Chapter 35

[English text for this chapter is available]

vāyuruvāca |
atha sarve pradīptāṃgā vaikuṇṭhaṃ prayayurdrutam |
praṇamyāhuśca tatsarvaṃ haraye devasattamāḥ || 1 ||
[Analyze grammar]

śrutvā teṣāṃ tadā vākyaṃ bhagavānpuruṣottamaḥ |
kimidantviti saṃcintya jñātvā tatkāraṇaṃ ca saḥ || 2 ||
[Analyze grammar]

jagāma mandaraṃ tūrṇaṃ maheśvaradidṛkṣayā |
dṛṣṭvā devaṃ praṇamyaivaṃ provāca sukṛtāṃjaliḥ || 3 ||
[Analyze grammar]

viṣṇuruvāca |
bhagavanbrāhmaṇaḥ kaścidupamanyuriti śrutaḥ |
kṣīrārthamadahatsarvaṃ tapasā tannivāraya || 4 ||
[Analyze grammar]

vāyuruvāca |
iti śrutvā vaco viṣṇoḥ prāha devo maheśvaraḥ |
śiśuṃ nivārayiṣyāmi tattvaṃ gaccha svamāśramam || 5 ||
[Analyze grammar]

tacchrutvā śaṃbhuvacanaṃ sa viṣṇurdevavallabhaḥ |
jagāmāśvāsya tānsarvānsvalokamamarādikān || 6 ||
[Analyze grammar]

etasminnaṃtare devaḥ pinākī parameśvaraḥ |
śakrasya rūpamāsthāya gantuṃ cakre matiṃ tataḥ || 7 ||
[Analyze grammar]

atha jagāma munestu tapovanaṃ gajavareṇa sitena sadāśivaḥ |
saha surāsurasiddhamahoragairamararājatanuṃ svayamāsthitaḥ || 8 ||
[Analyze grammar]

sa vāraṇaścāru tadā vibhuṃ taṃ nivījya vālavyajanena divyam |
dadhāra śacyā sahitaṃ sureṃdraṃ kareṇa vāmena śitātapatram || 9 ||
[Analyze grammar]

rarāja bhagavānsomaḥ śakrarūpī sadāśivaḥ |
tenātapatreṇa yathā candrabiṃbena mandaraḥ || 10 ||
[Analyze grammar]

āsthāyaivaṃ hi śakrasya svarūpaṃ parameśvaraḥ |
jagāmānugrahaṃ kartumupamanyostadāśramam || 11 ||
[Analyze grammar]

taṃ dṛṣṭvā parameśānaṃ śakrarūpadharaṃ śivam |
praṇamya śirasā prāha mahāmunivaraḥ svayam || 12 ||
[Analyze grammar]

upamanyuruvāca |
pāvitaścāśramasso 'yaṃ mama deveśvara svayam |
prāpto yattvaṃ jagannātha bhagavandevasattama || 13 ||
[Analyze grammar]

vāyuruvāca |
evamuktvā sthitaṃ prekṣya kṛtāṃjalipuṭaṃ dvijam |
prāha gaṃbhīrayā vācā śakrarūpadharo haraḥ || 14 ||
[Analyze grammar]

śakra uvāca |
tuṣṭo 'smi te varaṃ brūhi tapasānena suvrata |
dadāmi cepsitānsarvāndhaumyāgraja mahāmune || 15 ||
[Analyze grammar]

vāyuruvāca |
evamuktastadā tena śakreṇa munipuṃgavaḥ |
vārayāmi śive bhaktimityuvāca kṛtāñjaliḥ || 16 ||
[Analyze grammar]

tanniśamya hariḥ 1 prāha māṃ na jānāsi lekhapam |
trailokyādhipatiṃ śakraṃ sarvadevanamaskṛtam || 17 ||
[Analyze grammar]

madbhakto bhava viprarṣe māmevārcaya sarvadā |
dadāmi sarvaṃ bhadraṃ te tyaja rudraṃ ca nirguṇam || 18 ||
[Analyze grammar]

rudreṇa nirguṇenāpi kiṃ te kāryaṃ bhaviṣyati |
devapaṅktibahirbhūto yaḥ piśācatvamāgataḥ || 19 ||
[Analyze grammar]

vāyuruvāca |
tacchrutvā prāha sa munirjapanpañcākṣaraṃ manum |
manyamāno dharmavighnaṃ prāha taṃ kartumāgatam || 20 ||
[Analyze grammar]

upamanyuruvāca |
tvayaivaṃ kathitaṃ sarvaṃ bhavaniṃdāratena vai |
prasaṃgādeva devasya nirguṇatvaṃ mahātmanaḥ || 21 ||
[Analyze grammar]

