Chapter 46

līlopākhyāne satyakāmasatyasaṅkalpasthitirnāma sargaḥ |
ṣaṭcatvāriṃśatitamaḥ sargaḥ |
rāmaḥ |
evaṃ saṅkathayantīṣu tāsu tasmin gṛhodare |
vidūrathaḥ kimakaronnirgatya kupito gṛhāt || 1 ||
[Analyze grammar]

vasiṣṭhaḥ |
vidūrathaḥ svasadanānnirgatya parivāritaḥ |
parivāreṇa mahatā ṛkṣaughenaiva candramāḥ || 2 ||
[Analyze grammar]

sannaddhasarvāvayavo lagnahāravibhūṣaṇaḥ |
mahājayajayārāvaiḥ surendra iva nirgataḥ || 3 ||
[Analyze grammar]

samādiśanyodhagaṇaṃ śṛṇvanmaṇḍalasaṃsthitim |
ālokayanvīraraṇānāruroha nṛpo ratham || 4 ||
[Analyze grammar]

bhūtāgārasamākāraṃ muktāmāṇikyamaṇḍitam |
patākāpuñjakavyāptaṃ dyuvimānamivāgatam || 5 ||
[Analyze grammar]

candrabhittiparisrotaḥprapatatkāñcanāṅkuram |
muktājhaṇajhaṇatkāracāruvidrumakūvaram || 6 ||
[Analyze grammar]

sugrīvairlakṣaṇopetaiḥ praśastairdhavalaiḥ kṛśaiḥ |
javonnayanavegena prasravadbhiḥ khurāniva || 7 ||
[Analyze grammar]

vāyūnapīva sahajānasahadbhirgatikramaiḥ |
projjhadbhiriva paścārdhamāpibadbhirivāmbaram || 8 ||
[Analyze grammar]

yojitairiva saṃpūrṇaiścandraiścāmaradīptibhiḥ |
aśvairaṣṭabhirābaddhamāśāpūrakaheṣitaiḥ || 9 ||
[Analyze grammar]

athodabhūttadoddāmanāgābhraravanirbharaḥ |
śailabhittipratidhvānadāruṇo dundubhidhvaniḥ || 10 ||
[Analyze grammar]

mattasainikanirmuktairvyāptaiḥ kalakalāravaiḥ |
kiṅkiṇījālanidhvānairhetisaṅghaṭṭaṭāṅkṛtaiḥ || 11 ||
[Analyze grammar]

dhanuścaṭacaṭāśabdaiśśaraśītkāragāyanaiḥ |
parasparāṃsaniṣpiṣṭakavacaughajhaṇajjhaṇaiḥ || 12 ||
[Analyze grammar]

jvaladagniṭaṇatkārairārtimatkrandanāravaiḥ |
parasparaṃ bhaṭāhvānairbandīvikṣubdharodanaiḥ || 13 ||
[Analyze grammar]

śilāghanīkṛtāśeṣabrahmāṇḍakuharo dhvaniḥ |
hastagrāhyo bhavadbhīmo daśāśākuñjapūrakaḥ || 14 ||
[Analyze grammar]

athodapatadādityapathapīvararodhakam |
rajonibhena bhūpīṭhamambaroḍḍayanonmukham || 15 ||
[Analyze grammar]

garbhavāsamivāpannaṃ tenāsīttanmahāpuram |
mūrkhatvaṃ yauvaneneva ghanatāmāyayau tamaḥ || 16 ||
[Analyze grammar]

prayayuḥ kvāpi dīpaughā divaseneva tārakāḥ |
āyayurbalamālolā naiśabhūtaparamparāḥ || 17 ||
[Analyze grammar]

dadṛśustanmahāyuddhaṃ dve līle sā kumārikā |
prasphuraddhṛdayenaitā devīdattamahādṛśā || 18 ||
[Analyze grammar]

praśemuratha geheṣu prodyatkaṭakaṭāravāḥ |
ekārṇavapayaḥpūrairvāḍavā iva vahnayaḥ || 19 ||
[Analyze grammar]

śaraiḥ senāṃ samākarṣan rājā parabalāntaram |
viveśa pakṣaproḍḍīno merurekamivārṇavam || 20 ||
[Analyze grammar]

athodabhūdguṇadhvānaścaṭaccaṭaditi sphuṭam |
racitātmamayāmbhodāsteruśśaraparamparāḥ || 21 ||
[Analyze grammar]

yayurambaramāśritya nānāhetivihaṅgamāḥ |
prasasruralamāśāsu mihikāśśastradīptayaḥ || 22 ||
[Analyze grammar]

babhramuśśastrasaṅghaṭṭajvalanā ulmukāgnivat |
jagarjuśśaradhāraughānvarṣanto vīravāridāḥ || 23 ||
[Analyze grammar]

vileguḥ kaṅkavatkrūrā vīrāṅgeṣu ca hetayaḥ |
petuḥ paṭapaṭārāvaṃ hetiniṣpiṣṭayo'mbare || 24 ||
[Analyze grammar]

jagmuśśamaṃ tamāṃsyāśu śastrajvalanadīpakaiḥ |
babhūvurakhilāḥ senā navanārācaromaśāḥ || 25 ||
[Analyze grammar]

uttasthurnṛttayātrāyāṃ kabandhanaṭapaṅktayaḥ |
jaguruccai raṇadrohaṃ piśācyo raṇadārikāḥ || 26 ||
[Analyze grammar]

udagurmattasaṅghaṭṭatkreṅkārā dantināṃ bale |
ūhuḥ kṣepaṇapāṣāṇamattanadyo nabhastale || 27 ||
[Analyze grammar]

petuśca rathasaṅghātāḥ saṃśuṣkavanaparṇavat |
niryayurlohitā nadyo raṇādrermṛtivarṣiṇaḥ || 28 ||
[Analyze grammar]

praśemuḥ pāṃsavo raktaistamāṃsyāyudhavahnibhiḥ |
yuddhaikadhyānataśśabdā bhayāni mṛtiniścayaiḥ || 29 ||
[Analyze grammar]

abhavatkevalaṃ yuddhaṃ saśabdamasamaṃ bhramam |
anākulāmbuvāhābhakhaḍgavīcisajhāṅkṛtam || 30 ||
[Analyze grammar]

ṣavaṣavaravasaṃvahaccharaughaṃ kaṭakaṭaravasaṃpatadbhusuṇḍi |
jhaṇajhaṇaravasaṃmilanmahāstraṃ niśi navaraṇamāsa suptavattat || 31 ||
[Analyze grammar]