grammar]

avyāhatājñamārakṣyamidaṃ sthānaṃ mahībhṛtām |
bakulaśca mahānatra dṛśyate divyabhūruhaḥ || 78 ||
[Analyze grammar]

atra bhaktā vitanvantu śivakāryaviniścayam |
atra me dīyate dravyamaprekṣitaparāptaye || 79 ||
[Analyze grammar]

yattadakṣayyaphaladamārakṣyaṃ śivasevakaiḥ |
bhaktairvijñāpitaṃ cārthaṃ śroṣyāmi purataḥ sthitaiḥ || 80 ||
[Analyze grammar]

sarvaṃ saṃpādayiṣyāmi teṣāṃ cittānukūlakam |
aparādhasahasrāṇi kṣaṃsye māṃ svarcatāmaham || 81 ||
[Analyze grammar]

āgamoktā ca pūjeyaṃ mānuṣī nirmitā yataḥ |
grahīṣye tāmahaṃ sarvāmarcāṃ sarvāgamoditām || 82 ||
[Analyze grammar]

saṃkalpitaṃ bhavetkarma prītikṛnmama sevakaiḥ |
āgamārthānaśeṣāṃstvamālokya samayocitān || 83 ||
[Analyze grammar]

vidhāyābhyarcanābhedāṃllokarakṣākṛte mune |
kartavyā mahatī pūjā paurṇamāsyāṃ tu sādaram || 84 ||
[Analyze grammar]

satrāṇi vividhānyatra kartavyāni sahasraśaḥ |
vividhāni ca dānāni śaktyā caivāsya sannidhau || 85 ||
[Analyze grammar]

avyucchinnapradīpasya dātāro mama sannidhau |
tejomayamidaṃ rūpaṃ mama yāṃti na saṃśayaḥ || 86 ||
[Analyze grammar]

jalajaṃ tarujaṃ puṣpaṃ kakṣajaṃ ca latodbhavam |
dadate ye ca bhaktyā me te bhaviṣyaṃti bhūbhṛtaḥ || 87 ||
[Analyze grammar]

teṣāṃ purogataḥ sākṣādahaṃ jeṣyāmi vidviṣaḥ |
yasya yasya tu deśasya yo yo rājā tapodhikaḥ || 88 ||
[Analyze grammar]

tattatsamarddhitaṃ ramyaṃ saṃbhavaṃ dadate'tra me |
matsaṃnidhimupāgatya durātmāno'pi bhūmipāḥ || 89 ||
[Analyze grammar]

śivabhaktā bhṛśaṃ pūrṇā bhaviṣyaṃti na saṃśayaḥ || 90 ||
[Analyze grammar]

iti śaṃbhumukhotthitaṃ vacaḥ samupaśrutya vidhūtakalmaṣaḥ |
ahamānatavānvyajijñapaṃ kutukācchoṇagirīśvaraṃ śivam || 91 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye pūrvārdhe'ruṇeśvarārādhanāmāhātmyavarṇanaṃnāmāṣṭamo'dhyāyaḥ || 8 ||
[Analyze grammar]