Chapter 89

aindavaniścayakathanaṃ nāma sargaḥ |
ekonanavatitamaḥ sargaḥ |
bhānuḥ |
śrūyate hi purā deva magadheṣu mahīpatiḥ |
indradyumna iti khyāta indradyumna ivāparaḥ || 1 ||
[Analyze grammar]

tasyendubimbapratimā bhāryā kamalalocanā |
ahalyā nāma tatrāsīcchaśāṅkasyeva rohiṇī || 2 ||
[Analyze grammar]

tasminneva pure śiḍgaḥ kilāsīdbalavāniti |
indranāmāparaḥ kaścicchrīmānviprakumārakaḥ || 3 ||
[Analyze grammar]

ahalyā pūrvamindrasya babhūveṣṭetyahalyayā |
śrutaṃ rājamahiṣyātha kathāprastāvataḥ kvacit || 4 ||
[Analyze grammar]

ākarṇya tadahalyā sā babhūvendrānurāgiṇī |
ahalyāṃ māṃ na kasmātsa śakro'bhyetīti sotsukā || 5 ||
[Analyze grammar]

mṛṇālahārakadalīpallavāstaraṇeṣu sā |
atapyata bhṛśaṃ bālā latālūnā vaneṣviva || 6 ||
[Analyze grammar]

khedamāpa samagrāsu tāsu bhūpavibhūtiṣu |
matsī nidāghataptāsu parilolā sthaleṣviva || 7 ||
[Analyze grammar]

ayamindro'yamindraścetyevaṃ jātapralāpayā |
lajjāpi hi tayā tyaktā vaivaśyamupayātayā || 8 ||
[Analyze grammar]

ityārtāyā ghanasnehamatha tasyā vayasyayā |
uktamāli tavāvighnamindramapyānayāmyaham || 9 ||
[Analyze grammar]

indraṃ tavānayāmīti śrutvā vikasitekṣaṇā |
papāta pādayoḥ sakhyā nalinyā nalinī yathā || 10 ||
[Analyze grammar]

tataḥ prayāte divase samāyāte niśāgame |
sā vayasyā tamindrākhyaṃ yayau viprakumārakam || 11 ||
[Analyze grammar]

bodhayitvā yathāyuktaṃ sā tamindrakumārakam |
ahalyānikaṭaṃ rātrāvānayāmāsa satvaram || 12 ||
[Analyze grammar]

sā tatastena śiḍgena mahendreṇa ratiṃ yayau |
kasmiṃścitsadane gupte bahumālyavilepanā || 13 ||
[Analyze grammar]

hārāṅgadamanojñena tena sā taruṇī tadā |
ratenāvarjitā vallī rasena madhunā yathā || 14 ||
[Analyze grammar]

tatastadanuraktā sā paśyantī tanmayaṃ jagat |
na sānantaguṇākīrṇaṃ bhartāraṃ bahvamanyata || 15 ||
[Analyze grammar]

kenacittvatha kālena tasyā indrānurāgitā |
sā jñātā rājasiṃhena tanmukhavyomacandrikā || 16 ||
[Analyze grammar]

indraṃ dhyāyati sā yāvattāvattasyā virājate |
mukhaṃ pūrṇena candreṇa prabuddhamiva kairavam || 17 ||
[Analyze grammar]

evamanyo'nyamāsaktabhāvamālokya bhūpatiḥ |
cakāra bahubhirdaṇḍaiḥ sa dvayoratha śāsanam || 18 ||
[Analyze grammar]

tāv ubhāvapi santyaktau hi santau salilāśaye |
tuṣṭau jahasatustatra na khedaṃ samupāgatau || 19 ||
[Analyze grammar]

apṛcchattau tato rājā khinnau sthaḥ kiṃ na durmatī |
tāv ūcaturmahīpālaṃ jalāśayasamuddhṛtau || 20 ||
[Analyze grammar]

saṃsṛtyāvāmihānyo'nyaṃ mukhakāntimaninditām |
muhyāvo na mahīpāla svāṅgairapi vikartitaiḥ || 21 ||
[Analyze grammar]

vahnāvapi parikṣiptāvakhinnāvevameva tau |
ūcaturmuditātmānāvanyo'nyaṃ smṛtiharṣitau || 22 ||
[Analyze grammar]

grathitau gajapādeṣu nakhinnāveva saṃsthitau |
evamevocaturbhūpamanyo'nyaṃ smṛtiharṣitau || 23 ||
[Analyze grammar]

kaṣāhatāvakhinnau tāvevameva kilocatuḥ |
paṅkamagnāvakhinnau tāvevameva kilocatuḥ || 24 ||
[Analyze grammar]

