Chapter 7

[English text for this chapter is available]

pārvatyuvāca |
kathamagnimayaṃ liṃgamabhigamyamabhūdbhuvi |
prāṇināmapi sarveṣāmupaśāṃtiṃ kathaṃ gataḥ || 1 ||
[Analyze grammar]

tīrthānāmudbhavaḥ puṇyātkathaṃ cāruṇaparvatāt |
upasaṃhṛtasarvāṃgaḥ kathaṃ vā vada me'calaḥ || 2 ||
[Analyze grammar]

gautama uvāca |
kṛte tvagnimayaḥ śailastretāyāṃ maṇiparvataḥ |
dvāparaṃ hāṭakagiriḥ kalau marakatācalaḥ || 3 ||
[Analyze grammar]

bahuyojanaparyaṃtaṃ kṛte vahnimaye sthite |
bahiḥ pradakṣiṇaṃ cakruḥ praśāmyati maharṣayaḥ || 4 ||
[Analyze grammar]

śanaiḥ śāṃtoruṇādrīśaḥ śrīmānabhyarthitaḥ suraiḥ |
lokaguptyarthamatyarthamupaśāṃto'ruṇācalaḥ || 5 ||
[Analyze grammar]

atha gaurī muniṃ prāha kathaṃ śāṃto'ruṇācalaḥ |
kathaṃ vā prārthayāmāsurdeveśaṃ tridaśā imam || 6 ||
[Analyze grammar]

iti tasyā vacaḥ śrutvā gautamastvabhyabhāṣata |
praśasya bhaktimatulāṃ tasyāstattvārthavedinīm || 7 ||
[Analyze grammar]

gautama uvāca |
agnirūpaṃ purā śailamāsādayitumakṣamāḥ |
purā surāḥ stutiṃ cakrurabhyarcya kratusaṃbhavaiḥ || 8 ||
[Analyze grammar]

bhagavannaruṇādrīśa sarvalokahitāvaha |
agnirūpo'pi saṃśāṃtaḥ prakāśasya mahītale || 9 ||
[Analyze grammar]

asau yastāmro aruṇa uta babhruḥ sumaṃgalaḥ |
iti tvāṃ sakalā vedāḥ stuvaṃti śivavigraham || 10 ||
[Analyze grammar]

namastāmrāyāruṇāya śivāya paramātmane |
vedavedya svarūpāya somāya sukharūpiṇe || 11 ||
[Analyze grammar]

tvadrūpamakhilaṃ deva jagadetaccarācaram |
nidhānamiva te rūpaṃ devānāmidamīkṣyate || 12 ||
[Analyze grammar]

varṣatāṃ ca payodānāṃ nirjharāṇāṃ ca bhūyasām |
salilopāyasaṃhāro yuktaste yugasaṃkṣaye || 13 ||
[Analyze grammar]

agnerāpaḥ samudbhūtāstvatto hi paramātmanaḥ |
viśvasṛṣṭiṃ vitanvati vicitraguṇa vaibhavāt || 14 ||
[Analyze grammar]

śīto bhava mahādeva śoṇācala kṛpānidhe |
sarveṣāmapi jīvānāmabhigamyo bhava prabho || 15 ||
[Analyze grammar]

iti stutaḥ suraiḥ sarverānatairbhaktavatsalaḥ |
sadyaḥ śītalatāṃ gacchannabhimyo'bhavatprabhuḥ || 16 ||
[Analyze grammar]

prāvarttata punarnadyo nirjharāśca bahūdakāḥ |
varṣatāmapi meghānāṃ na jagrāha jalaṃ bahu || 17 ||
[Analyze grammar]

tathāpi taruṇārkodyatkālāgniśatakoṭibhiḥ |
samānadīptirabhajajjīvānāmabhigamyatām || 18 ||
[Analyze grammar]

visṛjya viśvasalilaṃ nadīśca rasavikṣaraiḥ |
saṃpūryaḥ sakalairdevaḥ sarvadā saṃprakāśate || 19 ||
[Analyze grammar]

tīrthāni tāni tānyāsanparitaḥ prārthanāvaśāt |
dikpālānāṃ surāṇāṃ ca maharṣīṇāṃ mahātmanām || 20 ||
[Analyze grammar]

brahmovāca |
iti tasya vacaḥ śrutvā gaurī kutukasaṃyutā |
tīrthānāmudbhavaṃ sarva śrotuṃ samupacakrame || 21 ||
[Analyze grammar]

pārvatyuvāca |
kāni tīrthāni jātāni śoṇādrerlokaguptaye |
bhagavanbrūhi sakalaṃ tīrthānāmudbhavaṃ mama || 22 ||
[Analyze grammar]

