Chapter 213

[English text for this chapter is available]

nārada uvāca |
etanmadhuvanaṃ tāta śive paramapāvanam |
devarājāya tuṣṭena sthāpitā viṣṇunā purī || 1 ||
[Analyze grammar]

atra viśrāṃtināmedaṃ tīrthaṃ tribhuvanottamam |
vividāṃ muktidaṃ puṃsāṃ pavanaṃ sādhusevitam || 2 ||
[Analyze grammar]

nityaṃ vasati viśvātmā viṣṇuḥ śrīkolarūpadhṛk |
atra tīrthottame puṇye nṛpaviśrāṃtisaṃjñake || 3 ||
[Analyze grammar]

bahubhirjanmabhiryena viṣṇurārādhitaḥ sadā |
maraṇaṃ tasya tīrthe'sminjāyate kila bhūpate || 4 ||
[Analyze grammar]

kāliṃdyā eva kūle tu dvitīyaṃ hariṇā kṛtam |
tīrthe viśrāṃtisaṃjñaṃ tu yatra kaṃso nipātitaḥ || 5 ||
[Analyze grammar]

etaddvayaṃ samaṃ rājanguṇairvaikuṃṭhadātṛbhiḥ |
bhāgyodayena kenāpi labhyate sakalārthadam || 6 ||
[Analyze grammar]

atha tīrthasya māhātmyaṃ kathayāmi tavāgrataḥ |
yacchrutvā sarvatīrtheṣu majjanāllapsyase phalam || 7 ||
[Analyze grammar]

himācalopatyakāyāṃ kirātanagare śubhe |
brāhmaṇo nāma kuśalo rājannāsīddaridrataḥ || 8 ||
[Analyze grammar]

tasya patnī durācārā durācāranare ratā |
karmaṇā mohayāmāsa patiṃ sā baṃdhakī varā || 9 ||
[Analyze grammar]

patistayā mohitastu na nivārayituṃ kṣamaḥ |
tadājñā tatparo dīnaḥ krayakrītaivābhavat || 10 ||
[Analyze grammar]

lokā upaharaṃti sma taṃ dvijaṃ kulaṭāpatim |
upahāsabhayātso'pi niryayau na gṛhāt kudhīḥ || 11 ||
[Analyze grammar]

mahārhāṇi dukūlāni bhūṣaṇāni ca sā dadhau |
jārairdattāni duṣṭātmā hasitāpi na lajjate || 12 ||
[Analyze grammar]

vastraṃ purātanaṃ dāsyāduttīrṇaṃ yaccharīrataḥ |
avajñāpūrvakaṃ duṣṭā svabhartre saṃprayacchati || 13 ||
[Analyze grammar]

evaṃ tayā kulaṭayā so'vajñātaṃ svakaḥ patiḥ |
nitāṃtaṃ duḥkhamāpanno viṣamattvāmṛto niśi || 14 ||
[Analyze grammar]

sā bhītā rājataḥ pāpā hyanayātsvairiṇī tadā |
anuyāsyāmi bharttāramityuvāca mṛṣā vacaḥ || 15 ||
[Analyze grammar]

tayaivaṃ śikṣitā sakhyaḥ svakīyastāṃ samīpagāḥ |
nivārayāmāsuriti kathayitvā mahīpateḥ || 16 ||
[Analyze grammar]

sakhya ūcuḥ |
bho mṛgākṣi kimarthaṃ te kriyate'nartha īdṛśa |
yatsuvarṇanibhaṃ kāyaṃ tvaṃ nāśayitumudyatā || 17 ||
[Analyze grammar]

bhavatyā kiṃ sukhaṃ dṛṣṭamamuṣyā vyavasāyinaḥ |
daridrasyāsamarthasya sakhi svodarapūriṇaḥ || 18 ||
[Analyze grammar]

pālayainaṃ sutaṃ bālaṃ tvadṛte ko'sya pālakaḥ |
mariṣyāmo vayaṃ sarvā mṛtāyāṃ tvayi suṃdari || 19 ||
[Analyze grammar]

gṛhametadavekṣasva samuttiṣṭhavarānane |
jīyādayaṃ tava sutoyastrībhāvisukhapradaḥ || 20 ||
[Analyze grammar]

vāṃchaṃti bāṃdhavāḥ sarve tvadīyāstava jīvitam |
uttiṣṭha nijabaṃdhūnāṃ kuru cittaṃ samīhitam || 21 ||
[Analyze grammar]

