Chapter 96

saṃjaya uvāca |
abhimanyū rathodāraḥ piśaṅgaisturagottamaiḥ |
abhidudrāva tejasvī duryodhanabalaṃ mahat |
vikirañśaravarṣāṇi vāridhārā ivāmbudaḥ || 1 ||
[Analyze grammar]

na śekuḥ samare kruddhaṃ saubhadramarisūdanam |
śastraughiṇaṃ gāhamānaṃ senāsāgaramakṣayam |
nivārayitumapyājau tvadīyāḥ kurupuṃgavāḥ || 2 ||
[Analyze grammar]

tena muktā raṇe rājañśarāḥ śatrunibarhaṇāḥ |
kṣatriyānanayañśūrānpretarājaniveśanam || 3 ||
[Analyze grammar]

yamadaṇḍopamānghorāñjvalanāśīviṣopamān |
saubhadraḥ samare kruddhaḥ preṣayāmāsa sāyakān || 4 ||
[Analyze grammar]

rathinaṃ ca rathāttūrṇaṃ hayapṛṣṭhācca sādinam |
gajārohāṃśca sagajānpātayāmāsa phālguniḥ || 5 ||
[Analyze grammar]

tasya tatkurvataḥ karma mahatsaṃkhye'dbhutaṃ nṛpāḥ |
pūjayāṃ cakrire hṛṣṭāḥ praśaśaṃsuśca phālgunim || 6 ||
[Analyze grammar]

tānyanīkāni saubhadro drāvayanbahvaśobhata |
tūlarāśimivādhūya mārutaḥ sarvatodiśam || 7 ||
[Analyze grammar]

tena vidrāvyamāṇāni tava sainyāni bhārata |
trātāraṃ nādhyagacchanta paṅke magnā iva dvipāḥ || 8 ||
[Analyze grammar]

vidrāvya sarvasainyāni tāvakāni narottamaḥ |
abhimanyuḥ sthito rājanvidhūmo'gniriva jvalan || 9 ||
[Analyze grammar]

na cainaṃ tāvakāḥ sarve viṣehurarighātinam |
pradīptaṃ pāvakaṃ yadvatpataṃgāḥ kālacoditāḥ || 10 ||
[Analyze grammar]

praharansarvaśatrubhyaḥ pāṇḍavānāṃ mahārathaḥ |
adṛśyata maheṣvāsaḥ savajra iva vajrabhṛt || 11 ||
[Analyze grammar]

hemapṛṣṭhaṃ dhanuścāsya dadṛśe carato diśaḥ |
toyadeṣu yathā rājanbhrājamānāḥ śatahradāḥ || 12 ||
[Analyze grammar]

śarāśca niśitāḥ pītā niścaranti sma saṃyuge |
vanātphulladrumādrājanbhramarāṇāmiva vrajāḥ || 13 ||
[Analyze grammar]

tathaiva caratastasya saubhadrasya mahātmanaḥ |
rathena meghaghoṣeṇa dadṛśurnāntaraṃ janāḥ || 14 ||
[Analyze grammar]

mohayitvā kṛpaṃ droṇaṃ drauṇiṃ ca sa bṛhadbalam |
saindhavaṃ ca maheṣvāsaṃ vyacarallaghu suṣṭhu ca || 15 ||
[Analyze grammar]

maṇḍalīkṛtamevāsya dhanuḥ paśyāma māriṣa |
sūryamaṇḍalasaṃkāśaṃ tapatastava vāhinīm || 16 ||
[Analyze grammar]

taṃ dṛṣṭvā kṣatriyāḥ śūrāḥ pratapantaṃ śarārcibhiḥ |
dviphalgunamimaṃ lokaṃ menire tasya karmabhiḥ || 17 ||
[Analyze grammar]

tenārditā mahārāja bhāratī sā mahācamūḥ |
babhrāma tatra tatraiva yoṣinmadavaśādiva || 18 ||
[Analyze grammar]

drāvayitvā ca tatsainyaṃ kampayitvā mahārathān |
nandayāmāsa suhṛdo mayaṃ jitveva vāsavaḥ || 19 ||
[Analyze grammar]

tena vidrāvyamāṇāni tava sainyāni saṃyuge |
cakrurārtasvaraṃ ghoraṃ parjanyaninadopamam || 20 ||
[Analyze grammar]

taṃ śrutvā ninadaṃ ghoraṃ tava sainyasya māriṣa |
mārutoddhūtavegasya samudrasyeva parvaṇi |
duryodhanastadā rājā ārśyaśṛṅgimabhāṣata || 21 ||
[Analyze grammar]

eṣa kārṣṇirmaheṣvāso dvitīya iva phalgunaḥ |
camūṃ drāvayate krodhādvṛtro devacamūmiva || 22 ||
[Analyze grammar]

tasya nānyaṃ prapaśyāmi saṃyuge bheṣajaṃ mahat |
ṛte tvāṃ rākṣasaśreṣṭha sarvavidyāsu pāragam || 23 ||
[Analyze grammar]

sa gatvā tvaritaṃ vīraṃ jahi saubhadramāhave |
vayaṃ pārthānhaniṣyāmo bhīṣmadroṇapuraḥsarāḥ || 24 ||
[Analyze grammar]

sa evamukto balavānrākṣasendraḥ pratāpavān |
prayayau samare tūrṇaṃ tava putrasya śāsanāt |
nardamāno mahānādaṃ prāvṛṣīva balāhakaḥ || 25 ||
[Analyze grammar]

