Chapter 25

[English text for this chapter is available]

upamanyuruvāca |
anuktaṃ cātra pūjāyāḥ kamalopabhayādiva |
yattadanyatpravakṣyāmi samāsānna tu vistarāt || 1 ||
[Analyze grammar]

havirnivedanātpūrvaṃ dīpadānādanantaram |
kuryādāvaraṇābhyarcāṃ prāpte nīrājane 'tha vā || 2 ||
[Analyze grammar]

tatreśānādisadyāṃtaṃ rudrādyastrāṃtameva ca |
śivasya vā śivāyāśca prathamāvaraṇe japet || 3 ||
[Analyze grammar]

aiśānyāṃ pūrvabhāge ca dakṣiṇe cottare tathā |
paścime ca tathāgneyyāmaiśānyāṃ nairṛte tathā || 4 ||
[Analyze grammar]

vāyavyāṃ punaraiśānyāṃ caturdikṣu tataḥ param |
garbhāvaraṇamākhyātaṃ mantrasaṃghātameva vā || 5 ||
[Analyze grammar]

hṛdayādyastraparyaṃtamathavāpi samarcayet |
tadbahiḥ pūrvataḥ śakraṃ yamaṃ dakṣiṇato yajet || 6 ||
[Analyze grammar]

varuṇaṃ vāruṇe bhāge dhanadaṃ cottare budhaḥ |
īśamaiśe 'nalaṃ svīye nairṛte nirṛtiṃ yajet || 7 ||
[Analyze grammar]

mārute mārutaṃ viṣṇuṃ nairṛte vidhimaiśvare |
bahiḥpadmasya vajrādyānyabjāṃtānyāyudhānyapi || 8 ||
[Analyze grammar]

prasiddharūpāṇyāśāsu lokeśānāṃ kramādyajet |
devaṃ devīṃ ca saṃprekṣya sarvāvaraṇadevatāḥ || 9 ||
[Analyze grammar]

baddhāṃjalipuṭā dhyeyāḥ samāsīnā yathāsukham |
sarvāvaraṇadevānāṃ svābhidhānairnamoyutaiḥ || 10 ||
[Analyze grammar]

puṣpaiḥ saṃpūjanaṃ kuryānnatvā sarvānyathākramam |
garbhāvaraṇamevāpi yajetsvāvaraṇena vā || 11 ||
[Analyze grammar]

yoge dhyāne jape home vāhye vābhyaṃtare 'pi vā |
haviśca ṣaḍvidhaṃ deyaṃ śuddhaṃ mudgānnameva ca || 12 ||
[Analyze grammar]

pāyasaṃ dadhisaṃmiśraṃ gauḍaṃ ca madhunāplutam |
eteṣvekamanekaṃ vā nānāvyaṃjanasaṃyutam || 13 ||
[Analyze grammar]

guḍakhaṃḍanvitaṃ dadyānmathitaṃ dadhi cottamam |
bhakṣyāṇyapūpamukhyāni svādumaṃti phalāni ca || 14 ||
[Analyze grammar]

raktacandanapuṣpāḍhyaṃ pānīyaṃ cātiśītalam |
mṛdu elārasāktaṃ ca khaṇḍaṃ pūgaphalasya ca || 15 ||
[Analyze grammar]

dalāni nāgavallyāśca yuktāni khadirādibhiḥ |
gaurāṇi svarṇavarṇāni vihitāni śivāni ca || 16 ||
[Analyze grammar]

śailameva sitaṃ cūrṇaṃ nātirūkṣaṃ na dūṣitam |
karpūraṃ cātha kaṃkolaṃ jātyādi ca navaṃ śubham || 16 ||
[Analyze grammar]

ālepanaṃ candanaṃ syānmūlakāṣṭhaṃrajomayam |
kastūrikā kuṃkumaṃ ca raso mṛgamadātmakaḥ || 17 ||
[Analyze grammar]

puṣpāṇi surabhīṇyeva pavitrāṇi śubhāni ca |
nirgaṃdhānyugragaṃdhāni dūṣitānyuṣitāni ca || 18 ||
[Analyze grammar]

svayameva viśīrṇāni na deyāni śivārcane |
vāsāṃsi ca mṛdūnyeva tapanīyamayāni ca || 19 ||
[Analyze grammar]

vidyudvalayakalpāni bhūṣaṇāni viśeṣataḥ |
sarvāṇyetāni karpūraniryāsāgurucandanaiḥ || 20 ||
[Analyze grammar]

