Chapter 36

[English text for this chapter is available]

śeṣauvāca |
etacchrutvā tu viprendro lomaśātparamaṃ mahat |
punaḥ papraccha tamṛṣiṃ sarvajñaṃ yogināṃ varam || 1 ||
[Analyze grammar]

āraṇyaka uvāca |
muniśreṣṭha vadaitanme pṛcchāmi tvāṃ mahāmate |
guravaḥ kṛpayā yuktā bhāṣaṃte sevake'khilam || 2 ||
[Analyze grammar]

ko'sau rāmo mahābhāga yo nityaṃ dhyāyate tvayā |
tasya kāni caritrāṇi vadasva tvaṃ dvijarṣabha || 3 ||
[Analyze grammar]

kimarthamavatīrṇo'sau kasmānmānuṣatāṃ gataḥ |
tatsarvaṃ kathayāśu tvaṃ mama saṃśayanuttaye || 4 ||
[Analyze grammar]

śeṣa uvāca |
iti vākyaṃ samākarṇya muneḥ paramaśobhanam |
lomaśaḥ kathayāmāsa rāmacāritramadbhutam || 5 ||
[Analyze grammar]

lokānnirayasaṃmagnāñjñātvā yogeśvareśvaraḥ |
kīrtiṃ prathayituṃ loke yayā ghoraṃ tariṣyati || 6 ||
[Analyze grammar]

evaṃ jñātvā dayāvārdhiḥ parameśo manoharaḥ |
avatāraṃ cakārātra caturdhā saśriyānvitaḥ || 7 ||
[Analyze grammar]

purā tretāyuge prāpte pūrṇāṃśo raghunandanaḥ |
sūryavaṃśe samutpanno rāmo rājīvalocanaḥ || 8 ||
[Analyze grammar]

sa rāmo lakṣmaṇasakhaḥ kākapakṣadharo yuvā |
tātasya vacanāttau tu viśvāmitramanuvratau || 9 ||
[Analyze grammar]

yajñasaṃrakṣaṇārthāya rājñā dattau kumārakau |
dāṃtau dhanurdharau vīrau viśvāmitramanuvratau || 10 ||
[Analyze grammar]

pathi pravrajatostatra tāṭakā nāma rākṣasī |
saṃgatā ca vane ghore tayorvai vighnakāraṇāt || 11 ||
[Analyze grammar]

ṛṣeranujñayā rāmastāṭakāṃ yamayātanām |
prāveśayaddhanurvedavidyābhyāsena rāghavaḥ || 12 ||
[Analyze grammar]

yasya pādatalasparśācchilā vāsavayogajā |
ahalyā gautamavadhūḥ punarjātā svarūpiṇī || 13 ||
[Analyze grammar]

viśvāmitrasya yajñe tu supravṛtte raghūttamaḥ |
mārīcaṃ ca subāhuṃ ca jaghāna parameṣubhiḥ || 14 ||
[Analyze grammar]

īśvarasya dhanurbhagnaṃ janakasya gṛhe sthitam |
rāmaḥ paṃcadaśe varṣe ṣaḍvarṣāmatha maithilīm || 15 ||
[Analyze grammar]

upayeme vivāhena ramyāṃ sītāmayonijām |
kṛtakṛtyastadā jātaḥ sītāṃ saṃprāpya rāghavaḥ || 16 ||
[Analyze grammar]

tato dvādaśa varṣāṇi reme rāmastayā saha |
saptaviṃśatime varṣe yauvarājyamakalpayat || 17 ||
[Analyze grammar]

rājānamatha kaikeyī varadvayamayācata |
tayorekena rāmastu sasītaḥ saha lakṣmaṇaḥ || 18 ||
[Analyze grammar]

jaṭādharaḥ pravrajatuvarṣāṇīha caturdaśa |
bharatastu dvitīyena yauvarājyādhipo'stu me || 19 ||
[Analyze grammar]

jānakī lakṣmaṇasakhaṃ rāmaṃ prāvrājayannṛpaḥ |
trirātramudakāhāraścaturthe'hni phalāśanaḥ || 20 ||
[Analyze grammar]

paṃcame citrakūṭe tu rāmasthānamakalpayat |
atha trayodaśe varṣe paṃcavaṭyāṃ mahāmune || 21 ||
[Analyze grammar]

rāmo virūpayāmāsa śūrpaṇakhāṃ niśācarīm |
vane vicaratastasya jānakyā sahitasya ca || 22 ||
[Analyze grammar]

