Chapter 45

saṃjaya uvāca |
gatapūrvāhṇabhūyiṣṭhe tasminnahani dāruṇe |
vartamāne mahāraudre mahāvīravarakṣaye || 1 ||
[Analyze grammar]

durmukhaḥ kṛtavarmā ca kṛpaḥ śalyo viviṃśatiḥ |
bhīṣmaṃ jugupurāsādya tava putreṇa coditāḥ || 2 ||
[Analyze grammar]

etairatirathairguptaḥ pañcabhirbharatarṣabha |
pāṇḍavānāmanīkāni vijagāhe mahārathaḥ || 3 ||
[Analyze grammar]

cedikāśikarūṣeṣu pāñcāleṣu ca bhārata |
bhīṣmasya bahudhā tālaścaranketuradṛśyata || 4 ||
[Analyze grammar]

śirāṃsi ca tadā bhīṣmo bāhūṃścāpi sahāyudhān |
nicakarta mahāvegairbhallaiḥ saṃnataparvabhiḥ || 5 ||
[Analyze grammar]

nṛtyato rathamārgeṣu bhīṣmasya bharatarṣabha |
kecidārtasvaraṃ cakrurnāgā marmaṇi tāḍitāḥ || 6 ||
[Analyze grammar]

abhimanyuḥ susaṃkruddhaḥ piśaṅgaisturagottamaiḥ |
saṃyuktaṃ rathamāsthāya prāyādbhīṣmarathaṃ prati || 7 ||
[Analyze grammar]

jāmbūnadavicitreṇa karṇikāreṇa ketunā |
abhyavarṣata bhīṣmaṃ ca tāṃścaiva rathasattamān || 8 ||
[Analyze grammar]

sa tālaketostīkṣṇena ketumāhatya patriṇā |
bhīṣmeṇa yuyudhe vīrastasya cānucaraiḥ saha || 9 ||
[Analyze grammar]

kṛtavarmāṇamekena śalyaṃ pañcabhirāyasaiḥ |
viddhvā navabhirānarchacchitāgraiḥ prapitāmaham || 10 ||
[Analyze grammar]

pūrṇāyatavisṛṣṭena samyakpraṇihitena ca |
dhvajamekena vivyādha jāmbūnadavibhūṣitam || 11 ||
[Analyze grammar]

durmukhasya tu bhallena sarvāvaraṇabhedinā |
jahāra sāratheḥ kāyācchiraḥ saṃnataparvaṇā || 12 ||
[Analyze grammar]

dhanuściccheda bhallena kārtasvaravibhūṣitam |
kṛpasya niśitāgreṇa tāṃśca tīkṣṇamukhaiḥ śaraiḥ || 13 ||
[Analyze grammar]

jaghāna paramakruddho nṛtyanniva mahārathaḥ |
tasya lāghavamudvīkṣya tutuṣurdevatā api || 14 ||
[Analyze grammar]

labdhalakṣyatayā kārṣṇeḥ sarve bhīṣmamukhā rathāḥ |
sattvavantamamanyanta sākṣādiva dhanaṃjayam || 15 ||
[Analyze grammar]

tasya lāghavamārgasthamalātasadṛśaprabham |
diśaḥ paryapataccāpaṃ gāṇḍīvamiva ghoṣavat || 16 ||
[Analyze grammar]

tamāsādya mahāvegairbhīṣmo navabhirāśugaiḥ |
vivyādha samare tūrṇamārjuniṃ paravīrahā || 17 ||
[Analyze grammar]

dhvajaṃ cāsya tribhirbhallaiściccheda paramaujasaḥ |
sārathiṃ ca tribhirbāṇairājaghāna yatavrataḥ || 18 ||
[Analyze grammar]

tathaiva kṛtavarmā ca kṛpaḥ śalyaśca māriṣa |
viddhvā nākampayatkārṣṇiṃ mainākamiva parvatam || 19 ||
[Analyze grammar]

sa taiḥ parivṛtaḥ śūro dhārtarāṣṭrairmahārathaiḥ |
vavarṣa śaravarṣāṇi kārṣṇiḥ pañcarathānprati || 20 ||
[Analyze grammar]

tatasteṣāṃ mahāstrāṇi saṃvārya śaravṛṣṭibhiḥ |
nanāda balavānkārṣṇirbhīṣmāya visṛjañśarān || 21 ||
[Analyze grammar]

