Chapter 7

[English text for this chapter is available]

|| brahmovāca |
haryyādayassurāste ca dṛṣṭvā taccaritaṃ vibhoḥ |
suprasannā babhūvurhi viśvāsāsaktamānasāḥ || 1 ||
[Analyze grammar]

valgaṃtaḥ kurvato nādaṃ bhāvitāśśivatejasā |
kumārante puraskṛtya tārakaṃ haṃtumāyayuḥ || 2 ||
[Analyze grammar]

devānāmudyamaṃ śrutvā tārako'pi mahābalaḥ |
sainyena mahatā sadyo yayau yoddhuṃ surān prati || 3 ||
[Analyze grammar]

devā dṛṣṭvā samāyāṃtaṃ tārakasya mahābalam |
balena bahukurvantaḥ siṃhanādaṃ visismiyuḥ || 4 ||
[Analyze grammar]

tadā nabho''ṅganā vāṇīṃ jagādopari satvaram |
śaṅkarapreritā sadyo haryādīnakhilān surān || 5 ||
[Analyze grammar]

|| vyomavāṇyuvāca |
kumāraṃ ca puraskṛtya surā yūyaṃ samudyatāḥ |
daityānvijitya saṃgrāme jayino'tha bhaviṣyatha || 6 ||
[Analyze grammar]

brahmovāca |
vācaṃ tu khecarīṃ śrutvā devāssarve samutsukāḥ |
vīraśabdān prakurvaṃto nirbhayā hyabhavaṃstadā || 7 ||
[Analyze grammar]

kumāraṃ ca puraskṛtya sarve te jātasādhvasāḥ |
yoddhukāmāssurā jagmurmahīsāgarasaṃgamam || 8 ||
[Analyze grammar]

ājagāma drutaṃ tatra yatra devāssa tārakaḥ |
sainyena mahatā sārddhaṃ surai rbahubhirāvṛt || 9 ||
[Analyze grammar]

raṇaduṃdubhayo neduḥ pralayāṃbudnissvanāḥ |
karkaśāni ca vādyāni parāṇi ca tadāgame || 10 ||
[Analyze grammar]

garjamānāstadā daityāstārakeṇasureṇa ha |
kaṃpayanto bhuvaṃ pādakramairvalgunakārakāḥ || 11 ||
[Analyze grammar]

tacchrutvā ravamatyugraṃ sarve devā vinirbhayāḥ |
aikapadyena cottasthuryoddhukāmāśca tārakam || 12 ||
[Analyze grammar]

gajamāropya devendraḥ kumāraṃ tyagrato'bhavat |
surasainyena mahatā lokapālaissamāvṛtaḥ || 13 ||
[Analyze grammar]

tadā duṃdubhayo nedurbherītūryāṇyanekaśaḥ |
vīṇāveṇumṛdaṃgāni tathā gaṃdharvanissvanāḥ || 14 ||
[Analyze grammar]

gajaṃ dattvā mahendrāya kumāro yānamāruhat |
anekāścaryasaṃbhūtaṃ nānāratnasamanvitam || 15 ||
[Analyze grammar]

vimānamāruhya tadā mahāyaśāssa śāṃkarissarvaguṇairupetaḥ |
śriyā sametaḥ parayā babhau mahān saṃvījyamānaścamarairmahāgrabhaiḥ || 16 ||
[Analyze grammar]

prācetasaṃ chatramatīvasuprabhaṃ ratnairupetaṃ vividhairvirājitam |
dhṛtaṃ tadā tacca kumāramūrdhni vai hyanantacāndraiḥ kiraṇairmahāprabhaiḥ || 17 ||
[Analyze grammar]

militāste tadā sarve devāśśakrapurogamā |
svaiḥsvairbalaiḥ parivṛtā yuddhakāmā mahābalāḥ || 18 ||
[Analyze grammar]

evaṃ devāśca daityāśca yoddhukāmāḥ sthitā bhuvi |
sainyena mahatā tena vyūhaṃ kṛtvā pṛthak pṛthak || 19 ||
[Analyze grammar]

te sene suradaityānāṃ śuśubhāte parasparam |
haṃtukāme tadānyonyaṃ stūyamāne ca bandibhiḥ || 20 ||
[Analyze grammar]

ubhe senaṃ tadā teṣāmagarjetāṃ vanopame |
bhayaṃkare'tyavīrāṇāmitareṣāṃ sukhāvahe || 21 ||
[Analyze grammar]

etasminnantare tatra balonmattāḥ parasparam |
daityā devā mahāvīrā yuyudhuḥ krodhavihvalāḥ || 22 ||
[Analyze grammar]

