Chapter 25

[English text for this chapter is available]

vyāsa uvāca |
sanatkumāra sarvajña tvatsakāśānmayā mune |
strīsvabhāvaḥ śrutaḥ prītyā kālajñānaṃ vadasva me || 1 ||
[Analyze grammar]

sanatkumāra uvāca |
idameva purā'pṛcchatpārvatī parameśvaram |
śrutvā nānākathāṃ divyāṃ prasannā supraṇamya tam || 2 ||
[Analyze grammar]

pārvatyuvāca |
bhagavaṃstvatprasādena jñātaṃ me sakalaṃ matam |
yathārcanaṃ tu te deva yairmaṃtraiśca yathāvidhi || 3 ||
[Analyze grammar]

adyāpi saṃśayastvekaḥ kālacakraṃ prati prabho |
mṛtyucihnaṃ yathā deva kiṃ pramāṇaṃ yathāyuṣaḥ || 4 ||
[Analyze grammar]

tathā kathaya me nātha yadyahaṃ tava vallabhā |
iti pṛṣṭastayā devyā pratyuvāca maheśvaraḥ || 5 ||
[Analyze grammar]

|| īśvara uvāca |
satyaṃ te kathayiṣyāmi śāstraṃ sarvottamaṃ priye |
yena śāstreṇa deveśi naraiḥ kālaḥ prabudhyate || 6 ||
[Analyze grammar]

ahaḥ pakṣaṃ tathā māsamṛtuṃ cāyanavatsarau |
sthūlasūkṣmagataiścihnairbahiraṃtargataistathā || 7 ||
[Analyze grammar]

tattehaṃ sampravakṣyāmi śṛṇu tattvena sundari |
lokānāmupakārārthaṃ vairāgyārthamume'dhunā || 8 ||
[Analyze grammar]

akasmātpāṃḍuraṃ dehamūrddhvarāgaṃ samaṃtataḥ |
tadā mṛtyuṃ vijānīyātṣaṇmāsābhyantare priye || 9 ||
[Analyze grammar]

mukhaṃ karṇau tathā cakṣurjihvāstambho yadā bhavet |
tadā mṛtyuṃ vijānīyātṣaṇmāsābhyantare priye || 10 ||
[Analyze grammar]

rauravānugataṃ bhadra dhvaniṃ nākarṇayeddrutam |
ṣaṇmāsābhyaṃtare mṛtyurjñātavyaḥ kālavedibhiḥ || 11 ||
[Analyze grammar]

ravisomāgnisaṃyogādyadodyotaṃ na paśyati |
kṛṣṇaṃ sarvaṃ samastaṃ ca ṣaṇmāsaṃ jīvitaṃ tathā || 12 ||
[Analyze grammar]

vāmahasto yadā devi saptāhaṃ spaṃdate priye |
jīvitaṃ tu tadā tasya māsamekaṃ na saṃśayaḥ || 13 ||
[Analyze grammar]

unmīlayati gātrāṇi tālukaṃ śuṣyate yadā |
jīvitaṃ tu tadā tasya māsamekaṃ na saṃśayaḥ || 14 ||
[Analyze grammar]

nāsā tu sravate yasya tridoṣe pakṣajīvitam |
vaktraṃ kaṃṭhaṃ ca śuṣyeta ṣaṇmāsāṃte gatāyuṣaḥ || 15 ||
[Analyze grammar]

sthūlajihvā bhavedyasya dvijāḥ klidyaṃti bhāmini |
ṣaṇmāsājjāyate mṛtyuścihnaistairupalakṣayet || 16 ||
[Analyze grammar]

aṃbutailaghṛtasthaṃ tu darpaṇe varavarṇini |
na paśyati yadātmānaṃ vikṛtaṃ palameva ca || 17 ||
[Analyze grammar]

ṣaṇmāsāyussa vijñeyaḥ kālacakraṃ vijānatā |
anyacca śṛṇu deveśi yena mṛtyurvibuddhyate || 18 ||
[Analyze grammar]