āgato rākṣasastāṃ tu hartuṃ pāpavipākataḥ |
tato māghāsitāṣṭamyāṃ muhūrte vṛṃdasaṃjñite || 23 ||
[Analyze grammar]

rāghavābhyāṃ vinā sītāṃ jahāra daśakaṃdharaḥ |
tenaivaṃ hriyamāṇā sā cakraṃda kurarī yathā || 24 ||
[Analyze grammar]

rāmarāmeti māṃ rakṣa rakṣa māṃ rakṣasā hṛtām |
yathā śyenaḥ kṣudhākrāṃtaḥ kraṃdaṃtīṃ vartikāṃ nayet || 25 ||
[Analyze grammar]

tathā kāmavaśaṃ prāpto rāvaṇo janakātmajām |
nayatyevaṃ janakajāṃ jaṭāyuḥ pakṣirāṭtadā || 26 ||
[Analyze grammar]

yuyudhe rākṣaseṃdreṇa sa rāvaṇahato'patat |
mārgaśuklanavamyāṃ tu vasaṃtīṃ rāvaṇālaye || 27 ||
[Analyze grammar]

saṃpātirdaśame māsa ācakhyau vānareṣu tām |
ekādaśyāṃ maheṃdrādre puḥpluve śatayojanam || 28 ||
[Analyze grammar]

hanūmānniśi tasyāṃ tu laṃkāyāṃ paryakālayat |
tadrātriśeṣe sītāyā darśanaṃ hi hanūmataḥ || 29 ||
[Analyze grammar]

dvādaśyāṃ śiṃśapāvṛkṣe hanūmānparyavasthitaḥ |
tasyāṃ niśāyāṃ jānakyā viśvāsāya ca saṃkathā || 30 ||
[Analyze grammar]

akṣādibhistrayodaśyāṃ tato yuddhamavartata |
brahmāstreṇa caturdaśyāṃ baddhaḥ śakrajitā kapiḥ || 31 ||
[Analyze grammar]

vahninā pucchayuktena laṃkāyā dahanaṃ kṛtam |
pūrṇimāyāṃ maheṃdrādrau punarāgamanaṃ kapeḥ || 32 ||
[Analyze grammar]

mārgāsitapratipadaḥ paṃcabhiḥ pathivāsaraiḥ |
punarāgatya ṣaṣṭhe'hni dhvastaṃ madhuvanaṃ kila || 33 ||
[Analyze grammar]

saptamyāṃ pratyabhijñānadānaṃ sarvanivedanam |
aṣṭamyuttaraphalgunyāṃ muhūrte vijayābhidhe || 34 ||
[Analyze grammar]

madhyaṃ prāpte sahasrāṃśau prasthānaṃ rāghavasya ca |
rāmaḥ kṛtvā pratijñāṃ tu prayāto dakṣiṇāṃ diśam || 35 ||
[Analyze grammar]

tīrtvāhaṃ sāgaramapi haniṣye rākṣaseśvaram |
dakṣiṇāśāṃ prayātasya sugrīvo'pyabhavatsakhā || 36 ||
[Analyze grammar]

vāsaraiḥ saptabhiḥ siṃdhoḥ skaṃdhāvāraniveśanam |
pauṣaśuklapratipadastṛtīyāyāvadaṃbudheḥ || 37 ||
[Analyze grammar]

upasthānaṃ sasainyasya rāghavasya babhūva ha |
bibhīṣaṇaścaturthyāṃ tu rāmeṇa saha saṃgataḥ || 38 ||
[Analyze grammar]

