Chapter 99

saṃjaya uvāca |
madhyāhne tu mahārāja saṃgrāmaḥ samapadyata |
lokakṣayakaro raudro bhīṣmasya saha somakaiḥ || 1 ||
[Analyze grammar]

gāṅgeyo rathināṃ śreṣṭhaḥ pāṇḍavānāmanīkinīm |
vyadhamanniśitairbāṇaiḥ śataśo'tha sahasraśaḥ || 2 ||
[Analyze grammar]

saṃmamarda ca tatsainyaṃ pitā devavratastava |
dhānyānāmiva lūnānāṃ prakaraṃ gogaṇā iva || 3 ||
[Analyze grammar]

dhṛṣṭadyumnaḥ śikhaṇḍī ca virāṭo drupadastathā |
bhīṣmamāsādya samare śarairjaghnurmahāratham || 4 ||
[Analyze grammar]

dhṛṣṭadyumnaṃ tato viddhvā virāṭaṃ ca tribhiḥ śaraiḥ |
drupadasya ca nārācaṃ preṣayāmāsa bhārata || 5 ||
[Analyze grammar]

tena viddhā maheṣvāsā bhīṣmeṇāmitrakarśinā |
cukrudhuḥ samare rājanpādaspṛṣṭā ivoragāḥ || 6 ||
[Analyze grammar]

śikhaṇḍī taṃ ca vivyādha bharatānāṃ pitāmaham |
strīmayaṃ manasā dhyātvā nāsmai prāharadacyutaḥ || 7 ||
[Analyze grammar]

dhṛṣṭadyumnastu samare krodhādagniriva jvalan |
pitāmahaṃ tribhirbāṇairbāhvorurasi cārpayat || 8 ||
[Analyze grammar]

drupadaḥ pañcaviṃśatyā virāṭo daśabhiḥ śaraiḥ |
śikhaṇḍī pañcaviṃśatyā bhīṣmaṃ vivyādha sāyakaiḥ || 9 ||
[Analyze grammar]

so'tividdho mahārāja bhīṣmaḥ saṃkhye mahātmabhiḥ |
vasante puṣpaśabalo raktāśoka ivābabhau || 10 ||
[Analyze grammar]

tānpratyavidhyadgāṅgeyastribhistribhirajihmagaiḥ |
drupadasya ca bhallena dhanuściccheda māriṣa || 11 ||
[Analyze grammar]

so'nyatkārmukamādāya bhīṣmaṃ vivyādha pañcabhiḥ |
sārathiṃ ca tribhirbāṇaiḥ suśitai raṇamūrdhani || 12 ||
[Analyze grammar]

tato bhīmo mahārāja draupadyāḥ pañca cātmajāḥ |
kekayā bhrātaraḥ pañca sātyakiścaiva sātvataḥ || 13 ||
[Analyze grammar]

abhyadravanta gāṅgeyaṃ yudhiṣṭhirahitepsayā |
rirakṣiṣantaḥ pāñcālyaṃ dhṛṣṭadyumnamukhānraṇe || 14 ||
[Analyze grammar]

tathaiva tāvakāḥ sarve bhīṣmarakṣārthamudyatāḥ |
pratyudyayuḥ pāṇḍusenāṃ sahasainyā narādhipa || 15 ||
[Analyze grammar]

tatrāsītsumahadyuddhaṃ tava teṣāṃ ca saṃkulam |
narāśvarathanāgānāṃ yamarāṣṭravivardhanam || 16 ||
[Analyze grammar]

rathī rathinamāsādya prāhiṇodyamasādanam |
tathetarānsamāsādya naranāgāśvasādinaḥ || 17 ||
[Analyze grammar]

anayanparalokāya śaraiḥ saṃnataparvabhiḥ |
astraiśca vividhairghoraistatra tatra viśāṃ pate || 18 ||
[Analyze grammar]

rathāśca rathibhirhīnā hatasārathayastathā |
vipradrutāśvāḥ samare diśo jagmuḥ samantataḥ || 19 ||
[Analyze grammar]

mardamānā narānrājanhayāṃśca subahūnraṇe |
vātāyamānā dṛśyante gandharvanagaropamāḥ || 20 ||
[Analyze grammar]

rathinaśca rathairhīnā varmiṇastejasā yutāḥ |
kuṇḍaloṣṇīṣiṇaḥ sarve niṣkāṅgadavibhūṣitāḥ || 21 ||
[Analyze grammar]

devaputrasamā rūpe śaurye śakrasamā yudhi |
ṛddhyā vaiśravaṇaṃ cāti nayena ca bṛhaspatim || 22 ||
[Analyze grammar]

sarvalokeśvarāḥ śūrāstatra tatra viśāṃ pate |
vipradrutā vyadṛśyanta prākṛtā iva mānavāḥ || 23 ||
[Analyze grammar]

