Chapter 10

janakavitarko nāma sargaḥ |
daśamaḥ sargaḥ |
vasiṣṭhaḥ |
iti cintayatastasya puraḥ sampraviveśa ha |
pratīhāraḥ prage bhānoḥ syandanāgramivāruṇaḥ || 1 ||
[Analyze grammar]

pratīhāraḥ |
deva dosstambhaviśrāntasamastavasudhābhara |
sampādayottiṣṭha dinavyāpāraṃ nṛpatocitam || 2 ||
[Analyze grammar]

etāḥ kusumakarpūrakuṅkumāmbughaṭāḥ striyaḥ |
snānabhūmau sthitāḥ sajjā nadyo mūrtiyutā iva || 3 ||
[Analyze grammar]

eṣā kamalakalhārakānanabhrāntaṣaṭpadā |
kṛtā kamalinī stryarthaṃ racitāṃśukamaṇḍapā || 4 ||
[Analyze grammar]

etāḥ kamalinītīrabhuvaśchattraiḥ prapūritāḥ |
sacāmararathebhāśvaiḥ snānāvasarasevinām || 5 ||
[Analyze grammar]

samagrasumanaḥpūrṇai ratnauṣadhipariplutaiḥ |
sajjīkṛtāḥ paṭalakairdevārcanabhuvastava || 6 ||
[Analyze grammar]

snātaḥ pavitrahastaśca parijaptāghamarṣaṇam |
tvāmeva prekṣate deva dakṣiṇārho dvijavrajaḥ || 7 ||
[Analyze grammar]

calaccāmarahastābhiḥ pālyante parameśvara |
sajjīkṛtāstu kāntābhiśśītā bhojanabhūmayaḥ || 8 ||
[Analyze grammar]

śīghramuttiṣṭha bhadraṃ te niyataṃ kāryamācara |
na kālamativartante mahāntaḥ sveṣu karmasu || 9 ||
[Analyze grammar]

pratīhārapatāvitthamuktavatyatha pārthivaḥ |
tathaiva cintayāmāsa citrāṃ saṃsārasaṃsthitim || 10 ||
[Analyze grammar]

kiyanmātramidaṃ nāma rājyaṃ sukhamiti sthitam |
na prayojanametena mameha kṣaṇabhaṅginā || 11 ||
[Analyze grammar]

sarvameva parityajya mithyāḍambarasambhramam |
ekānta eva tiṣṭhāmi saṃśānta iva vāridhiḥ || 12 ||
[Analyze grammar]

alamebhirasatprāyairmama bhogavijṛmbhitaiḥ |
tyaktvā sarvāṇi karmāṇi sukhaṃ tiṣṭhāmi kevalaḥ || 13 ||
[Analyze grammar]

citta cāturyametasmādbhogābhyāsakusambhramāt |
tyaja janmajarājāḍyajālajambālaśāntaye || 14 ||
[Analyze grammar]

daśāsu yāsu yāsveva sambhramaṃ citta paśyasi |
tābhya evātivirataṃ paramaṃ sukhameṣyasi || 15 ||
[Analyze grammar]

pravṛttaṃ sannivṛttaṃ sadbhūyo bhūyaściraṃ ciram |
bhogabhūmiṣu sarvāsu citta tṛptiṃ na gacchasi || 16 ||
[Analyze grammar]

tasmāttavālamanayā tucchayā bhogacintayā |
bhavatyakṛtrimā tṛptiryenābhipata tattatam || 17 ||
[Analyze grammar]

iti sañcintya janakastūṣṇīmeva babhūva ha |
śāntacāpalacetastvāl lipikarmārpitopamaḥ || 18 ||
[Analyze grammar]

pratīhāro'pi novāca gauraveṇa bhayena ca |
punarvākyaṃ mahīpānāṃ cittavṛttiṣvaśīlitam || 19 ||
[Analyze grammar]

tūṣṇīmatha kṣaṇaṃ sthitvā janako janajīvitam |
punaḥ sañcintayāmāsa manasā śamaśālinā || 20 ||
[Analyze grammar]

kimupādeyamastīha yatnātsaṃsādhayāmi yat |
kasminvastuni badhnāmi dhṛtiṃ nāśavivarjite || 21 ||
[Analyze grammar]

kiṃ me kriyāparatayā kiṃ niṣkriyatayāpi vā |
na tadasti vināśena varjitaṃ yatkiloditam || 22 ||
[Analyze grammar]

kriyāvānakriyo vāstu kāyo'yamasadutthitaḥ |
sataḥ sthirasya śuddhasya citaḥ kā nāma me kṣatiḥ || 23 ||
[Analyze grammar]

nābhivāñchāmyasamprāptaṃ samprāptaṃ na tyajāmyaham |
svastha ātmani tiṣṭhāmi yanmamāsti tadastu me || 24 ||
[Analyze grammar]

na mameha kṛtenārtho nākṛteneha kaścana |
kriyayākriyayā vāpi yatprāpyaṃ sadasatsataḥ || 25 ||
[Analyze grammar]

akurvataḥ kurvato vā yuktāyuktāḥ kriyā mama |
nābhivāñchitamastīha yadupādeyatāṃ gatam || 26 ||
[Analyze grammar]

tadutthāya kramaprāptāṃ kāyo'yaṃ prakṛtāṃ kriyām |
karotvaspanditāṅgastu kimayaṃ sādhayiṣyati || 27 ||
[Analyze grammar]

sthite manasi niṣkāme same vigatarañjane |
kāyāvayavajau kāryaspandāspandau phale samau || 28 ||
[Analyze grammar]

karmajāsu phalaśrīṣu manasaḥ kartṛbhoktṛte |
tasminpraśamamāyāte kṛtamapyakṛtaṃ nṛṇām || 29 ||
[Analyze grammar]

yo niścayo'ntaḥ puruṣasya rūḍhaḥ kriyāsvasau tanmayatāmupaiti |
anāmayaṃ me padamāgatā dhīradhīratāmantaralaṃ tyajāmi || 30 ||
[Analyze grammar]