śirohīnāṃ yadā chāyāṃ svakīyāmupalakṣayet |
athavā chāyayā hīnaṃ māsamekaṃ na jīvati || 19 ||
[Analyze grammar]

āṃgikāni mayoktāni mṛtyucihnāni pārvati |
bāhyasthāni bruve bhadre cihnāni śṛṇu sāṃpratam || 20 ||
[Analyze grammar]

raśmihīnaṃ yadā devi bhavetsomārkamaṇḍalam |
dṛśyate pāṭalākāraṃ māsārde्dhena vipadyate || 21 ||
[Analyze grammar]

aruṃdhatī mahāyānamiṃdulakṣaṇavarjitam |
adṛṣṭatārako yo'sau māsamekaṃ sa jīvati || 22 ||
[Analyze grammar]

dṛṣṭe grahe ca diṅmohaḥ ṣaṇmāsājjāyate dhruvam |
utathyaṃ na dhruvaṃ paśyedyadi vā ravimaṇḍalam || 23 ||
[Analyze grammar]

rātrau dhanuryadāpaśyenmadhyāhne colkapātanam |
veṣṭyate gṛdhrakākaiśca ṣaṇmāsāyurna saṃśayaḥ || 24 ||
[Analyze grammar]

ṛṣayassvargapaṃthāśca dṛśyaṃte naiva cāmbare |
ṣaṇmāsāyurvijanīyātpuruṣaiḥ kālavedibhiḥ || 25 ||
[Analyze grammar]

akasmādrāhuṇā grastaṃ sūryaṃ vā somameva ca |
dikcakraṃ bhrāṃtavatpaśyetṣaṇmāsānmriyate sphuṭam || 26 ||
[Analyze grammar]

nīlābhirmakṣikābhiśca hyakasmādveṣṭyate pumān |
māsamekaṃ hi tasyāyurjñātavyaṃ paramārthataḥ || 27 ||
[Analyze grammar]

gṛdhraḥ kākaḥ kapotaśca śiraścākramya tiṣṭhati |
śīghraṃ tu mriyate jaṃturmāsaikena na saṃśayaḥ || 28 ||
[Analyze grammar]

evaṃ cāriṣṭabhedastu bāhyasthaḥ samudāhṛtaḥ |
mānuṣāṇāṃ hitārthāya saṃkṣepeṇa vadāmyaham || 29 ||
[Analyze grammar]

hastayorubhayordevi yathā kālaṃ vijānate |
vāmadakṣiṇayormadhye pratyakṣaṃ cetyudāhṛtam || 30 ||
[Analyze grammar]

evaṃ pakṣau sthitau dvau tu samāsātsurasuṃdari |
śucirbhūtvā smarandevaṃ susnātassaṃyatendriyaḥ || 31 ||
[Analyze grammar]

hastau prakṣālya dugdhenālaktakena vimardayet |
gaṃdhaiḥ puṣpaiḥ karau kṛtvā mṛgayecca śubhāśubham || 32 ||
[Analyze grammar]

kaniṣṭhāmāditaḥ kṛtvā yāvadaṃguṣṭhakaṃ priye |
parvatrayakrameṇaiva hastayorubhayorapi || 33 ||
[Analyze grammar]

pratipadādivinyasya tithiṃ pratipadāditaḥ |
saṃpuṭākārahastau tu pūrvadiṅmukhasaṃsthitaḥ || 34 ||
[Analyze grammar]

smarennavātmakaṃ maṃtraṃ yāvadaṣṭottaraṃ śatam |
nirīkṣayettato hastau pratiparvaṇi yatnataḥ || 35 ||
[Analyze grammar]

tasminparvaṇi sā rekhā dṛśyate bhṛṃgasannibhā |
tattithau hi mṛtirjñeyā kṛṣṇe śukle tathā priye || 36 ||
[Analyze grammar]

adhunā nādajaṃ vakṣye saṃkṣepātkālalakṣaṇam |
gamāgamaṃ viditvā tu karma kuryāñchṛṇu priye || 37 ||
[Analyze grammar]

