Chapter 30

[English text for this chapter is available]

śeṣa uvāca |
atha tejaḥpuraṃ prāptasturagaḥ patraśobhitaḥ |
yasyāṃ pālayate rājā prajāḥ satyena satyavān || 1 ||
[Analyze grammar]

atha koṭiparīvāro raghunāthānujastataḥ |
hayānugo yayau tasya purataḥ puradharṣaṇaḥ || 2 ||
[Analyze grammar]

taddṛṣṭvā nagaraṃ ramyaṃ citraprākāraśobhitam |
kāṃcanaiḥ kalaśaistatra paritaḥ pratibhāsitam || 3 ||
[Analyze grammar]

devāyatanasāhasraiḥ sarvataśca virājitam |
yatīnāṃ tu maṭhāstatra śobhaṃte yatipūritāḥ || 4 ||
[Analyze grammar]

vahatyatra mahādevī śikhilocanamūrdhagā |
haṃsakāraṃḍavākīrṇāmunivṛṃdaniṣevitā || 5 ||
[Analyze grammar]

brāhmaṇānāṃ pratyagāramagnihotrabhavaḥ punaḥ |
dhūmastatra punātyaṃga pātakāplutamānasān || 6 ||
[Analyze grammar]

uvāca sumatiṃ rājā śatrughnaḥ śatrutāpanaḥ |
tatpuraprekṣaṇodbhūtaharṣavismitamānasaḥ || 7 ||
[Analyze grammar]

śatrughna uvāca |
maṃtrinkathaya kasyedaṃ puraṃ me dṛṣṭigocaram |
karoti mānasāhlādaṃ dharmeṇa pratipālitam || 8 ||
[Analyze grammar]

śeṣa uvāca |
iti vākyaṃ samākarṇya śatrughnasya mahīpateḥ |
uvāca sumatiḥ sarvaṃ yathātathamanuddhatam || 9 ||
[Analyze grammar]

sumatiruvāca |
śṛṇuṣvāvahitaḥ svāminvaiṣṇavasya kathāḥ śubhāḥ |
yāḥ śrutvā mucyate pāpādbrahmahatyāsamādapi || 10 ||
[Analyze grammar]

jīvanmukto varīvarti rāmāṃghryaṃbujaṣaṭpadaḥ |
satyavānyajñayajñāṃga jñātā kartā'vitā mahān || 11 ||
[Analyze grammar]

dhenuṃ prasādya bahubhirvratairyaṃ prāpa tatpitā |
ṛtaṃbharākhyo jagati khyātaḥ paramadhārmikaḥ || 12 ||
[Analyze grammar]

gauḥ prasannā dadau putramanekaguṇasaṃskṛtam |
satyavaṃtaṃ suśobhāḍhyaṃ taṃ jānīhi nṛpottamam || 13 ||
[Analyze grammar]

śatrughna uvāca |
ko vā ṛtaṃbharo rājā kimarthaṃ dhenupūjanam |
kathaṃ prāptaḥ sutastasya vaiṣṇavo viṣṇusevakaḥ || 14 ||
[Analyze grammar]

sarvametatsamācakṣva vaiṣṇavasya kathānakam |
śrutaṃ harati jaṃtūnāṃ mahāpātakaparvatam || 15 ||
[Analyze grammar]

śeṣa uvāca |
iti vākyaṃ samākarṇya śatrughnasya mahārthakam |
kathayāmāsa viśadaṃ tadutpattikathānakam || 16 ||
[Analyze grammar]

ṛtaṃbharo narapatiranapatyaḥ purā'bhavat |
kalatrāṇi bahūnyasya na putraṃ prāpa teṣu vai || 17 ||
[Analyze grammar]

tadā jābālināmānaṃ muniṃ daivādupāgatam |
prapaccha kuśalodyuktaḥ saputrotpattikāraṇam || 18 ||
[Analyze grammar]

