Chapter 192

[English text for this chapter is available]

pāvartyuvāca |
uktaṃ saptadaśādhyāyagauravaṃ bhavatā śiva |
sa tvamaṣṭādaśādhyāyamahimānamudīraya || 1 ||
[Analyze grammar]

īśvara uvāca |
ākarṇaya cidānaṃda niṣpādi nigamottaram |
puṇyamaṣṭādaśādhyāyamāhātmyaṃ girinaṃdini || 2 ||
[Analyze grammar]

samastaśāstrasarvasvaṃ śrotraprāptaṃ rasāyanam |
saṃsārayātanājālavidāraṇaparāyaṇam || 3 ||
[Analyze grammar]

paraṃ rahasyaṃ siddhānāmavidyonmūlanakṣamam |
caitanyaṃ kaiṭabhārāteragragaṇyaṃ paraṃ padam || 4 ||
[Analyze grammar]

vivekavallarīmūlaṃ kāmakrodhamalāpaham |
puraṃdarādigīrvāṇacittaviśrāmakārakam || 5 ||
[Analyze grammar]

sanakādimahāyogimanoraṃjanakāraṇam |
pāṭhamātraparābhūtakālakiṃkaragarjitam || 6 ||
[Analyze grammar]

aṣṭottaraśatavyādhimūlonmūlanakārakam |
nātaḥ parataraṃ kiṃcidrahasyaṃ haṃsagāmini || 7 ||
[Analyze grammar]

upatāpatrayaharaṃ mahāpātakanāśanam |
yathākāleṣvahaṃ nityo yathā paśuṣu kāmadhuk || 8 ||
[Analyze grammar]

yathā vyāso munīṃdreṣu vyāseṣu brahmavittamaḥ |
yathā divaukasāṃ śakro guruḥ śakrādyathā varaḥ || 9 ||
[Analyze grammar]

yathā rasānāṃ pīyūṣamuttamaṃ viśvaviśrutam |
tathā girīṇāṃ kailāso yathā ceṃdro divaukasām || 10 ||
[Analyze grammar]

tīrthānāṃ puṣkaraṃ tīrthaṃ yathā puṣpeṣu paṃkajam |
pativratāsu nārīṣu yathā lokeṣvaruṃdhatī || 11 ||
[Analyze grammar]

yathā makheṣvaśvamedho yathodyāneṣu naṃdanam |
yathārudreṣu sarveṣu vīrabhadro mamānugaḥ || 12 ||
[Analyze grammar]

yathā dāneṣu bhūdānaṃ yathā siṃdhuṣu gautamī |
yathā loke harikṣetraṃ praśastaṃ dharmakarmasu || 13 ||
[Analyze grammar]

tathaivāṣṭādaśādhyāyamāhātmyaṃ bhuvanottaram |
tatrākhyānamidaṃ puṇyaṃ bhaktyākarṇaya pārvati || 14 ||
[Analyze grammar]

yathākarṇanamātreṇa jaṃtuḥ pāpaiḥ pramucyate |
asti merugireḥ śṛṃge purī ramyāmarāvatī || 15 ||
[Analyze grammar]

purā mama vinodāya nirmitā viśvakarmaṇā |
niraṃtaraṃ guṇayutā koṭigīrvāṇasevitā || 16 ||
[Analyze grammar]

tejaḥpuṃjavatī sākṣādbrahmavidyeva viśrutā |
ciṃtāmaṇiśilābaddhāḥ prāsādā yatra kāmadāḥ || 17 ||
[Analyze grammar]

jayaṃti meruśikhare caturmukhapurāvadhi |
yatra kalpadrumacchāyā sukhāsīnā pulomajā || 18 ||
[Analyze grammar]

śṛṇoti śyāmalā gīrbhirgītaṃ gaṃdharvayoṣitām |
yatrāste sabalārātirdevaiśca dalitāyuṣām || 19 ||
[Analyze grammar]

daityānāṃ raktakallolaiḥ svardhunī śoṇatāṃ gatā |
purātanasudhāsvādu smāraṃ smāraṃ divaukasaḥ || 20 ||
[Analyze grammar]

dhayaṃti yatra kṣutkṣāmā kalāṃ pratyahamaiṃdavīm |
tasyāṃ kaivalyakalpāyāmāsītpūrvaṃ śatakratuḥ || 21 ||
[Analyze grammar]

