Chapter 13

[English text for this chapter is available]

vyāsa uvāca |
bho brahmanbhagavanpūrvaṃ śrutaṃ me brahmaputraka |
jalaṃdharaṃ mahādaityamavadhīcchaṃkaraḥ prabhuḥ || 1 ||
[Analyze grammar]

tattvaṃ vada mahāprājña caritaṃ śaśimaulinaḥ |
vistārapūrvakaṃ śṛṇvankastṛpyettadyaśo'malam || 2 ||
[Analyze grammar]

|| sūta uvāca |
ityevaṃ vyāsasaṃpṛṣṭo brahmaputro mahāmuniḥ |
uvācārthavadavyagraṃ vākyaṃ vākyaviśāradaḥ || 3 ||
[Analyze grammar]

sanatkumāra uvāca |
ekadā jīvaśakrau ca bhaktyā paramayā mune |
darśanaṃ kartumīśasya kailāsaṃ jagmaturbhṛśam || 4 ||
[Analyze grammar]

atha gurvindrayorjñātvāgamanaṃ śaṃkaraḥ prabhuḥ |
parīkṣituṃ tayorjñānaṃ svadarśanaratātmanoḥ || 5 ||
[Analyze grammar]

digambaro'tha tanmārgamāruddhya sadgatissatām |
jaṭābaddhena śiraśātiṣṭhatsaṃśobhitānanaḥ || 6 ||
[Analyze grammar]

atha tau guruśakrau ca kurvaṃtau gamanaṃ mudā |
ālokya puruṣaṃ bhīmaṃ mārgamadhye'dbhutākṛtim || 7 ||
[Analyze grammar]

mahātejasvinaṃ śāṃtaṃ jaṭāsaṃbaddhamastakam |
mahābāhuṃ mahoraskaṃ gauraṃ nayanabhīṣaṇam || 6 ||
[Analyze grammar]

atho puraṃdaro'pṛcchatsvādhikāreṇa durmadaḥ |
puruṣaṃ taṃ svamārgāṃtasthitamajñāya śaṃkaram || 9 ||
[Analyze grammar]

purandara uvāca |
kastvaṃ bhoḥ kuta āyātaḥ kiṃ nāma vada tattvataḥ |
svasthānesaṃsthitaśśaṃbhu kiṃ vānyatra gataḥ prabhuḥ || 10 ||
[Analyze grammar]

sanatkumāra uvāca |
śakreṇetthaṃ sa pṛṣṭastu kiṃcinnovāca tāpasaḥ |
śakraḥ punarapṛcchadvai novāca sa digaṃbaraḥ || 11 ||
[Analyze grammar]

punaḥ puraṃdaro'pṛcchllokānāmadhipeśvaraḥ |
tūṣṇīmāsa mahāyogī līlārūpadharaḥ prabhuḥ || 12 ||
[Analyze grammar]

itthaṃ punaḥ punaḥ pṛṣṭaśśakreṇa sa digambaraḥ |
novāca kiṃcidbhagavāñchakrajñānaparīkṣayā || 13 ||
[Analyze grammar]

atha cukrodha deveśastrailokyaiśvaryagarvitaḥ |
uvāca vacanaṃ caiva taṃ nirbhartsya jaṭādharam || 14 ||
[Analyze grammar]

|| indra uvāca |
re mayā pṛcchyamāno'pi nottaraṃ dattavānasi |
atastvāṃ hanmi vajreṇa kaste trātāsti durmate || 15 ||
[Analyze grammar]

sanatkumāra uvāca |
ityudīrya tato vajrī saṃnirīkṣya krudhā hi tam |
haṃtuṃ digaṃbaraṃ vajramudyataṃ sa cakāra ha || 16 ||
[Analyze grammar]

puraṃdaraṃ vajrahastaṃ dṛṣṭvā devassadāśivaḥ |
cakāra staṃbhanaṃ tasya vajrapātasya śaṃkaraḥ || 17 ||
[Analyze grammar]

tato rudraḥ krudhāviṣṭaḥ karālākṣo bhayaṃkaraḥ |
drutameva prajajvāla tejasā pradahanniva || 18 ||
[Analyze grammar]

bāhupratiṣṭaṃbhabhuvāmanyunāṃtaśśacīpatiḥ |
samadahyata bhogīva maṃtraruddhaparākramaḥ || 19 ||
[Analyze grammar]

dṛṣṭvā bṛhaspatistūrṇaṃ prajvalaṃtaṃ svatejasā |
puruṣaṃ taṃ dhiyā jñātvā praṇanāma haraṃ prabhum || 20 ||
[Analyze grammar]

kṛtāṃjalipuṭo bhūtvā tato gururudāradhīḥ |
natvā ca daṃḍavadbhūmau prabhuṃ stotuṃ pracakrame || 21 ||
[Analyze grammar]

gururuvāca |
namo devādhidevāya mahādevāya cātmane |
maheśvarāya prabhave tryambakāya kapardine || 22 ||
[Analyze grammar]

dīnanāthāya vibhave namoṃ'dhakaniṣūdine |
tripuraghnāya śarvāya brahmaṇe parameṣṭhine || 23 ||
[Analyze grammar]

virūpākṣāya rudrāya bahurūpāya śaṃbhave |
virūpāyātirūpāya rūpātītāya te namaḥ || 24 ||
[Analyze grammar]

yajñavidhvaṃsakartre ca yajñānāṃ phaladāyine |
namaste makharūpāya parakarmapravartine || 25 ||
[Analyze grammar]

kālāṃtakāya kālāya kālabhogidharāya ca |
namaste parameśāya sarvatra vyāpine namaḥ || 26 ||
[Analyze grammar]