samudrataraṇārthāya paṃcamyāṃ maṃtra udyataḥ |
prāyopaveśanaṃ cakre rāmo dinacatuṣṭayam || 39 ||
[Analyze grammar]

samudravaralābhaśca sahopāyapradarśanam |
tato daśamyāmāraṃbhastrayodaśyāṃ samāpanam || 40 ||
[Analyze grammar]

caturdaśyāṃ suvelādrau rāmaḥ sainyaṃ nyaveśayat |
paurṇamāsyāṃ dvitīyāṃ taṃ tridinaiḥ sainyatāraṇam || 41 ||
[Analyze grammar]

tīrtvā toyanidhiṃ rāmo vānareśvarasainyavān |
rurodha ca purīṃ laṃkāṃ sītārthaṃ saha lakṣmaṇaḥ || 42 ||
[Analyze grammar]

tṛtīyādi daśamyaṃtaṃ niveśaśca dināṣṭakam |
śukasāraṇayostatra prāptirekādaśe dine || 43 ||
[Analyze grammar]

pauṣāsitākhyadvādaśyāṃ sainyasaṃkhyānameva ca |
śārdūlena kapīṃdrāṇāṃ sahasāropavarṇanam || 44 ||
[Analyze grammar]

trayodaśyā amāvāsyāṃ laṃkāyāṃ divasaistribhiḥ |
rāvaṇaḥ sainyasaṃkhyānaṃ raṇotsāhaṃ tadākarot || 45 ||
[Analyze grammar]

prayayāvaṃgado dautyaṃ māghaśuklādyavāsare |
sītāyāśca tato bharturmāyāmūrddhādidarśanam || 46 ||
[Analyze grammar]

māghadvitīyādi dinaiḥ saptabhiryāvadaṣṭamī |
rakṣasāṃ vānarāṇāṃ ca yuddhamāsīcca saṃkulam || 47 ||
[Analyze grammar]

māghaśuklanavamyāṃ tu rātrāviṃdrajitā raṇe |
rāmalakṣmaṇayornāgapāśabaṃdhaḥ kṛtaḥ kila || 48 ||
[Analyze grammar]

ākuleṣu kapīśeṣu nirutsāheṣu sarvaśaḥ |
nāgapāśavimokṣārthaṃ daśamyāṃ pavano'japat || 49 ||
[Analyze grammar]

karṇe svarūpaṃ rāmasya garuḍāgamanaṃ tataḥ |
ekādaśyāṃ ca dvādaśyāṃ dhūmrākṣasya vadhaḥ kṛtaḥ || 50 ||
[Analyze grammar]

trayodaśyāṃ tu tenaiva nihataḥ kaṃpano raṇe |
māghaśuklacaturdaśyā yāvatkṛṣṇādivāsaram || 51 ||
[Analyze grammar]

tridinena prahastasya nīlena vihito vadhaḥ |
māghakṛṣṇadvitīyāyāścaturthyaṃ taṃ tribhirdinaiḥ || 52 ||
[Analyze grammar]

rāmeṇa tumule yuddhe rāvaṇo drāvito raṇāt |
paṃcamyā aṣṭamīyāvadrāvaṇena prabodhitaḥ || 53 ||
[Analyze grammar]

kuṃbhakarṇastadā cakre'bhyavahāraṃ caturdinam |
kuṃbhakarṇo dinaiḥ ṣaḍbhirnavamyāstu caturdaśīm || 54 ||
[Analyze grammar]

rāmeṇa nihato yuddhe bahuvānarabhakṣakaḥ |
amāvāsyādine śokādavahāro babhūva ha || 55 ||
[Analyze grammar]

phālgunādipratipadaścaturthyaṃtaṃ caturdinaiḥ |
bisataṃtuprabhṛtayo nihatāḥ paṃcarākṣasāḥ || 56 ||
[Analyze grammar]

