Chapter 6

[English text for this chapter is available]

|| brahmovāca |
atha tatra sa gāṃgeyo darśayāmāsa sūtikām |
tāmeva śṛṇu suprītyā nārada tvaṃ svabhaktidām || 1 ||
[Analyze grammar]

dvija eko nāradākhya ājagāma tadaiva hi |
tatrādhvarakaraḥ śrīmāñśaraṇārthaṃ guhasya vai || 2 ||
[Analyze grammar]

sa vipraḥ prāpya nikaṭaṃ kārttikasya prasannadhīḥ |
svābhiprāyaṃ samācakhyau supraṇamya śubhaiḥ stavaiḥ || 3 ||
[Analyze grammar]

|| vipra uvāca |
śṛṇu svāminvaco medya kaṣṭaṃ me vinivāraya |
sarvabrahmāṃḍanāthastvamataste śaraṇaṃ gataḥ || 4 ||
[Analyze grammar]

ajamedhādhvaraṃ kartumāraṃbhaṃ kṛtavānaham |
so'jo gato gṛhānme hi troṭayitvā svabaṃdhanam || 5 ||
[Analyze grammar]

na jāne sa gataḥ kutrā'nveṣaṇaṃ tatkṛtaṃ bahu |
na prāpto'tassa balavān bhaṃgo bhavati me kratoḥ || 6 ||
[Analyze grammar]

tvayi nāthe sati vibho yajñabhaṃgaḥ kathaṃ bhavet |
vicāryyaivā'khileśāna kāma pūrṇaṃ kuruṣva me || 7 ||
[Analyze grammar]

tvāṃ vihāya śaraṇyaṃ kaṃ yāyāṃ śivasuta prabho |
sarvabrahmāṃḍanāthaṃ hi sarvāmarasusevitam || 8 ||
[Analyze grammar]

dīnabaṃdhurdayāsindhussusevyā bhaktavatsalaḥ |
haribrahmādidevaiśca sustutaḥ parameśvaraḥ || 9 ||
[Analyze grammar]

pārvatīnandanasskandaḥ paramekaḥ paraṃtapaḥ |
paramātmā'tmadassvāmī satāṃ ca śaraṇārthinām || 10 ||
[Analyze grammar]

dīnānātha maheśa śaṃkarasuta trailokyanātha prabho māyādhīśa samāgato'smi śaraṇaṃ māṃ pāhi viprapriya |
tvaṃ sarvaprabhupriyaḥ khilavidabrahmādidevaistutastvaṃ māyākṛtirātmabhaktasukhado rakṣāparo māyikaḥ || 11 ||
[Analyze grammar]

bhaktaprāṇaguṇākarastriguṇato bhinnosi śaṃbhupriyaḥ śaṃbhuḥ śaṃbhusutaḥ prasannasukhadassaccitsvarūpo mahān |
sarvajñastripuraghnaśaṃkarasutaḥ satpremavaśyassadā ṣaḍvaktraḥ priyasādhurānatapriyassarveśvara śśaṃkaraḥ |
sādhudrohakaraghna śaṃkaraguro brahmāṃḍanātho prabhuḥ sarveṣāmamarādisevitapado māṃ pāhi sevāpriya || 12 ||
[Analyze grammar]

vairibhayaṃkara śaṃkara janaśaraṇasya vande tava padapadmaṃ sukhakaraṇasya |
vijñaptiṃ mama karṇe skanda nidhehi nijabhaktiṃ janacetasi sadā vidhehi || 13 ||
[Analyze grammar]

karoti kiṃ tasya balī vipakṣo dakṣo'pi pakṣobhayāpārśvaguptaḥ |
kintakṣakopyāmiṣabhakṣako vā tvaṃ rakṣako yasya sadakṣamānaḥ || 14 ||
[Analyze grammar]

vibudhagururapi tvāṃ stotumīśo na hi syātkathaya kathamahaṃ syāṃ maṃdabuddhirvarārcyaḥ |
śuciraśuciranāryo yādṛśastādṛśo vā padakamala parāgaṃ skanda te prārthayāmi || 15 ||
[Analyze grammar]

