Chapter 5

[English text for this chapter is available]

brahmovāca |
araṇyādgautamaṃ śāṃtamuṭajadvāra āgatam |
pratyādhātuṃ pravavṛte śivabhaktirjaganmayī || 1 ||
[Analyze grammar]

āluloke samāyātaṃ gautamaṃ śiṣyasevitam |
laṃbamānaśiraḥśmaśrusampūrṇamukhamaṇḍalam || 2 ||
[Analyze grammar]

jaṭābhiratitāmrābhistīrthasnānaviśuddhibhiḥ |
nyastarudrākṣamaṇibhirjvālābhiriva pāvakam || 3 ||
[Analyze grammar]

bhasmatripuṇḍrakopetaviśālaniṭilojvalam |
śuklayajñopavītena pūrṇaṃ rudrākṣadāmabhiḥ || 4 ||
[Analyze grammar]

dadhānaṃ valkale rakte tapaḥ kṛśitavigraham |
japaṃtaṃ vaidikānmaṃtrānrudraprītikarānbahūn || 5 ||
[Analyze grammar]

śambhunāvasitodāttasārūpyamiva bhāṣitam |
tejonidhiṃ dayāpūrṇaṃ pratyakṣamiva bhāskaram || 6 ||
[Analyze grammar]

ālokya taṃ mahātmānaṃ vṛddhaṃ śaṃbhupadāśrayam |
kṛtāṃjalipuṭā gaurī praṇantumupacakrame || 7 ||
[Analyze grammar]

kṛtāṃjaliṃ munirvīkṣya samastajagadambikām |
kimetaditi sāścaryaṃ vārayanpraṇanāma saḥ || 8 ||
[Analyze grammar]

svāgataṃ gauri subhage lokamātardayānidhe |
vyājena bhaktasaṃrakṣāṃ kartumatrāgatāsyaho || 9 ||
[Analyze grammar]

aho mānye mānyamarthaṃ vijñāyaiva purā vayam |
pṛthagbhāvamivālaṃbya śiṣyādibhiḥ samāgatāḥ || 10 ||
[Analyze grammar]

yaddevi te na cetkiṃcinmāyāvilasitannijam |
tataḥ prapaṃcasaṃsiddhiḥ kathameva bhaviṣyati || 11 ||
[Analyze grammar]

tiṣṭhatvaśeṣaṃ me vaktuṃ māyāvilasitaṃ tava |
na śakyate yannirṇetuṃ tvadīyaiśca kadācana || 12 ||
[Analyze grammar]

āsyatāṃ pāvane śuddhaṃ āsane kuśanirmite |
gṛhyatāṃ pādyamarghaṃ ca dattaṃ ca vidhivanmayā || 13 ||
[Analyze grammar]

iti śiṣyaiḥ samānīte darbhāṃke paramāsane |
āsīnāmaṃbikāṃ vṛddho munirānarca bhaktimān || 14 ||
[Analyze grammar]

nivedya sakalāṃ pūjāṃ bhaktibhāvasamanvitaḥ |
gauryā samabhyanujñātaḥ svayamapyāsane sthitaḥ || 15 ||
[Analyze grammar]

uvāca daśanajyotsnāparidhautadiśāmukhaḥ |
pulakāṃcitasarvāṃgaḥ sānaṃdāśru sagadgadam || 16 ||
[Analyze grammar]

aho devasya māhātmyaṃ śambhoramitatejasaḥ |
sadbhakta rakṣaṇāya tvāmādiśadbhaktavatsalaḥ || 17 ||
[Analyze grammar]

asiddhamanyallabdhavyaṃ kiṃ vānyattava vidyate |
ambaitadbhaktimāhātmyaṃ saṃdarśayitumīśvaraḥ || 18 ||
[Analyze grammar]

kailāsaśailavṛttāṃtaḥ kaṃpātaṭatapaḥsthitaḥ |
aruṇādrisamādeśaḥ sarvaṃ jñātamidaṃ mayā || 19 ||
[Analyze grammar]