paṃcamyāḥ saptamī yāvadatikāyavadhastathā |
aṣṭamyādvādaśī yāvannihatau dinapaṃcakāt || 57 ||
[Analyze grammar]

nikuṃbhakuṃbhāvūrdhvaṃ tu makarākṣastribhirdinaiḥ |
phālgunāsitadvitīyāyāṃ dine śakrajitā jitam || 58 ||
[Analyze grammar]

tṛtīyādisaptamyaṃtaṃ dinapaṃcakameva ca |
oṣadhyānayanavyagrādavahāro babhūva ha || 59 ||
[Analyze grammar]

tatastrayodaśīyāvaddinaiḥ paṃcabhiriṃdrajit |
lakṣmaṇena hato yuddhe vikhyātabalapauruṣaḥ || 60 ||
[Analyze grammar]

caturdaśyāṃ daśagrīvo dīkṣāṃ prāpāvahārataḥ |
amāvāsyādine prāyādyuddhāya daśakaṃdharaḥ || 61 ||
[Analyze grammar]

caitraśuklapratipadaḥ paṃcamīdinapaṃcakaiḥ |
rāvaṇe yuddhyamāne tu pracuro rakṣasāṃ vadhaḥ || 62 ||
[Analyze grammar]

caitraṣaṣṭhyāṣṭamī yāvanmahāpārśvādi māraṇam |
caitraśuklanavamyāṃ tu saumitreḥ śaktibhedanam || 63 ||
[Analyze grammar]

kopāviṣṭena rāmeṇa drāvito daśakaṃdharaḥ |
droṇādrirāṃjaneyena lakṣmaṇārthamupāhṛtaḥ || 64 ||
[Analyze grammar]

daśamyāmavahārobhūdrātrau yuddhe tu rakṣasām |
ekādaśyāṃ tu rāmāya rathaṃ mātalisārathiḥ || 65 ||
[Analyze grammar]

prerito vāsavenājāvarpayāmāsa bhaktitaḥ |
kopavānatha dvādaśyā yāvatkṛṣṇacaturdaśī || 66 ||
[Analyze grammar]

aṣṭādaśadinai rāmo rāvaṇaṃ dvairathe'vadhīt |
saṃgrāme tumule jāte rāmo jayamavāptavān || 67 ||
[Analyze grammar]

māghaśukladvitīyāyāścaitrakṛṣṇa caturdaśīm |
saptāśītidineṣveva madhyaṃ paṃcadaśāhakam || 68 ||
[Analyze grammar]

yuddhāvahāraḥ saṃgrāmo dvāsaptati dinānyabhūt |
saṃskāro rāvaṇādīnāmamāvasyā dine'bhavat || 69 ||
[Analyze grammar]

vaiśākhādi tithau rāma uvāsa raṇabhūmiṣu |
abhiṣikto dvitīyāyāṃ laṃkārājye vibhīṣaṇaḥ || 70 ||
[Analyze grammar]

sītāśuddhistṛtīyāyāṃ devebhyo varalaṃbhanam |
hatvā cireṇa laṃkeśaṃ lakṣmaṇāgraja eva saḥ || 71 ||
[Analyze grammar]

gṛhītvā jānakīṃ puṇyāṃ duḥkhitāṃ rākṣasena tu |
ādāya parayā prītyā jānakīṃ sa nyavartata || 72 ||
[Analyze grammar]

vaiśākhasya caturthyāṃ tu rāmaḥ puṣpakamāśritaḥ |
vihāyasā nivṛttastu bhūyo'yodhyāṃ purīṃ prati || 73 ||
[Analyze grammar]

pūrṇe caturdaśe varṣe paṃcamyāṃ mādhavasya tu |
bharadvājāśrame rāmaḥ sagaṇaḥ samupāviśat || 74 ||
[Analyze grammar]

naṃdigrāme tu ṣaṣṭhyāṃ sa bharatena samāgataḥ |
saptamyāmabhiṣikto'sāvayodhyāyāṃ raghūdvahaḥ || 75 ||
[Analyze grammar]