iti tasyā vacaḥ śṛṇvangirīśātsaṃśrutaṃ purā |
tīrthānāmudbhavaṃ sarvaṃ vyākhyātumupacakrame || 23 ||
[Analyze grammar]

gautama uvāca |
aindraṃ nāma mahātīrthamiṃdrabhāge samutthitam |
tatra snātvā purā śakro brahmahatyāṃ vyapohayat || 24 ||
[Analyze grammar]

brahmatīrthaṃ punardivyaṃ vahniḥkoṇe samutthitam |
parastrīsaṃgamātpāpaṃ vahniḥ snātvātra cātyajat || 25 ||
[Analyze grammar]

yāmyaṃ nāma mahātīrthaṃ yamabhāge vijṛṃbhate |
atra snātvā yamo'tyākṣīdbhayaṃ brahmāstrasaṃbhavam || 26 ||
[Analyze grammar]

nairṛtaṃ tu mahātīrthaṃ nairṛtyāṃ diśi śobhate |
bhūtavetālavijayaṃ tatra snātvarṣayo gatāḥ || 27 ||
[Analyze grammar]

paścime vāruṇaṃ tīrthaṃ digbhāge ca prakāśate |
śalyakośaṃ purā lebhe snātvātra varuṇo nijam || 28 ||
[Analyze grammar]

vāyave vāyavīyaṃ ca tīrthamatra prakāśate |
tatra snātvā yayau vāyurjagatprāṇatvavaibhavam || 29 ||
[Analyze grammar]

uttare cātra digbhāge somatīrthamiti smṛtam |
tatra snātvā purā somo yakṣmarogādamuṃcata || 30 ||
[Analyze grammar]

aiśāne cātra digbhāge viṣṇutīrthamiti smṛtam |
tatra snātvā purā viṣṇuḥ śriyā ca saha saṃgataḥ || 31 ||
[Analyze grammar]

mārkaṇḍeyaḥ purā devi prārthayāmāsa śaṃkaram |
sadāśiva mahādeva devadeva jagatpate || 32 ||
[Analyze grammar]

bahūnāmiha tīrthānāmekatra syātsamāgamaḥ |
kenopāyena bhagavankṛpayā vada śaṃkara || 33 ||
[Analyze grammar]

iti tasya vacaḥ śrutvā devadeva umāpatiḥ |
upāyaṃ darśayāmāsa munaye prītamānasaḥ || 34 ||
[Analyze grammar]

maheśvara uvāca |
sadopahāravelāyāṃ sarvatīrthasamuccayaḥ |
sannidhiṃ mama saṃprāptaḥ sevate gūḍharūpataḥ || 35 ||
[Analyze grammar]

nānyadanveṣaṇīyaṃ te tīrthamatra mahāmune |
mamopahāravelāyāṃ dṛśyate tīrthasaṃcayaḥ || 36 ||
[Analyze grammar]

tasmādbhaktiyutairnityaṃ sarvatīrthasamāgamaḥ |
munibhiśca suraiḥ sarvairnaivedyāṃte vilokyatām || 37 ||
[Analyze grammar]

iti devi purā devo mārkaḍeyāya śaṃkaraḥ |
upādiśadameyātmā tīrthasaṃdarśanakramam || 38 ||
[Analyze grammar]

gautama uvāca |
sarvāṇyapi ca puṇyāni tīrthāni śivasannidhau |
sadopahāravelāyāṃ dṛśyāni kila mānavaiḥ || 39 ||
[Analyze grammar]

vrataṃ tīrthaṃ tapo vedā yajñāśca niyamādayaḥ |
yogāśca śoṇaśaileśadarśanāddṛṣṭasaṃcarāḥ || 40 ||
[Analyze grammar]

niśamya vākyaṃ munipuṃgavasya praseduṣī parvatarājaputrī |
avocadatyadbhutametadatra tvayopadiṣṭaṃ bhuvi tīrthajālam || 41 ||
[Analyze grammar]

ahaṃ kṛtārthā tapatāṃ variṣṭha tvatsaṃgamātsaṃprati tīrthajālam |
prāptā namaste'stu tapoviśeṣa śivopi me'trādiśadeva kartum || 42 ||
[Analyze grammar]

kathaṃ girīśaḥ punaratra devaḥ sphuranmahāvahnivapurdharo'pi |
praśāṃtarūpaḥ parameśvaro'yamabhyarcanīyo bhuvi martyavargaiḥ || 43 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe 'ruṇācalamāhātmye pūrvārdhe'ruṇācalasthavividhatīrthavarṇanaṃnāma saptamo'dhyāyaḥ || 7 ||
[Analyze grammar]