Chapter 212

[English text for this chapter is available]

nārada uvāca |
ityuktvā tasya viprasya pitarau divyarūpiṇau |
vimānavaramāruhya gatau haripuraṃ prati || 1 ||
[Analyze grammar]

tayoḥ putrastu tatraiva kośalāyāṃ dinatrayam |
uṣitvā svagṛhaṃ prāyātciṃtayaṃstīrthavaibhavam || 2 ||
[Analyze grammar]

iyameva tu kathyaṃte vibudhaiḥ kośalā nṛpa |
kathayiṣyāmi tatte'haṃ śravaṇotsukacetase || 3 ||
[Analyze grammar]

te dākṣiṇātyā baṭavastasyāmūṣu mumūrṣavaḥ |
samarthārthapradāyinyāṃ kośalāyāṃ vipadyatām || 4 ||
[Analyze grammar]

kaścidekastadā teṣu tāmanādṛtya kośalām |
gacchannārāyaṇasthānaṃ viṣṇunā vāritaḥ pathi || 5 ||
[Analyze grammar]

vṛddhabrāhmaṇarūpeṇa proktaṃ ceti dvijaṃ prati |
vṛddhabrāhmaṇa uvāca |
kva yāsi brāhmaṇaśreṣṭha tyaktvemāṃ kośalāṃ śubhām || 6 ||
[Analyze grammar]

iṃdraprasthamidaṃ tīrthaṃ sarvatīrthottamaṃ dvija |
kośalā hyatra putreyaṃ muktidā viṣṇuvallabhā || 7 ||
[Analyze grammar]

yatra yāsi vihāyaināṃ niṣkāmapadadāyinīm |
na siddhirbhavitā tatra viṣṇuste ca parāṅmukhaḥ || 8 ||
[Analyze grammar]

muktiṃ cedicchase vipra tīrthenyā saṃpragṛhya ca |
yasya yasyecchayā snāsi taṃ taṃ vargaṃ pradāsyati || 9 ||
[Analyze grammar]

tava dṛṣṭipathe vipra sarpo'pi suratāmiyāt |
asyāḥ prasādato muktau svargasthau vipradaṃpatī || 10 ||
[Analyze grammar]

saṃjātapratyayo'pi tvametanmāhātmyadarśanāt |
labdhvā bhāgyodayenāpi kathamenāṃ vimuṃcasi || 11 ||
[Analyze grammar]

yathā kaścittṛṣārto'pi labdhvāpyamṛtavāridhim |
taṃ tyaktvā yāti paṃkāṃbhastadvattvaṃ mūḍha dṛśyase || 12 ||
[Analyze grammar]

yathā ciṃtāmaṇiṃ kaścitkūpe kṣipati mohitaḥ |
hastasthaṃ yā gatistasya dṛśyate sā gatistava || 13 ||
[Analyze grammar]

ārādhya viṣṇuṃ viśveśaṃ yathā kaścitpumānkudhīḥ |
sukhamaiṃdriyakaṃ tucchaṃ yācate sā gatistava || 14 ||
[Analyze grammar]

na yāti kośalāmenāṃ tyaktvā sarvārthadāyinīm |
snātasyātra diva prāptirmṛtasyāmṛtasaṃsthitiḥ || 15 ||
[Analyze grammar]

nārada uvāca |
rājannākarṇya vipro'sau dvijaśreyabhṛto hareḥ |
vākyaṃ provāca viprāya śreṣṭhaṃ badarikāśramam || 16 ||
[Analyze grammar]

vipra uvāca |
bho bho vipravara śraddhā tava vākyena jāyate |
mama śrutavataḥ pūrvamalpagrāmasya vaibhavam || 17 ||
[Analyze grammar]

iṃdraprasthamidaṃ tīrthaṃ na kadācinmayā śrutam |
kutastu kośalāvṛddha etadaṃtaravartinī || 18 ||
[Analyze grammar]

yatra nārāyaṇaḥ sākṣānmuktā yatra ca yoginaḥ |
muktvā tamāśramaṃ puṇyaṃ tiṣṭhāmyatra kathaṃ dvija || 19 ||
[Analyze grammar]

yathāgatya svayaṃ viṣṇurityuktvā māṃ nivārayet |
badaryāścādhikaṃ kṣetramiṃdraprasthamidaṃ dvija || 20 ||
[Analyze grammar]