anyasmācchāsanājālātkalpitācca punaḥ punaḥ |
uddhṛtāv ūcatuḥ pṛṣṭau tamevārthaṃ punaḥ punaḥ || 25 ||
[Analyze grammar]

uvācendro mahīpāla jaganme dayitāmayam |
na śāsanāni duḥkhāni bādhante kiñcideva me || 26 ||
[Analyze grammar]

asyāścaiva jagad rājan sarvaṃ manmayameva hi |
tena nau śāsanāduḥkhaṃ kiñcideva na bādhate || 27 ||
[Analyze grammar]

mano nāma vayaṃ rājanmano hi puruṣaḥ smṛtaḥ |
prapañcamātramevāyaṃ deho dṛśyata eva hi || 28 ||
[Analyze grammar]

samakālaprayuktena sahasā daṇḍarāśinā |
dhīraṃ mano bhedhayituṃ na manāgapi śakyate || 29 ||
[Analyze grammar]

kā nāma tā mahārāja kīdṛśyaḥ kasya śaktayaḥ |
yābhirmanāṃsi bhidyante dṛḍhaniścayavantyapi || 30 ||
[Analyze grammar]

patatūdetu vā deho yātu vā viśarārutām |
bhāvitārthābhipatitaṃ manastiṣṭhati pūrvavat || 31 ||
[Analyze grammar]

iṣṭe'rthe ciramāviṣṭaṃ bhaṅktuṃ dhīraṃ sthitaṃ manaḥ |
bhāvā bhāvāśśarīrasthā mama śaktā na kecana || 32 ||
[Analyze grammar]

bhāvitaṃ tīvravegena manasā yanmahīpate |
tadeva paśyatyacalaṃ na śarīraviceṣṭitam || 33 ||
[Analyze grammar]

na kāścana kriyā rājanvaraśāpādikā api |
tīvrasaṃvegasampannaṃ śaktāścālayituṃ manaḥ || 34 ||
[Analyze grammar]

tīvravegena saṃsaktaṃ puruṣā hyabhivāñchite |
manaścālayituṃ śaktā na mahādriṃ mṛgā iva || 35 ||
[Analyze grammar]

rāmeyamasitāpāṅgā manaḥkośe pratiṣṭhitā |
devāgāre mahotsedhe devī bhagavatī yathā || 36 ||
[Analyze grammar]

na duḥkhamanugacchāmi priyayā jīvarakṣayā |
girirgrīṣmadaśādāhaṃ lagnayevābhramālayā || 37 ||
[Analyze grammar]

yatra yatra yathā rājaṃstiṣṭhāmyabhipatāmi vā |
tatreṣṭāsaṅgamādanyatkiṅcinnānubhavāmyaham || 38 ||
[Analyze grammar]

ahalyādayitānāmnā manasendrābhidhaṃ manaḥ |
saṃsaktamidamāyāti na svabhāvādṛte param || 39 ||
[Analyze grammar]

ekakāryaniviṣṭaṃ hi mano dhīrasya bhūpate |
na cālyate meruriva varaśāpabalairapi || 40 ||
[Analyze grammar]

deho hi varaśāpābhyāmanyatvamupagacchati |
na tu dhīraṃ mano rājanvijigīṣutayotthitam || 41 ||
[Analyze grammar]

etāni cātra manasāṃ na ca kāraṇāni rājañcharīraśakalānyasamutthitāni |
ceto hi kāraṇamamīṣu śarīrakeṣu vārīva sarvavanaṣaṇḍalatāraseṣu || 42 ||
[Analyze grammar]

ādyaṃ śarīramiha viddhi mano mahātman saṅkalpitā jagati tena śarīrasaṅghāḥ |
ādyaṃ śarīramabhitiṣṭhati yatra tatra tattadbhṛśaṃ phalati netaradasya puṃsaḥ || 43 ||
[Analyze grammar]

mukhyāṅkuraṃ subhaga viddhi mano hi puṃso dehāstataḥ pravisṛtāstarupallavābhāḥ |
naṣṭe'ṅkure punarudeti na pallavaśrīrna tvaṅkuraḥ kṣayamupaiti dalakṣayeṣu || 44 ||
[Analyze grammar]

dehakṣaye vividhadehagaṇaṃ karoti svapnāvanāviva vanaṃ navamāśu cetaḥ |
citte kṣate na tu karoti hi kiñcideva dehastataḥ samanupālaya cittaratnam || 45 ||
[Analyze grammar]

diśi diśi hariṇākṣīmeva paśyāmi rājanpriyayuvatimanastvānnityamānandito'smi |
tava sukhavikṛtīnāṃ yatphalaṃ duḥkhadāyi kṣaṇamatha suciraṃ vā tanna paśyāmi kiñcit || 46 ||
[Analyze grammar]