Chapter 33

[English text for this chapter is available]

|| ṛṣaya ūcuḥ |
jagatpitā śivaḥ prokto jaganmātā śivā matā |
tasmāddeyā tvayā kanyā śaṃkarāya mahātmane || 1 ||
[Analyze grammar]

evaṃ kṛtvā himagire sārthakaṃ te bhavejjanuḥ |
jagadgurorgurustvaṃ hi bhaviṣyasi na saṃśayaḥ || 2 ||
[Analyze grammar]

|| brahmovāca |
evaṃ vacanamākarṇya saptarṣīṇāṃ munīśvara |
praṇamya tānkarau baddhvā girirājo'bravīdidam || 3 ||
[Analyze grammar]

himālaya uvāca |
saptarṣayo mahābhāgā bhavadbhiryadudīritam |
tatpramāṇīkṛtaṃ me hi puraiva giriśecchayā || 4 ||
[Analyze grammar]

idānīmeka āgatya vipro vaiṣṇavadharmavān |
śivamuddiśya suprītyā viparītaṃ vaco'bravīt || 5 ||
[Analyze grammar]

tadārabhya śivāmātā jñānabhraṣṭā babhūva ha |
sutāvivāhaṃ rudreṇa yoginā tena necchati || 6 ||
[Analyze grammar]

kopāgāramagātsā hi sutaptā malināmbarā |
kṛtvā mahāhaṭhaṃ viprā bodhyamānāpi'nābudhat || 7 ||
[Analyze grammar]

ahaṃ ca jñānavibhraṣṭo jātohaṃ satyamīryyate |
dātuṃ sutāṃ maheśāya necchāmi bhikṣurūpiṇe |
brahmovāca||ityuktvā śailarājastu śivamāyāvimohitaḥ |
tūṣṇīṃ babhūva tatrastho munīnāṃ madhyato mune || 9 ||
[Analyze grammar]

sarve saptarṣayaste hi śivamāyāṃ praśasya vai |
preṣayāmāsuratha tāṃ menakāṃ pratyarundhatīm || 10 ||
[Analyze grammar]

atha patyussamādāya nideśaṃ jñānadā hi sā |
jagāmārundhatī tūrṇaṃ yatra menā ca pārvatī || 11 ||
[Analyze grammar]

gatvā dadarśa menāṃ tāṃ śayānāṃ śokamūrcchitām |
uvāca madhuraṃ sādhvī sāvadhānā hitaṃ vacaḥ || 12 ||
[Analyze grammar]

arundhatyuvāca |
uttiṣṭha menake sādhvi tvadgṛhe'hamarundhatī |
āgatā munayaścāpi saptāyātāḥ kṛpālavaḥ || 13 ||
[Analyze grammar]

brahmovāca |
arundhatīsvaraṃ śrutvā śīghramutthāya menakā |
uvāca śirasā natvā tāṃ padmāmiva tejasā || 14 ||
[Analyze grammar]

menovāca |
ahodya kimidaṃ puṇyamasmākaṃ puṇyajanmanām |
vadhūrjagadvidheḥ patnī vasiṣṭhasyāgateha vai || 15 ||
[Analyze grammar]

kimarthamāgatā devi tanme brūhi viśeṣataḥ |
ahaṃ dāsīsamā te hi sasutā karuṇāṃ kuru || 16 ||
[Analyze grammar]

brahmovāca |
ityuktvā menakāṃ sādhvī bodhayitvā ca tāṃ bahu |
tathāgatā ca suprītyā sāste yatrarṣayo'pi te || 17 ||
[Analyze grammar]

atha śaileśvaraṃ te ca bodhayāmāsurādarāt |
smṛtvā śivapadadvandvaṃ sarve vākyaviśāradāḥ || 18 ||
[Analyze grammar]

ṛṣaya ūcuḥ |
śailendra śrūyatāṃ vākyamasmākaṃ śubhakāraṇam |
śivāya pārvatīṃ dehi saṃharttuḥ śvaśuro bhava || 19 ||
[Analyze grammar]

ayācitāraṃ sarveśaṃ prārthayāmāsa yatnataḥ |
tārakasya vināśāya brahmāsambaṃdhakarmmaṇi || 20 ||
[Analyze grammar]

notsuko dārasaṃyoge śaṃkaro yogināṃ varaḥ |
vidheḥ prārthanayā devastava kanyāṃ grahīṣyati || 21 ||
[Analyze grammar]