tadāhaṃ na pratiṣṭhāmi cālito'pi tamāśramam |
muktikāmaḥ svasadanānnānyathā sthitiratra me || 21 ||
[Analyze grammar]

nārada uvāca |
ityukte tena vipreṇa prādurāsīccaturbhujaḥ |
vihāya prākṛtaṃ rūpaṃ divyarūpadharo hariḥ || 22 ||
[Analyze grammar]

uvāca ca mahābhāgaṃ taṃ dvijaṃ mokṣakāmukam |
viṣṇuruvāca |
iṃdraprasthamidaṃ vipra sarvatīrthottamottamam |
brahmajñeṣviva sarveṣu śaṃbhurgaṃgānadīṣviva || 23 ||
[Analyze grammar]

himavāniva śaileṣu pakṣirāḍiva pakṣiṣu |
tridaśeṣu yathā śakro vaiṣṇaveṣviva nāradaḥ || 24 ||
[Analyze grammar]

tejasviṣu yathā sūryaḥ kṣīrābdhiriva cābdhiṣu |
yathā varṇeṣu bhūdevaḥ sṛṣṭiṣviva pitāmahaḥ || 25 ||
[Analyze grammar]

viṣṇoryathāvatāreṣu kauśalyā janito varaḥ |
tathā samastatīrtheṣu śakraprasthamidaṃ varam || 26 ||
[Analyze grammar]

niṣkāmo vā sakāmo vā yāti tīrthe kvacinnaraḥ |
tatra tatra samastātmā phaladātāhameva vai || 27 ||
[Analyze grammar]

iṃdraprasthāṃtaragatāṃ tyaktvā yo yāti kośalām |
sa no phalamavāpnoti bhakto varadavṛṃdapāt || 28 ||
[Analyze grammar]

nārada uvāca |
evaṃ niśamya tadvākyaṃ dṛṣṭvā tadrūpamuttamam |
praṇipatya ramākāṃtaṃ tasyāmevāgamaddvijaḥ || 29 ||
[Analyze grammar]

bhagavānapi viśvātmā sapadyaṃtardadhe vibhuḥ |
tattvamuddiśya taṃ vipraṃ tena bhāvena pūjitaḥ || 30 ||
[Analyze grammar]

tatrāgatya sa vipro'sau kośalāyāṃ narādhipa |
kathayāmāsa tadvṛttaṃ sarvaṃ sarvānsvasaṃginaḥ || 31 ||
[Analyze grammar]

tepi śrutvā mahābhāgā dākṣiṇātyā dvijātayaḥ |
tasyāmanaśanaṃ kṛtvā tatyajuḥ prākṛtaṃ vapuḥ || 32 ||
[Analyze grammar]

tadeva garuḍārūḍhaḥ śrīviṣṇuṃ samupāgataḥ |
vimānaiḥ svagaṇaiḥ sārddhaṃ tāvadbhirdīptibhāsvaraiḥ || 33 ||
[Analyze grammar]

te taṃ dṛṣṭvā samāyāṃtaṃ vimānaṃ gaṇasaṃyutam |
vapuṣā divyarūpeṇa daṃḍavatpatitā bhuvi || 34 ||
[Analyze grammar]

tuṣṭavuśca dvijāḥ sarve divyajñānavapurddharāḥ |
taṃ divyarūpiṇaṃ devadevavaṃdyapadāṃbujam || 35 ||
[Analyze grammar]

brāhmaṇā ūcuḥ |
namaste'tasīpuṣpasaṃkāśabhāsaṃ tanuṃ bibhrate pītavāso vṛtāya |
lasatkuṃḍalaprotanānopalāya śrutau caṃcalā vyāpinīlāṃbudāya || 36 ||
[Analyze grammar]

bhaktistvadīyā kila kalpavallī samāśritā yacchati cittavāṃcchitam |
yathā tathaiṣā tava kośalā vibho janairubhe te kṛpayā tavāpyate || 37 ||
[Analyze grammar]

vaṃdāmahe te caraṇāraviṃdaṃ vṛdāṃrakairvṛṃditamīśvarādyaiḥ |
viciṃtyamānaṃ hṛdi yogivṛṃdaiḥ kaṃdaṃ parānaṃdabhuvo vimukteḥ || 38 ||
[Analyze grammar]

