Chapter 12

paramārthavarṇanaṃ nāma sargaḥ |
dvādaśaḥ sargaḥ |
vasiṣṭhaḥ |
etasmātparamācchāntātpadātparamapāvanāt |
yathedamutthitaṃ viśvaṃ tacchṛṇūttamayā dhiyā || 1 ||
[Analyze grammar]

suṣuptaṃ svapnavadbhāti bhāti brahmaiva sargavat |
sarvamekaṃ ca tacchāntaṃ tatra tāvatkramaṃ śṛṇu || 2 ||
[Analyze grammar]

tasyānantaprakāśātmarūpasyātatacinmaṇeḥ |
sattāmātrātma kacanaṃ yadajasraṃ svabhāvataḥ || 3 ||
[Analyze grammar]

tadātmani svayaṃ kiñciccetyatāmiva gacchati |
agṛhītārthakaṃ saṃvidīhāmarśanasūcakam || 4 ||
[Analyze grammar]

bhāvināmārthakalanaiḥ kiñcidūhitarūpakam |
ākāśādaṇu śuddhaṃ ca sarvasminbhāvibodhanam || 5 ||
[Analyze grammar]

tataḥ sā paramā sattā satītaścetanonmukhī |
cinnāmayogyā bhavati kiñcillabhyatayā tayā || 6 ||
[Analyze grammar]

ghanasaṃvedanātpaścādbhāvijīvādināmikā |
sā bhavatyātmakalanā yadā yāntī parātpadāt || 7 ||
[Analyze grammar]

svataikabhāvanāmātrasārā saṃsaraṇonmukhī |
tadā vastusvabhāvena tanvastiṣṭhanti tāmimāḥ || 8 ||
[Analyze grammar]

samanantarametasyāḥ khasattodeti śūnyatā |
śabdādiguṇabījaṃ sā bhaviṣyadabhidhārthadā || 9 ||
[Analyze grammar]

ahantodeti tadanu saha vai kālasattayā |
bhaviṣyadabhidhārthe te bījaṃ mukhyaṃ jagatsthiteḥ || 10 ||
[Analyze grammar]

tasyāśśakteḥ parāyāstu svasaṃvedanamātrakam |
etajjālamasadrūpaṃ sadivodeti visphurat || 11 ||
[Analyze grammar]

evamprāyātmikā sā cidbījaṃ saṅkalpaśākhinaḥ |
tatrāpyahaṅkārakaraḥ sa tatspandatayā marut || 12 ||
[Analyze grammar]

cidahantāvatī vyomaśabdatanmātrabhāvanāt |
svato ghanībhūya śanaiḥ khatanmātraṃ bhavatyalam || 13 ||
[Analyze grammar]

bhāvināmārtharūpaṃ tadbījaṃ śabdaughaśākhinaḥ |
padavākyapramāṇāḍhyavedavṛndavikāri tat || 14 ||
[Analyze grammar]

tasmādudeṣyatyakhilā jagacchrīśśabdarūpiṇaḥ |
śabdaughanirmitārthaughapariṇāmavisāriṇī || 15 ||
[Analyze grammar]

cidevamparivārā sā jīvaśabdena kathyate |
bhāviśabdārthajālena bījaṃ bhūtaughaśākhinaḥ || 16 ||
[Analyze grammar]

caturdaśavidhaṃ bhūtajātamāvalitāmbaram |
jagajjaṭharayantraughaṃ prasariṣyati vai tataḥ || 17 ||
[Analyze grammar]

asamprāptābhidhāsārā cijjīvatvātsphuradvapuḥ |
yā saiva sparśatanmātraṃ bhāvanādbhavati kṣaṇāt || 18 ||
[Analyze grammar]

pavanaskandhavistāraṃ bījaṃ sparśaikaśākhinaḥ |
sarvabhūtakriyāspandastasmātsamprasariṣyati || 19 ||
[Analyze grammar]

tatra yaścidvilāsena prakāśo'nubhavādbhavet |
tejastanmātrakaṃ tattadbhaviṣyadabhidhārthadam || 20 ||
[Analyze grammar]

tatsūryādivijṛmbhābhirbījamālokaśākhinaḥ |
tasmād rūpavibhedena saṃsāraḥ prasariṣyati || 21 ||
[Analyze grammar]

bhavaccaturṇāmavatastataḥ sata ivāsataḥ |
svadanaṃ tasya saṅghasya rasatanmātramucyate || 22 ||
[Analyze grammar]

bhāvivārivilāsātma tadbījaṃ rasaśākhinaḥ |
anyo'nyāsvadanenāsmātsaṃsāraḥ prasariṣyati || 23 ||
[Analyze grammar]

bhaviṣyadgandhasaṅkalpanāmāsau kalanātmakā |
saṅkalpātmā sasaugandhatanmātratvaṃ prayacchati || 24 ||
[Analyze grammar]

bhāvibhūgolakatvena bījamākṛtiśākhinaḥ |
sarvādhārātmanastasmātsaṃsāraḥ prasariṣyati || 25 ||
[Analyze grammar]

citā vibhāvyamānāni tanmātrāṇi parasparam |
svayaṃ pariṇatānyantarambunīva nirantaram || 26 ||
[Analyze grammar]

tathaitāni vimiśrāṇi viviktāni punaryathā |
na śuddhānyupalabhyante sarvanāśāntameva hi || 27 ||
[Analyze grammar]

saṃvittimātrarūpāṇi sthitāni gaganodare |
bhavanti vaṭajālāni yathā bījakaṇāntare || 28 ||
[Analyze grammar]

prasavaṃ paripaśyanti śataśākhaṃ sphuranti ca |
paramāṇvantare mānti kṣaṇātkalpībhavanti ca || 29 ||
[Analyze grammar]

vivartameva dhāvanti nirvivartāni santi ca |
cidveditāni sarvāṇi kṣaṇātpiṇḍībhavanti hi || 30 ||
[Analyze grammar]

tanmātragaṇametatsā svasaṅkalpātmakaṃ citiḥ |
vedanāvasare'ṇvaughamanākāraiva paśyati || 31 ||
[Analyze grammar]

bījaṃ jagatsu nanu pañcakamātramasya bījaṃ parā vyavahitā citiśaktirādyā |
tajjaṃ tadeva bhavatīti sadānubhūtaṃ cinmātramekamajamādyamato jagacchrīḥ || 32 ||
[Analyze grammar]