dantinaśca naraśreṣṭha vihīnā varasādibhiḥ |
mṛdnantaḥ svānyanīkāni saṃpetuḥ sarvaśabdagāḥ || 24 ||
[Analyze grammar]

varmabhiścāmaraiśchatraiḥ patākābhiśca māriṣa |
kakṣyābhiratha tottraiśca ghaṇṭābhistomaraistathā || 25 ||
[Analyze grammar]

viśīrṇairvipradhāvanto dṛśyante sma diśo daśa |
nagameghapratīkāśairjaladodayanisvanaiḥ || 26 ||
[Analyze grammar]

tathaiva dantibhirhīnāngajārohānviśāṃ pate |
pradhāvanto'nvapaśyāma tava teṣāṃ ca saṃkule || 27 ||
[Analyze grammar]

nānādeśasamutthāṃśca turagānhemabhūṣitān |
vātāyamānānadrākṣaṃ śataśo'tha sahasraśaḥ || 28 ||
[Analyze grammar]

aśvārohānhatairaśvairgṛhītāsīnsamantataḥ |
dravamāṇānapaśyāma drāvyamāṇāṃśca saṃyuge || 29 ||
[Analyze grammar]

gajo gajaṃ samāsādya dravamāṇaṃ mahāraṇe |
yayau vimṛdnaṃstarasā padātīnvājinastathā || 30 ||
[Analyze grammar]

tathaiva ca rathānrājansaṃmamarda raṇe gajaḥ |
rathaścaiva samāsādya padātiṃ turagaṃ tathā || 31 ||
[Analyze grammar]

vyamṛdnātsamare rājaṃsturagāṃśca narānraṇe |
evaṃ te bahudhā rājanpramṛdnantaḥ parasparam || 32 ||
[Analyze grammar]

tasminraudre tathā yuddhe vartamāne mahābhaye |
prāvartata nadī ghorā śoṇitāntrataraṅgiṇī || 33 ||
[Analyze grammar]

asthisaṃcayasaṃghāṭā keśaśaivalaśādvalā |
rathahradā śarāvartā hayamīnā durāsadā || 34 ||
[Analyze grammar]

śīrṣopalasamākīrṇā hastigrāhasamākulā |
kavacoṣṇīṣaphenāḍhyā dhanurdvīpāsikacchapā || 35 ||
[Analyze grammar]

patākādhvajavṛkṣāḍhyā martyakūlāpahāriṇī |
kravyādasaṃghasaṃkīrṇā yamarāṣṭravivardhinī || 36 ||
[Analyze grammar]

tāṃ nadīṃ kṣatriyāḥ śūrā hayanāgarathaplavaiḥ |
praterurbahavo rājanbhayaṃ tyaktvā mahāhave || 37 ||
[Analyze grammar]

apovāha raṇe bhīrūnkaśmalenābhisaṃvṛtān |
yathā vaitaraṇī pretānpretarājapuraṃ prati || 38 ||
[Analyze grammar]

prākrośankṣatriyāstatra dṛṣṭvā tadvaiśasaṃ mahat |
duryodhanāparādhena kṣayaṃ gacchanti kauravāḥ || 39 ||
[Analyze grammar]

guṇavatsu kathaṃ dveṣaṃ dhārtarāṣṭro janeśvaraḥ |
kṛtavānpāṇḍuputreṣu pāpātmā lobhamohitaḥ || 40 ||
[Analyze grammar]

evaṃ bahuvidhā vācaḥ śrūyante smātra bhārata |
pāṇḍavastavasaṃyuktāḥ putrāṇāṃ te sudāruṇāḥ || 41 ||
[Analyze grammar]

tā niśamya tadā vācaḥ sarvayodhairudāhṛtāḥ |
āgaskṛtsarvalokasya putro duryodhanastava || 42 ||
[Analyze grammar]

bhīṣmaṃ droṇaṃ kṛpaṃ caiva śalyaṃ covāca bhārata |
yudhyadhvamanahaṃkārāḥ kiṃ ciraṃ kurutheti ca || 43 ||
[Analyze grammar]

tataḥ pravavṛte yuddhaṃ kurūṇāṃ pāṇḍavaiḥ saha |
akṣadyūtakṛtaṃ rājansughoraṃ vaiśasaṃ tadā || 44 ||
[Analyze grammar]

yatpurā na nigṛhṇīṣe vāryamāṇo mahātmabhiḥ |
vaicitravīrya tasyedaṃ phalaṃ paśya tathāvidham || 45 ||
[Analyze grammar]

na hi pāṇḍusutā rājansasainyāḥ sapadānugāḥ |
rakṣanti samare prāṇānkauravā vā viśāṃ pate || 46 ||
[Analyze grammar]

etasmātkāraṇādghoro vartate sma janakṣayaḥ |
daivādvā puruṣavyāghra tava cāpanayānnṛpa || 47 ||
[Analyze grammar]