daśaikādhikamāsāṃstucaturdaśāhāni maithilī |
uvāsa rāma rahitā rāvaṇasya niveśane || 76 ||
[Analyze grammar]

dvicatvāriṃśaka varṣe rāmo rājyamakārayat |
sītāyāśca trayastriṃśadvatsarāśca tadābhavan || 77 ||
[Analyze grammar]

sa caturdaśavarṣāṃte praviśya ca purīṃ prabhuḥ |
ayodhyāṃ mudito rāmo hatvā rāvaṇamāhave || 78 ||
[Analyze grammar]

bhrātṛbhiḥ sahitastatra rāmo rājyamathākarot |
rājyaṃ prakurvatastasya purodhā vadatāṃ varaḥ || 79 ||
[Analyze grammar]

agastyaḥ kuṃbhasaṃbhūtistamāgaṃtā raghoḥ patim |
tadvākyādraghunātho'sau kariṣyati hayakratum || 80 ||
[Analyze grammar]

tasyāgamiṣyati hayo hyāśrame tava suvrata |
tasya yodhāḥ pramuditā āyāsyaṃti tavāśramam || 81 ||
[Analyze grammar]

teṣāmagre rāmakathāḥ kariṣyasi manoharāḥ |
taiḥ sākaṃ tvamayodhyāyāṃ gaṃtāsi vai dvijarṣabha || 82 ||
[Analyze grammar]

dṛṣṭvā rāmamayodhyāyāṃ padmapatranibhekṣaṇam |
tatkṣaṇādeva saṃsāravārdhinistāravānbhava || 83 ||
[Analyze grammar]

ityuktvā māṃ munivaro lomaśaḥ sarvabuddhimān |
uvāca te kiṃ praṣṭavyaṃ tadāhamavadaṃ hi tam || 84 ||
[Analyze grammar]

jñātaṃ tvatkṛpayā sarvaṃ rāmacāritramadbhutam |
tvatprasādādavāpsye'haṃ rāmasya caraṇāṃbujam || 85 ||
[Analyze grammar]

mayā namaskṛtaḥ paścājjagāma sa munīśvaraḥ |
tatprasādānmayāvāptaṃ rāmasya caraṇārcanam || 86 ||
[Analyze grammar]

so'haṃ smarāmi rāmasya caraṇāvanvahaṃ muhuḥ |
gāyāmi tasya caritaṃ muhurmuhurataṃdritaḥ || 87 ||
[Analyze grammar]

pāvayāmi janānanyāngānena svāṃtahāriṇā |
hṛṣyāmi tanmunervākyaṃ smāraṃsmāraṃ tadīkṣayā || 88 ||
[Analyze grammar]

dhanyo'haṃ kṛtakṛtyo'haṃ sabhāgyo'haṃ mahītale |
rāmacaṃdra padāṃbhoja didṛkṣā me bhaviṣyati || 89 ||
[Analyze grammar]

tasmātsarvātmanā rāmo bhajanīyo manoharaḥ |
vaṃdanīyo hi sarveṣāṃ saṃsārābdhititīrṣayā || 90 ||
[Analyze grammar]

tasmādyūyaṃ kimarthaṃ vai prāptāḥ ko vānarādhipaḥ |
yāgaṃ karoti dharmātmā hayamedhaṃ mahākratum || 91 ||
[Analyze grammar]

tatsarvaṃ kathayaṃtvatra yāṃ tu vāhasya pālane |
smaraṃtu raghunāthāṃghriṃ smṛtvā smṛtvā punaḥ punaḥ || 92 ||
[Analyze grammar]

iti vākyaṃ samākarṇya munervismayamāgatāḥ |
raghunāthaṃ smaraṃtaste procurāraṇyakaṃ munim || 93 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe loma |
śāraṇyakasaṃvāde rāmacaritrakathanaṃnāma ṣaṭtriṃśattamo'dhyāyaḥ || 36 ||
[Analyze grammar]