ṛtaṃbhara uvāca |
svāminvaṃdhyasya me brūhi putrotpattikaraṃ vacaḥ |
yatkṛtvā jāyate'patyaṃ mama vaṃśadharaṃ varam || 19 ||
[Analyze grammar]

tajjñātvā bhavato bhavyaṃ prakuryāṃ niścitaṃ vacaḥ |
dānaṃ vrataṃ vā tīrthaṃ vā makhaṃ vā munisattama || 20 ||
[Analyze grammar]

iti rājñovacaḥ śrutvā jagāda munisattamaḥ |
sutotpattikaraṃ vākyaṃ praṇatasya sutārthinaḥ || 21 ||
[Analyze grammar]

apatyaprāptikāmasya saṃtyupāyāstrayaḥ prabho |
viṣṇoḥ prasādo goścāpi śivasyāpyathavā punaḥ || 22 ||
[Analyze grammar]

tasmāttvaṃ kuru vai pūjāṃ dhenordevatanornṛpa |
yasyāḥ pucche mukhe śṛṃge pṛṣṭhe devāḥ pratiṣṭhitāḥ || 23 ||
[Analyze grammar]

sā tuṣṭā dāsyati kṣipraṃ vāṃchitaṃ dharmasaṃyutam |
evaṃ viditvā gopūjāṃ vidhehi tvamṛtaṃbhara || 24 ||
[Analyze grammar]

yo vai nityaṃ pūjayati gāṃ gehe yavasādibhiḥ |
tasya devāśca pitaro nityaṃ tṛptā bhavaṃti hi || 25 ||
[Analyze grammar]

yo vai gavāhnikaṃ dadyānniyamena śubhavrataḥ |
tena satyena tasya syuḥ sarve pūrṇā manorathāḥ || 26 ||
[Analyze grammar]

tṛṣitā gaurgṛhe baddhā gehe kanyā rajasvalā |
devatā ca sanirmālyā haṃti puṇyaṃ purākṛtam || 27 ||
[Analyze grammar]

yo vai gāṃ pratiṣiddhyeta caraṃtīṃ svaṃ tṛṇaṃ naraḥ |
tasya pūrve ca pitaraḥ kaṃpaṃte patanonmukhāḥ || 28 ||
[Analyze grammar]

yo vai yaṣṭyā tāḍayati dhenuṃ martyo vimūḍhadhīḥ |
dharmarājasya nagaraṃ sa yāti karavarjitaḥ || 29 ||
[Analyze grammar]

yo vai daṃśānvārayati tasya pūrve hyadhogatāḥ |
nṛtyaṃti matsuto hyasmāṃstārayiṣyati bhāgyavān || 30 ||
[Analyze grammar]

atraivodāharaṃtīmamitihāsaṃ purātanam |
janakasya purāvṛttaṃ dharmarājapure'dbhutam || 31 ||
[Analyze grammar]

ekadā janako rājā yogenāsūnsamatyajat |
tadā vimānaṃ saṃprāptaṃ kiṃkiṇījālabhūṣitam || 32 ||
[Analyze grammar]

tadāruhya gato rājā sevakairūḍhadehavān |
mārge jagāma dharmasya saṃyaminyāḥ puroṃ'tike || 33 ||
[Analyze grammar]

tadā narakakoṭīṣu pīḍyaṃte pāpakāriṇaḥ |
janakasyāṃgapavanaṃ prāpya saukhyaṃ prapedire || 34 ||
[Analyze grammar]

niraye dāhajāpīḍā jātaiṣāṃ sukhakāriṇī |
mahāduḥkhaṃ tadā naṣṭaṃ janakasyāṃgavāyunā || 35 ||
[Analyze grammar]

tadā taṃ nirgataṃ dṛṣṭvā jaṃtavaḥ pāpapīḍitāḥ |
atyaṃtaṃ cukruśurbhītāstadviyogamanicchavaḥ || 36 ||
[Analyze grammar]