rudaṃti tava rāgeṇa vayasyāḥ sakalāḥ sati |
nijavākyapradānena vārayaitāḥ suduḥkhitāḥ || 22 ||
[Analyze grammar]

nārada uvāca |
ityākarṇya vacastāsāṃ duṣṭā sā dharmaviśrutam |
unnamayya mukhaṃ prāha śrāvayaṃtī svabāṃdhavān || 23 ||
[Analyze grammar]

sakhyuvāca |
yuṣmābhiryadvaco dharmaṃ proktaṃ jāne ṛtaṃ nanu |
tathāpi svapatiḥ strībhirmānyo lokadvayapradaḥ || 24 ||
[Analyze grammar]

yaducyate mayā vākyaṃ dharmaśāstrasamanvitam |
tadvacaḥ śrūyatāṃ sakhyo yuktaṃ cedanumodata || 25 ||
[Analyze grammar]

yā strī nidhanamāpannaṃ patimanveti tatparā |
pāpāpi saha tenaiva svarge vasati sā ciram || 26 ||
[Analyze grammar]

strībhiḥ patirna hātavyo nirdhano rogavānapi |
jīvanmṛto'nugaṃtavyaḥ śrutireṣā sanātanī || 27 ||
[Analyze grammar]

viciṃtyeti svamanasi sakhyonvemi svakaṃ patim |
vartiṣyate svabhāgyena kariṣye'haṃ kimasya vai || 28 ||
[Analyze grammar]

nārada uvāca |
ityuktāstāstayā sakhyo duṣṭā duṣṭamatipradāḥ |
ūcustāṃ dharmavākyena samastajanamohinīm || 29 ||
[Analyze grammar]

sakhya ūcuḥ |
jahi pūrvaṃ hi naḥ subhru paścādanvehi vallabhe |
samastāstvadviyogaṃ na vayaṃ soḍhuṃ kṣamāmahe || 30 ||
[Analyze grammar]

asmāṃstava vinighnaṃtyā anuyāṃtyāḥ svakaṃ patim |
dharmo'lpapāpabāhulyaṃ svargaprāptistu kīdṛśī || 31 ||
[Analyze grammar]

jīvannayaṃ patiḥ svīyaḥ sādhvayaṃ pratipālitaḥ |
yaduktaṃ patipatnībhyāṃ tattvayā vihitaṃ sakhī || 32 ||
[Analyze grammar]

yāvatsvajīvanopāyaṃ vidhātumayamakṣamaḥ |
tāvattvadīyabhāgyena jīviṣyati sutastava || 33 ||
[Analyze grammar]

nārada uvāca |
ityuktā sā nivavṛte svabhartturanuyānataḥ |
sutena kārayāmāsa tadā tadviratikriyām || 34 ||
[Analyze grammar]

atha kālena kiyatā sutopanayane matim |
kārayāmāsa sā viprairdattvā jārārpitaṃ dhanam || 35 ||
[Analyze grammar]

kṛtopanayanaḥ kuṃḍaḥ sa tattvajñānavānśiśuḥ |
gṛhānnirgamya sapadi nārāyaṇaparo'bhavat || 36 ||
[Analyze grammar]

satāṃ saṃgatimāsādya tyaktvā svaṃ prākṛtaṃ vapuḥ |
āruroha nijaṃ lokamaprāpyaṃ yogibhiśca tat || 37 ||
[Analyze grammar]

atha sā nirgate putre mano duḥkhaṃ cakāra vai |
tasminneva dine rājanbhūyo jāraiḥ sahāramat || 38 ||
[Analyze grammar]

iti tai ramamāṇāyāṃ tasyāṃ jāraiḥ samaṃ nṛpa |
samāgatā jarā kāle lāvaṇyamadanāśinī || 39 ||
[Analyze grammar]

tyaktopapatibhirdṛṣṭā sā jarāgrastavigrahā |
babhūva dūtikānyāsaṃ kulaśīlavināśinī || 40 ||
[Analyze grammar]

tadā hyekasya viprasya savatsāṃ gāmapāharat |
vikrītā kiyatā rājandravyeṇa nanu sā tayā || 41 ||
[Analyze grammar]

