Chapter 16

saṃjaya uvāca |
te sene śibiraṃ gatvā nyaviśetāṃ viśāṃ pate |
yathābhāgaṃ yathānyāyaṃ yathāgulmaṃ ca sarvaśaḥ || 1 ||
[Analyze grammar]

kṛtvāvahāraṃ sainyānāṃ droṇaḥ paramadurmanāḥ |
duryodhanamabhiprekṣya savrīḍamidamabravīt || 2 ||
[Analyze grammar]

uktametanmayā pūrvaṃ na tiṣṭhati dhanaṃjaye |
śakyo grahītuṃ saṃgrāme devairapi yudhiṣṭhiraḥ || 3 ||
[Analyze grammar]

iti tadvaḥ prayatatāṃ kṛtaṃ pārthena saṃyuge |
mātiśaṅkīrvaco mahyamajeyau kṛṣṇapāṇḍavau || 4 ||
[Analyze grammar]

apanīte tu yogena kenacicchvetavāhane |
tata eṣyati te rājanvaśamadya yudhiṣṭhiraḥ || 5 ||
[Analyze grammar]

kaścidāhvayatāṃ saṃkhye deśamanyaṃ prakarṣatu |
tamajitvā tu kaunteyo na nivartetkathaṃcana || 6 ||
[Analyze grammar]

etasminnantare śūnye dharmarājamahaṃ nṛpa |
grahīṣyāmi camūṃ bhittvā dhṛṣṭadyumnasya paśyataḥ || 7 ||
[Analyze grammar]

arjunena vihīnastu yadi notsṛjate raṇam |
māmupāyāntamālokya gṛhītamiti viddhi tam || 8 ||
[Analyze grammar]

evaṃ te sahasā rājandharmaputraṃ yudhiṣṭhiram |
samāneṣyāmi sagaṇaṃ vaśamadya na saṃśayaḥ || 9 ||
[Analyze grammar]

yadi tiṣṭhati saṃgrāme muhūrtamapi pāṇḍavaḥ |
athāpayāti saṃgrāmādvijayāttadviśiṣyate || 10 ||
[Analyze grammar]

droṇasya tu vacaḥ śrutvā trigartādhipatistataḥ |
bhrātṛbhiḥ sahito rājannidaṃ vacanamabravīt || 11 ||
[Analyze grammar]

vayaṃ vinikṛtā rājansadā gāṇḍīvadhanvanā |
anāgaḥsvapi cāgaskṛdasmāsu bharatarṣabha || 12 ||
[Analyze grammar]

te vayaṃ smaramāṇāstānvinikārānpṛthagvidhān |
krodhāgninā dahyamānā na śemahi sadā niśāḥ || 13 ||
[Analyze grammar]

sa no divyāstrasaṃpannaścakṣurviṣayamāgataḥ |
kartāraḥ sma vayaṃ sarvaṃ yaccikīrṣāma hṛdgatam || 14 ||
[Analyze grammar]

bhavataśca priyaṃ yatsyādasmākaṃ ca yaśaskaram |
vayamenaṃ haniṣyāmo nikṛṣyāyodhanādbahiḥ || 15 ||
[Analyze grammar]

adyāstvanarjunā bhūmiratrigartātha vā punaḥ |
satyaṃ te pratijānīmo naitanmithyā bhaviṣyati || 16 ||
[Analyze grammar]

evaṃ satyarathaścoktvā satyadharmā ca bhārata |
satyavarmā ca satyeṣuḥ satyakarmā tathaiva ca || 17 ||
[Analyze grammar]

sahitā bhrātaraḥ pañca rathānāmayutena ca |
nyavartanta mahārāja kṛtvā śapathamāhave || 18 ||
[Analyze grammar]

mālavāstuṇḍikerāśca rathānāmayutaistribhiḥ |
suśarmā ca naravyāghrastrigartaḥ prasthalādhipaḥ || 19 ||
[Analyze grammar]

mācellakairlalitthaiśca sahito madrakairapi |
rathānāmayutenaiva so'śapadbhrātṛbhiḥ saha || 20 ||
[Analyze grammar]

nānājanapadebhyaśca rathānāmayutaṃ punaḥ |
samutthitaṃ viśiṣṭānāṃ saṃśapārthamupāgatam || 21 ||
[Analyze grammar]

tato jvalanamādāya hutvā sarve pṛthakpṛthak |
jagṛhuḥ kuśacīrāṇi citrāṇi kavacāni ca || 22 ||
[Analyze grammar]

te ca baddhatanutrāṇā ghṛtāktāḥ kuśacīriṇaḥ |
maurvīmekhalino vīrāḥ sahasraśatadakṣiṇāḥ || 23 ||
[Analyze grammar]

yajvānaḥ putriṇo lokyāḥ kṛtakṛtyāstanutyajaḥ |
yokṣyamāṇāstadātmānaṃ yaśasā vijayena ca || 24 ||
[Analyze grammar]

brahmacaryaśrutimukhaiḥ kratubhiścāptadakṣiṇaiḥ |
prāpya lokānsuyuddhena kṣiprameva yiyāsavaḥ || 25 ||
[Analyze grammar]

brāhmaṇāṃstarpayitvā ca niṣkāndattvā pṛthakpṛthak |
gāśca vāsāṃsi ca punaḥ samābhāṣya parasparam || 26 ||
[Analyze grammar]

prajvālya kṛṣṇavartmānamupāgamya raṇe vratam |
tasminnagnau tadā cakruḥ pratijñāṃ dṛḍhaniścayāḥ || 27 ||
[Analyze grammar]