duhituste tapastaptaṃ pratijñānaṃ cakāra sā |
hetudvayena yogīndro vivāhaṃ ca kariṣyati || 22 ||
[Analyze grammar]

brahmovāca |
ṛṣīṇāṃ vacanaṃ śrutvā prahasya sa himālayaḥ |
uvāca kiñcidbhītastu paraṃ vinayapūrvakam || 23 ||
[Analyze grammar]

himālaya uvāca |
śivasya rājasāmagrīṃ na hi paśyāmi kāñcana |
kañcidāśrayamaiśvaryaṃ kaṃ vā svajanabāndhavam || 24 ||
[Analyze grammar]

necchāmyati vinirliptayogine svāṃ sutāmaham |
yūyaṃ vedavidhātuśca putrā vadata niścitam || 25 ||
[Analyze grammar]

varāyānanurūpāya pitā kanyāṃ dadāti cet |
kāmānmohādbhayāllobhātsa naṣṭo narakaṃ yajet || 26 ||
[Analyze grammar]

na hi dāsyāmyahaṃ kanyāmicchayā śūlapāṇaye |
yadvidhānaṃ bhavedyogyamṛṣayasta dvidhīyatām || 27 ||
[Analyze grammar]

brahmovāca |
ityākarṇya vacastasya himāgasya munīśvara |
pratyuvāca vasiṣṭhastaṃ teṣāṃ vākyaviśārada || 28 ||
[Analyze grammar]

vasiṣṭha uvāca |
śṛṇu śaileśa madvākyaṃ sarvathā te hitāvaham |
dharmāviruddhaṃ satyaśca paratreha mudāvaham || 29 ||
[Analyze grammar]

vacanaṃ trividhaṃ śaila laukike vaidike'pi ca |
sarvaṃ jānāti śāstrajño nirmalajñānacakṣuṣā || 30 ||
[Analyze grammar]

asatyamahitaṃ paścātsāṃprataṃ śrutisundaram |
subuddhirvakti śatrurhi hitaṃ naiva kadācana || 31 ||
[Analyze grammar]

ādāvaprītijanakaṃ pariṇāme sukhāvaham |
dayālurdhamaśīlo hi bodhayatyeva bāṃdhavaḥ || 32 ||
[Analyze grammar]

śrutimātrātsudhātulyaṃ sarvakālasukhāvaham |
satyasāraṃ hitakaraṃ vacanaṃ śreṣṭhamīpsitam || 33 ||
[Analyze grammar]

evañca trividhaṃ śaila nītiśāstroditaṃ vacaḥ |
kathyatāṃ triṣu madhye kiṃ bruve vākyaṃ tvadīpsitam || 34 ||
[Analyze grammar]

brāhmasampadvihīnaśca śaṃkarastridaśeśvaraḥ |
tattvajñānasamudreṣu sannimagnaikamānasaḥ || 35 ||
[Analyze grammar]

jñānānandasyeśvarasya brāhmavastuṣu kā spṛhā |
gṛhī dadāti svasutāṃ rājyasampattiśāline || 36 ||
[Analyze grammar]

kanyakāṃ duḥkhine dattvā kanyāghātī bhavetpitā |
ko veda śaṃkaro duḥkhī kubero yasya kiṃkaraḥ || 37 ||
[Analyze grammar]

bhrūbhaṅgalīlayā sṛṣṭiṃ sraṣṭuṃ harttuṃ kṣamo hi saḥ |
nirguṇaḥ paramātmā ca pareśaḥ prakṛteḥ paraḥ || 38 ||
[Analyze grammar]

yasya ca trividhā mūrttirvidhā tussṛṣṭikarmaṇi |
sṛṣṭisthityantajananī brahmaviṣṇuharābhidhā || 39 ||
[Analyze grammar]

brahmā ca brahmalokastho viṣṇuḥ kṣīrodavāsakṛt |
haraḥ kailāsanilayaḥ sarvāḥ śivavibhūtayaḥ || 40 ||
[Analyze grammar]

dhatte ca trividhā mūrtī prakṛtiḥ śivasambhavā |
aṃśena līlayā sṛṣṭau kalayā bahudhā api || 41 ||
[Analyze grammar]

mukhodbhavā svayaṃ vāṇī vāgadhiṣṭhātṛdevatā |
vakṣaḥsthalodbhavā lakṣmīssarvasampatsvarūpiṇī || 42 ||
[Analyze grammar]