tatrāsya sumahadrājanbāhvorbalamadṛśyata |
yatamānasya samare bhīṣmamardayataḥ śaraiḥ || 22 ||
[Analyze grammar]

parākrāntasya tasyaiva bhīṣmo'pi prāhiṇoccharān |
sa tāṃściccheda samare bhīṣmacāpacyutāñśarān || 23 ||
[Analyze grammar]

tato dhvajamamogheṣurbhīṣmasya navabhiḥ śaraiḥ |
ciccheda samare vīrastata uccukruśurjanāḥ || 24 ||
[Analyze grammar]

sa rājato mahāskandhastālo hemavibhūṣitaḥ |
saubhadraviśikhaiśchinnaḥ papāta bhuvi bhārata || 25 ||
[Analyze grammar]

dhvajaṃ saubhadraviśikhaiḥ patitaṃ bharatarṣabha |
dṛṣṭvā bhīmo'nadaddhṛṣṭaḥ saubhadramabhiharṣayan || 26 ||
[Analyze grammar]

atha bhīṣmo mahāstrāṇi divyāni ca bahūni ca |
prāduścakre mahāraudraḥ kṣaṇe tasminmahābalaḥ || 27 ||
[Analyze grammar]

tataḥ śatasahasreṇa saubhadraṃ prapitāmahaḥ |
avākiradameyātmā śarāṇāṃ nataparvaṇām || 28 ||
[Analyze grammar]

tato daśa maheṣvāsāḥ pāṇḍavānāṃ mahārathāḥ |
rakṣārthamabhyadhāvanta saubhadraṃ tvaritā rathaiḥ || 29 ||
[Analyze grammar]

virāṭaḥ saha putreṇa dhṛṣṭadyumnaśca pārṣataḥ |
bhīmaśca kekayāścaiva sātyakiśca viśāṃ pate || 30 ||
[Analyze grammar]

javenāpatatāṃ teṣāṃ bhīṣmaḥ śāṃtanavo raṇe |
pāñcālyaṃ tribhirānarchatsātyakiṃ niśitaiḥ śaraiḥ || 31 ||
[Analyze grammar]

pūrṇāyatavisṛṣṭena kṣureṇa niśitena ca |
dhvajamekena ciccheda bhīmasenasya patriṇā || 32 ||
[Analyze grammar]

jāmbūnadamayaḥ ketuḥ kesarī narasattama |
papāta bhīmasenasya bhīṣmeṇa mathito rathāt || 33 ||
[Analyze grammar]

bhīmasenastribhirviddhvā bhīṣmaṃ śāṃtanavaṃ raṇe |
kṛpamekena vivyādha kṛtavarmāṇamaṣṭabhiḥ || 34 ||
[Analyze grammar]

pragṛhītāgrahastena vairāṭirapi dantinā |
abhyadravata rājānaṃ madrādhipatimuttaraḥ || 35 ||
[Analyze grammar]

tasya vāraṇarājasya javenāpatato rathī |
śalyo nivārayāmāsa vegamapratimaṃ raṇe || 36 ||
[Analyze grammar]

tasya kruddhaḥ sa nāgendro bṛhataḥ sādhuvāhinaḥ |
padā yugamadhiṣṭhāya jaghāna caturo hayān || 37 ||
[Analyze grammar]

sa hatāśve rathe tiṣṭhanmadrādhipatirāyasīm |
uttarāntakarīṃ śaktiṃ cikṣepa bhujagopamām || 38 ||
[Analyze grammar]

tayā bhinnatanutrāṇaḥ praviśya vipulaṃ tamaḥ |
sa papāta gajaskandhātpramuktāṅkuśatomaraḥ || 39 ||
[Analyze grammar]

samādāya ca śalyo'simavaplutya rathottamāt |
vāraṇendrasya vikramya cicchedātha mahākaram || 40 ||
[Analyze grammar]

bhinnamarmā śaravrātaiśchinnahastaḥ sa vāraṇaḥ |
bhīmamārtasvaraṃ kṛtvā papāta ca mamāra ca || 41 ||
[Analyze grammar]

etadīdṛśakaṃ kṛtvā madrarājo mahārathaḥ |
āruroha rathaṃ tūrṇaṃ bhāsvaraṃ kṛtavarmaṇaḥ || 42 ||
[Analyze grammar]

uttaraṃ nihataṃ dṛṣṭvā vairāṭirbhrātaraṃ śubham |
kṛtavarmaṇā ca sahitaṃ dṛṣṭvā śalyamavasthitam |
śaṅkhaḥ krodhātprajajvāla haviṣā havyavāḍiva || 43 ||
[Analyze grammar]