śacī samanvitaḥ śrīmānsarvagīrvāṇasevitaḥ |
sa kadācitsukhāsīno viṣṇudūtairadhiśritam || 22 ||
[Analyze grammar]

sahasranetramāyāṃtamapaśyatpuruṣaṃ param |
tatastadīya tejobhirabhibhūtaḥ puraṃdaraḥ || 23 ||
[Analyze grammar]

maṇisiṃhāsanāttūrṇaṃ patitaḥ sthānamaṃḍape |
siṃhāsanātprayātasya tatastasya harerbhaṭāḥ || 24 ||
[Analyze grammar]

gīrvāṇagaṇasāmrājya paṭṭabaṃdhaṃ vitenire |
atha tasyābhiṣiktasya maheṃdrasya pulomajā || 25 ||
[Analyze grammar]

vāmāṃkamārurohāśu divyaduṃduṃbhiniḥsvanaiḥ |
atha tridivasaṃgīta gīrvāṇāḥ pramadānvitāḥ || 26 ||
[Analyze grammar]

surā nīrājayāmāsurdivyaratnaiḥ surastriyaḥ |
tato vai ṛṣayo vedairāśīrvādāstadā daduḥ || 27 ||
[Analyze grammar]

raṃbhādyā nanṛtustasya purastādapsarogaṇāḥ |
gaṃdharvā lalitālāpāñjagurmaṃgalakautukam || 28 ||
[Analyze grammar]

evaṃ nūtanamiṃdraṃ tu juṣṭaṃ bahubhirutsavaiḥ |
vinā śatakratuṃ dṛṣṭvā śakro vismayamāyayau || 29 ||
[Analyze grammar]

na mayā vihitā mārge taḍāgā na vinirmitāḥ |
na ropitā mahāvṛkṣāḥ pāṃthaviśrāṃtikārakaḥ || 30 ||
[Analyze grammar]

na kadācidaho dṛṣṭo devastripurabhairavaḥ |
nidhivāse sthitā devī pūjitā na madālasā || 31 ||
[Analyze grammar]

meghaṃkarasthitaḥ śārṅgadharo naiva nirīkṣitaḥ |
na kṛtaṃ viraje snānaṃ naivaṃ kāśīṃ purīṃ gataḥ || 32 ||
[Analyze grammar]

na devavāṭikāvāsī dṛṣṭo narahariḥ svayam |
eraṃḍaviṣṇurheraṃbo na jātu pariśīlitaḥ || 33 ||
[Analyze grammar]

reṇukānekṣitā jātu mātā puranivāsinī |
na bhaktyā pūjitā devī dānā puranivāsinī || 34 ||
[Analyze grammar]

na bhaktyā tripure dṛṣṭastriliṃgastryaṃbakaḥ svayam |
na śārdūlataḍāgastho vīkṣitaḥ somanāthakaḥ || 35 ||
[Analyze grammar]

revāpurasthito devo ghusṛṇeśo na vīkṣitaḥ |
nāgadaṃtapure khyāto nāganātho na vekṣitaḥ || 36 ||
[Analyze grammar]

parṇagrāmasthito dṛṣṭo na mahānamṛteśvaraḥ |
na tuṃgabhadrā tīrastho dṛṣṭo hariharaḥ svayam || 37 ||
[Analyze grammar]

na veṃkaṭādrinilayaḥ śrīnivāsaḥ sulakṣitaḥ |
kāverī karṇikātīre śrīraṃgo naiva vīkṣitaḥ || 38 ||
[Analyze grammar]

dīnāstvanāthāḥ krośaṃtaḥ kārāgārānna mocitāḥ |
annadānena daurbhikṣe prāṇino naiva pūjitāḥ || 39 ||
[Analyze grammar]

rātrau rātrau kṛtā kvāpinirjale nodakaprabhā || 40 ||
[Analyze grammar]

na gautamyāṃ kṛtaṃ snānaṃ na dṛṣṭo hariṇeśvaraḥ |
kṛṣṇaveṇyāṃ ca na kṛtaṃ snānaṃ kanyāgate gurau || 41 ||
[Analyze grammar]

dattaṃ no bhūkhaṃḍamapi kavayo naiva pūjitāḥ |
na tīrtheṣu kṛtaṃ satraṃ na grāmeṣu kṛtā makhāḥ || 42 ||
[Analyze grammar]

puṣkariṇyo na vihitā madhye mārgaṃ bahūdakāḥ |
na prāsādāḥ kṛtāḥ kvāpi brahmaviṣṇupinākinām || 43 ||
[Analyze grammar]

