Chapter 129

bhārgavopākhyāne bhārgavamanorājyaṃ nāma sargaḥ |
ekonatriṃśaduttaraśatatamaḥ sargaḥ |
vasiṣṭhaḥ |
iti śukraḥ puraṃ prāpya vaibudhaṃ svena cetasā |
visasmāra nijaṃ bhāvaṃ prāktanaṃ vyasanaṃ vinā || 1 || muhūrtamatha viśramya tasya pārśve śacīpateḥ |
svargaṃ vihartumuttasthau svarvāsiparicoditaḥ || 2 ||
[Analyze grammar]

svargaśriyaṃ samālokya lolalocanalāñchitam |
straiṇaṃ draṣṭuṃ jagāmāsau nalinīmiva sārasaḥ || 3 ||
[Analyze grammar]

tatra tāṃ mṛgaśāvākṣīṃ kāntāmadhyāgatāmasau |
dadarśa vipināntassthāṃ bhṛṅgaścūtalatāmiva || 4 ||
[Analyze grammar]

tāmālokya lasallolavilāsavalitākṛtim |
āsīdvilīyamānāṅgo jyotsnayendumaṇiryathā || 5 ||
[Analyze grammar]

vilīyamānasarvāṅgastāmavaikṣata kāminīm |
candrakānta iva jyotsnāṃ śītalāṃ khe vilāsinīm || 6 ||
[Analyze grammar]

tenāvalokitā sāpi tatparāyaṇatāṃ gatā |
niśānte cakravākena kānteva parikūjitā || 7 ||
[Analyze grammar]

rasādvikasatornūnamanyo'nyamanuraktayoḥ |
prātararkanalinyoryā śobhā saiva tayorabhūt || 8 ||
[Analyze grammar]

saṅkalpitārthadāyitvāddeśasya madanena sā |
sarvāṅgaṃ vivaśīkṛtya śukrāyaiva samarpitā || 9 ||
[Analyze grammar]

petuḥ smaraśarāstasyā mṛduṣvaṅgeṣu bhūriśaḥ |
palāśeṣviva padminyā dhārā navapayomucaḥ || 10 ||
[Analyze grammar]

sā babhūva smarādhūtā lolālivalayālakā |
mandavātavinunnāyā mañjaryāḥ sahadharmiṇī || 11 ||
[Analyze grammar]

nīlanīrajanetrāṃ tāṃ haṃsavāraṇagāminīm |
madanaḥ kṣobhayāmāsa pūraḥ kamalinīmiva || 12 ||
[Analyze grammar]

atha tāṃ tādṛśīṃ dṛṣṭvā śukraḥ saṅkalpitārthabhāk |
tamaḥ saṅkalpayāmāsa saṃhāramiva bhūtakṛt || 13 ||
[Analyze grammar]

triviṣṭapasya deśo'sau babhūva timirākulaḥ |
bhūlokasyāndhatamaso lokālokataṭo yathā || 14 ||
[Analyze grammar]

lajjāndhakāratīkṣṇāṃśau tasmiṃstimiramaṇḍale |
pratiṣṭhāmāgate tasya mithunasyeva manmathe || 15 ||
[Analyze grammar]

teṣu sarveṣu bhūteṣu gateṣvabhimatāṃ diśam |
tasmātpradeśādbhūlokaṃ dinānte vihageṣviva || 16 ||
[Analyze grammar]

sā dīrghadhavalāpāṅgā pravṛddhamadanā tathā |
ājagāma bhṛgoḥ putraṃ mayūrī vāridaṃ yathā || 17 ||
[Analyze grammar]

dhavalāgāramadhyasthe paryaṅke parikalpite |
viveśa bhārgavastatra kṣīroda iva mādhavaḥ || 18 ||
[Analyze grammar]

sā pādāvavalambyāsya vivaśeva varānanā |
rarāja ca surebhasya pādalagneva padminī || 19 ||
[Analyze grammar]

uvāca cedaṃ lalitaṃ lasatsnehotkayā girā |
vaco madhuramānandi vilāsavalitākṣaram || 20 ||
[Analyze grammar]

paśyāmalenduvadana maṇḍalīkṛtakārmukaḥ |
abalāmanubadhnāti māmeṣa kimanaṅgakaḥ || 21 ||
[Analyze grammar]

pāhi māmabalāṃ nātha dīnāṃ tvaccharaṇāmiha |
kṛpaṇāśvāsanaṃ sādho viddhi saccaritavratam || 22 ||
[Analyze grammar]

snehadṛṣṭimajānadbhirmūḍhaireva mahāmate |
praṇayā avagaṇyante na rasajñaiḥ kadācana || 23 ||
[Analyze grammar]

aśaṅkitopasampannaḥ praṇayo'nyo'nyaraktayoḥ |
adhaḥkaroti niṣyandaṃ cāndramāsvāditaṃ priya || 24 ||
[Analyze grammar]

na tathā sukhayatyeṣā cetastribhuvaneśatā |
yathā parasparānandī snehaḥ prathamaraktayoḥ || 25 ||
[Analyze grammar]

tvatpādasparśaneneyaṃ samāśvastāsmi mānada |
candrapādaparāmṛṣṭā yathā niśi kumudvatī || 26 ||
[Analyze grammar]

saṃsparśāmṛtapānena tava jīvāmi sundara |
candrāṃśurasapānena cakorī capalā yathā || 27 ||
[Analyze grammar]

māmimāṃ caraṇālīnāṃ bhramarīṃ karapallavaiḥ |
āliṅgyāmṛtasampūrṇe satpadmahṛdaye kuru || 28 ||
[Analyze grammar]

ityuktvā puṣpamṛdvaṅgī sā tasya patitorasi |
vyāghūrṇitālinayanā sutarāviva mañjarī || 29 ||
[Analyze grammar]

tau dampatī tatra vilāsakāntau vilesatustāsu vanasthalīṣu |
kiñjalkagaurānilaghūrṇitāsu mattau dvirephāviva padminīṣu || 30 ||
[Analyze grammar]