sa visphārya mahaccāpaṃ kārtasvaravibhūṣitam |
abhyadhāvajjighāṃsanvai śalyaṃ madrādhipaṃ balī || 44 ||
[Analyze grammar]

mahatā rathavaṃśena samantātparivāritaḥ |
sṛjanbāṇamayaṃ varṣaṃ prāyācchalyarathaṃ prati || 45 ||
[Analyze grammar]

tamāpatantaṃ saṃprekṣya mattavāraṇavikramam |
tāvakānāṃ rathāḥ sapta samantātparyavārayan |
madrarājaṃ parīpsanto mṛtyordaṃṣṭrāntaraṃ gatam || 46 ||
[Analyze grammar]

tato bhīṣmo mahābāhurvinadya jalado yathā |
tālamātraṃ dhanurgṛhya śaṅkhamabhyadravadraṇe || 47 ||
[Analyze grammar]

tamudyatamudīkṣyātha maheṣvāsaṃ mahābalam |
saṃtrastā pāṇḍavī senā vātavegahateva nauḥ || 48 ||
[Analyze grammar]

tatrārjunaḥ saṃtvaritaḥ śaṅkhasyāsītpuraḥsaraḥ |
bhīṣmādrakṣyo'yamadyeti tato yuddhamavartata || 49 ||
[Analyze grammar]

hāhākāro mahānāsīdyodhānāṃ yudhi yudhyatām |
tejastejasi saṃpṛktamityevaṃ vismayaṃ yayuḥ || 50 ||
[Analyze grammar]

atha śalyo gadāpāṇiravatīrya mahārathāt |
śaṅkhasya caturo vāhānahanadbharatarṣabha || 51 ||
[Analyze grammar]

sa hatāśvādrathāttūrṇaṃ khaḍgamādāya vidrutaḥ |
bībhatsoḥ syandanaṃ prāpya tataḥ śāntimavindata || 52 ||
[Analyze grammar]

tato bhīṣmarathāttūrṇamutpatanti patatriṇaḥ |
yairantarikṣaṃ bhūmiśca sarvataḥ samavastṛtam || 53 ||
[Analyze grammar]

pāñcālānatha matsyāṃśca kekayāṃśca prabhadrakān |
bhīṣmaḥ praharatāṃ śreṣṭhaḥ pātayāmāsa mārgaṇaiḥ || 54 ||
[Analyze grammar]

utsṛjya samare tūrṇaṃ pāṇḍavaṃ savyasācinam |
abhyadravata pāñcālyaṃ drupadaṃ senayā vṛtam |
priyaṃ saṃbandhinaṃ rājañśarānavakiranbahūn || 55 ||
[Analyze grammar]

agnineva pradagdhāni vanāni śiśirātyaye |
śaradagdhānyadṛśyanta sainyāni drupadasya ha |
atiṣṭhata raṇe bhīṣmo vidhūma iva pāvakaḥ || 56 ||
[Analyze grammar]

madhyaṃdine yathādityaṃ tapantamiva tejasā |
na śekuḥ pāṇḍaveyasya yodhā bhīṣmaṃ nirīkṣitum || 57 ||
[Analyze grammar]

vīkṣāṃ cakruḥ samantātte pāṇḍavā bhayapīḍitāḥ |
trātāraṃ nādhyagacchanta gāvaḥ śītārditā iva || 58 ||
[Analyze grammar]

hatavipradrute sainye nirutsāhe vimardite |
hāhākāro mahānāsītpāṇḍusainyeṣu bhārata || 59 ||
[Analyze grammar]

tato bhīṣmaḥ śāṃtanavo nityaṃ maṇḍalakārmukaḥ |
mumoca bāṇāndīptāgrānahīnāśīviṣāniva || 60 ||
[Analyze grammar]

śarairekāyanīkurvandiśaḥ sarvā yatavrataḥ |
jaghāna pāṇḍavarathānādiśyādiśya bhārata || 61 ||
[Analyze grammar]

tataḥ sainyeṣu bhagneṣu mathiteṣu ca sarvaśaḥ |
prāpte cāstaṃ dinakare na prājñāyata kiṃcana || 62 ||
[Analyze grammar]

bhīṣmaṃ ca samudīryantaṃ dṛṣṭvā pārthā mahāhave |
avahāramakurvanta sainyānāṃ bharatarṣabha || 63 ||
[Analyze grammar]