na jātucidbhayākrāṃtā rakṣitāḥ śaraṇāgatāḥ |
kathamekena puṇyena devadattamihārjitam || 44 ||
[Analyze grammar]

iti ciṃtākulo bhūtvā hariṃ praṣṭuṃ puraṃdaraḥ |
yayau sarabhasaṃkhinnaḥ kṣīrakūpāragahvaram || 45 ||
[Analyze grammar]

tatra praviśya goviṃdaṃ kṛtanidraṃ navaistavaiḥ |
akasmānnijasāmrājyabhraṃśaduḥkhamuvāca ha || 46 ||
[Analyze grammar]

iṃdra uvāca |
ramākāṃta bhavatprītyai kṛtaṃ kratuśataṃ purā |
tena puṇyena saṃprāptaṃ mayā pauraṃdaraṃ padam || 47 ||
[Analyze grammar]

idānīṃ nūtanaḥ ko'pi jāto divi puraṃdaraḥ |
na tena dharmo vihito na tena kratavaḥ kṛtāḥ || 48 ||
[Analyze grammar]

mama siṃhāsanaṃ divyaṃ kathamākrāṃtamacyuta || 49 ||
[Analyze grammar]

mahādeva uvāca |
ityevaṃ vadatastasya śrutvā vācaṃ ramāpatiḥ |
unmīlitasmitākṣo sāvuvāca madhuraṃ vacaḥ || 50 ||
[Analyze grammar]

śrībhagavānuvāca |
kiṃ dānairalpaphaladaiḥ kiṃ tapobhiḥ kimadhvaraiḥ |
varttamānaḥ kṣititale satvaṃ prīṇitavānpurā || 51 ||
[Analyze grammar]

indra uvāca |
bhagavankarmaṇā kena sa tvāṃ prīṇitavāndvijaḥ |
yatprītyā bhagavānprādāttasmai pauraṃdaraṃ padam || 52 ||
[Analyze grammar]

śrībhagavānuvāca |
japatyaṣṭādaśādhyāye gītānāṃ ślokapaṃcakam |
yatpuṇyena ca saṃprāptaṃ tava sāmrājyamuttamam || 53 ||
[Analyze grammar]

sarvapuṇyaśiroratna bhūtena tvaṃ sthiro bhava |
iti viṣṇorvacaḥ śrutvā jñātopāyaṃ puraṃdaraḥ || 54 ||
[Analyze grammar]

vipraveṣadharo bhūtvā gato godāvarītaṭam |
tatrāpaśyatpuraṃ puṇyaṃ kālikāgrāmamuttamam || 55 ||
[Analyze grammar]

yatra kāleśvaro devo varttate kālamardanaḥ |
tatra godāvarī tīre sthitaṃ paramadhārmikam || 56 ||
[Analyze grammar]

apaśyatkaruṇāvaṃtaṃ brāhmaṇaṃ vedapāragam |
nityamaṣṭādaśādhyāyaṃ japaṃtaṃ dāṃtacetasam || 57 ||
[Analyze grammar]

tatastaccaraṇadvaṃdve luṭhitvā parayā mudā |
satvamaṣṭādaśādhyāyamapaṭhattena śikṣitam || 58 ||
[Analyze grammar]

atha puṇyena tenā'sau viṣṇoḥ sāyujyamāyayau |
hitvā puraṃdarādīnāṃ devānāṃ padamalpakam || 59 ||
[Analyze grammar]

jñātvātīva mudāyukto vaikuṃṭhamagamatpuram |
ataeva paraṃ tatvaṃ munīnāmidamuttamam || 60 ||
[Analyze grammar]

divyamaṣṭādaśādhyāyamāhātmyaṃ kathitaṃ mayā |
yasya śravaṇamātreṇa sarvapāpaiḥ pramucyate || 61 ||
[Analyze grammar]

ityevaṃ gītāmāhātmyaṃ kathitaṃ pāpanāśanam |
puṇyaṃ pavitramāyuṣyaṃ svargyaṃ svastyayanaṃ mahat || 62 ||
[Analyze grammar]

yaḥ śṛṇoti mahābhāge śraddhayā saṃyutaḥ pumān |
sarvayajñaphalaṃ prāpya viṣṇoḥ sāyujyamāpnuyāt || 63 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṃḍe satīśvarasaṃvāde gītāmāhātmye dvinavatyadhika śatatamo'dhyāyaḥ || 192 ||
[Analyze grammar]