Chapter 130

bhārgavopākhyāne navasaṅgamo nāma sargaḥ |
triṃśaduttaraśatatamaḥ sargaḥ |
vasiṣṭhaḥ |
iti cittavilāsena ciramutprekṣitaiḥ priyaiḥ |
praṇayairbhārgavasyāsīttuṣṭaye sasamāgamaḥ || 1 || mandāradāmākulayā vaibudhāsavamattayā |
tadā tena tayā sārdhaṃ dvitīyenāmalendunā || 2 ||
[Analyze grammar]

vihṛtaṃ mattahaṃsāsu hemapaṅkajinīṣu ca |
taṭeṣvamaravāhinyāḥ saha kinnaracāraṇaiḥ || 3 ||
[Analyze grammar]

pītamindudalasyandi devaiḥ saha rasāyanam |
pārijātalatājālanilayeṣu vilāsinā || 4 ||
[Analyze grammar]

cārucaitrarathodyānalatādolāsu līlayā |
ciraṃ vilasitaṃ vyagraiḥ saha vidyādharīgaṇaiḥ || 5 ||
[Analyze grammar]

nandanopavanābhogo mandareṇeva vāridhiḥ |
bhṛśamullolatāṃ nītaḥ pramathaiḥ saha śāmbhavaiḥ || 6 ||
[Analyze grammar]

bālahemalatājālajaṭilāsu darīṣu ca |
bhrāntamunmattarāgeṇa mairavīṣvabjinīṣviva || 7 ||
[Analyze grammar]

kailāsavanakuñjeṣu tayā saha vilāsinā |
hārendudhavalā rātriḥ kṣapitā gaṇagītibhiḥ || 8 ||
[Analyze grammar]

gandhamādanaśailasya viśramyopari sānuṣu |
sā tena kanakāmbhojairāpādamabhimaṇḍitā || 9 ||
[Analyze grammar]

lokālokataṭānteṣu vicitrāścaryahāriṣu |
krīḍitaṃ kṛtahāsena rāma tena tayā saha || 10 ||
[Analyze grammar]

mandarāntarakaccheṣu sārdhaṃ hariṇaśāvakaiḥ |
avasatsa samāṣṣaṣṭiṃ kalpitāmaramandiraḥ || 11 ||
[Analyze grammar]

kṣīrārṇavataṭeṣvasya vanitāsahacāriṇaḥ |
kṣīṇaṃ kṛtayugādardhaṃ śvetadvīpajanaiḥ saha || 12 ||
[Analyze grammar]

gandharvanagarodyānalīlāviracanairasau |
sṛṣṭānantajagatsṛṣṭeḥ kālasyānukṛtiṃ gataḥ || 13 ||
[Analyze grammar]

athāvasadasau śukraḥ purandarapure punaḥ |
sukhaṃ caturyugānyaṣṭau hariṇekṣaṇayā saha || 14 ||
[Analyze grammar]

puṇyakṣayānusandhānāttataścāvanimaṇḍale |
tayaiva saha māninyā papātāpahṛtākṛtiḥ || 15 ||
[Analyze grammar]

parālūnasamastāṅgo hṛtasyandananandanaḥ |
cintāparavaśo dhvastaḥ samitīvāhato bhaṭaḥ || 16 ||
[Analyze grammar]

patitasyāvanau tasya cintayā saha dīrghayā |
śarīraṃ śatadhā yātaṃ śilāpātīva nirjharaḥ || 17 ||
[Analyze grammar]

saṃśīrṇayordehakayościtte te vāsanāvṛte |
viceratustayorvyomni nirnīḍau vihagau yathā || 18 ||
[Analyze grammar]

tatrāviviśatuścāndraṃ te citte raśmijālakam |
prāleyatāmupetyāśu śālitāmatha jagmatuḥ || 19 ||
[Analyze grammar]

śālīṃstānbhuktavānpakvāndaśārṇeṣu dvijottamaḥ |
śaukrāñchukrāṅganāgarbhānmālaveṣu ca bhūpatiḥ || 20 ||
[Analyze grammar]

ajāyatośanāḥ pūrvaṃ daśārṇeṣu dvijottamāt |
nṛpāduttamasaubhāgyānmālaveṣu tadaṅganā || 21 ||
[Analyze grammar]

sa tatra vavṛdhe bālaḥ sā tatra vavṛdhe'ṅganā |
tau pūrvadampatī jātau svarbhraṣṭāviva bhūtale || 22 ||
[Analyze grammar]

atha ṣoḍaśavarṣo'bhūcchukraḥ sāraṅganāmabhṛt |
piturgṛhe yauvanavāñchrīmānviprakumārakaḥ || 23 ||
[Analyze grammar]

mālānāmasurastrī sā kumārī rājasadmani |
bhṛṅgekṣaṇā gatā vṛddhiṃ latā varavane yathā || 24 ||
[Analyze grammar]

rājaputrī tato mālā pūjayāmāsa śaṅkaram |
labheyaṃ prāktanaṃ siddhaṃ patimityaniśaṃ śubhā || 25 ||
[Analyze grammar]

