Chapter 4

[English text for this chapter is available]

brahmovāca |
athābhyadhatta vijayā praṇamya jagadambikām |
sāṃtvayantī stutiśatairupāyaiḥ śivadarśanaiḥ || 1 ||
[Analyze grammar]

devi tvamavinābhūtā sadā devena śaṃbhunā |
prāṇeśvarī tvamekāsi śaktistasya parātmanaḥ || 2 ||
[Analyze grammar]

tathā māyāṃ tvamātmīyāṃ saṃdarśayitumīhase |
pṛthagbhāvamiveśānaḥ prakāśayati na svayam || 3 ||
[Analyze grammar]

ādeśaṃ pratigṛhyaiva samupetāsi pārvati |
alaṃghanīyā sevājñā śāṃbhavī sarvadā tvayā || 4 ||
[Analyze grammar]

vidhātavyaṃ tapaḥ prāptaṃ sthānesmicchivakalpite |
nivṛttya nikhilānkāmācchaṃmumāśritayā tvayā || 5 ||
[Analyze grammar]

anyathāpi jagadrakṣā tvadadhīnā jaganmayi |
dharmasaṃrakṣaṇaṃ bhūyaḥ śivena sahitaṃ tava || 6 ||
[Analyze grammar]

niṣkalaṃ śivamatyaṃtaṃ dhyāyaṃtyātmanyavasthitam |
viyogaduḥkhaṃ kañcittvaṃ na smariṣyasi pārvati || 7 ||
[Analyze grammar]

bhaktānāṃ tava mukhyānāṃ tavaivācārasaṃgrahaḥ |
upadeśitayā loke prathatāṃ dharmavatsale || 8 ||
[Analyze grammar]

iti tasyā vacaḥ śrutvā gaurī susthiramānasā |
tapaḥ karttuṃ samārebhe kaṃpā nadyāstaṭe śubhe || 9 ||
[Analyze grammar]

vimucya vividhā bhūṣā rudrākṣagaṇabhūṣitā |
visṛjya divyaṃ vasanaṃ paryadhādvalkale śubhe || 10 ||
[Analyze grammar]

alakaiḥ sahasā śilpamanayacca kapardṛtām |
aliṃpata tanūṃ sarvāṃ bhasmanā muktakuṃkumā || 11 ||
[Analyze grammar]

mṛgeṣu kṛtasaṃtoṣā śiloṃchīkṛtavṛttiṣu |
jajāpa niyamopetā śivapaṃcākṣaraṃ param || 12 ||
[Analyze grammar]

kṛtvā triṣavaṇaṃ snānaṃ kampā payasi nirmale |
kṛtvā ca saikataṃ liṃgaṃ pūjayāmāsa sādaram || 13 ||
[Analyze grammar]

vṛkṣapraropaṇairdānairaśeṣātithipūjanaiḥ |
śrāṃtiṃ haraṃtī jīvānāṃ devī dharmamapālayat || 14 ||
[Analyze grammar]

grīṣme paṃcāgnimadhyasthā varṣāsu sthaṃḍileśayā |
hemante jalamadhyasthā śiśire cākarottapaḥ || 15 ||
[Analyze grammar]

puṇyātmanāṃ maharṣīṇāṃ darśanārthamupeyuṣām |
vismayaṃ janayāmāsa pūjayāmāsa sādaram || 16 ||
[Analyze grammar]

kadācitsvayamuccitya vanāṃtātpallavānvitam |
puṣpotkaraṃ viśeṣeṇa śodhituṃ samupāviśat || 17 ||
[Analyze grammar]

kṛtvā ca saikataṃ liṃgaṃ kaṃpārodhasi pāvane |
saṃpūjayitumārebhe nyāsāvāhanapūrvakam || 18 ||
[Analyze grammar]

sūryamabhyarcya vidhivadraktaiḥ puṣpaiśca caṃdanaiḥ |
paṃcāvaraṇasaṃyuktaṃ kramādānarca śaṃkaram || 19 ||
[Analyze grammar]

dhūpairdīpaśca naivedyairbhaktibhāvasamanvitaiḥ |
aparokṣitamīśānamāluloke purohitam || 20 ||
[Analyze grammar]

atha devaḥ śivaḥ sākṣātsaṃśodhayitumaṃbikām |
kaṃpānadyāḥ pravāheṇa mahatā paryaveṣṭayat || 21 ||
[Analyze grammar]

ativṛddhaṃ pravāhaṃ taṃ kampāyāḥ samupasthitam |
ālokya niyamāsīnāmāhuḥ sakhyastadāṃbikām || 22 ||
[Analyze grammar]

uttiṣṭha devi bahulaḥ pravāho'yaṃ vijṛṃbhate |
diśāṃ mukhāni saṃpūrya tarasā plāvayiṣyati || 23 ||
[Analyze grammar]

iti tadvacanaṃ śrutvā dhyāyaṃtī mīlitekṣaṇā |
unmīlya vegamatulaṃ nadyāstaṃ samavaikṣata || 24 ||
[Analyze grammar]

aciṃtayacca sā devī pūjāvighnasamākulā |
kiṃ karomi na śaknomi hātumārabdhamarcanam || 25 ||
[Analyze grammar]