tvaṃ na jānāmi vai rudraṃ sarvadeveśvareśvaram |
brahmaviṣṇumaheśānāṃ janaka prakṛteḥ param || 22 ||
[Analyze grammar]

sadasadvyaktamavyaktaṃ yamāhurbrahmavādinaḥ |
nityamekamanekaṃ ca varaṃ tasmādvṛṇomyaham || 23 ||
[Analyze grammar]

hetuvādavinirmuktaṃ sāṃkhyayogārthadamparam |
upāsate yaṃ tattvajñā varaṃ tasmādvṛṇomyaham || 24 ||
[Analyze grammar]

nāsti śaṃbhoḥ paraṃ tattvaṃ sarvakāraṇakāraṇāt |
brahmaviṣṇvādidevānāṃ sraṣṭurguṇaparādvibhoḥ || 25 ||
[Analyze grammar]

bahunātra kimuktena mayādyānumitaṃ mahat |
bhavāṃtare kṛtaṃ pāpaṃ śrutā nindā bhavasya cet || 26 ||
[Analyze grammar]

śrutvā niṃdāṃ bhavasyātha tatkṣaṇādeva santyajet |
svadehaṃ tannihatyāśu śivalokaṃ sa gacchati || 27 ||
[Analyze grammar]

āstāṃ tāvanmameccheyaṃ kṣīraṃ prati surādhama |
nihatya tvāṃ śivāstreṇa tyajāmyetaṃ kalevaram || 28 ||
[Analyze grammar]

vāyuruvāca |
evamuktvopamanyustaṃ martuṃ vyavasitassvayam |
kṣīre vāñchāmapi tyaktvā nihantuṃ śakramudyataḥ || 29 ||
[Analyze grammar]

bhasmādāya tadā ghoramaghorāstrābhimaṃtritam |
visṛjya śakramuddiśya nanāda sa munistadā || 30 ||
[Analyze grammar]

smṛtvā śaṃbhupadadvaṃdvaṃ svadehaṃ dugdhumudyataḥ |
āgneyīṃ dhāraṇāṃ bibhradupamanyuravasthitaḥ || 31 ||
[Analyze grammar]

evaṃ vyavasite vipre bhagavānbhaganetrahā |
vārayāmāsa saumyena dhāraṇāṃ tasya yoginaḥ || 32 ||
[Analyze grammar]

tadvisṛṣṭamaghorāstraṃ naṃdīśvaraniyogataḥ |
jagṛhe madhyataḥ kṣiptaṃ nandī śaṃkaravallabhaḥ || 33 ||
[Analyze grammar]

svaṃ rūpameva bhagavānāsthāya parameśvaraḥ |
darśayāmāsa śiprāya bālendukṛtaśekharam || 34 ||
[Analyze grammar]

kṣīrārṇavasahasraṃ ca pīyūṣārṇavameva vā |
dadhyāderarṇavāṃścaiva ghṛtodārṇavameva ca || 35 ||
[Analyze grammar]

phalārṇavaṃ ca bālasya bhakṣya bhojyārṇavaṃ tathā |
apūpānāṃ giriṃ caiva darśayāmāsa sa prabhuḥ || 36 ||
[Analyze grammar]

evaṃ sa dadṛśe devo devyā sārdhaṃ vṛṣopari |
gaṇeśvaraistriśūlādyairdivyāstrairapi saṃvṛtaḥ || 37 ||
[Analyze grammar]

divi duṃdubhayo neduḥ puṣpavṛṣṭiḥ papāta ca |
viṣṇubrahmendrapramukhairdevaiśchannā diśo daśa || 38 ||
[Analyze grammar]

athopamanyurānandasamudrormibhirāvṛtaḥ |
papāta daṇḍavadbhūmau bhaktinamreṇa cetasā || 39 ||
[Analyze grammar]

etasminsamaye tatra sasmito bhagavānbhavaḥ |
ehyehīti tamāhūya mūrdhnyāghrāya dadau varān || 40 ||
[Analyze grammar]