atha mālavabhūpasya yajñe dvijasabhāgatam |
mālā dadarśa sāraṅgaṃ pitrā saha samāgatam || 26 ||
[Analyze grammar]

taṃ dṛṣṭvā sānavadyāṅgī prāktanasnehabhāvitā |
dṛṣṭacandrendumaṇivatsnehasvinnāṅgikā babhau || 27 ||
[Analyze grammar]

tato yajñasabhāmadhye dāśārṇadvijadārakam |
bhartṛtve varayāmāsa sā mālā mālavātmajā || 28 ||
[Analyze grammar]

kramātkṛtavivāhāya tasmai vārdhakajarjaraḥ |
mālaveśo'khilaṃ rājyaṃ pratipādya vanaṃ yayau || 29 ||
[Analyze grammar]

sa sāraṅgastayā sārdhaṃ tasminmālavamaṇḍale |
cakārātisukhī rājyaṃ śakravaccharadāṃ śatam || 30 ||
[Analyze grammar]

atha kālena mahatā cañcalatvācca cetasaḥ |
apriyatvaṃ mitho yātau dampatī tau vidhervaśāt || 31 ||
[Analyze grammar]

sāraṅgastu jarājīrṇaḥ pātasajjakalevaraḥ |
dadhre śvasanaśaithilyājjīrṇaparṇasavarṇatām || 32 ||
[Analyze grammar]

jāyājanavirāgeṇa vārdhakātiśayena ca |
maraṇaṃ mandamandeho nirīho'bhinananda saḥ || 33 ||
[Analyze grammar]

atha nīrasarājyasya duḥkhātiśayaśaṃsinaḥ |
araṇya iva vetālo moho'tighanatāṃ gataḥ || 34 ||
[Analyze grammar]

mohāndhakūpapatitaṃ bhogāsaṅgādanāratam |
avivekinamajñānamasajjanaparāyaṇam || 35 ||
[Analyze grammar]

jahārainaṃ tato mṛtyustṛṣṇākavalitāśayam |
pataṅgamiva maṇḍūkaḥ kṛtākrandamakiñcanam || 36 ||
[Analyze grammar]

tataḥ karmaphalaṃ bhuktvā svaṃ paratra śubhāśubham |
aṅgeṣu dhīvaro jātaḥ sa durbhāvavaśāttadā || 37 ||
[Analyze grammar]

tatra dhīvarakarmāṇi kurvan sa śaradāṃ śatam |
duḥkhajarjaracetastvādvairāgyaṃ samupāyayau || 38 ||
[Analyze grammar]

duḥkhaṃ saṃsāra ityevaṃ cintayanbhāskaraṃ tataḥ |
sampataṃstena sañjātaḥ sūryavaṃśe mahānṛpaḥ || 39 ||
[Analyze grammar]

śubhabhāvavaśātso'tha kiñcijjñānamavāptavān |
jajñe nṛpatanuṃ tyaktvā guruḥ sarvopadeśakaḥ || 40 ||
[Analyze grammar]

mantrasādhitasiddhirhi so'tha vidyādharo'bhavat |
kalpamekaṃ tu bubhuje tato vaidyādharīṃ purīm || 41 ||
[Analyze grammar]

kalpāvasānasamayaṃ nītvā pavanarūpayā |
tanvā sṛṣṭau pravṛttāyāṃ bhūyo jāto muneḥ sutaḥ || 42 ||
[Analyze grammar]

tato munīnāṃ samparkāttapasyugre vyavasthitaḥ |
avasanmerugahane manvantaramaninditaḥ || 43 ||
[Analyze grammar]

tatra tasya samutpanno mṛgyāḥ putro narākṛtiḥ |
tatsnehena paraṃ mohaṃ punarabhyāyayau kṣaṇāt || 44 ||
[Analyze grammar]

putrasyāsya dhanaṃ me'stu guṇāścāyuśca śāśvatam |
ityanāratacintābhirjahau satyāmavasthitim || 45 ||
[Analyze grammar]

dharmacintāparibhraṃśātputrārthaṃ bhogacintanāt |
kṣīṇāyuṣaṃ tamaharanmṛtyuḥ sarpa ivānilam || 46 ||
[Analyze grammar]

bhogaikacintayā sārdhaṃ sa samutkrāntacetanaḥ |
prāpya madreśaputratvamāsīnmadramahīpatiḥ || 47 ||
[Analyze grammar]

madradeśe ciraṃ kṛtvā rājyamucchinnaśātravaḥ |
jarāmabhyājagāmātra himāśanirivāmbujam || 48 ||
[Analyze grammar]

madrarājatanuṃ tāṃ tu tapovāsanayā saha |
tatyāja tena jāto'sau tapasvī tāpasātmajaḥ || 49 ||
[Analyze grammar]

samaṅgāyā mahānadyāstaṭamāsādya tāpasaḥ |
tapastepe mahābuddhiḥ sa rāma vigatajvaraḥ || 50 ||
[Analyze grammar]

vividhajanmadaśāvivaśāśayaḥ samanusṛtya śarīraparamparām |
sukhamatiṣṭhadasau bhṛgunandano varanadīsutaṭe dṛḍhavṛkṣavat || 51 ||
[Analyze grammar]