Chapter 26

[English text for this chapter is available]

devyuvāca |
kathitaṃ tu tvayā deva kālajñānaṃ yathārthataḥ |
kālasya vaṃcanaṃ brūhi yathā tattvena yoginaḥ || 1 ||
[Analyze grammar]

kālastu sannikṛṣṭo hi vartate sarvajaṃtuṣu |
yathā cāsya na mṛtyuśca vaṃcate kālamāgatam || 2 ||
[Analyze grammar]

tathā kathaya me deva prītiṃ kṛtvā mamopari |
yogināṃ ca hitāya tvaṃ brūhi sarvasukhaprada || 3 ||
[Analyze grammar]

|| śaṃkara uvāca |
śṛṇu devi pravakṣyāmi pṛṣṭohaṃ yattvayā śive |
samāsena ca sarveṣāṃ mānuṣāṇāṃ hitārthataḥ || 4 ||
[Analyze grammar]

pṛthivyāpastathā tejo vāyurākāśameva ca |
eteṣāṃ hi samāyogaḥ śarīraṃ pāṃcabhautikam || 5 ||
[Analyze grammar]

ākāśastu tato vyāpī sarveṣāṃ sarvagaḥ sthitaḥ |
ākāśe tu vilīyaṃte saṃbhavaṃti punastataḥ || 6 ||
[Analyze grammar]

viyoge tu sadā kasya svaṃ dhāma pratipedire |
tasyā sthiratā cāsti sannipātasya suṃdari || 7 ||
[Analyze grammar]

jñānino'pi tathā tatra tapomaṃtrabalādapi |
te sarve suvijānaṃti sarvametanna saṃśayaḥ || 8 ||
[Analyze grammar]

devyuvāca |
khaṃ tena yannaśyati ghorarūpaḥ kālaḥ karālastridivaikanāthaḥ |
dagdhastvayā tvaṃ punareva tuṣṭaḥ stotrai stutaḥ svāṃ prakṛtiṃ sa lebhe || 9 ||
[Analyze grammar]

tvayā sa coktaḥ kathayā janānāmadṛṣṭarūpaḥ pracariṣyasīti |
dṛṣṭastvayā tatra mahāprabhāvaḥ prabhorvarātte punarutthitaśca || 10 ||
[Analyze grammar]

tadadya bhoḥ kāla ihāsthi kiṃcinnihanyate yena vadasva tanme |
tvaṃ yogivaryaḥ prabhurātmataṃtraḥ paropakārāttatanurmaheśa || 11 ||
[Analyze grammar]

śaṃkara uvāca |
na hanyate devavaraistu daityaissayakṣarakṣoragamānuṣaiśca |
ye yogino dhyānaparāssadehā bhavaṃti te ghnaṃti sukhena kālam || 12 ||
[Analyze grammar]

sanatkumāra uvāca |
etacchrutvā tribhuvanaguroḥ prāha gaurī vihasya satyaṃ tvaṃ me vada kathamasau hanyate yena kālaḥ |
śambhustāmāha sadyo hi makaravadane yogino ye kṣipaṃti kālavyālaṃ sakalamanaghāstacchṛṇuṣvaikacittā || 13 ||
[Analyze grammar]

śaṅkara uvāca |
paṃcabhūtātmako dehassadāyuktastu tadguṇaiḥ |
utpādyate varārohe tadvilīno hi pārthivaḥ || 14 ||
[Analyze grammar]

ākāśājjāyate vāyurvāyostejaśca jāyate |
tejaso'mbu vinirddiṣṭaṃ tasmāddhi pṛthivī bhavet || 15 ||
[Analyze grammar]

pṛthivyādīni bhūtāni gacchaṃti kramaśaḥ param |
dharā paṃcaguṇā proktā hyāpaścaiva caturguṇāḥ || 16 ||
[Analyze grammar]

triguṇaṃ ca tathā tejo vāyurdviguṇa eva ca |
śabdaikaguṇamākāśaṃ pṛthivyādiṣu kīrtitam || 17 ||
[Analyze grammar]