namo brahmaśirohaṃtre brahmacaṃdra stutāya ca |
brahmaṇyāya namaste'stu namaste paramātmane || 27 ||
[Analyze grammar]

tvamagniranilo vyoma tvamevāpo vasuṃdharā |
tvaṃ sūryaścandramā bhāni jyotiścakraṃ tvameva hi || 28 ||
[Analyze grammar]

tvameva viṣṇustvaṃ brahmā tatstutastvaṃ pareśvaraḥ |
munayaḥ sanakādyāstvaṃ nāradastvaṃ tapodhanaḥ || 29 ||
[Analyze grammar]

tvameva sarva lokeśastvameva jagadātmakaḥ |
sarvānvayassarvabhinnastvameva prakṛteḥ paraḥ || 30 ||
[Analyze grammar]

tvaṃ vai sṛjasi lokāṃśca rajasā vidhināmabhāk |
sattvena harirūpastvaṃ sakalaṃ yāsi vai jagat || 31 ||
[Analyze grammar]

tvamevāsi mahādeva tamasā hararūpadhṛk |
līlayā bhuvanaṃ sarvaṃ nikhilaṃ pāṃcabhautikam || 32 ||
[Analyze grammar]

tvaddhyānabalatassūryastapate viśvabhāvana |
amṛtaṃ cyavate loke śaśī vāti samariṇaḥ || 33 ||
[Analyze grammar]

tvaddhyānabalato meghāścāṃbu varṣaṃti śaṃkara |
tvaddhyānabalataśśakrastrilokīṃ pāti putravat || 34 ||
[Analyze grammar]

tvaddhyānabalato meghāḥ sarve devā munīśvarāḥ |
svādhikāraṃ ca kurvaṃti cakitā bhavato bhayāt || 35 ||
[Analyze grammar]

tvatpādakamalasyaiva sevanādbhuvi mānavāḥ |
nādriyante surānruda lokaiśvaryaṃ ca bhuṃjate || 36 ||
[Analyze grammar]

tvatpādakamalasyaiva sevanādagamanparām |
gatiṃ yogadhanā nāmapyagamyāṃ sarvadurlabhām || 37 ||
[Analyze grammar]

|| sanatkumāra uvāca |
bṛhaspatiriti stutvā śaṃkaraṃ lokaśaṃkaram |
pādayo pātayāmāsa tasyeśasya puraṃdaram || 38 ||
[Analyze grammar]

pātayitvā ca deveśamiṃdraṃ nata śirodharam |
bṛhaspatiruvācedaṃ praśrayāvanataśśivam || 39 ||
[Analyze grammar]

|| bṛhaspatiruvāca |
dīnanātha mahādeva praṇataṃ tava pādayoḥ |
samuddhara ca śāṃtaṃ svaṃ krodhaṃ nayanajaṃ kuru || 40 ||
[Analyze grammar]

tuṣṭo bhava mahādeva pāhīdra śaraṇāgatam |
agnireva śamaṃ yātu bhālanetrasamudbhavaḥ || 41 ||
[Analyze grammar]

|| sanatkumāra uvāca |
ityākarṇya gurorvākyaṃ devadevo maheśvaraḥ |
uvāca karuṇāsindhurmeghanirhrādayā girā || 42 ||
[Analyze grammar]

maheśvara uvāca |
krodhaṃ ca nissṛte netrāddhārayāmi bṛhaspateḥ |
kathaṃ hi kañcukīṃ sarpassaṃdhatte nojjhitāṃ punaḥ || 43 ||
[Analyze grammar]

sanatkumāra uvācu |
iti śrutvā vacastasya śaṃkarasya bṛhaspatiḥ |
uvāca kliṣṭarūpaśca bhayavyākulamānasaḥ || 44 ||
[Analyze grammar]

bṛhaspatiruvāca |
he deva bhagavanbhaktā anukaṃpyāḥ sadaiva hi |
bhaktavatsalanāmeti tvaṃ satyaṃ kuru śaṃkara || 45 ||
[Analyze grammar]

kṣeptumanyatra deveśa svatejo'tyugramarhasi |
uddhartassarvabhaktānāṃ samuddhara puraṃdaram || 46 ||
[Analyze grammar]

sanatkumāra uvāca |
ityukto guruṇā rudro bhaktavatsalanāmabhāk |
pratyuvāca prasannātmā surejyaṃ praṇatārttihā || 47 ||
[Analyze grammar]

śiva uvāca |
prītaḥ stutyānayā tāta dadāmi varamuttamam |
indrasya jīvadānena jīveti tvaṃ prathāṃ vraja || 48 ||
[Analyze grammar]

samudbhūto'nalo yo'yaṃ bhālanetrātsureśahā |
enaṃ tyakṣyāmyahaṃ dūraṃ yathendraṃ naiva pīḍayet || 49 ||
[Analyze grammar]

|| sanatkumāra uvāc |
ityuktvā taṃ kare dhṛtvā svatejo'nalamadbhutam |
bhālanetrātsamudbhūtaṃ prākṣipallavaṇāṃbhasi || 50 ||
[Analyze grammar]

tataścāṃtardadhe rudro mahālīlākaraḥ prabhuḥ |
guruśakrau bhayānmuktau jagmatuḥ sukhamuttamam || 51 ||
[Analyze grammar]

yadarthaṃ gamanodyuktau darśanaṃ prāpya tasya vai |
kṛtārthau guruśakrau hi svasthānaṃ jagmaturmudā || 52 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ paṃcame yuddhakhaṇḍe jalaṃdharavadhopākhyāne śakrajīvanaṃ nāma trayodaśo' dhyāyaḥ || 13 ||
[Analyze grammar]