he sarveśvara bhaktavatsala kṛpāsindho tvadīyo'smyahaṃ bhṛtyassvasya na sevakasya gaṇapasyā'' gaśśataṃ satprabho |
bhaktiṃ kvāpi kṛtāṃ manāgapi vibho jānāsi bhṛtyārtihā |
tvatto nāstyaparo'vitā na bhagavan matto naraḥ pāmaraḥ || 16 ||
[Analyze grammar]

kalyāṇakarttā kalikalmaṣaghnaḥ kuberabandhuḥ karuṇārdracittaḥ |
triṣaṭkanetro rasavaktraśobhī yajñaṃ prapūrṇaṃ kuru me guha tvam || 17 ||
[Analyze grammar]

rakṣakastvaṃ trilokasya śaraṇāgatavatsalaḥ |
yajñakarttā yajñabharttā harase vighnakāriṇām || 18 ||
[Analyze grammar]

vighnavāraṇa sādhūnāṃ sarga kāraṇa sarvataḥ |
pūrṇaṃ kuru mameśāna sutayajña namostu te || 19 ||
[Analyze grammar]

sarvatrātā skanda hi tvaṃ sarvajñātā tvameva hi |
sarveśvarastvamīśāno niveśasakalā'vanaḥ || 20 ||
[Analyze grammar]

saṃgītajñastvamevāsi vedavijñaḥ paraḥ prabhuḥ |
sarvasthātā vidhātā tvaṃ devadevassatāṃ gatiḥ || 21 ||
[Analyze grammar]

bhavānīnandanaśśaṃbhutanayo vayunaḥ svarāṭ |
dhyātā dhyeyaḥ pitṝṇāṃ hi pitā yoniḥ sadātmanām || 22 ||
[Analyze grammar]

|| brahmovāca |
ityākarṇya vacastasya devasamrāṭ śivātmajaḥ |
svagaṇaṃ vīrabāhvākhyaṃ preṣayāmāsa tatkṛte || 23 ||
[Analyze grammar]

tadājñayā vīrabāhustadanveṣaṇahetave |
praṇamya svāminaṃ bhaktyā mahāvīro drutaṃ yayau || 24 ||
[Analyze grammar]

anveṣaṇaṃ cakārāsau sarvabrahmāṇḍagolake |
na prāpa tamajaṃ kutra śuśrāva tadupadravam || 25 ||
[Analyze grammar]

jagāmā'tha sa vaikuṃṭhaṃ tatrā'jaṃ pradadarśa tam |
upadravaṃ prakurvantaṃ galayūpaṃ mahābalam || 26 ||
[Analyze grammar]

dhṛtvā taṃ śṛṃgayo vīro dharṣayitvā tivegataḥ |
ānināya svāmipuro vikurvaṃtaṃ ravaṃ bahu || 27 ||
[Analyze grammar]

dṛṣṭvā taṃ kārtikasso'ramāruroha sa taṃ prabhuḥ |
dhṛtabrahmāṇḍagarimā mahāsūtikaro guhaḥ || 28 ||
[Analyze grammar]

muhūrtamātratasso'jo brahmāṃḍaṃ sakalaṃ mune |
babhrāma śrama evāśu punastatsthānamāgataḥ || 29 ||
[Analyze grammar]

tata uttīrya sa svāmī samuvāsa svamāsanam |
so'jaḥ sthitastu tatraiva sa nārada uvāca tam || 30 ||
[Analyze grammar]

|| nārada uvāca |
namaste deva deveśa dehi me'jaṃ kṛpānidhe |
kuryāmadhvaramānandātsakhāyaṃ kuru māmaho || 31 ||
[Analyze grammar]

|| kārttika uvāca |
vadhayogyo na viprā'jaḥ svagṛhaṃ gaccha nārada |
pūrṇo'stu te'dhvarassarvaḥ prasādādeva me kṛtaḥ || 32 ||
[Analyze grammar]

brahmovāca |
ityākarṇya dvijassvāmī vacanaṃ prītamānasaḥ |
jagāma svālayaṃ dattvā tasmā āśiṣamuttamām || 33 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṃḍe kumārā'dbhutacari tavarṇanaṃ nāma ṣaṣṭho'dhyāyaḥ || 6 ||
[Analyze grammar]