ātmavijñānaṃ suśroṇi cāraṃ jñātvā tu yatnataḥ |
kṣaṇaṃ truṭirlavaṃ caiva nimeṣaṃ kāṣṭhakālikam || 38 ||
[Analyze grammar]

muhūrtakaṃ tvahorātraṃ pakṣamāsartuvatsaram |
abdaṃ yugaṃ tathā kalpaṃ mahākalpaṃ tathaiva ca || 39 ||
[Analyze grammar]

evaṃ sa harate kālaḥ paripāṭyā sadāśivaḥ |
vāmadakṣiṇamadhye tu pathi trayamidaṃ smṛtam || 40 ||
[Analyze grammar]

dināni paṃca cārabhya paṃcaviṃśaddināvadhi |
vāmācāragatau nādaḥ pramāṇaṃ kathitaṃ tava || 41 ||
[Analyze grammar]

bhūtaraṃdhradiśaścaiva dhvajaśca varavarṇini |
vāmacāragatau nādaḥ pramāṇaṃ kālavedinaḥ || 42 ||
[Analyze grammar]

ṛtorvikārabhūtāśca guṇāstatraiva bhāmini |
pramāṇaṃ dakṣiṇaṃ proktaṃ jñātavyaṃ prāṇavedibhiḥ || 43 ||
[Analyze grammar]

bhūtasaṃkhyā yadā prāṇānvahaṃte ca iḍādayaḥ |
varṣasyābhyaṃtare tasya jīvitaṃ hi na saṃśayaḥ || 44 ||
[Analyze grammar]

daśaghasrapravāheṇa hyabdamānaṃ sa jīvati |
paṃcadaśapravāheṇa hyabdamekaṃ gatāyuṣam || 45 ||
[Analyze grammar]

viṃśaddinapravāheṇa ṣaṇmāsaṃ lakṣayettadā |
paṃcaviṃśaddinamitaṃ vahate vāmanāḍikā || 46 ||
[Analyze grammar]

jīvitaṃ tu tadā tasya trimāsaṃ hi gatāyuṣaḥ |
ṣaḍviṃśaddinamānena māsadvayamudāhṛtam || 47 ||
[Analyze grammar]

saptaviṃśaddinamitaṃ vahatetyativiśramā |
māsamekaṃ samākhyātaṃ jīvitaṃ vāmagocare || 48 ||
[Analyze grammar]

etatpramāṇaṃ vijñeyaṃ vāmavāyupramāṇataḥ |
savyetare dinānyeva catvāraścānupūrvaśaḥ || 49 ||
[Analyze grammar]

catussthāne sthitā devi ṣoḍaśaitāḥ prakīrtitāḥ |
teṣāṃ pramāṇaṃ vakṣyāmi sāmprataṃ hi yathārthataḥ || 50 ||
[Analyze grammar]

ṣaḍdinānyāditaḥ kṛtvā saṃkhyāyāśca yathāvidhi |
etadaṃtargate caiva vāmaraṃdhre prakāśitam || 51 ||
[Analyze grammar]

ṣaḍdināni yadā rūḍhaṃ dvivarṣaṃ ca sa jīvati |
māsānaṣṭau vijānīyāddinānyaṣṭa ca tāni tu || 52 ||
[Analyze grammar]

prāṇaḥ saptadaśe caiva viddhi varṣaṃ na saṃśayaḥ |
saptamāsānvijānīyāddinaiḥ ṣaḍbhirna saṃśayaḥ || 53 ||
[Analyze grammar]

aṣṭaghasraprabhedena dvivarṣaṃ hi sa jīvati |
caturmāsā hi vijñeyāścaturviṃśaddināvadhiḥ || 54 ||
[Analyze grammar]

yadā navadinaṃ prāṇā vahaṃtyeva trimāsakam |
māsadvayaṃ ca dve māse dinā dvādaśa kīrtitāḥ || 55 ||
[Analyze grammar]

pūrvavatkathitā ye tu kālaṃ teṣāṃ tu pūrvakam |
avāṃtaradinā ye tu tena māsena kathyate || 56 ||
[Analyze grammar]