śiva uvāca |
bhakṣyabhojyānyathākāmaṃ bāndhavairbhukṣva sarvadā |
sukhī bhava sadā duḥkhānnirmuktā bhaktimānmama || 41 ||
[Analyze grammar]

upamanyo mahābhāga tavāmbaiṣā hi pārvatī |
mayā putrīkṛto hyadya dattaḥ kṣīrodakārṇavaḥ || 42 ||
[Analyze grammar]

madhunaścārṇavaścaiva dadhyannārṇava eva ca |
ājyaudanārṇavaścaiva phalādyarṇava eva ca || 43 ||
[Analyze grammar]

apūpagirayaścaiva bhakṣyabhojyārṇavastathā |
ete dattā mayā te hi tvaṃ gṛhṇīṣva mahāmune || 44 ||
[Analyze grammar]

pitā tava mahādevo mātā vai jagadambikā |
amaratvaṃ mayā dattaṃ gāṇapatyaṃ ca śāśvatam || 45 ||
[Analyze grammar]

varānvaraya suprītyā mano 'bhilaṣitānparān |
prasanno 'haṃ pradāsyāmi nātra kāryā vicāraṇā || 46 ||
[Analyze grammar]

vāyuruvāca |
evamuktvā mahādevaḥ karābhyāmupagṛhyatam |
mūrdhnyāghrāya sutaste 'yamiti devyai nyavedayat || 47 ||
[Analyze grammar]

devī ca guhavatprītyā mūrdhni tasya karāmbujam |
vinyasya pradadau tasmai kumārapadamavyayam || 48 ||
[Analyze grammar]

kṣīrābdhirapi sākāraḥ kṣīraṃ svādu kare dadhat |
upasthāya dadau piṇḍībhūtaṃ kṣīramanaśvaram || 49 ||
[Analyze grammar]

yogaiśvaryaṃ sadā tuṣṭiṃ brahmavidyāmanaśvarām |
samṛddhiṃ paramāntasmai dadau saṃtuṣṭamānasaḥ || 50 ||
[Analyze grammar]

atha śaṃbhuḥ prasannātmā dṛṣṭvā tasya tapomahaḥ |
punardadau varaṃ divyaṃ munaye hyupamanyave || 51 ||
[Analyze grammar]

vrataṃ pāśupataṃ jñānaṃ vratayogaṃ ca tattvataḥ |
dadau tasmai pravaktṛtvapāṭavaṃ suciraṃ param || 52 ||
[Analyze grammar]

so 'pi labdhvā varāndivyānkumāratvaṃ ca sarvadā |
tasmācchivācca tasyāśca śivāyā mudito 'bhavat || 53 ||
[Analyze grammar]

tataḥ prasannacetaskaḥ supraṇamya kṛtāṃjaliḥ |
yayāce sa varaṃ vipro devadevānmaheśvarāt || 54 ||
[Analyze grammar]

upamanyuruvāca |
prasīda devadeveśa prasīda parameśvara |
svabhaktindehi paramāndivyāmavyabhicāriṇīm || 55 ||
[Analyze grammar]

śraddhāndehi mahādeva dvasambandhiṣu me sadā |
svadāsyaṃ paramaṃ snehaṃ sānnidhyaṃ caiva sarvadā || 56 ||
[Analyze grammar]

evamuktvā prasannātmāharṣagadgadayā girā |
satuṣṭāva mahādevamupamanyurdvijottamaḥ || 57 ||
[Analyze grammar]

upamanyuruvāca |
devadeva mahādeva śaraṇāgatavatsala |
prasīda karuṇāsiṃdho sāmba śaṃkara sarvadā || 58 ||
[Analyze grammar]

vāyuruvāca |
evamukto mahādevaḥ sarveṣāṃ ca varapradaḥ |
pratyuvāca prasannātmopamanyuṃ munisattamam || 59 ||
[Analyze grammar]

śiva uvāca |
vatsopamanyo tuṣṭo 'smi sarvaṃ dattaṃ mayā hi te |
dṛḍhabhakto 'si viprarṣe mayā vijñāsito hyasi || 60 ||
[Analyze grammar]

ajaraścāmaraścaiva bhava tvanduḥkhavarjitaḥ |
yaśasvī tejasā yukto divyajñānasamanvitaḥ || 61 ||
[Analyze grammar]

akṣayā bāndhavāścaiva kulaṃ gotraṃ ca te sadā |
bhaviṣyati dvijaśreṣṭha mayi bhaktiśca śāśvatī || 62 ||
[Analyze grammar]

sānnidhyaṃ cāśrame nityaṃ kariṣyāmi dvijottama |
upakaṃṭhaṃ mama tvaṃ vai sānandaṃ vihariṣyasi || 63 ||
[Analyze grammar]

evamuktvā sa bhagavānsūryakoṭisamaprabhaḥ |
īśānassa varāndattvā tatraivāntardadhe haraḥ || 64 ||
[Analyze grammar]

upamanyuḥ prasannātmā prāpya tasmādvarādvarān |
jagāma jananīsthānaṃ sukhaṃ prāpādhikaṃ ca saḥ || 65 ||
[Analyze grammar]