śreyaḥ prāptumavighnena prāyaḥ puṇyātmanāṃ bhuvi |
ghaṭate dharmasaṃyogo manorathaphalapradaḥ || 26 ||
[Analyze grammar]

saikataṃ liṃgamatulapravāhāllayameṣyati |
liṃganāśe vimoktavyaḥ sadbhaktaiḥ prāṇasaṃgrahaḥ || 27 ||
[Analyze grammar]

pravāho'yaṃ samāyāti śivamāyāvinirmitaḥ |
viśodhayitumātmānaṃ bhaktiyuktaṃ nije pade || 28 ||
[Analyze grammar]

āliṃgya sudṛḍhaṃ dorbhyāmetalliṃgamanākulam |
ahaṃ vatsyāmi yātāśu sakhyo yūyaṃ vidūrataḥ || 29 ||
[Analyze grammar]

ityuktā saikataṃ ligaṃ gāḍhamāliṃgya sāṃbikā |
na mumoca pravāhena veṣṭyamānāpi vegataḥ || 30 ||
[Analyze grammar]

stanacūcukanirmagnamudrādarśitalāṃchanam |
mahāliṃgaṃ svasaṃyuktaṃ praṇanāma tadādarāt || 31 ||
[Analyze grammar]

nimīlitekṣaṇā dhyānaniṣṭhaikahṛdayā sthitā |
pulakāṃcitasarvāṃgī sā smaraṃtī sadāśivam || 32 ||
[Analyze grammar]

kaṃpasvedaparitrāṇalajjāpraṇayakelidāt |
kṣaṇamapyacalā liṃgānna viyogamapekṣate || 33 ||
[Analyze grammar]

atha tāmabravītkāpi daivī vāgaśarīriṇī |
vimuṃca bālike liṃgaṃ pravāho'yaṃ gato mahān || 34 ||
[Analyze grammar]

tvayārcitamidaṃ liṃgaṃ saikataṃ sthiravaibhavam |
bhaviṣyati mahābhāge varadaṃ surapūjitam || 35 ||
[Analyze grammar]

tapaścaryāṃ tavālokya racitaṃ dharmapālanam |
liṃgaṃ caitannamaskṛtya kṛtārthāḥ saṃtu mānavāḥ || 36 ||
[Analyze grammar]

ahaṃ hi taijasaṃ rūpamāsthāya vasudhātale |
vasāmi cātra siddhyarthamaruṇācalasaṃjñayā || 37 ||
[Analyze grammar]

ruṇaddhi sarvalokebhyaḥ paruṣaṃ pāpasaṃcayam |
ruṇo na vidyate yasmindṛṣṭe tenāruṇācalaḥ || 38 ||
[Analyze grammar]

ṛṣayaḥ siddhagaṃdharvā mahātmānaśca yoginaḥ |
muktvā kailāsaśikharaṃ meruṃ cainamupāsate || 39 ||
[Analyze grammar]

madaṃśa jātayoḥ pūrvaṃ yudhyatorbrahmakṛṣṇayoḥ |
ahaṃ mohamapākarttuṃ tejorūpo vyavasthitaḥ || 40 ||
[Analyze grammar]

brahmaṇā haṃsarūpeṇa viṣṇunā kroḍarūpiṇā |
adṛṣṭaśekharapadaḥ praṇato bhaktiyogataḥ || 41 ||
[Analyze grammar]

tataḥ prasannaḥ pratyakṣastasyāṃ varamabhīpsitam |
prādāṃ jagattrayasyāsya saṃrakṣāyāṃ tu kauśalam || 42 ||
[Analyze grammar]

prārthitaśca punastābhyāmaruṇācalasaṃjñayā |
anaiṣi taijasaṃ rūpamahaṃ sthāvaraliṃgatām || 43 ||
[Analyze grammar]

gatvā pṛccha mahābhāgaṃ madbhaktiṃ gautamaṃ munim |
aruṇācalamāhātmyaṃ śrutvā tatra tapaścara || 44 ||
[Analyze grammar]

tatra te darśayiṣyāmi taijasaṃ rūpamātmanaḥ |
sarvapāpanivṛttyarthaṃ sarvalokahitāya ca || 45 ||
[Analyze grammar]

iti vācaṃ samākarṇya niṣkalātkathitāṃ śivāt |
tatheti sahasā devī gaṃtuṃ samupacakrame || 46 ||
[Analyze grammar]

atha devānṛṣīnsarvānpaścātsevārthamāgatān |
avādīdaṃbikālokya snehapūrṇena cakṣuṣā || 47 ||
[Analyze grammar]

tiṣṭhatātraiva vai devā munayaśca dṛḍhavratāḥ |
niyamāṃścādhitiṣṭhaṃtaḥ kaṃpārodhasi pāvane || 48 ||
[Analyze grammar]

sarvapāpakṣayakaraṃ sarvasaubhāgyavarddhanam |
pūjyatāṃ saikataṃ liṃgaṃ kucakaṃkaṇalāṃchanam || 49 ||
[Analyze grammar]