ādhūpitāni puṣpaughairvāsitāni samaṃtataḥ |
candanāgurukarpūrakāṣṭhaguggulucūrṇikaiḥ || 21 ||
[Analyze grammar]

ghṛtena madhunā caiva siddho dhūpaḥ praśasyate |
kapilāsambhavenaiva ghṛtenātisugandhinā || 22 ||
[Analyze grammar]

nityaṃ pradīpitā dīpāḥ śastāḥ karpūrasaṃyutāḥ |
pañcagavyaṃ ca madhuraṃ payo dadhi ghṛtaṃ tathā || 23 ||
[Analyze grammar]

kapilāsambhavaṃ śambhoriṣṭaṃ snāne ca pānake |
āsanāni ca bhadrāṇi gajadaṃtamayāni ca || 24 ||
[Analyze grammar]

suvarṇaratnayuktāni citrāṇyāstaraṇāni ca |
mṛdūpadhānayuktāni sūkṣmatūlamayāni ca || 25 ||
[Analyze grammar]

uccāvacāni ramyāṇi śayanāni sukhāni ca |
nadyassamudragāminyā naṭādvāmbhaḥ samāhṛtam || 26 ||
[Analyze grammar]

śītañca vastrapūtaṃ tadviśiṣṭaṃ snānapānayoḥ |
chatraṃ śaśinibhaṃ cāru muktādāmavirājitam || 27 ||
[Analyze grammar]

navaratnacitaṃ divyaṃ hemadaṇḍamanoharam |
cāmare ca site sūkṣme cāmīkarapariṣkṛte || 28 ||
[Analyze grammar]

rājahaṃsadvayākāre ratnadaṃḍopaśobhite |
darpaṇaṃ cāpi susnigdhaṃ divyagandhānulepanam || 29 ||
[Analyze grammar]

samaṃtādratnasañchannaṃ sragvairaiścāpi bhūṣitam |
gambhīraninadaḥ śaṃkho haṃsakuṃdendusannibhaḥ || 30 ||
[Analyze grammar]

āsvapṛṣṭhādideśeṣu ratnacāmīkarācitaḥ |
kāhalāni ca ramyāṇi nānānādakarāṇi ca || 31 ||
[Analyze grammar]

suvarṇanirmitānyeva mauktikālaṃkṛtāni ca |
bherīmṛdaṃgamurajatimicchapaṭahādayaḥ || 32 ||
[Analyze grammar]

samudrakalpasannādāḥ kalpanīyāḥ prayatnataḥ |
bhāṃḍānyapi ca ramyāṇi patrāṇyapi ca kṛtsnaśaḥ || 33 ||
[Analyze grammar]

tadādhārāṇi 1 sarvāṇi sauvarṇānyeva sādhayet |
ālayaṃ ca maheśasya śivasya paramātmanaḥ || 34 ||
[Analyze grammar]

rājāvasathavatkalpyaṃ śilpaśāstroktalakṣaṇam |
uccaprākārasaṃbhinnaṃ bhūdharākāragopuram || 35 ||
[Analyze grammar]

anekaratnasaṃcchannaṃ hemadvārakapāṭakam |
taptajāṃbūnadamayaṃ ratnastambhaśatāvṛtam || 36 ||
[Analyze grammar]

muktādāmavitānāḍhyaṃ vidrumadvāratoraṇam |
cāmīkaramayairdivyairmukuṭaiḥ kumbhalakṣaṇaiḥ || 37 ||
[Analyze grammar]

alaṃkṛtaśirobhāgamastra 2 ājena cihnitam |
rājanyārhanivāsaiśca rājavīthyādiśobhitaiḥ || 38 ||
[Analyze grammar]

procchritaprāṃśuśikharaiḥ prāsādaiśca samaṃtataḥ |
āsthānasthānavaryaiśca sthitairdikṣu vidikṣu ca || 39 ||
[Analyze grammar]

atyantālaṃkṛtaprāṃtamaṃtarāvaraṇairiva |
uttamastrīsahasraiśca nṛtyageyaviśāradaiḥ || 40 ||
[Analyze grammar]

veṇuvīṇāvidagdhaiśca puruṣairbahubhiryutam |
rakṣitaṃ rakṣibhirvīrairgajavājirathānvitaiḥ || 41 ||
[Analyze grammar]

anekapuṣpavāṭībhiranekaiśca sarovaraiḥ |
dīrghikābhiranekābhirdigvidikṣu virājitam || 42 ||
[Analyze grammar]

vedavedāṃtatattvajñaiśśivaśāstraparāyaṇaiḥ |
śivāśramaratairbhaktaiḥ śivaśāstroktalakṣaṇaiḥ || 43 ||
[Analyze grammar]