śṛṇvatāṃ sarvabhūtānāmuccairvācaḥ sma menire |
dhṛtvā dhanaṃjayavadhe pratijñāṃ cāpi cakrire || 28 ||
[Analyze grammar]

ye vai lokāścānṛtānāṃ ye caiva brahmaghātinām |
pānapasya ca ye lokā gurudāraratasya ca || 29 ||
[Analyze grammar]

brahmasvahāriṇaścaiva rājapiṇḍāpahāriṇaḥ |
śaraṇāgataṃ ca tyajato yācamānaṃ tathā ghnataḥ || 30 ||
[Analyze grammar]

agāradāhināṃ ye ca ye ca gāṃ nighnatāmapi |
apacāriṇāṃ ca ye lokā ye ca brahmadviṣāmapi || 31 ||
[Analyze grammar]

jāyāṃ ca ṛtukāle vai ye mohādabhigacchatām |
śrāddhasaṃgatikānāṃ ca ye cāpyātmāpahāriṇām || 32 ||
[Analyze grammar]

nyāsāpahāriṇāṃ ye ca śrutaṃ nāśayatāṃ ca ye |
kopena yudhyamānānāṃ ye ca nīcānusāriṇām || 33 ||
[Analyze grammar]

nāstikānāṃ ca ye lokā ye'gnihorāpitṛtyajām |
tānāpnuyāmahe lokānye ca pāpakṛtāmapi || 34 ||
[Analyze grammar]

yadyahatvā vayaṃ yuddhe nivartema dhanaṃjayam |
tena cābhyarditāstrāsādbhavema hi parāṅmukhāḥ || 35 ||
[Analyze grammar]

yadi tvasukaraṃ loke karma kuryāma saṃyuge |
iṣṭānpuṇyakṛtāṃ lokānprāpnuyāma na saṃśayaḥ || 36 ||
[Analyze grammar]

evamuktvā tato rājaṃste'bhyavartanta saṃyuge |
āhvayanto'rjunaṃ vīrāḥ pitṛjuṣṭāṃ diśaṃ prati || 37 ||
[Analyze grammar]

āhūtastairnaravyāghraiḥ pārthaḥ parapuraṃjayaḥ |
dharmarājamidaṃ vākyamapadāntaramabravīt || 38 ||
[Analyze grammar]

āhūto na nivarteyamiti me vratamāhitam |
saṃśaptakāśca māṃ rājannāhvayanti punaḥ punaḥ || 39 ||
[Analyze grammar]

eṣa ca bhrātṛbhiḥ sārdhaṃ suśarmāhvayate raṇe |
vadhāya sagaṇasyāsya māmanujñātumarhasi || 40 ||
[Analyze grammar]

naitacchaknomi saṃsoḍhumāhvānaṃ puruṣarṣabha |
satyaṃ te pratijānāmi hatānviddhi parānyudhi || 41 ||
[Analyze grammar]

yudhiṣṭhira uvāca |
śrutametattvayā tāta yaddroṇasya cikīrṣitam |
yathā tadanṛtaṃ tasya bhavettadvatsamācara || 42 ||
[Analyze grammar]

droṇo hi balavāñśūraḥ kṛtāstraśca jitaśramaḥ |
pratijñātaṃ ca tenaitadgrahaṇaṃ me mahāratha || 43 ||
[Analyze grammar]

arjuna uvāca |
ayaṃ vai satyajidrājannadya te rakṣitā yudhi |
dhriyamāṇe hi pāñcālye nācāryaḥ kāmamāpsyati || 44 ||
[Analyze grammar]

hate tu puruṣavyāghre raṇe satyajiti prabho |
sarvairapi sametairvā na sthātavyaṃ kathaṃcana || 45 ||
[Analyze grammar]

saṃjaya uvāca |
anujñātastato rājñā pariṣvaktaśca phalgunaḥ |
premṇā dṛṣṭaśca bahudhā āśiṣā ca prayojitaḥ || 46 ||
[Analyze grammar]

vihāyainaṃ tataḥ pārthastrigartānpratyayādbalī |
kṣudhitaḥ kṣudvighātārthaṃ siṃho mṛgagaṇāniva || 47 ||
[Analyze grammar]

tato dauryodhanaṃ sainyaṃ mudā paramayā yutam |
gate'rjune bhṛśaṃ kruddhaṃ dharmarājasya nigrahe || 48 ||
[Analyze grammar]

tato'nyonyena te sene samājagmaturojasā |
gaṅgāsarayvorvegena prāvṛṣīvolbaṇodake || 49 ||
[Analyze grammar]