śabdassparśaśca rūpaṃ ca raso gandhaśca paṃcamaḥ |
vijahāti guṇaṃ svaṃ svaṃ tadā bhūtaṃ vipadyate || 18 ||
[Analyze grammar]

tadā guṇaṃ vigṛhṇāti prādurbhūtaṃ taducyate |
evaṃ jānīhi deveśi paṃcabhūtāni tattvataḥ || 19 ||
[Analyze grammar]

tasmāddhi yoginā nityaṃ svasvakāleṃ'śajā guṇāḥ |
ciṃtanīyāḥ prayatnena devi kālajigīṣuṇā || 20 ||
[Analyze grammar]

devyuvāca |
kathaṃ jejīyyate kālo yogibhiryogavitprabho |
dhyānena cātha mantreṇa tatsarvaṃ kathayasva me || 23 ||
[Analyze grammar]

śaṅkara uvāca |
śṛṇu devi pravakṣyāmi yogināṃ hitakāmyayā |
parajñānaprakathanaṃ na deyaṃ yasya kasyacit || 22 ||
[Analyze grammar]

śraddadhānāya dātavyaṃ bhaktiyuktāya dhīmate |
anāstikāya śuddhāya dharmanityāya bhāmini || 23 ||
[Analyze grammar]

suśvāsena suśayyāyāṃ yogaṃ yuṃjīta yogavit |
dīpaṃ vināṃdhakāre tu prajāḥ supteṣu dhārayet || 24 ||
[Analyze grammar]

tarjanyā pihitau karṇau pīḍayitvā muhūrttakam |
tasmātsaṃśrūyate śabdastudanvahnisamudbhavaḥ || 25 ||
[Analyze grammar]

sandhyāto bhuktamevaṃ hi cāvasannaṃ kṣaṇādapi |
sarvarogānnihatyāśu jvaropadravakānbahūn || 26 ||
[Analyze grammar]

yaścopalakṣayennityairākāraṃ ghaṭikādvayam |
jitvā mṛtyuṃ tathā kāmaṃ svecchayā paryyaṭediha || 27 ||
[Analyze grammar]

sarvajñassarvadarśī ca sarvasiddhimavāpnuyāt |
yathā nadati khe'bdo hi prāvṛḍadbhissusaṃyataḥ || 28 ||
[Analyze grammar]

taṃ śrutvā mucyate yogī sadyaḥ saṃsārabandhanāt |
tatassa yogibhirnnityaṃ sūkṣmātsūkṣmataro bhavet || 29 ||
[Analyze grammar]

eṣa te kathito devi śabdabrahmavidhikramaḥ |
palālamiva dhānyārthī tyajedbandhamaśeṣataḥ || 30 ||
[Analyze grammar]

śabdabrahmatvidaṃ prāpya ye kecidanyakāṃkṣiṇaḥ |
ghnaṃti te muṣṭinākāśaṃ kāmayaṃte kṣudhāṃ tṛṣām || 31 ||
[Analyze grammar]

jñātvā paramidaṃ brahma sukhadaṃ muktikāraṇam |
avāhyamakṣaraṃ caiva sarvopādhivivarjitam || 32 ||
[Analyze grammar]

mohitāḥ kālapāśena mṛtyupāśavaśaṃgatāḥ |
śabdabrahma na jānaṃti pāpinaste kubuddhayaḥ || 33 ||
[Analyze grammar]

tāvadbhavaṃti saṃsāre yāvaddhāma na viṃdate |
vidite tu pare tattve mucyate janmabandhanāt || 34 ||
[Analyze grammar]

nidrālasyaṃ mahā vighnaṃ jitvā śatruṃ prayatnataḥ |
sukhāsane sthito nityaṃ śabdabrahmābhyasanniti || 35 ||
[Analyze grammar]