ūcuste karuṇāṃ vācaṃ mā gaccha sukṛtinnitaḥ |
tvadaṃgavāyusaṃsparśātsukhinaḥ syāmapīḍitāḥ || 37 ||
[Analyze grammar]

iti vākyaṃ samākarṇya rājā paramadhārmikaḥ |
mānase ciṃtayāmāsa karuṇāpūrapūritaḥ || 38 ||
[Analyze grammar]

cenmattaḥ prāṇināṃ saukhyaṃ bhavediha tadā punaḥ |
atraiva ca pure sthāsye svarga eṣa manoramaḥ || 39 ||
[Analyze grammar]

evaṃ kṛtvā nṛpastasthau tatraiva nirayāgrataḥ |
vidadhatprāṇināṃ saukhyamanukaṃpitamānasaḥ || 40 ||
[Analyze grammar]

tatra dharmastu saṃprāpto nirayadvāri duḥkhade |
kārayanyātanāstīvrā nānāpātakakāriṇām || 41 ||
[Analyze grammar]

tadā dadarśa rājānaṃ janakaṃ dvārisaṃsthitam |
vimānena mahāpuṇyakāriṇaṃ dayayāyutam || 42 ||
[Analyze grammar]

tamuvāca pretapatirjanakaṃ sahasangirā |
rājankutastvaṃ saṃprāptaḥ sarvadharmaśiromaṇiḥ || 43 ||
[Analyze grammar]

etatsthānaṃ pātakināṃ duṣṭānāṃ prāṇaghātinām |
nāyāṃti puruṣā bhūpa tvādṛśāḥ puṇyakāriṇaḥ || 44 ||
[Analyze grammar]

atrāyāṃti narāste vai ye paradrohatatparāḥ |
parāpavādaniratāḥ paradravyaparāyaṇāḥ || 45 ||
[Analyze grammar]

yo vai kalatraṃ dharmiṣṭhaṃ nijasevāparāyaṇam |
aparādhādṛte jahyātsanaro'tra samāvrajet || 46 ||
[Analyze grammar]

mitraṃ vañcayate yastu dhanalobhena lobhitaḥ |
āgatyātra naraḥ pīḍāṃ mattaḥ prāpnoti dāruṇām || 47 ||
[Analyze grammar]

yo rāmaṃ manasā vācā karmaṇā daṃbhato'pi vā |
dveṣādvācopahāsādvā na smaratyeva mūḍhadhīḥ || 48 ||
[Analyze grammar]

taṃ badhnāmi punastveṣu nikṣipya śrapayāmi ca |
yaiḥ smṛto na ramānātho narakakleśavārakaḥ || 49 ||
[Analyze grammar]

tāvatpāpaṃ manuṣyāṇāmaṃgeṣu nṛpa tiṣṭhati |
yāvadrāmaṃ na rasanā gṛṇāti kali durmateḥ || 50 ||
[Analyze grammar]

mahāpāpakarā rājanye bhavaṃti mahāmate |
tānānayaṃti madbhṛtyāstvādṛśāndraṣṭumakṣamāḥ || 51 ||
[Analyze grammar]

tasmādgaccha mahārāja bhuṃkṣva bhogānanekaśaḥ |
vimānavaramāruhya bhuṃkṣva puṇyamupārjitam || 52 ||
[Analyze grammar]

iti vākyaṃ samākarṇyadha rmarājasya tatpateḥ |
uvāca dharmarājānaṃ karuṇāpūrapūritaḥ || 53 ||
[Analyze grammar]

janaka uvāca |
ahaṃ gacchāmi no nātha jīvānāmanukampayā |
madaṃgavāyunā hyete sukhaṃ prāptāḥ sma saṃsthitāḥ || 54 ||
[Analyze grammar]

etānmuṃcasi cedrājansarvānvai nirayasthitān |
tato gacchāmi sukhitaḥ svargaṃ puṇyajanāśritam || 55 ||
[Analyze grammar]

jābāliruvāca |
iti vākyamathāśrutya janakaṃ pratyuvāca saḥ |
pratyekaṃ nirdiśañjīvānnirayasthānanekaśaḥ || 56 ||
[Analyze grammar]

dharma uvāca |
ayaṃ mitra kalatraṃ vai viśvastamanujagmivān |
tasmādenaṃ lohaśaṃkau varṣāyutamapīpacam || 57 ||
[Analyze grammar]

paścādenaṃ sūkarāṇāṃ yonau nikṣipya doṣiṇam |
mānuṣeṣvavatāryo'yaṃ ṣaṃḍhacihnena cihnitaḥ || 58 ||
[Analyze grammar]

anena paradārāśca balādāligitā muhuḥ |
tasmādayaṃ pacyate'tra raurave śatahāyanam || 59 ||
[Analyze grammar]