āgatāsi mahābhāge bhaktāśramamimaṃ svayam |
snehena karuṇāmūrte karttavyamupadiśyatām || 20 ||
[Analyze grammar]

iti tasya vacaḥ śrutvā maharṣeḥ sarvavedinaḥ |
aṃbikā prāha kutukātstuvantī taṃ mahāmunim || 21 ||
[Analyze grammar]

mahāvaibhavametatte devadevaḥ svayaṃ śivaḥ |
madhye tapasvināṃ tvaṃ tu draṣṭavya iti cādiśat || 22 ||
[Analyze grammar]

āgamānāṃ śivoktānāṃ vedānāmapi pāragaḥ |
tapasā śaṃbhubhaktānāṃ tvameva śivasaṃmataḥ || 23 ||
[Analyze grammar]

aruṇācala nāmnāhaṃ tiṣṭhāmītyabravīcchivaḥ || |
asyācalasya māhātmyaṃ śrotavyaṃ ca bhavanmukhāt || 24 ||
[Analyze grammar]

prāptāsmyahaṃ tapaḥ kartumaruṇācalasannidhau |
bhavatāṃ darśanādeva svayamīśaḥ prasīdati || 25 ||
[Analyze grammar]

śivabhaktena saṃbhāṣā śivasaṃkīrttanaśravaḥ |
śivaliṃgārcanaṃ loke vapurgrahaphalodayaḥ || 26 ||
[Analyze grammar]

tasmānmamaitanmāhātmyaṃ śrotavyaṃ bhavato mukhāt |
suvyaktamupadeśena jñānato'si pitā mama || 27 ||
[Analyze grammar]

iti tasyā vacaḥ śrutvā gautamastapasāṃ nidhiḥ |
ācakhyau giriśaṃ dhyāyannaruṇācalavaibhavam || 28 ||
[Analyze grammar]

ajñātamiva yatkiṃcitpṛcchyate ca punastvayā |
avaimi sarvavidyānāṃ māyā śaivī tvameva sā || 29 ||
[Analyze grammar]

athavā bhaktavaktreṇa śivavaibhavasaṃśravaḥ |
śikṣaṇaṃ śāṃbhavaṃ teṣāṃ tava tuṣṭeśca kāraṇam || 30 ||
[Analyze grammar]

paṭhitānāṃ ca vedānāṃ yadāvṛttaphalāvaham |
vadatāṃ śṛṇvatāṃ loke śivasaṃkīrttanaṃ tathā || 31 ||
[Analyze grammar]

saphalānyadya sarvāṇi tapāṃsi caritāni me |
yadahaṃ śaṃbhunādiṣṭaṃ māhātmyaṃ kīrttaye śrutam || 32 ||
[Analyze grammar]

śivāśivaprasādena māhātmyamidamadbhutam || 33 ||
[Analyze grammar]

aruṇācalamāhātmyaṃ duritakṣayakāraṇam |
śrūyatāmanavadyāṃgi purāvṛttamidaṃ mahat || 34 ||
[Analyze grammar]

aruṇādrimayaṃ liṃgamāvirbhūtaṃ yathā purā |
na śakyate punarvaktumaśeṣaṃ vaktrakoṭibhiḥ || 35 ||
[Analyze grammar]

aruṇācalamāhātmyaṃ brahmaṇāmapi koṭibhiḥ |
brahmaṇā viṣṇunā pūrvaṃ somabhāskaravahnibhiḥ || 36 ||
[Analyze grammar]

indrādibhiśca dikpālaiḥ pūjitaścāṣṭasiddhaye |
siddhacāraṇagaṃdharva yakṣavidyādharoragaiḥ || 37 ||
[Analyze grammar]

khagaiśca munibhirdivyaiḥ siddhayogibhirarcitaḥ |
tattatpāpanivṛttyarthaṃ tattadīpsitasiddhaye || 38 ||
[Analyze grammar]

