Chapter 13

saṃsṛtibījopadeśo nāma sargaḥ |
trayodaśaḥ sargaḥ |
vasiṣṭhaḥ |
parame brahmaṇi sphāre same samasamasthitau |
anutpannanabhastejastamassattādikātmani || 1 ||
[Analyze grammar]

pūrvaṃ cetyatvakalanaṃ svacetyāṃśasya cetanāt |
udeti cittvakalanaṃ citiśaktitvacetanāt || 2 ||
[Analyze grammar]

tato jīvatvakalanaṃ cetyasampoṣacetanāt |
tato'hambhāvakalanaṃ cetyaikaparatāvaśāt || 3 ||
[Analyze grammar]

tato buddhitvakalanamahantāpariṇāmataḥ |
etadeva manastādiśabdatanmātrakādimat || 4 ||
[Analyze grammar]

aucchūnyādanyatanmātrabhāvanādbhūtarūpiṇaḥ |
ayamitthaṃ mahāgulmo jagadādirvilokyate || 5 ||
[Analyze grammar]

jhagityeva krameṇeti svapne puramivākṛtam |
mahākāśamahāṭavyāmudbhūyodbhūya naśyatām || 6 ||
[Analyze grammar]

jagatkarañjakuñjānāṃ bījametadavāpajam |
nāpekṣate kiñcidapi kṣitivāryanilādikam || 7 ||
[Analyze grammar]

etaccidātmakaṃ paścātkilorvyādi kariṣyati |
svapnasaṃvitpuramiva cinmātrātmakameva tat || 8 ||
[Analyze grammar]

jagadādyaṅkuraṃ yatratatrasthamapi muñcati |
jagataḥ pañcakaṃ bījaṃ pañcakasya cidavyayā || 9 ||
[Analyze grammar]

yadbījaṃ tatphalaṃ viddhi tasmādbrahmamayaṃ jagat |
evameṣa mahākāśe sargādau pañcako gaṇaḥ || 10 ||
[Analyze grammar]

cicchaktyākāśabhūtātmā kalpito'sti na vāstavaḥ |
anenocchūnatāmetya yadapīdaṃ vitanyate || 11 ||
[Analyze grammar]

tadapyākāśarūpātma kalanātma na sanmayam |
na kvacinnāma tatsiddhaṃ yadasiddhena sādhyate || 12 ||
[Analyze grammar]

kharūpaṃ yadvikalpātma kathaṃ tatsatyatāmiyāt |
atha cetpañcakaṃ brahma brahmātmakatayā tayā || 13 ||
[Analyze grammar]

tatpañcakavidhiprauḍho brahmaiva trijagadbhramaḥ |
yathā sphurati sargādāveṣa pañcakasambhavaḥ || 14 ||
[Analyze grammar]

tathaivādyeha bhūtatve yāti kāraṇatāṃ svayam |
evaṃ na jāyate kiñcijjagajjātaṃ ca lakṣyate || 15 ||
[Analyze grammar]

svapnasaṅkalpapuravadasatsadanubhūyate |
brahmākāśaḥ parākāśo jīvākāśatvamātmani || 16 ||
[Analyze grammar]

iti vettyavadātātmā pṛthvyādīnāmasambhavāt |
ityeṣa jīvaḥ kathito vyomni khātmā yathoditaḥ || 17 ||
[Analyze grammar]

jīvākāśastvimaṃ dehaṃ yathā vindati tacchṛṇu |
jīvākāśaḥ khamevāsau tasmiṃstu paramāmbare || 18 ||
[Analyze grammar]

atra tejaḥkaṇo'smīti svayaṃ cetati cintayā |
tamevocchūnamiva sadbhāvayatyātmanāmbare || 19 ||
[Analyze grammar]

asadeva sadākāraṃ saṅkalpenduryathā śaśam |
tameva bhāvayandraṣṭṛdṛśyarūpatayā sthitaḥ |
eka eva dvitāmeti svapne svamṛtiboddhṛvat || 20 ||
[Analyze grammar]

kiñcitsthaulyamivādatte tatastārakatāṃ vidan |
yathābhāvitvamatrārthabhāvitāccitsvarūpataḥ || 21 ||
[Analyze grammar]

kha eva khātmā satato'pyayaṃ so'hamiti svayam |
cittvātpratyayamādatte svapne tvamiva pānthatām || 22 ||
[Analyze grammar]

tārakākāramākāraṃ bhāvidehābhidhaṃ tataḥ |
bhāvayanyāti tadbhāvaṃ cittaṃ cetyārthatāmiva || 23 ||
[Analyze grammar]

parityajyeva tadbāhyaṃ tatastārakakoṭare |
antarbhāti bahisstho'pi parvato makure yathā || 24 ||
[Analyze grammar]

kūpasaṃsthaṃ yathā dehaṃ samudgakagataṃ ca vā |
svapnasaṅkalpayoḥ saṃvidvettyevaṃ jīvako'ṇuke || 25 ||
[Analyze grammar]

kharūpatārakāntasstho jīvo yaccetati svayam |
tadetadbuddhicittādi jñānasantānarūpakam || 26 ||
[Analyze grammar]

jīvākāśastatastatra tārakākāśakośagaḥ |
prekṣe'hamiti bhāvena draṣṭuṃ prasaratīva khe || 27 ||
[Analyze grammar]