ekādaśa pravāheṇa varṣamekaṃ sa jīvati |
māsā nava tathā proktā dinānyaṣṭamitānyapi || 57 ||
[Analyze grammar]

dvādaśena pravāheṇa varṣamekaṃ sa jīvati |
māsān sapta vijānīyātṣaḍghasrāṃścāpyudāharet || 58 ||
[Analyze grammar]

nāḍī yadā ca vahati trayodaśadināvadhi |
samvatsaraṃ bhavettasya caturmāsāḥ prakīrtitāḥ || 59 ||
[Analyze grammar]

caturviśaddinaṃ śeṣaṃ jīvitaṃ ca na saṃśayaḥ |
prāṇavāhā yadā vāme caturddaśadināni tu || 60 ||
[Analyze grammar]

samvatsaraṃ bhavettasya māsāḥ ṣaṭ ca prakīrtitāḥ |
caturviṃśaddinānyeva jīvitaṃ ca na saṃśayaḥ || 61 ||
[Analyze grammar]

paṃcadaśapravāheṇa nava māsānsa jīvati |
caturviśaddinānyeva kathitaṃ kālavedibhiḥ || 62 ||
[Analyze grammar]

ṣoḍaśāhapravāheṇa daśamāsānsa jīvati |
caturviśaddinādhikyaṃ kathitaṃ kālavedibhiḥ || 63 ||
[Analyze grammar]

saptadaśapravāheṇa navamāsairgatāyuṣam |
aṣṭādaśadinānyatra kathitaṃ sādhakeśvari || 64 ||
[Analyze grammar]

vāmacāraṃ yadā devi hyaṣṭādaśadināvadhiḥ |
jīvitaṃ cāṣṭamāsaṃ tu ghasrā dvādaśa kīrtitāḥ || 65 ||
[Analyze grammar]

caturviṃśaddinānyatra niścayenāvadhāraya |
prāṇavāho yadā devi trayoviṃśaddināvadhiḥ || 66 ||
[Analyze grammar]

catvāraḥ kathitā māsāḥ ṣaḍdināni tathottare |
caturviṃśapravāheṇa trīnmāsāṃśca sa jīvati || 67 ||
[Analyze grammar]

dinānyatra daśāṣṭau ca saṃharaṃtyeva cārataḥ |
avāṃtaradine yastu saṃkṣepātte prakīrtitaḥ || 68 ||
[Analyze grammar]

vāmacāraḥ samākhyāto dakṣiṇaṃ śṛṇu sāṃpratam |
aṣṭāviṃśapravāheṇa tithimānena jīvati || 69 ||
[Analyze grammar]

pravāheṇa daśāhena tatsaṃsthena vipadyate |
triṃśaddhasrapravāhena pañcāhena vipadyate || 70 ||
[Analyze grammar]

ekatriṃśadyadā devi vahate ca niraṃtaram |
dinatrayaṃ tadā tasya jīvitaṃ hi na saṃśayaḥ || 71 ||
[Analyze grammar]

dvātriṃśatprāṇasaṃkhyā ca yadā hi vahate raviḥ |
tadā tu jīvitaṃ tasya dvidinaṃ hi na saṃśayaḥ || 72 ||
[Analyze grammar]

dakṣiṇaḥ kathitaḥ prāṇo madhyasthaṃ kathayāmi te |
ekabhāgagato vāyupravāho mukhamaṇḍale || 73 ||
[Analyze grammar]

dhāvamānapravāheṇa dinamekaṃ sa jīvati |
cakrame tatparāsorhi purāvidbhirudāhṛtam || 74 ||
[Analyze grammar]

etatte kathitaṃ devi kālacakraṃ gatāyuṣaḥ |
lokānāṃ ca hitārthāya kimanyacchrotumicchasi || 75 ||
[Analyze grammar]

iti śrīśivamahāpurāṇe paṃcamyāmumāsaṃhitāyāṃ kālajñānavarṇanaṃ nāma paṃcaviṃśo'dhyāyaḥ || 25 ||
[Analyze grammar]