tayeti gamitaḥ kālo dūtitvena kiyānnṛpa |
paścācchuṣkaraśarīro'syā viguṇaḥ samajāyata || 42 ||
[Analyze grammar]

tasyāḥ kuṣṭhe samutpanne galitaṃ hyaṃgapaṃcakam |
hastau pādau ca nṛpate paṃcamā nāsikā tadā || 43 ||
[Analyze grammar]

evaṃbhūtā yadāhāraṃ na labheta kutaścana |
tadā tu tatroditayā dāsyā sā nīyatā paṇam || 44 ||
[Analyze grammar]

tatra sā patitā pāpā lokānsaṃprārthya dīnayā |
girā dhigiti kurvāṇā cakre svodarapūraṇam || 45 ||
[Analyze grammar]

tadihābhyāsavarttye ko dvijaḥ sarvāgamārthavit |
tāṃ vilokya mahāvāgmī provācedaṃ vaco nṛpa || 46 ||
[Analyze grammar]

janānāṃ duḥkhadaṃ pāpamihaloke paratra ca |
tasmātpāpaṃ na karttavyaṃ mānavairduḥkhabhīrubhiḥ || 47 ||
[Analyze grammar]

pāpaṃ kṛtvā jano yastu prāyaścittaṃ karoti vai |
na tadācarite bhūyo na tatphalamavāpnuyāt || 48 ||
[Analyze grammar]

yaḥ kṛtvā muhurenāṃsi prāyaścittaṃ karoti na |
tasyāsyā iva pāpāyā gatiratra paratra ca || 49 ||
[Analyze grammar]

anayā pāpasaṃghāto loke'tra samupārjitaḥ |
ihaiva tatphalaṃ bhuṃkte bhokṣyate narake'pyasau || 50 ||
[Analyze grammar]

sarvaśāstreṣu dṛṣṭaṃ vai sarveṣāṃ pāpakarmaṇām |
prāyaścittaṃ na ca strīṇāṃ vinmukhānāṃ tu karmaṇaḥ || 51 ||
[Analyze grammar]

nārada uvāca |
ityuktvā sa dvijaśreṣṭho namaskṛtya raviṃ yayau |
viṣṇuṃ saṃsmṛtya saṃsmṛtya bhītastadavalokanāt || 52 ||
[Analyze grammar]

evaṃ sā duḥkhamāpannā bhuṃjānā karmaṇaḥ phalam |
arjitasya svayaṃ rājanmṛtā katipayairdinaiḥ || 53 ||
[Analyze grammar]

na tasyā agnisaṃskāraḥ saṃjātaḥ pāpakarmaṇaḥ |
ākṛṣya keśe sā nītā śvapacairnagarādbahiḥ || 54 ||
[Analyze grammar]

maraṇāvasare tasyā yamabhṛtyāḥ samāgatāḥ |
prāpapya yātanādehaṃ tāṃ ninyurbhāskareḥ purīm || 55 ||
[Analyze grammar]

saumyaḥ sadharmiṇāṃ devaḥ sākṣādguhyastu pāpinām |
tasyā vilokanādbhūyaḥ sopyabhūdvai parāṅmukhaḥ || 56 ||
[Analyze grammar]

bhṛtyānājñāpayāmāsa yama eva parāṅmukhaḥ |
raurave narake ghore pātyatāṃ sā mayeritā || 57 ||
[Analyze grammar]

ityuktāste tadā bhṛtyā nītvā tāṃ ghoraraurave |
nyapātayannadhovavaktrāṃ smaraṃtīṃ karma yatkṛtam || 58 ||
[Analyze grammar]

ekamanvaṃtaraṃ yāvatsā sthitvā tatra raurave |
paścādgodhā samutpannā śmaśāne mṛtamāṃsabhuk || 59 ||
[Analyze grammar]

tatrāpi sā varṣaśataṃ lebhe duḥkhaṃ svakarmaṇaḥ |
phalaṃ mṛtakamāṃse kurvatyāhāramutkaṭam || 60 ||
[Analyze grammar]

ekadā sa muneḥ putro yo'syā kukṣau vyajāyata |
viprayonau samāyātaḥ śmaśāne tatra paryaṭan || 61 ||
[Analyze grammar]

muniputrastu tāṃ vīkṣya mṛtānāṃ kravyamaśnatīm |
dhyātvā kṣaṇaṃ svamanasi bubudhe tāṃ svamātaram || 62 ||
[Analyze grammar]