ārādhito'yaṃ bhagavānaruṇādripatiḥ śivaḥ |
dṛṣṭo harati pāpāni sevito vāṃchitapradaḥ || 39 ||
[Analyze grammar]

kīrtitopi janairdūraiḥ śoṇādririti muktidaḥ |
tejaḥstaṃbhamayaṃ rūpamaruṇādririti śrutam || 40 ||
[Analyze grammar]

dhyāyanto yoginaścitte śivasāyujyamāpnuyuḥ |
dattaṃ hutaṃ ca yatkiṃcijjaptaṃ cānyattapaḥ kṛtam || 41 ||
[Analyze grammar]

akṣayyaṃ bhavati prāptamaruṇācalasaṃnidhau |
purā brahmā ca viṣṇuśca śivatejoṃśasaṃbhavau || 42 ||
[Analyze grammar]

sāhaṃkārau yuyudhatuḥ parasparajigīṣayā |
tathā tayorgarvaśāṃtyai yogidhyeyaḥ sadāśivaḥ || 43 ||
[Analyze grammar]

agnitejomayaṃ rūpamādimadhyāṃtavarjitam |
saṃprāpya tasthau tanmadhye diśo daśa vibhāsayan || 44 ||
[Analyze grammar]

tejaḥstaṃbhasya tasyātha draṣṭumādyaṃtabhāgayoḥ |
haṃsakroḍatanū kṛtvā jagmaturdyāṃ rasātalam || 45 ||
[Analyze grammar]

tau viṣaṇṇamukhau dṛṣṭvā bhagavānkaruṇānidhiḥ |
āvirbabhūva ca tayorvaraṃ prādādabhīpsitam || 46 ||
[Analyze grammar]

tatprārthitaśca deveśo yātaḥ sthāvaraliṃgatām |
aruṇādririti khyātaḥ praśāṃtaḥ saṃprakāśate || 47 ||
[Analyze grammar]

divyadundubhinirghoṣairapsarogītanarttanaiḥ |
pūjyate taijasaṃ liṃgaṃ puṣpavṛṣṭiśataiḥ sadā || 48 ||
[Analyze grammar]

brahmaṇāmapyatītānāṃ purā ṣaṇṇavateḥ prabhuḥ |
viṣṇunābhisamudbhūto brahmā lokānsasarja hi || 49 ||
[Analyze grammar]

sa kadācittapovighnaṃ kartukāmena yoginām |
iṃdreṇa prārthito brahmā sasarja lalitāṃ striyam || 50 ||
[Analyze grammar]

lāvaṇyaguṇasaṃpūrṇāmālokya kamalekṣaṇām |
mumoha kaṃdarpaśaraiḥ sa viddhahṛdayo vidhiḥ || 51 ||
[Analyze grammar]

spraṣṭukāmaṃ tamālokya brahmāṇaṃ kamalāsanam |
natvā pradakṣiṇavyājādgaṃtumaicchadvarāpsarāḥ || 52 ||
[Analyze grammar]

asyāṃ pradakṣiṇāṃ bhaktyā kurvāṇāyāṃ prajāpateḥ |
catasṛbhyo'pi digbhyo'sya mukhānyudabhavankṣaṇāt || 53 ||
[Analyze grammar]

sā bālā pakṣiṇī bhūtvā gaganaṃ samagāhata |
punaśca khagarūpeṇa samāyāṃtaṃ samīkṣya sā || 54 ||
[Analyze grammar]

