Chapter 296

yudhiṣṭhira uvāca |
nāpadāmasti maryādā na nimittaṃ na kāraṇam |
dharmastu vibhajatyatra ubhayoḥ puṇyapāpayoḥ || 1 ||
[Analyze grammar]

bhīma uvāca |
prātikāmyanayatkṛṣṇāṃ sabhāyāṃ preṣyavattadā |
na mayā nihatastatra tena prāptāḥ sma saṃśayam || 2 ||
[Analyze grammar]

arjuna uvāca |
vācastīkṣṇāsthibhedinyaḥ sūtaputreṇa bhāṣitāḥ |
atitīkṣṇā mayā kṣāntāstena prāptāḥ sma saṃśayam || 3 ||
[Analyze grammar]

sahadeva uvāca |
śakunistvāṃ yadājaiṣīdakṣadyūtena bhārata |
sa mayā na hatastatra tena prāptāḥ sma saṃśayam || 4 ||
[Analyze grammar]

vaiśaṃpāyana uvāca |
tato yudhiṣṭhiro rājā nakulaṃ vākyamabravīt |
āruhya vṛkṣaṃ mādreya nirīkṣasva diśo daśa || 5 ||
[Analyze grammar]

pānīyamantike paśya vṛkṣānvāpyudakāśrayān |
ime hi bhrātaraḥ śrāntāstava tāta pipāsitāḥ || 6 ||
[Analyze grammar]

nakulastu tathetyuktvā śīghramāruhya pādapam |
abravīdbhrātaraṃ jyeṣṭhamabhivīkṣya samantataḥ || 7 ||
[Analyze grammar]

paśyāmi bahulānrājanvṛkṣānudakasaṃśrayān |
sārasānāṃ ca nirhrādamatrodakamasaṃśayam || 8 ||
[Analyze grammar]

tato'bravītsatyadhṛtiḥ kuntīputro yudhiṣṭhiraḥ |
gaccha saumya tataḥ śīghraṃ tūrṇaṃ pānīyamānaya || 9 ||
[Analyze grammar]

nakulastu tathetyuktvā bhrāturjyeṣṭhasya śāsanāt |
prādravadyatra pānīyaṃ śīghraṃ caivānvapadyata || 10 ||
[Analyze grammar]

sa dṛṣṭvā vimalaṃ toyaṃ sārasaiḥ parivāritam |
pātukāmastato vācamantarikṣātsa śuśruve || 11 ||
[Analyze grammar]

mā tāta sāhasaṃ kārṣīrmama pūrvaparigrahaḥ |
praśnānuktvā tu mādreya tataḥ piba harasva ca || 12 ||
[Analyze grammar]

anādṛtya tu tadvākyaṃ nakulaḥ supipāsitaḥ |
apibacchītalaṃ toyaṃ pītvā ca nipapāta ha || 13 ||
[Analyze grammar]

cirāyamāṇe nakule kuntīputro yudhiṣṭhiraḥ |
abravīdbhrātaraṃ vīraṃ sahadevamariṃdamam || 14 ||
[Analyze grammar]

bhrātā cirāyate tāta sahadeva tavāgrajaḥ |
taṃ caivānaya sodaryaṃ pānīyaṃ ca tvamānaya || 15 ||
[Analyze grammar]

sahadevastathetyuktvā tāṃ diśaṃ pratyapadyata |
dadarśa ca hataṃ bhūmau bhrātaraṃ nakulaṃ tadā || 16 ||
[Analyze grammar]

bhrātṛśokābhisaṃtaptastṛṣayā ca prapīḍitaḥ |
abhidudrāva pānīyaṃ tato vāgabhyabhāṣata || 17 ||
[Analyze grammar]

mā tāta sāhasaṃ kārṣīrmama pūrvaparigrahaḥ |
praśnānuktvā yathākāmaṃ tataḥ piba harasva ca || 18 ||
[Analyze grammar]

anādṛtya tu tadvākyaṃ sahadevaḥ pipāsitaḥ |
apibacchītalaṃ toyaṃ pītvā ca nipapāta ha || 19 ||
[Analyze grammar]

athābravītsa vijayaṃ kuntīputro yudhiṣṭhiraḥ |
bhrātarau te ciragatau bībhatso śatrukarśana |
tau caivānaya bhadraṃ te pānīyaṃ ca tvamānaya || 20 ||
[Analyze grammar]

evamukto guḍākeśaḥ pragṛhya saśaraṃ dhanuḥ |
āmuktakhaḍgo medhāvī tatsaraḥ pratyapadyata || 21 ||
[Analyze grammar]