sa uvācātmanātmānaṃ buddhvā tāṃ nijamātaram |
muniputra uvāca |
etāṃ tu tārayāmyadya dustarādduḥkhavāridheḥ || 63 ||
[Analyze grammar]

aho na mucyate jaṃturjātapāpena karmaṇā |
ātmanopārjitenaiva bhogakālāvadhiṃ vinā || 64 ||
[Analyze grammar]

asyāḥ kālo vyatīyāya niraye mānavābhidhaḥ |
sāṃprataṃ ca janaistvatra vatsarāṇāṃ śataṃ gatam || 65 ||
[Analyze grammar]

kiyadagre ca bhoktavyametayā pāpamulbaṇam |
nārada uvāca |
ityālocya punardadhyau jñānenāmīlya cakṣuṣī || 66 ||
[Analyze grammar]

dṛṣṭvā tasyā gatiṃ ghorāṃ pāpāyā divyacakṣuṣā |
punarātmānamādehaṃ sa dvijapravaro nṛpa || 67 ||
[Analyze grammar]

muniputra uvāca |
aho kalpaśatenāpi nistāro'syā na dṛśyate |
vinā sattīrthamaraṇaṃ śaraṇaṃ vā ramāpateḥ || 68 ||
[Analyze grammar]

athavā piṃḍadānena gayāyāṃ matkṛtena ca |
vināsyāḥ sadgatiṃ naiva kalpakoṭiśatairapi || 69 ||
[Analyze grammar]

na ghaṭeta dvayaṃ cāsyā asyāṃ yonau kadācana |
tattīrthaviṣaye mṛtyuḥ sevāyāṃ śrīpate ratiḥ || 70 ||
[Analyze grammar]

asyā uddhāraheturvai magnāyāḥ pāpasāgare |
bhavitā matkṛtaṃ śrāddhaṃ gayāyā ca hitrakam || 71 ||
[Analyze grammar]

nārada uvāca |
ityālocya sa dharmātmā yayau svapiturāśramam |
ācakhyau pitaraṃ sarvaṃ svamāturduḥkhakāraṇam || 72 ||
[Analyze grammar]

niśamya putravacanaṃ mātṛduḥkhanivedakam |
uvāca sa muniśreṣṭhaḥ putraṃ praṇatakaṃdharam || 73 ||
[Analyze grammar]

muniruvāca |
he tāta mātaraṃ svīyāṃ śīghramuddhara durgateḥ |
nayavidbhūpatiḥ śatrorjayalakṣmīmivāhave || 74 ||
[Analyze grammar]

na tārayati yaḥ putro mātaraṃ pitaraṃ svakam |
duḥkhātsa yāti narakaṃ yadi tārayituṃ kṣamaḥ || 75 ||
[Analyze grammar]

svaputrātprāpya pānīyaṃ piṃḍāśca varatīrthake |
pitaro narakātsvargaṃ svargādyāṃti hareḥ padam || 76 ||
[Analyze grammar]

tasmādāśu samuttiṣṭha gaccha khāṃḍavakānane |
tatrāsti yamunā puṇyā munivaryaniṣevitā || 77 ||
[Analyze grammar]

tattīre'sti hariprasthaṃ sarvatīrthamayaṃ tataḥ |
puṇyaṃ madhuvanaṃ tatra viṣṇunā sthāpitaṃ svayam || 78 ||
[Analyze grammar]

tatra snātvā tu vidhivatkṛtvā nityakriyāṃ nijām |
tāmuddiśya kuru śrāddhaṃ svaprasūṃ ca kuru kriyām || 79 ||
[Analyze grammar]

tvayā tatra kṛte śrāddhe tasyāḥ sadgatimicchatā |
sā prāpsyati harerlokaṃ hitvā godhāṃgamulbaṇam || 80 ||
[Analyze grammar]

gayāyāṃ piṃḍadānena yatphalaṃ tāta jāyate |
tataḥ śataguṇaṃ puṇyaṃ sadbhirmadhuvane smṛtam || 81 ||
[Analyze grammar]

idānīṃ vartate tāta kanyārāśigato raviḥ |
putra gatvā kuru śrāddhaṃ pūrvānuddiśya bāṃdhavān || 82 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe kāliṃdīmāhātmye trayodaśādhikadviśatatamo'dhyāyaḥ || 213 ||
[Analyze grammar]