tasya śabdena mahatā pāṇḍavānāṃ mahadbalam |
prācalatsarvato rājanpūryamāṇa ivārṇavaḥ || 26 ||
[Analyze grammar]

bahavaśca narā rājaṃstasya nādena bhīṣitāḥ |
priyānprāṇānparityajya nipeturdharaṇītale || 27 ||
[Analyze grammar]

kārṣṇiścāpi mudā yuktaḥ pragṛhītaśarāsanaḥ |
nṛtyanniva rathopasthe tadrakṣaḥ samupādravat || 28 ||
[Analyze grammar]

tataḥ sa rākṣasaḥ kruddhaḥ saṃprāpyaivārjuniṃ raṇe |
nātidūre sthitastasya drāvayāmāsa vai camūm || 29 ||
[Analyze grammar]

sā vadhyamānā samare pāṇḍavānāṃ mahācamūḥ |
pratyudyayau raṇe rakṣo devasenā yathā balim || 30 ||
[Analyze grammar]

vimardaḥ sumahānāsīttasya sainyasya māriṣa |
rakṣasā ghorarūpeṇa vadhyamānasya saṃyuge || 31 ||
[Analyze grammar]

tataḥ śarasahasraistāṃ pāṇḍavānāṃ mahācamūm |
vyadrāvayadraṇe rakṣo darśayadvai parākramam || 32 ||
[Analyze grammar]

sā vadhyamānā ca tathā pāṇḍavānāmanīkinī |
rakṣasā ghorarūpeṇa pradudrāva raṇe bhayāt || 33 ||
[Analyze grammar]

tāṃ pramṛdya tataḥ senāṃ padminīṃ vāraṇo yathā |
tato'bhidudrāva raṇe draupadeyānmahābalān || 34 ||
[Analyze grammar]

te tu kruddhā maheṣvāsā draupadeyāḥ prahāriṇaḥ |
rākṣasaṃ dudruvuḥ sarve grahāḥ pañca yathā ravim || 35 ||
[Analyze grammar]

vīryavadbhistatastaistu pīḍito rākṣasottamaḥ |
yathā yugakṣaye ghore candramāḥ pañcabhirgrahaiḥ || 36 ||
[Analyze grammar]

prativindhyastato rakṣo bibheda niśitaiḥ śaraiḥ |
sarvapāraśavaistūrṇamakuṇṭhāgrairmahābalaḥ || 37 ||
[Analyze grammar]

sa tairbhinnatanutrāṇaḥ śuśubhe rākṣasottamaḥ |
marīcibhirivārkasya saṃsyūto jalado mahān || 38 ||
[Analyze grammar]

viṣaktaiḥ sa śaraiścāpi tapanīyaparicchadaiḥ |
ārśyaśṛṅgirbabhau rājandīptaśṛṅga ivācalaḥ || 39 ||
[Analyze grammar]

tataste bhrātaraḥ pañca rākṣasendraṃ mahāhave |
vivyadhurniśitairbāṇaistapanīyavibhūṣitaiḥ || 40 ||
[Analyze grammar]

sa nirbhinnaḥ śarairghorairbhujagaiḥ kopitairiva |
alambuso bhṛśaṃ rājannāgendra iva cukrudhe || 41 ||
[Analyze grammar]

so'tividdho mahārāja muhūrtamatha māriṣa |
praviveśa tamo dīrghaṃ pīḍitastairmahārathaiḥ || 42 ||
[Analyze grammar]

pratilabhya tataḥ saṃjñāṃ krodhena dviguṇīkṛtaḥ |
ciccheda sāyakaisteṣāṃ dhvajāṃścaiva dhanūṃṣi ca || 43 ||
[Analyze grammar]

ekaikaṃ ca tribhirbāṇairājaghāna smayanniva |
alambuso rathopasthe nṛtyanniva mahārathaḥ || 44 ||
[Analyze grammar]

tvaramāṇaśca saṃkruddho hayāṃsteṣāṃ mahātmanām |
jaghāna rākṣasaḥ kruddhaḥ sārathīṃśca mahābalaḥ || 45 ||
[Analyze grammar]

bibheda ca susaṃhṛṣṭaḥ punaścainānsusaṃśitaiḥ |
śarairbahuvidhākāraiḥ śataśo'tha sahasraśaḥ || 46 ||
[Analyze grammar]

virathāṃśca maheṣvāsānkṛtvā tatra sa rākṣasaḥ |
abhidudrāva vegena hantukāmo niśācaraḥ || 47 ||
[Analyze grammar]

tānarditānraṇe tena rākṣasena durātmanā |
dṛṣṭvārjunasutaḥ saṃkhye rākṣasaṃ samupādravat || 48 ||
[Analyze grammar]

tayoḥ samabhavadyuddhaṃ vṛtravāsavayoriva |
dadṛśustāvakāḥ sarve pāṇḍavāśca mahārathāḥ || 49 ||
[Analyze grammar]

tau sametau mahāyuddhe krodhadīptau parasparam |
mahābalau mahārāja krodhasaṃraktalocanau |
parasparamavekṣetāṃ kālānalasamau yudhi || 50 ||
[Analyze grammar]

tayoḥ samāgamo ghoro babhūva kaṭukodayaḥ |
yathā devāsure yuddhe śakraśambarayoriva || 51 ||
[Analyze grammar]