ahaṃ ca niṣkalaṃ rūpamāsthāyaitaddivāniśam |
ārādhayāmi maṃtreṇa śoṇeśvaraṃ varapradam || 50 ||
[Analyze grammar]

mattapaścaraṇālloke maddharmaparipālanāt |
malliṃgadarśanāccaiva sidhyaṃtviṣṭavibhūtayaḥ || 51 ||
[Analyze grammar]

sarvakāmapradānena kāmākṣīmiti kāmataḥ |
māṃ praṇamyātra madbhaktā labhaṃtāṃ vāṃchitaṃ varam || 52 ||
[Analyze grammar]

ahaṃ hi devadevasya śaṃbhoravyāhato janaḥ |
ādeśaṃ pālayiṣyāmi gatvāruṇamahīdharam || 53 ||
[Analyze grammar]

tatra gatvā tapastīvraṃ kṛtvā śaṃbhuṃ prasādya ca |
māṃ tu labdhavarāṃ yūyaṃ paścādrakṣyatha saṃgatāḥ || 54 ||
[Analyze grammar]

iti sarvānvisṛjyāśu sadbhaktānpādasevinaḥ |
aruṇādriṃ gatā bālā tapase śaṃkarājñayā || 55 ||
[Analyze grammar]

nityābhisevitā'kāri sakhībhirabhiyogataḥ |
āsasādāruṇādrīśaṃ divyaduṃdubhināditam || 56 ||
[Analyze grammar]

aṃtastejomayaṃ śāṃtamaruṇācalanāyakam |
apsaronṛtyagītaiśca pūjitaṃ puṣpavṛṣṭibhiḥ || 57 ||
[Analyze grammar]

praṇamya sthāvaraṃ liṃgaṃ kautūhalasamanvitā |
siddhānāṃ yogināṃ sārthamṛṣīṇāṃ cānvavaikṣata || 58 ||
[Analyze grammar]

atrirbhṛgurbharadvājaḥ kaśyapaścāṃgirāstathā |
kutsaśca gautamaścānye siddhavidyādharāmarāḥ || 59 ||
[Analyze grammar]

tapaḥ kurvaṃti satatamapekṣitavarāptaye |
gaṃgādyāḥ saritaścānyāḥ paritaḥ paryupāsate || 60 ||
[Analyze grammar]

divyaliṃgamidaṃ pūjyamaruṇādririti smṛtam |
vaṃdasveti suraiḥ proktā praṇanāma punaḥpunaḥ || 61 ||
[Analyze grammar]

abhyarthitā punaḥ sarvairātithyārthe maharṣibhiḥ |
śivājñayā gautamo me draṣṭavya iti sāvadat || 62 ||
[Analyze grammar]

ayamatrarṣibhirbhaktairnirdiṣṭaṃ tamathābhyagāt |
sa muniḥ śivabhaktānāṃ prathamastapasāṃ nidhiḥ || 63 ||
[Analyze grammar]

vanāṃtaraṃ gateḥ prātaḥ samitkuśaphalāhṛteḥ |
atithīnāśramaṃ prāptānarcatheti dṛḍhavratān || 64 ||
[Analyze grammar]

śiṣyānādiśya dharmātmā gataśca vipināṃtaram |
atha sā gautamaṃ draṣṭumāgatā parṇaśālikām || 65 ||
[Analyze grammar]

kva gato munirityuktairita āyāsyati kṣaṇāt |
śiṣyairabhyarthitetyuktvā phalamūlaissugaṃdhibhiḥ || 66 ||
[Analyze grammar]

abhyutthānenāsanena pādyenārgheṇa sūnṛtaiḥ |
vacanaiḥ phalamṛlena sārcitā śiṣyasaṃpadā || 67 ||
[Analyze grammar]

kṣaṇaṃ kṣamasvasūnustāmanye jagmustadantikam |
devyāṃ praviṣṭamātrāyāṃ maharṣerāśramo mahān || 68 ||
[Analyze grammar]

abhavatkalpabahulo maṇiprāsādasaṃkulaḥ |
vanāṃtarādupāvṛttya samitkuśaphalāharaḥ || 69 ||
[Analyze grammar]

apaśyatsvāśramaṃ dūre vimānaśataśobhitam |
kimetaditi sāścaryaṃ ciṃtayanmunipuṃgavaḥ || 70 ||
[Analyze grammar]

gauryāḥ samāgamaṃ sarvamapaśyajjñānacakṣuṣā |
śīghraṃ nivartamāno'sau draṣṭuṃ tāṃ lokamātaram || 71 ||
[Analyze grammar]

śiṣyaiḥ śīghracarairvṛttamāveditamathāśṛṇot || 72 ||
[Analyze grammar]

atha maharṣirupāgatakautuko nijatapaḥphalameva tadāgamam |
śivadayākalitaṃ paricintayannabhajadāśramamāśritavatsalaḥ || 73 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ prathame māheśvarakhaṇḍe'ruṇācalamāhātmye pūrvārdhe pārvatyāḥ kaṃpāyā aruṇācale gautamāśramāgamanaṃnāma caturtho'dhyāyaḥ || 4 ||
[Analyze grammar]