śāṃtaiḥ smitamukhaiḥ sphītaiḥ sadācāraparāyaṇaiḥ |
śaivairmāheśvaraiścaiva śrīmadbhissevitadvijaiḥ || 44 ||
[Analyze grammar]

evamaṃtarbahirvāthayathāśaktivinirmitaiḥ |
sthāne śilāmaye dāṃte dārave ceṣṭakāmaye || 45 ||
[Analyze grammar]

kevalaṃ mṛnmaye vāpi puṇyāraṇye 'tha vā girau |
nadyāṃ devālaye 'nyatra deśe vātha gṛhe śubhe || 46 ||
[Analyze grammar]

āḍhyo vātha daridro vā svakāṃ śaktimavaṃcayan |
dravyairnyāyārjitaireva bhaktyā devaṃ samarcayet || 47 ||
[Analyze grammar]

athānyāyārjitaiścāpi bhaktyā cecchivamarcayet |
na tasya pratyavāyo 'sti bhāvavaśyo yataḥ prabhuḥ || 48 ||
[Analyze grammar]

nyāyārjitairapi dravyairabhaktyā pūjayedyadi |
na tatphalamavāpnoti bhaktirevātra kāraṇam || 49 ||
[Analyze grammar]

bhaktyā vittānusāreṇa śivamuddiśya yatkṛtam |
alpe mahati vā tulyaṃ phalamāḍhyadaridrayoḥ || 50 ||
[Analyze grammar]

bhaktyā pracoditaḥ kuryādalpavittopi mānavaḥ |
mahāvibhavasāropi na kuryādbhaktivarjitaḥ || 51 ||
[Analyze grammar]

sarvasvamapi yo dadyācchive bhaktivivarjitaḥ |
na tena phalabhāksa syādbhaktirevātra kāraṇam || 52 ||
[Analyze grammar]

na tattapobhiratyugrairna ca sarvairmahāmakhaiḥ |
gacchecchivapuraṃ divyaṃ muktvā bhaktiṃ śivātmakam || 53 ||
[Analyze grammar]

guhyādguhyataraṃ kṛṣṇa sarvatra parameśvare |
śive bhaktirna saṃdehastayā bhakto vimucyate || 54 ||
[Analyze grammar]

śivamaṃtrajapo dhyānaṃ homo yajñastapaḥśrutam |
dānamadhyayanaṃ sarve bhāvārthaṃ nātra saṃśayaḥ || 55 ||
[Analyze grammar]

bhāvahīno narassarvaṃ kṛtvāpi na vimucyate |
bhāvayuktaḥ punassarvamakṛtvāpi vimucyate || 56 ||
[Analyze grammar]

cāṃdrāyaṇasahasraiśca prājāpatyaśataistathā |
māsopavāsaiścānyaiśca śivabhaktasya kiṃ punaḥ || 57 ||
[Analyze grammar]

abhaktā mānavāścāsmiṃlloke giriguhāsu ca |
tapaṃti cālpabhogārthaṃ bhakto bhāvena mucyate || 58 ||
[Analyze grammar]

sāttvikaṃ muktidaṃ karma sattve vai yoginaḥ sthitāḥ |
rājasaṃ siddhidaṃ kuryuḥ karmiṇo rajasāvṛtāḥ || 59 ||
[Analyze grammar]

asurā rākṣasāścaiva tamoguṇasamanvitāḥ |
aihikārthaṃ yajantīśaṃ narāścānye 'pi tādṛśāḥ || 60 ||
[Analyze grammar]

tāmasaṃ rājasaṃ vāpi sāttvikaṃ bhāvameva ca |
āśritya bhaktyā pūjādyaṃ kurvanbhadraṃ samaśnute || 61 ||
[Analyze grammar]

yataḥ pāpārṇavāttrātuṃ bhaktirnauriva nirmitā |
tasmādbhaktyupapannasya rajasā tamasā ca kim || 62 ||
[Analyze grammar]

antyajo vādhamo vāpi mūrkho vā patito 'pi vā |
śivaṃ prapannaścetkṛṣṇa pūjyassarvasurāsuraiḥ || 63 ||
[Analyze grammar]

tasmātsarvaprayatnena bhaktyaiva śivamarcayet |
abhuktānāṃ kvacidapi phalaṃ nāsti yatastataḥ || 64 ||
[Analyze grammar]

vakṣyāmyatirahasyaṃ te śṛṇu kṛṣṇa vaco mama |
vedaiśśāstrairvedavidbhirvicārya suviniścitam || 65 ||
[Analyze grammar]