āsītsutumulaṃ yuddhaṃ devadaityasamākulam |
ruṇḍamuṃḍāṃkitaṃ sarvaṃ kṣaṇena samapadyata || 23 ||
[Analyze grammar]

bhūmau nipatitāstatra śataśo'tha sahasraśaḥ |
nikṛttāṃgā mahāśastrairnihatā vīrasaṃmatāḥ || 24 ||
[Analyze grammar]

keṣāṃcidbāhavaśchinnā khaḍpātaissudāruṇaiḥ |
keṣāṃcidūravaśchinnā vīrāṇāṃ mānināṃ mṛdhe || 25 ||
[Analyze grammar]

kecinmathitasarvāṃgā gadābhirmudgaraistathā |
kecinnirbhinnahṛdayāḥ pāśairbhallaiśca pātitāḥ || 26 ||
[Analyze grammar]

kecidvidāritāḥ pṛṣṭhe kuṃtairṛṣṭibhiraṃkuśaiḥ |
chinnānyapi śirāṃsyeva patitāni ca bhūtale || 27 ||
[Analyze grammar]

bahūni ca kabaṃdhāni nṛtyamānāni tatra vai |
valgamānāni śataśo udyatāstrakarāṇi ca || 28 ||
[Analyze grammar]

nadyaḥ pravartitāstatra śataśo'sṛṅvahāstadā |
bhūtapretādayastatra śataśaśca samāgatāḥ || 29 ||
[Analyze grammar]

gomāyavaśśivā tatra bhakṣayantaḥ palaṃ bahu |
tathā gṛdhravaṭāśyenā vāyasā māṃsabhakṣakāḥ |
bubhujuḥ patitānāṃ ca palāni subahūni vai || 30 ||
[Analyze grammar]

etasminnantare tatra tārakākhyo mahābalaḥ |
sainyena mahatā sadyo yayau yoddhuṃ surān prati || 31 ||
[Analyze grammar]

devā dṛṣṭvā samāyāntaṃ tārakaṃ yuddhadurmadam |
yoddhukāmaṃ tadā sadyo yayuśśakrādayastadā |
babhūvātha mahonnādassenayorubhayorapi || 32 ||
[Analyze grammar]

athābhūddvaṃdvayuddhaṃ hi surāsuravimardanam |
yaṃ dṛṣṭvā harṣitā vīrāḥ klībāśca bhayamāgatā || 33 ||
[Analyze grammar]

tārako yuyudhe yuddhe śakreṇa ditijo balī |
agninā saha saṃhrādo jaṃbhenaiva yamaḥ svayam || 34 ||
[Analyze grammar]

mahāprabhurnairṛtena pāśī saha balena ca |
suvīro vāyunā sārdhaṃ pavamānena guhyarāṭ || 35 ||
[Analyze grammar]

īśānena samaṃ śaṃbhuryuyudhe raṇavittamaḥ |
śuṃbhaśśeṣeṇa yuyudhe kuṃbhaścandreṇa dānavaḥ || 36 ||
[Analyze grammar]

kuṃbaro mihireṇājau mahābala parākramaḥ |
yuyudhe paramāstraiśca nānāyuddhaviśāradaḥ || 37 ||
[Analyze grammar]

evaṃ dvandvena yuddhena mahatā ca surāsurāḥ |
saṃgare yuyudhussarve balena kṛtaniśca yāḥ || 38 ||
[Analyze grammar]

anyonyaṃ sparddhamānāste'marā daityā mahābalāḥ |
tasmindevāsure yuddhe durjayā abhavanmune || 39 ||
[Analyze grammar]

tadā ca teṣāṃ suradānavānāṃ babhūva yuddhaṃ tumulaṃ jayaiṣiṇām |
sukhāvahaṃ vīramanasvināṃ vai bhayāvahaṃ caiva tathetareṣām || 40 ||
[Analyze grammar]

mahī mahāraudratarā vinaṣṭakaissurāsurairvai patitairanekaśaḥ |
tasminnagamyātibhayānakā tadā jātā mahāsaukhyavahā manasvinām || 41 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ caturthe kumārakhaṇḍe yuddhaprāraṃbhavarṇanaṃ nāma saptamo'dhyāyaḥ || 7 ||
[Analyze grammar]