prāptāḥ kāmaṃ śrīpatetvatsvarūpaṃ śrīvatsādyairlakṣitaṃ cārucihnaiḥ |
vāṃcchāmaste dāsabhāvaṃ tathāpi prāptaṃ sarvairādṛtaṃ nāradādyaiḥ || 39 ||
[Analyze grammar]

yatsaukhyaṃ te dāsabhāvaṃ gatānāṃ tanno lakṣmyā vakṣasoṃtarvasaṃtyāḥ |
tajjānāti śrīpate śrīmaheśo nānyo loke yena taccānubhūtam || 40 ||
[Analyze grammar]

madhye'smākaṃ śrīpate sevakānāṃ nīrāgāṇāmapyasau mānanīyaḥ |
asmāttaṃ te nāradādyā munīśāstvadbhaktāptairlokanāthaṃ bhajaṃte || 41 ||
[Analyze grammar]

kāmaṃ brahmānaṃdamāsoṃtarātmā tvaddāsye no tṛptimāyāti śaṃbhuḥ |
vāraṃvāraṃ tvadguṇānāgrahītuṃ nṛtyatyuccaistvatparo bhāvayuktaḥ || 42 ||
[Analyze grammar]

hetorasmāddehinaḥ svasya dāsyaṃ yatprāptānāṃ normayaḥ saṃbhavaṃti |
tvaccihnāṃgau dvārapālau tadīyau mohāddhāmaprāpya tau tatsvakīyam || 43 ||
[Analyze grammar]

lokādasmādaṃtareṇa tvadicchā tvallokānāṃ nodyate cāśupātaḥ |
ko jānīyāttāvakīmatra māyāṃ durvijñeyāṃ brahma śarvādidevaiḥ || 44 ||
[Analyze grammar]

nārada uvāca |
evaṃ taiḥ stūyamānaḥ sa prabhurnijapadonmukhaḥ |
uvāca tāndākṣiṇātyānmeghagaṃbhīrayā girā || 45 ||
[Analyze grammar]

śrībhagavānuvāca |
bhobho dvijā bhavaṃto'syā kośalāyāḥ prasādataḥ |
sārūpyamapi me prāptā dāsabhāvaṃ ca yāsyatha || 46 ||
[Analyze grammar]

adyaprabhṛti me viprāstīrthametadanuttamam |
dakṣiṇakośaletyuccairnāmnā khyātaṃ bhaviṣyati || 47 ||
[Analyze grammar]

yatra dāśarathī bhūtvā nihaniṣyaddaśānanam |
sā kathyate munivaraiḥ sarvairuttarakośalā || 48 ||
[Analyze grammar]

vipanno jñānavānyasyā vaikuṃṭhamadhirohati |
vināpi tadvasedyo'syāṃ so'pi svargaṃ ca gacchati || 49 ||
[Analyze grammar]

imāṃ tato daśaguṇāmāhurdakṣiṇakośalām |
ekādaśaguṇāmeke samyagāhurmunīśvarāḥ || 50 ||
[Analyze grammar]

iyāneva viśeṣo'sti tasyā asyā matirmama |
tasyāṃ mṛtaṃ nayaṃtyete vaikuṃṭhaṃ māmakā gaṇāḥ || 51 ||
[Analyze grammar]

asyāṃ mṛtaṃ svayamahamananyavadamānasam |
āropya garuḍaṃ dattvā sārūpyaṃ prāpayāmi tat || 52 ||
[Analyze grammar]

nārada uvāca |
ityuktvā tāndvijānviṣṇurnītvā vaikuṃṭhamabhyagāt |
mahimānaṃ stuvannasya svayaṃ tīrthasya bhūpate || 53 ||
[Analyze grammar]

etatte sarvamākhyātaṃ kāraṇaṃ jagatīpate |
yeneyaṃ kathyate vijñairiha dakṣiṇakośalā || 54 ||
[Analyze grammar]

kalimalakulahaṃtā śṛṇvatāṃ mānavānāṃ kamalanayanapādaprāptaye vāṃcchitaśca |
nṛpavara mahimā te varṇitaḥ kośalāyā madhuvanabhavavṛttaṃ śṛṇvataste vadāmi || 55 ||
[Analyze grammar]

iti śrīpādme mahāpurāṇe paṃcapaṃcāśatsāhasryāṃ saṃhitāyāmuttarakhaṃḍe kāliṃdīmāhātmye kośalāmahimāvarṇanaṃnāma dvādaśādhikadviśatatamo'dhyāyaḥ || 212 ||
[Analyze grammar]