tato randhradvayeneva bhāvibāhyābhidhaṃ punaḥ |
yena paśyati tannetrayugmaṃ nāmnā bhaviṣyati || 28 ||
[Analyze grammar]

yena spṛśati sāsya tvag yacchṛṇoti śrutistu sā |
yena jighrati tadghrāṇaṃ sa svamātmani paśyati || 29 ||
[Analyze grammar]

tattasya svadanaṃ paścād rasanāmnollasiṣyati |
yatspandati sa tadvāyuceṣṭāḥ karmendriyavrajam || 30 ||
[Analyze grammar]

rūpālokamanaskārajātamityeva bhāvayan |
ātivāhikadehātmā tiṣṭhatyambaramambare || 31 ||
[Analyze grammar]

evamucchūnatāṃ tasminbhāvayaṃstejasaḥ kaṇe |
asatyaṃ satyasaṅkāśaṃ brahmāste jīvaśabdadhṛt || 32 ||
[Analyze grammar]

itthaṃ sa jīvaśabdārthakalanākulatāṃ gataḥ |
ātivāhikadehātmā cittadehāmbarākṛtiḥ || 33 ||
[Analyze grammar]

svakalpanāta ākāramaṇḍasaṃsthaṃ prapaśyati |
kaścijjalagataṃ vetti kaścitsamrāṭsvarūpiṇam || 34 ||
[Analyze grammar]

bhāvibrahmāṇḍakalanaṃ paśyatyanubhavatyapi |
ātmagarbhagṛhaṃ cittād yathā saṅkalpitātmakaḥ || 35 ||
[Analyze grammar]

deśakālakriyādravyakalanāvedanaṃ sa tat |
bhāvayañchabdanirmātā śabdairbadhnāti kalpitaiḥ || 36 ||
[Analyze grammar]

ātivāhikadeho'sāvityasatye jagadbhrame |
asatya eva kacati svapneṣūḍḍayanaṃ yathā || 37 ||
[Analyze grammar]

ityanudbhūta evāsau svayambhūḥ svayamutthitaḥ |
ātivāhikadehātmā prabhurādyaḥ prajāpatiḥ || 38 ||
[Analyze grammar]

etasminnapi sampanne brahmāṇḍākāriṇi bhrame |
na kiñcidapi sampannaṃ na ca jātaṃ na dṛśyate || 39 ||
[Analyze grammar]

tadbrahmākāśamākāśameva sthitamaśaṅkitam |
saṅkalpanagarākārametatsadapi naiva sat || 40 ||
[Analyze grammar]

anirmitamanaṅgaṃ ca etad khe citramutthitam |
akṛtaṃ cānubhūtaṃ ca na satyaṃ satyavatsthitam || 41 ||
[Analyze grammar]

mahākalpe vimuktatvādbrahmādīnāmasaṃśayam |
smṛtirna prāktanī kācitkāraṇaṃ sā svayambhuvaḥ || 42 ||
[Analyze grammar]

tena yādṛksvayambhūḥ syāttādṛktajjamidaṃ smṛtam |
anādyanubhavastvitthaṃ ya evāvanitādibhiḥ || 43 ||
[Analyze grammar]

svapnānubhūtaṃ pṛthvyādi prabodhe yādṛśaṃ bhavet |
smṛtaṃ sadvyomamātrātma sarvadaivedṛśaṃ jagat || 44 ||
[Analyze grammar]

yatra yatra yathā toye dravatvaṃ nāma vidyate |
tatra tatra tathā nānyaḥ sargo'sti paramātmani || 45 ||
[Analyze grammar]

sṛṣṭirevamiyaṃ prauḍhā sarga evamayaṃ sthitaḥ |
brahmāṇḍaṃ nāma bhātyeva vyomātmaivāpanirmitiḥ || 46 ||
[Analyze grammar]

dṛśyamevamidaṃ śāntaṃ khātma nirbhitti nirbhramam |
nirādhāraṃ nirādheyamadvaitaṃ caikyavarjitam || 47 ||
[Analyze grammar]

jagatsaṃvidi jātāyāmapi jātaṃ na kiñcana |
paramākāśamāśūnyamacchameva vyavasthitam || 48 ||
[Analyze grammar]

sarvasaṃhārakhe tvāsīd yadeva tadavasthitam |
nādheyaṃ tatra nādhāro na ca dṛśyaṃ na draṣṭṛtā || 49 ||
[Analyze grammar]

brahmāṇḍaṃ nāsti na brahmā na ca brahmāṇḍikā kvacit |
na jagannāsti jagatī śāntamevākhilaṃ sthitam || 50 ||
[Analyze grammar]

brahmaiva kacati svacchamitthamātmātmanātmani |
cittvāddravatvātsalilamivāvartatayātmani || 51 ||
[Analyze grammar]

asadevedamābhāti sadivehānubhūyate |
vinaśyatyasadevānte svapne svamaraṇaṃ yathā || 52 ||
[Analyze grammar]

atha vājasvarūpatvātsadevedamanāmayam |
akhaṇḍitamanādyantaṃ jñānamātrāmbarodaram || 53 ||
[Analyze grammar]

ākāśa eva parame prathamaḥ prajeśo nityaṃ svayaṃ kacati śūnyatayā samānaḥ |
sa hyātivāhikavapurna tu bhūtarūpī pṛthvyādi tena na sadasti yadā na jātam || 54 ||
[Analyze grammar]