yataḥ puruṣaśārdūlau pānīyaharaṇe gatau |
tau dadarśa hatau tatra bhrātarau śvetavāhanaḥ || 22 ||
[Analyze grammar]

prasuptāviva tau dṛṣṭvā narasiṃhaḥ suduḥkhitaḥ |
dhanurudyamya kaunteyo vyalokayata tadvanam || 23 ||
[Analyze grammar]

nāpaśyattatra kiṃcitsa bhūtaṃ tasminmahāvane |
savyasācī tataḥ śrāntaḥ pānīyaṃ so'bhyadhāvata || 24 ||
[Analyze grammar]

abhidhāvaṃstato vācamantarikṣātsa śuśruve |
kimāsīdasi pānīyaṃ naitacchakyaṃ balāttvayā || 25 ||
[Analyze grammar]

kaunteya yadi vai praśnānmayoktānpratipatsyase |
tataḥ pāsyasi pānīyaṃ hariṣyasi ca bhārata || 26 ||
[Analyze grammar]

vāritastvabravītpārtho dṛśyamāno nivāraya |
yāvadbāṇairvinirbhinnaḥ punarnaivaṃ vadiṣyasi || 27 ||
[Analyze grammar]

evamuktvā tataḥ pārthaḥ śarairastrānumantritaiḥ |
vavarṣa tāṃ diśaṃ kṛtsnāṃ śabdavedhaṃ ca darśayan || 28 ||
[Analyze grammar]

karṇinālīkanārācānutsṛjanbharatarṣabha |
anekairiṣusaṃghātairantarikṣaṃ vavarṣa ha || 29 ||
[Analyze grammar]

yakṣa uvāca |
kiṃ vighātena te pārtha praśnānuktvā tataḥ piba |
anuktvā tu tataḥ praśnānpītvaiva na bhaviṣyasi || 30 ||
[Analyze grammar]

vaiśaṃpāyana uvāca |
sa tvamoghāniṣūnmuktvā tṛṣṇayābhiprapīḍitaḥ |
avijñāyaiva tānpraśnānpītvaiva nipapāta ha || 31 ||
[Analyze grammar]

athābravīdbhīmasenaṃ kuntīputro yudhiṣṭhiraḥ |
nakulaḥ sahadevaśca bībhatsuścāparājitaḥ || 32 ||
[Analyze grammar]

ciraṃ gatāstoyahetorna cāgacchanti bhārata |
tāṃścaivānaya bhadraṃ te pānīyaṃ ca tvamānaya || 33 ||
[Analyze grammar]

bhīmasenastathetyuktvā tāṃ diśaṃ pratyapadyata |
yatra te puruṣavyāghrā bhrātaro'sya nipātitāḥ || 34 ||
[Analyze grammar]

tāndṛṣṭvā duḥkhito bhīmastṛṣayā ca prapīḍitaḥ |
amanyata mahābāhuḥ karma tadyakṣarakṣasām |
sa cintayāmāsa tadā yoddhavyaṃ dhruvamadya me || 35 ||
[Analyze grammar]

pāsyāmi tāvatpānīyamiti pārtho vṛkodaraḥ |
tato'bhyadhāvatpānīyaṃ pipāsuḥ puruṣarṣabhaḥ || 36 ||
[Analyze grammar]

yakṣa uvāca |
mā tāta sāhasaṃ kārṣīrmama pūrvaparigrahaḥ |
praśnānuktvā tu kaunteya tataḥ piba harasva ca || 37 ||
[Analyze grammar]

vaiśaṃpāyana uvāca |
evamuktastato bhīmo yakṣeṇāmitatejasā |
avijñāyaiva tānpraśnānpītvaiva nipapāta ha || 38 ||
[Analyze grammar]

tataḥ kuntīsuto rājā vicintya puruṣarṣabhaḥ |
samutthāya mahābāhurdahyamānena cetasā || 39 ||
[Analyze grammar]

apetajananirghoṣaṃ praviveśa mahāvanam |
rurubhiśca varāhaiśca pakṣibhiśca niṣevitam || 40 ||
[Analyze grammar]

nīlabhāsvaravarṇaiśca pādapairupaśobhitam |
bhramarairupagītaṃ ca pakṣibhiśca mahāyaśāḥ || 41 ||
[Analyze grammar]

sa gacchankānane tasminhemajālapariṣkṛtam |
dadarśa tatsaraḥ śrīmānviśvakarmakṛtaṃ yathā || 42 ||
[Analyze grammar]

upetaṃ nalinījālaiḥ sindhuvāraiśca vetasaiḥ |
ketakaiḥ karavīraiśca pippalaiścaiva saṃvṛtam |
śramārtastadupāgamya saro dṛṣṭvātha vismitaḥ || 43 ||
[Analyze grammar]