Chapter 44

saṃjaya uvāca |
rājañśatasahasrāṇi tatra tatra tadā tadā |
nirmaryādaṃ prayuddhāni tatte vakṣyāmi bhārata || 1 ||
[Analyze grammar]

na putraḥ pitaraṃ jajñe na pitā putramaurasam |
na bhrātā bhrātaraṃ tatra svasrīyaṃ na ca mātulaḥ || 2 ||
[Analyze grammar]

mātulaṃ na ca svasrīyo na sakhāyaṃ sakhā tathā |
āviṣṭā iva yudhyante pāṇḍavāḥ kurubhiḥ saha || 3 ||
[Analyze grammar]

rathānīkaṃ naravyāghrāḥ kecidabhyapatanrathaiḥ |
abhajyanta yugaireva yugāni bharatarṣabha || 4 ||
[Analyze grammar]

ratheṣāśca ratheṣābhiḥ kūbarā rathakūbaraiḥ |
saṃhatāḥ saṃhataiḥ kecitparasparajighāṃsavaḥ || 5 ||
[Analyze grammar]

na śekuścalituṃ kecitsaṃnipatya rathā rathaiḥ |
prabhinnāstu mahākāyāḥ saṃnipatya gajā gajaiḥ || 6 ||
[Analyze grammar]

bahudhādārayankruddhā viṣāṇairitaretaram |
satomarapatākaiśca vāraṇāḥ paravāraṇaiḥ || 7 ||
[Analyze grammar]

abhisṛtya mahārāja vegavadbhirmahāgajaiḥ |
dantairabhihatāstatra cukruśuḥ paramāturāḥ || 8 ||
[Analyze grammar]

abhinītāśca śikṣābhistottrāṅkuśasamāhatāḥ |
suprabhinnāḥ prabhinnānāṃ saṃmukhābhimukhā yayuḥ || 9 ||
[Analyze grammar]

prabhinnairapi saṃsaktāḥ kecittatra mahāgajāḥ |
krauñcavanninadaṃ muktvā prādravanta tatastataḥ || 10 ||
[Analyze grammar]

samyakpraṇītā nāgāśca prabhinnakaraṭāmukhāḥ |
ṛṣṭitomaranārācairnirviddhā varavāraṇāḥ || 11 ||
[Analyze grammar]

vinedurbhinnamarmāṇo nipetuśca gatāsavaḥ |
prādravanta diśaḥ kecinnadanto bhairavānravān || 12 ||
[Analyze grammar]

gajānāṃ pādarakṣāstu vyūḍhoraskāḥ prahāriṇaḥ |
ṛṣṭibhiśca dhanurbhiśca vimalaiśca paraśvadhaiḥ || 13 ||
[Analyze grammar]

gadābhirmusalaiścaiva bhiṇḍipālaiḥ satomaraiḥ |
āyasaiḥ parighaiścaiva nistriṃśairvimalaiḥ śitaiḥ || 14 ||
[Analyze grammar]

pragṛhītaiḥ susaṃrabdhā dhāvamānāstatastataḥ |
vyadṛśyanta mahārāja parasparajighāṃsavaḥ || 15 ||
[Analyze grammar]

rājamānāśca nistriṃśāḥ saṃsiktā naraśoṇitaiḥ |
pratyadṛśyanta śūrāṇāmanyonyamabhidhāvatām || 16 ||
[Analyze grammar]

avakṣiptāvadhūtānāmasīnāṃ vīrabāhubhiḥ |
saṃjajñe tumulaḥ śabdaḥ patatāṃ paramarmasu || 17 ||
[Analyze grammar]

gadāmusalarugṇānāṃ bhinnānāṃ ca varāsibhiḥ |
dantidantāvabhinnānāṃ mṛditānāṃ ca dantibhiḥ || 18 ||
[Analyze grammar]

tatra tatra naraughāṇāṃ krośatāmitaretaram |
śuśruvurdāruṇā vācaḥ pretānāmiva bhārata || 19 ||
[Analyze grammar]

hayairapi hayārohāścāmarāpīḍadhāribhiḥ |
haṃsairiva mahāvegairanyonyamabhidudruvuḥ || 20 ||
[Analyze grammar]

tairvimuktā mahāprāsā jāmbūnadavibhūṣaṇāḥ |
āśugā vimalāstīkṣṇāḥ saṃpeturbhujagopamāḥ || 21 ||
[Analyze grammar]

aśvairagryajavaiḥ kecidāplutya mahato rathān |
śirāṃsyādadire vīrā rathināmaśvasādinaḥ || 22 ||
[Analyze grammar]

bahūnapi hayārohānbhallaiḥ saṃnataparvabhiḥ |
rathī jaghāna saṃprāpya bāṇagocaramāgatān || 23 ||
[Analyze grammar]

nagameghapratīkāśāścākṣipya turagāngajāḥ |
pādairevāvamṛdnanta mattāḥ kanakabhūṣaṇāḥ || 24 ||
[Analyze grammar]