śivā tejassu devānāmāvirbhāvaṃ cakāra sā |
nihatya dānavānsarvāndevebhyaśca śriyaṃ dadau || 43 ||
[Analyze grammar]

prāpa kalpāntare janma jaṭhare dakṣa yoṣitaḥ |
nāmnā satī haraṃ prāpa dakṣastasmai dadau ca tām || 44 ||
[Analyze grammar]

dehaṃ tatyāja yogena śrutvā sā bhartṛnindanam |
sādya tvattastu menāyāṃ jajñe jaṭharataśśivā || 45 ||
[Analyze grammar]

śivā śivasya patnīyaṃ śaila janmanijanmani |
kalpekalpe buddhirūpā jñānināṃ jananī parā || 46 ||
[Analyze grammar]

jāyate sma sadā siddhā siddhidā siddhirūpiṇī |
satyā asthi citābhasma bhaktyā dhatte harassvayam || 47 ||
[Analyze grammar]

atastvaṃ svecchayā kanyāṃ dehi bhadrāṃ harāya ca |
athavā sā svayaṃ kāntasthāne yāsyatyadāsyasi || 48 ||
[Analyze grammar]

kṛtvā pratijñāṃ deveśo dṛṣṭvā kleśamasaṃkhyakam |
duhituste tapaḥsthānamājagāma dvijātmakaḥ || 49 ||
[Analyze grammar]

tāmāśvāsya varaṃ dattvā jagāma nijamandiram |
tatprārthanāvaśācchambhuryayāce tvāṃ śivāṃ gire || 50 ||
[Analyze grammar]

aṃgīkṛtaṃ yuvābhyāṃ tacchivabhaktiratātmanā |
viparītamatirjātā vada kasmādgirīśvara || 51 ||
[Analyze grammar]

tadgatvā prabhuṇā deva prārthitena tvadantikam |
prasthāpitā vayaṃ śīghraṃ hyṛṣayassāpyarundhatī || 52 ||
[Analyze grammar]

śikṣayāmo vayaṃ tvā hi dattvā rudrāya pārvatīm |
evaṃkṛte mahānando bhaviṣyati gire tava || 53 ||
[Analyze grammar]

śivāṃ śivāya śailendra svecchayā cenna dāsyasi |
bhavitā tadvivāho'tra bhavitavyabalena hi || 54 ||
[Analyze grammar]

varaṃ dadau śivāyai sa tapantyai tāta śaṃkaraḥ |
nahīśvarapratijñātaṃ viparītāya kalpate || 55 ||
[Analyze grammar]

aho pratijñā durlaṃghyā sādhūnāmīśavartinām |
sarveṣāṃ jagatāṃ madhye kimīśasya punargire || 56 ||
[Analyze grammar]

eko mahendraśśailānāṃ pakṣāṃściccheda līlayā |
pārvatī līlayā merośśṛṅgabhaṅgaṃ cakāra ca || 57 ||
[Analyze grammar]

ekārthe nahi śaileśa nāśyāssarvā hi sampadaḥ |
ekaṃ tyajetkulasyārthe śrutireṣā sanātanī || 58 ||
[Analyze grammar]

dattvā viprāya svasutāmanaraṇyo nṛpeśvara |
brāhmaṇādbhayamāpanno rarakṣa nijasampadam || 59 ||
[Analyze grammar]

tamāśu bodhayāmāsurnītiśāstravido janāḥ |
brahmaśāpādvibhītāśca guravo jñātisattamāḥ || 60 ||
[Analyze grammar]

śailarāja tvamapyeva sutāṃ dattvā śivāya ca |
rakṣa sarvānbaṃdhuvargānvaśaṃ kuru surānapi || 61 ||
[Analyze grammar]

brahmovāca |
ityākarṇya vasiṣṭhasya vacanaṃ sa praha sya ca |
papraccha nṛpavārttāśca hṛdayena vidūyatā || 62 ||
[Analyze grammar]

himālaya uvāca |
kasya vaṃśodbhavo brahmannanaraṇyo nṛpaścasaḥ |
sutāṃ dattvā sa ca kathaṃ rarakṣākhilasampadaḥ || 63 ||
[Analyze grammar]

brahmovāca |
iti śrutvā vasiṣṭhastu śailavākyaṃ prasannadhīḥ |
provāca giraye tasmai nṛpavārttā sukhāvahām || 64 ||
[Analyze grammar]

iti śrīśivamahāpurāṇe dvitīyāyāṃ rudrasaṃhitāyāṃ tṛtīye pārvatīkhaṇḍe girisāṃtvanonāma trayastriṃśo'dhyāyaḥ || 33 ||
[Analyze grammar]