śatavṛddhaḥ pumāṃllabdhvā yāvadāyussamabhyaset |
mṛtyuñjayavapustambha ārogyaṃ vāyuvarddhanam || 36 ||
[Analyze grammar]

pratyayo dṛśyate vṛddhe kiṃ punastaruṇe jane |
na coṃkāro na mantropi naiva bījaṃ na cākṣaram || 37 ||
[Analyze grammar]

anāhatamanuccāryyaṃ śabdabrahma śivaṃ param |
dhyāyante devi satataṃ sudhiyā yatnataḥ priye || 38 ||
[Analyze grammar]

tasmācchabdā nava proktāḥ prāṇavidbhistu lakṣitāḥ |
tānpravakṣyāmi yatnena nādasiddhimanukramāt || 39 ||
[Analyze grammar]

ghoṣaṃ 1 kāṃsyaṃ 2 tathā śṛṃgaṃ 3 ghaṇṭāṃ 4 vīṇā 5 divaṃśajān || 6 ||
[Analyze grammar]

dundubhiṃ 7 śaṃkhaśabdaṃ 8 tu navamaṃ meghagarjitam 9 || 40 ||
[Analyze grammar]

nava śabdānparityajya tuṃkāraṃ tu samabhyaset |
dhyāyannevaṃ sadā yogī puṇyaiḥ pāpairna lipyate || 41 ||
[Analyze grammar]

na śṛṇoti yadā śṛṇvanyogābhyāsena devike |
mriyatebhyasamānastu yogī tiṣṭheddivāniśam || 42 ||
[Analyze grammar]

tasmādutpadyate śabdo mṛ tsaptabhirdinaiḥ |
sa vai navavidho devi taṃ bravīmi yathārthataḥ |
prathamaṃ nadate ghoṣamātmaśuddhikaraṃ param |
sarvavyādhiharaṃ nādaṃ vaśyākarṣaṇamuttamam || 44 ||
[Analyze grammar]

dvitīyaṃ nādate kāṃsyastambhayetprāṇināṃ gatim |
viṣabhūtagrahānsarvānbadhnīyānnātra saṃśayaḥ || 45 ||
[Analyze grammar]

tṛtīyaṃ nādate śṛṃgamabhicāri niyojayet |
vidviḍuccāṭane śatrormāraṇe ca prayojayet || 46 ||
[Analyze grammar]

ghaṃṭānādaṃ caturtha tu vadate parameśvaraḥ |
ākarṣassarvadevānāṃ kiṃ punarmānuṣā bhuvi || 47 ||
[Analyze grammar]

yakṣagandharvakanyāśca tasyākṛṣṭā dadaṃti hi |
yathepsitāṃ mahāsiddhiṃ yogine kāmato'pi vā || 48 ||
[Analyze grammar]

vīṇā tu paṃcamo nādaḥ śrūyate yogibhissadā |
tasmādutpadyate devi dūrādarśanameva hi || 49 ||
[Analyze grammar]

dhyāyato vaṃśanādaṃ tu sarvatattvaṃ prajāyate |
dundubhiṃ dhyāyamānastu jarāmṛtyuvivarjitaḥ || 50 ||
[Analyze grammar]

śaṃkhaśabdena deveśi kāmarūpaṃ prapadyate |
yogino meghanādena na vipatsaṃgamo bhavet || 51 ||
[Analyze grammar]

yaścaikamanasā nityaṃ tuṃkāraṃ brahmarūpiṇam |
kimasādhyaṃ na tasyāpi yathāmati varānane || 52 ||
[Analyze grammar]

sarvajñassarvadarśī ca kāmarūpī vrajatyasau |
na vikāraiḥ prayujyeta śiva eva na saṃśayaḥ || 53 ||
[Analyze grammar]

etatte parameśāni śabdabrahmasvarūpakam |
navadhā sarvamākhyātaṃ kiṃ bhūyaḥ śrotumicchasi || 54 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ kālavaṃcanavarṇanaṃ nāma ṣaḍviṃśo'dhyāyaḥ || 26 ||
[Analyze grammar]