śaraṇaṃ yācamānā sā śoṇādrimimamāśrayat |
brahmaṇā viṣṇunā ca tvamadṛṣṭapadaśekharaḥ || 55 ||
[Analyze grammar]

rakṣa māmaruṇādrīśa śaraṇya śaraṇāgatām |
iti tasyāṃ bhayārttāyāṃ krośaṃtyāmaruṇācalāt || 56 ||
[Analyze grammar]

udabhūtsthāvarālliṃgādvyādhaḥ kaściddhanurddharaḥ |
saṃdhāya sāyakaṃ cāpe sameghagaganadyutiḥ || 57 ||
[Analyze grammar]

niṣāde purato dṛṣṭe mohastasya nanāśa hi |
tataḥ prasannahṛdayotinamraḥ kamalodbhavaḥ || 58 ||
[Analyze grammar]

namaścakre śaraṇyāya śoṇādripataye tadā |
sarvapāpakṣayakṛte namastubhyaṃ pinākine || 59 ||
[Analyze grammar]

aruṇācalarūpāya bhakvavaśyāya śaṃbhave |
ajānatāṃ svabhaktānāmakarmavinivarttane || 60 ||
[Analyze grammar]

tvadanyaḥ kaḥ prabhuḥ kartumaśakyaṃ cāpi dehinām |
upasaṃhara me dehaṃ tejasā pāpaniścayam || 61 ||
[Analyze grammar]

anyaṃ vā sṛja viśvātmanbrahmāṇaṃ lokasṛṣṭaye |
atha tasya vacaḥ śrutvā śivo dīnasya vedhasaḥ || 62 ||
[Analyze grammar]

uvāca karuṇāmūrtirbhūtvā caṃdrārddhaśekharaḥ |
dattaḥ kālastava mayā puraiva na nivartyate || 63 ||
[Analyze grammar]

kaṃ vā rāgādayo doṣā na bādheranprabhusthitam |
 tasmāddūrasthito'pyetadaruṇācalasaṃjñitam || 64 ||
[Analyze grammar]

bhajasva taijasaṃ liṃgaṃ sarvadoṣanivṛttaye |
vācikaṃ mānasaṃ pāpaṃ kāyikaṃ vā ca yadbhavet || 65 ||
[Analyze grammar]

vinaśyati kṣaṇātsarvamaruṇācaladarśanāt |
pradakṣiṇā namaskāraiḥ smaraṇairarcanaiḥ stavaiḥ || 66 ||
[Analyze grammar]

aruṇādrirayaṃ nṛṇāṃ sarvakalmaṣanāśanaḥ |
kailāse meruśṛṃge vā svasthāneṣu kalādriṣu || 67 ||
[Analyze grammar]

saṃdṛśyaḥ kaścidevāhamaruṇādrirayaṃ svayam |
yacchṛṃgadarśanānnṝṇāṃ cakṣurlābhena kevalam || 68 ||
[Analyze grammar]

bhavetsarvāghanāśaśca lābhaśca jñānacakṣuṣaḥ |
madaṃśasaṃbhavo brahmā svanāmnā brahmapuṣkare || 69 ||
[Analyze grammar]

atra snātaḥ purā brahmanmoho'gājjagatīpateḥ |
snātvā tvaṃ brahmatīrthe māṃ samabhyarcya kṛtāṃjaliḥ || 70 ||
[Analyze grammar]

maunī pradakṣiṇaṃ kṛtvā viśvātmanbhava vijvaraḥ || 71 ||
[Analyze grammar]

iti vacanamudīrya viśvanāthaṃ sthitamaruṇācalarūpato maheśam |
atha sarasi nimajya padmajanmā duritaharaṃ samapūjayatkrameṇa || 72 ||
[Analyze grammar]

imamaruṇagirīśameṣa vedhā yamaniyamādiviśuddhacittayogaḥ |
sphuṭataramabhipūjya sopacāraṃ gatadurito'tha jagāma cādhipatyam || 73 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye pūrvārdhe brahmapuṣkaramāhātmyavarṇanaṃnāma pañcamo'dhyāyaḥ || 5 ||
[Analyze grammar]