Chapter 191

[English text for this chapter is available]

īśvara uvāca |
ṣoḍaśādhyāyasāmarthyaṃ kathitaṃ śṛṇu sāṃpratam |
spaṣṭaṃ saptadaśādhyāyamahimāṃbhonidhiṃ śive || 1 ||
[Analyze grammar]

khaḍgabāhoḥ sutasyaiva bhṛtyo duḥśāsano'bhavat |
taṃ gajaṃ dhartumāgatya gajātprāpto yamakṣayam || 2 ||
[Analyze grammar]

tadvāsanānibaddhātmā gajayonimavāpya ca |
gītā saptadaśādhyāyaṃ śrutvā prāptaḥ paraṃ padam || 3 ||
[Analyze grammar]

devyuvāca |
duḥśāsano gajatvaṃ ca prāpya mukta iti śrutam |
tadeva vada kalyāṇa vistareṇa mama prabho || 4 ||
[Analyze grammar]

īśvara uvāca |
sthitaḥ kaścana durmedhā maṃḍalīkakumārakaiḥ |
bahumūlyaṃ paṇaṃ kṛtvā gajamārūḍhavāṃstataḥ || 5 ||
[Analyze grammar]

gatvā katipayānyeva padāni janavāritaḥ |
nāmnā duḥśāsano mūḍhaḥ prauḍhavākyamudīrayan || 6 ||
[Analyze grammar]

tato niśamya tadvākyaṃ krodhāṃdhaḥ siṃdhuro'bhavat |
nyapatacca skhalatpādaḥ kaṃpamānakumārakaiḥ || 7 ||
[Analyze grammar]

tato nipatitaṃ kiṃciducchvasaṃtaṃ gajo ruṣā |
ūrddhvamunmūlayāṃcakre kṛtāṃtakaniraṃkuśaḥ || 8 ||
[Analyze grammar]

gatāsorapi roṣeṇa tasyāsthnyāṃ ca gaṇaṃ gajaḥ |
vikīrṇavānpṛthakkṛtvā matto daṃtāvalastataḥ || 9 ||
[Analyze grammar]

tataḥ kālena saṃpretya gajayonimavāpa saḥ |
mahāṃtaṃ kālamanayatsiṃhaladvīpabhūpateḥ || 10 ||
[Analyze grammar]

maitrī garīyasī sārddhaṃ khaḍgabāhumahībhujā |
tato'yaṃ jalamārgeṇa prāpito vāruṇo mataḥ || 11 ||
[Analyze grammar]

jayadevena khaḍgabāhoḥ prītyā nīto mahībhujā |
jātiṃ smaransvakīyāṃ sa paśyanbaṃdhūnsahodarān || 12 ||
[Analyze grammar]

duḥkhena mahatāstokāndivasānatyavāhayat |
uvāsa khaḍgabāhośca gṛhe tūṣṇīmanirdiśan || 13 ||
[Analyze grammar]

sa kadācittu saṃtuṣṭaḥ samasyāślokapūraṇe |
kasmaicitkavaye prādāttamupāyana hastinam || 14 ||
[Analyze grammar]

śatena tena kavinā rogopadravabhīruṇā |
mālavakṣoṇipālasya vikrītaścaityakuṃjaraḥ || 15 ||
[Analyze grammar]

kiyatyapi gate kāle pālyamāno'pi yatnataḥ |
mumūrṣurabhavattatra kuṃjaro durjarajvaraḥ || 16 ||
[Analyze grammar]

na jighrati payaḥ śītaṃ nādatte kavalaṃ gajaḥ |
svapityapi na saukhyena muṃcatyaśrūṇi kevalam |
tato hastipakākhyātaṃ vṛttāṃtamavanīpatiḥ || 17 ||
[Analyze grammar]

ākarṇya sa samāyāto yatrāste jvarito gajaḥ |
sa cāvalokya bhūpālaṃ jagadvismayakāriṇīm || 18 ||
[Analyze grammar]

vācamūce gajaḥ samyagvisṛṣṭajvaravedanaḥ |
rājannaśeṣaśāstrajña rājanītipayonidhe || 19 ||
[Analyze grammar]

nirjitārātisaṃghāta murāricaraṇapriya |
kimauṣadhairalaṃ vaidyaiḥ kiṃ dhānaiḥ kiṃ nu jāpakaiḥ || 20 ||
[Analyze grammar]

gītāsaptadaśādhyāyajāpakaṃ dvijamānaya |
tenāyaṃ māmako rogaḥ śāmyatyatra na saṃśayaḥ || 21 ||
[Analyze grammar]

yathādiṣṭaṃ gajenāsau tathā cakre narādhipaḥ |
tato gajatvamutsṛjya mukto duḥśāsano'bhavat || 22 ||
[Analyze grammar]

tena vipreṇābhimaṃtrya jale kṣipte taduttame |
atha divyaṃ samārūḍhaṃ vimānamavanīpatiḥ || 23 ||
[Analyze grammar]

taṃ duḥśāsanamadrākṣītpākaśāsanatejasam || 24 ||
[Analyze grammar]

rājovāca |
kiṃ jātīyaḥ kimātmā tvaṃ kiṃ vṛtta iti me vada |
kena vā karmaṇā jāto gajaḥ kathamihāgataḥ || 25 ||
[Analyze grammar]

pṛṣṭo rājñā vimukto'sau vimānasthaḥ sthirākṣaram |
vṛttaṃ yathā yadācakhyau nijaṃ duḥśāsanaḥ kramāt || 26 ||
[Analyze grammar]

gītāsaptadaśādhyāyaṃ japanmālavabhūpatiḥ |
naravarmābhavanmuktaḥ kālenālpīyasā tataḥ || 27 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāmuttarakhaṃḍe gītāmāhātmye ekanavatyadhikaśatatamo'dhyāyaḥ || 191 ||
[Analyze grammar]