pāṭyamāneṣu kumbheṣu pārśveṣvapi ca vāraṇāḥ |
prāsairvinihatāḥ kecidvineduḥ paramāturāḥ || 25 ||
[Analyze grammar]

sāśvārohānhayānkecidunmathya varavāraṇāḥ |
sahasā cikṣipustatra saṃkule bhairave sati || 26 ||
[Analyze grammar]

sāśvārohānviṣāṇāgrairutkṣipya turagāndvipāḥ |
rathaughānavamṛdnantaḥ sadhvajānparicakramuḥ || 27 ||
[Analyze grammar]

puṃstvādabhimadatvācca kecidatra mahāgajāḥ |
sāśvārohānhayāñjaghnuḥ karaiḥ sacaraṇaistathā || 28 ||
[Analyze grammar]

kecidākṣipya kariṇaḥ sāśvānapi rathānkaraiḥ |
vikarṣanto diśaḥ sarvāḥ samīyuḥ sarvaśabdagāḥ || 29 ||
[Analyze grammar]

āśugā vimalāstīkṣṇāḥ saṃpeturbhujagopamāḥ |
narāśvakāyānnirbhidya lauhāni kavacāni ca || 30 ||
[Analyze grammar]

nipeturvimalāḥ śaktyo vīrabāhubhirarpitāḥ |
maholkāpratimā ghorāstatra tatra viśāṃ pate || 31 ||
[Analyze grammar]

dvīpicarmāvanaddhaiśca vyāghracarmaśayairapi |
vikośairvimalaiḥ khaḍgairabhijaghnuḥ parānraṇe || 32 ||
[Analyze grammar]

abhiplutamabhikruddhamekapārśvāvadāritam |
vidarśayantaḥ saṃpetuḥ khaḍgacarmaparaśvadhaiḥ || 33 ||
[Analyze grammar]

śaktibhirdāritāḥ kecitsaṃchinnāśca paraśvadhaiḥ |
hastibhirmṛditāḥ kecitkṣuṇṇāścānye turaṃgamaiḥ || 34 ||
[Analyze grammar]

rathaneminikṛttāśca nikṛttā niśitaiḥ śaraiḥ |
vikrośanti narā rājaṃstatra tatra sma bāndhavān || 35 ||
[Analyze grammar]

putrānanye pitṝnanye bhrātṝṃśca saha bāndhavaiḥ |
mātulānbhāgineyāṃśca parānapi ca saṃyuge || 36 ||
[Analyze grammar]

vikīrṇāntrāḥ subahavo bhagnasakthāśca bhārata |
bāhubhiḥ subhujācchinnaiḥ pārśveṣu ca vidāritāḥ |
krandantaḥ samadṛśyanta tṛṣitā jīvitepsavaḥ || 37 ||
[Analyze grammar]

tṛṣṇāparigatāḥ kecidalpasattvā viśāṃ pate |
bhūmau nipatitāḥ saṃkhye jalameva yayācire || 38 ||
[Analyze grammar]

rudhiraughapariklinnāḥ kliśyamānāśca bhārata |
vyanindanbhṛśamātmānaṃ tava putrāṃśca saṃgatān || 39 ||
[Analyze grammar]

apare kṣatriyāḥ śūrāḥ kṛtavairāḥ parasparam |
naiva śastraṃ vimuñcanti naiva krandanti māriṣa |
tarjayanti ca saṃhṛṣṭāstatra tatra parasparam || 40 ||
[Analyze grammar]

nirdaśya daśanaiścāpi krodhātsvadaśanacchadān |
bhrukuṭīkuṭilairvaktraiḥ prekṣante ca parasparam || 41 ||
[Analyze grammar]

apare kliśyamānāstu vraṇārtāḥ śarapīḍitāḥ |
niṣkūjāḥ samapadyanta dṛḍhasattvā mahābalāḥ || 42 ||
[Analyze grammar]

anye tu virathāḥ śūrā rathamanyasya saṃyuge |
prārthayānā nipatitāḥ saṃkṣuṇṇā varavāraṇaiḥ |
aśobhanta mahārāja puṣpitā iva kiṃśukāḥ || 43 ||
[Analyze grammar]

saṃbabhūvuranīkeṣu bahavo bhairavasvanāḥ |
vartamāne mahābhīme tasminvīravarakṣaye || 44 ||
[Analyze grammar]

ahanattu pitā putraṃ putraśca pitaraṃ raṇe |
svasrīyo mātulaṃ cāpi svasrīyaṃ cāpi mātulaḥ || 45 ||
[Analyze grammar]

sakhāyaṃ ca sakhā rājansaṃbandhī bāndhavaṃ tathā |
evaṃ yuyudhire tatra kuravaḥ pāṇḍavaiḥ saha || 46 ||
[Analyze grammar]

vartamāne bhaye tasminnirmaryāde mahāhave |
bhīṣmamāsādya pārthānāṃ vāhinī samakampata || 47 ||
[Analyze grammar]

ketunā pañcatāreṇa tālena bharatarṣabha |
rājatena mahābāhurucchritena mahārathe |
babhau bhīṣmastadā rājaṃścandramā iva meruṇā || 48 ||
[Analyze grammar]