ayaṃ tu parakīyaṃ svaṃ muṣitvā bubhuje kudhīḥ |
tasmādasya karau chittvā paceyaṃ pūyaśoṇite || 60 ||
[Analyze grammar]

ayaṃ sāyaṃtane prāptamatithiṃ kṣudhayārditam |
vāṇyāpi nākarottasya pūjanaṃ svāgataṃ na ca || 61 ||
[Analyze grammar]

tasmādayaṃ pātanīyastāmisreṃdhanapūrite |
bhramaraiḥ pīḍito yātu yātanāṃ śatahāyanam || 62 ||
[Analyze grammar]

ayaṃ tāvatparasyoccairniṃdāṃ kurvannalajjitaḥ |
ayamapyaśṛṇotkarṇau prerayanbahuśastu tām || 63 ||
[Analyze grammar]

tasmādimāvaṃdhakūpe patitau duḥkhaduḥkhitau |
ayaṃ mitradhrugudvignaḥ pacyate raurave bhṛśam || 64 ||
[Analyze grammar]

tasmādetānpāpabhogānkārayitvā vimocaye |
tvaṃ gaccha naraśārdūla puṇyarāśividhāyakaḥ || 65 ||
[Analyze grammar]

jābāliruvāca |
evaṃ sa nirdiśañjīvāṃstūṣṇīmāsāghakāriṇaḥ |
provāca rāmabhakto'sau karuṇāpūritekṣaṇaḥ || 66 ||
[Analyze grammar]

janaka uvāca |
kathaṃ nirayanirmuktirjīvānāṃ duḥkhināṃ bhavet |
tadāśu kathaya tvaṃ vai yatkṛtvā sukhamāpnuyuḥ || 67 ||
[Analyze grammar]

dharma uvāca |
naibhirārādhito viṣṇurnaibhistasya kathāḥ śrutāḥ |
kathaṃ nirayanirmuktirbhavedvai pāpakāriṇām || 68 ||
[Analyze grammar]

yadi tvaṃ mocayasyetānmahāpāpakarānapi |
tarhyarpaya mahārāja puṇyaṃ tatkathayāmi yat || 69 ||
[Analyze grammar]

ekadā prātarutthāya śuddhabhāvena cetasā |
dhyātaḥ śrīraghunātho'sau mahāpāpaharābhidhaḥ || 70 ||
[Analyze grammar]

rāmarāmeti yaccoktaṃ tvayā śuddhena cetasā |
tatpuṇyamarpayaitebhyo yena syānnirayāccyutiḥ || 71 ||
[Analyze grammar]

jābāliruvāca |
etacchrutvā vacastasya dharmarājasya dhīmataḥ |
puṇyaṃ dadau mahārāja ājanmasamupārjitam || 72 ||
[Analyze grammar]

yadā janmakṛtaiḥ puṇyai raghunāthārcanodbhavaiḥ |
eteṣāṃ nirayānmuktirbhavatvatra manoramā || 73 ||
[Analyze grammar]

evaṃ kathayatastasya jīvā nirayasaṃsthitāḥ |
tatkṣaṇānnirayānmuktā jātā divyavapurdharāḥ || 74 ||
[Analyze grammar]

ūcuste janakaṃ rājaṃstvatprasādādvayaṃ kṣaṇāt |
duḥkhadānnirayānmuktā yāsyāmaḥ paramaṃ padam || 75 ||
[Analyze grammar]

tāndṛṣṭvā sūryasaṃkāśānnarānnirayaniḥsṛtān |
tutoṣa citte subhṛśaṃ sarvabhūtadayāparaḥ || 76 ||
[Analyze grammar]

te sarve prayayurlokaṃ divaṃ devairalaṃkṛtam |
janakaṃ tu praśaṃsaṃto mahārājaṃ dayānidhim || 77 ||
[Analyze grammar]

iti śrīpadmapurāṇe pātālakhaṃḍe śeṣavātsyāyanasaṃvāde rāmāśvamedhe satyavadākhyāne janakena narakasthaprāṇimocanaṃnāma triṃśo'dhyāyaḥ || 30 ||
[Analyze grammar]